Watu wanne walifariki na wengine 21 kujeruhiwa baada ya lori kugonga magari na pikipiki kadhaa mjini Meru Alhamisi jioni.

Kamanda wa Polisi wa Imenti Kaskazini, Bashir Hassan, alisema ajali hiyo ilitokea dakika chache kabla ya saa tatu usiku, breki za lori hilo lililokuwa likielekea Nkubu zilipofeli.

Alisema lori hilo liligonga magari mawili barabarani, kisha likagonga pikipiki mbili na matatu zilizokuwa zimeegeshwa kando ya barabara kabla ya kupinduka.

“Lori lilikuwa likiteremka mlima breki zilipofeli. Wanaume watatu na mwanamke mmoja walifariki papo hapo. Waliojeruhiwa walipelekwa katika Hospitali ya Rufaa na Mafunzo ya Meru,” alisema Bw Hassan.

Mkurugenzi Mkuu wa hospitali hiyo, Bernard Murithi, alisema watu 21 walipelekwa hospitalini. Kati yao, 10 walitibiwa na kuruhusiwa kwenda nyumbani, huku 11 wakilazwa kwa matibabu zaidi. Alisema hali yao ilikuwa shwari.

Mashahidi walisema lori hilo lililokuwa limebeba simiti lilikuwa likiendeshwa kwa kasi kutoka Makutano. Dereva alijaribu kuwaonya watumiaji wa barabara kwa kupiga honi kabla ya kugonga magari na watu waliokuwa kando ya barabara.

Mkazi Frank Mwongera alisema baadhi ya waathiriwa walinaswa chini ya lori hilo.