Habari za Kitaifa

Sifuna, washirika wasusia hotuba ya Ruto wakilalamikia ukiukaji wa haki za kimsingi

Na KEVIN CHERUIYOT November 19th, 2026 Kusoma ni dakika: 1

KIONGOZI wa Linda Mwananchi Movement (LMM) Edwin Sifuna na washirika wake katika upinzani walisusia hotuba ya Hali ya Taifa ya Rais William Ruto bungeni, wakipinga visa vya utekaji nyara na vitisho dhidi ya wakosoaji wa serikali.

Badala yake, walizindua rasmi mrengo wa wanawake wa chama hicho, ‘Dada za Sifuna’, katika makao makuu ya chama jijini Nairobi, hafla iliyohudhuriwa na viongozi kadhaa.

Sifuna, ambaye pia ni Seneta wa Nairobi, alisema aliamua kususia kikao hicho kwa sababu kanuni za Bunge zinamtaka Rais asikilizwe kwa utulivu, hata anapotoa madai ambayo upinzani haukubaliani nayo.

“Rais anaenda bungeni kudanganya tena. Kanuni za Bunge zinamtaka Rais asikilizwe kwa utulivu. Baadhi yetu hatuwezi kukaa kimya bila kumwambia kuwa anadanganya,” alisema.

Alisema hotuba hiyo inapaswa kueleza hali halisi ya wananchi, uchumi na usalama nchini, badala ya Rais kujikita katika kutaja miradi ya maendeleo.

Sifuna alirejelea Kifungu cha 132 cha Katiba kinachomtaka Rais kutoa hotuba kwa taifa kila mwaka kuhusu hatua zilizochukuliwa na maendeleo yaliyopatikana katika kutekeleza maadili ya kitaifa inavyofafanuliwa katika Kifungu cha 10.

Alisema maadili hayo yanahusu haki za binadamu, demokrasia, utawala wa sheria, uhuru, ushirikishaji na haki, akidai visa vya utekaji nyara bado vinaripotiwa chini ya utawala wa Rais Ruto.

LMM pia ilieleza wasiwasi kuhusu mashambulizi dhidi ya watu wanaotetea demokrasia, ikiwemo shambulizi la hivi karibuni dhidi ya Amos Boaz Masika, mfanyakazi katika Trans Nzoia.

Chama hicho kilidai viongozi, wafanyakazi na wafuasi wake wamekuwa wakilengwa kwa mashambulizi, vitisho na kukamatwa kiholela, hasa katika kaunti za Trans Nzoia, Bungoma na Kakamega.

Kililaumu serikali kwa kuzorotesha uchumi na kuongeza gharama ya maisha, kikisema vitisho na silaha haviwezi kupunguza bei ya bidhaa wala deni la taifa.