Habari Mseto

Polisi waokoa mtoto ‘aliyeuzwa’ kwa Sh150, 000

Na HILARY KIMUYU November 19th, 2026 Kusoma ni dakika: 1

POLISI wamefanikiwa kumuokoa msichana wa miaka minne aliyetekwa nyara akicheza na watoto wengine katika uwanja wa wazi karibu na nyumbani kwao Malaa, Kaunti ya Machakos na kudaiwa kuuzwa kwa Sh150,000.

Maafisa pia wamewakamata washukiwa wanne katika operesheni zilizofanyika Utawala, Nairobi na Meru kuhusiana na utekaji huo.

Kwa mujibu wa Idara ya Upelelezi wa Makosa ya Jinai (DCI), mwanamke aliyekuwa amejifunika kichwa kwa hijab alimshawishi mtoto huyo kuandamana naye kwa kisingizio cha kumpeleka dukani kununua sukari na chokoleti.

Mama wa mtoto alipofika kumchukua, watoto wenzake walimweleza kuwa mwanamke huyo alikuwa amemchukua.

Uchunguzi uliwawezesha wapelelezi kumkamata mshukiwa wa kwanza eneo la Tutua, kaunti ya Meru, kabla ya wengine watatu kunaswa Utawala karibu na duka la Quickmart.

Kamanda wa Polisi wa Matungulu Peter Gichohi, alisema mtoto alipatikana akiwa katika hali nzuri na kupelekwa Kituo cha Afya cha Nguluni kufanyiwa uchunguzi kabla ya kuunganishwa na wazazi wake.

Polisi wanachunguza madai kuwa mtoto huyo alikuwa ameuzwa kwa Sh150,000. Magari na pikipiki zinazoshukiwa kutumiwa katika uhalifu huo pia zilikamatwa.