Upinzani waanza kujaribu kupenya ngome za Ruto
UPINZANI umeanza kupeleka kampeni zake katika maeneo yanayochukuliwa kuwa ngome za Rais William Ruto, huku viongozi wake wakijaribu kuunda muungano imara wa kumkabili katika uchaguzi mkuu wa 2027.
Hata hivyo, licha ya kuahidi kuungana na kumuunga mkono mgombea mmoja wa urais ili kuepuka kugawanya kura, viongozi hao bado wanakabiliwa na mvutano kuhusu nani atakayepeperusha tiketi hiyo na nafasi ya vyama vidogo katika muungano unaochipuka.
Mnamo Jumatano, kiongozi wa Wiper Patriotic Front (WPF) Kalonzo Musyoka, alipeleka kampeni zake Eldoret, ambako alimtangaza Dkt Ruto kuwa rais wa muhula mmoja na kusema hana nia ya kujiunga na serikali yake.
Bw Musyoka ambaye ni naibu rais wa zamani, aliwahakikishia wafuasi wake kuwa atasalia katika kambi ya upinzani licha ya kile alichokitaja kuwa juhudi za kumpa majina ya kisiasa na wapinzani wake.
“Amekuwa akiniita Bw 40, na kwa kweli yeye ni mdogo wangu kisiasa. Hilo pekee haliwezi kunifanya niondoke katika upinzani na kujiunga na kambi yake,” alisema Bw Musyoka, ambaye pia anaongoza muungano wa Ukombozi Alliance.
Alisema ni haki ya Wakenya kuamua iwapo watampa Rais Ruto muhula wa pili au watataka kiongozi mwingine mwaka ujao.
Alikosoa hotuba ya Rais kuhusu hali ya taifa, akisema haikushughulikia ipasavyo changamoto zinazowakabili wananchi, zikiwemo gharama ya maisha, ukosefu wa ajira na ukiukaji wa haki za binadamu.
Alisema kupanda kwa bei ya bidhaa muhimu kunaendelea kutatiza maisha ya familia nyingi, huku vijana wakikosa ajira.
Bw Musyoka alitaka serikali kueleza hatua iliyochukua kuwafidia waathiriwa wa maandamano ya kupinga Mswada wa Fedha wa 2024 na kufutilia mbali agizo tata la polisi la kuwapiga waandamanaji risasi miguuni.
Ziara yake Eldoret, eneo linalochukuliwa kuwa ngome ya chama tawala cha UDA, inaashiria azma ya upinzani kupanua ushawishi nje ya maeneo ambako unaungwa mkono kwa wingi.
Alionya dhidi ya vitisho na ghasia za kisiasa, akisema hakuna chama kinachopaswa kuchukulia eneo lolote la nchi kuwa mali yake.
Akitaja ghasia za baada ya uchaguzi wa 2007/2008, Bw Musyoka aliwataka viongozi kuhakikisha ushindani wa kisiasa hauleti machafuko.
Alisema awali aliweza kufanya kampeni katika maeneo yaliyokuwa yakimuunga mkono hasimu wake wa kisiasa, Raila Odinga, kutokana na uvumilivu wa kisiasa uliokuwepo.
Pia alikosoa kauli mbiu ya UDA na ODM ya Usawa ni Sawa, akisema serikali haijaonyesha usawa katika ugawaji wa rasilimali, miradi ya maendeleo na nafasi za kazi serikalini.
Kuhusu uchaguzi, alionya Tume Huru ya Uchaguzi na Mipaka (IEBC) kuhakikisha hakuna udanganyifu au kuvurugwa kwa kura.
Ziara yake ilifuatia mkutano wa viongozi wa upinzani Kitale Jumanne, ambapo kiongozi wa People’s Liberation Party, Martha Karua na aliyekuwa Jaji Mkuu, David Maraga waliungana na Mbunge wa Saboti, Caleb Amisi kuahidi kuunga mkono mgombea mmoja wa urais.
Bi Karua alisema viongozi wa upinzani wamejitolea kupatia Wakenya mgombea mwenye uwezo wa kumshinda Rais Ruto, akiwataka wafuasi kuwa na matumaini.
Hata hivyo, Bw Amisi alitumia mkutano huo kushinikiza chama chake kipya, People’s Renaissance Movement (PM), kijumuishwe katika mazungumzo ya kuunda muungano wa upinzani.
Pia aliwataka Bi Karua na Bw Maraga kuwashawishi viongozi wengine kumzingatia Seneta wa Nairobi Edwin Sifuna kama mgombea wa urais.
Pendekezo hilo lilishangiliwa na baadhi ya wafuasi waliohudhuria mkutano huo karibu na kituo cha mabasi cha Kitale.
Bw Amisi alisema chama chake kinapaswa kupewa nafasi katika meza ya mazungumzo ili kusaidia kuamua muundo wa muungano na mgombea atakayesimamishwa.
Bw Amisi pia aliwakosoa viongozi wa ODM wanaoshirikiana na Rais Ruto na kumhimiza Gavana wa Trans Nzoia George Natembeya kujiunga na chama chake.
Viongozi hao walifanya mikutano katika maeneo ya Soy na Moi’s Bridge kabla ya kuungana na Amisi katika hafla yake ya kuwakaribisha nyumbani.
Kwa sasa, changamoto kubwa kwa upinzani si tu kupanua uungwaji mkono katika ngome za UDA, bali pia kukubaliana kuhusu mgombea mmoja na jinsi ya kugawa nafasi za kisiasa bila kuzua migawanyiko kabla ya uchaguzi wa 2027.
RIPOTI ZA BARNABAS BII, EVANS JAOLA, EMMANUEL ASHINDU na EZRA NANJENDO