Kauli za Tutam, faya, pawa zatawala wakati wa hotuba ya Ruto Bungeni
BUNGE jana liligeuka jukwaa la kwaya ya kaulimbiu za kisiasa wakati Rais William Ruto akitoa hotuba yake ya nne ya Hali ya Taifa, takriban miezi tisa kabla ya uchaguzi mkuu wa 2027.
Usalama ulikuwa umeimarishwa katika majengo ya Bunge, huku barabara zilizo karibu zikifungwa na maafisa wa usalama kutoka vitengo mbalimbali.
Mbwa maalumu wa kunusa vilipuzi pia walitumwa kukagua eneo hilo, huku watu waliokuwa na vitambulisho maalumu pekee wakiruhusiwa kuingia ndani ya Bunge.
Rais aliwasili saa nane na dakika kumi mchana kupitia Barabara ya Uhuru na kuwasalimu maafisa waliokuwa wameandaa gwaride la heshima kabla ya kuingia katika majengo ya Bunge.
Alipokelewa na Spika wa Bunge la Kitaifa Moses Wetang’ula na mwenzake wa Seneti Amason Kingi.
Baadaye aliingia katika ukumbi wa Bunge saa nane na dakika thelathini na nane mchana, akiongozwa na maafisa waliobeba fimbo za mamlaka za mabunge hayo.