Na THOMAS MATIKO

KWA mastaa wanaopiga mkwanja wa adabu kule Hollywood, yupo Bradley Cooper. Kama ni kukafunga, jamaa unaambiwa amekafunga sio mchezo.

Huwezi kumwitia kazi kama huna mkwanja wa maana sababu anajiamini kupita maelezo kwamba akikupigia shughuli, utaingiza faida maradufu ya kile kiasi cha pesa anachokuitisha kama malipo ya huduma yake.

Sanaa

Bradley aliyezaliwa miaka 44 iliyopita maeneo ya Philadelphia, alianza sanaa yake baada ya kumaliza masomo yake ya chuo kikuu alikohitimu kwa shahada ya lugha ya Kiingereza.

Kazi yake ya kwanza kama mwigizaji ilitokea 1999 alipohusika kwenye shoo maarufu enzi hizo ya Sex and The City.

Alijihusisha kwenye shoo zingine kibao za runingani zilizomfanya kutambulika zaidi.

Mnamo 2001 alipata fursa ya kuigiza kwenye filamu yake ya kwanza Wet Hot American Summer na ndiyo kazi iliyomfungulia milango hata zaidi.

Aliishia kupata mchongo wa kuigiza kwenye Wedding Crashers ambayo nayo ilitisha sana na kumgeuza lulu Hollywood.
Toka hapo, kila akihusika kwenye filamu, inaishia kuwa kitu kikubwa mno.

Mkwanja wake noma

Kwa mujibu wa majarida makubwa kama vile People, Insider kati ya mengineo, Bradley anakadiriwa kuwa na utajiri usiopungua dola 100 milioni.

Hadi kufikia sasa, filamu alizoigiza zimefanikiwa kuingiza dola7.8 bilioni kimauzo kote ulimwenguni.

Dau lake limeripotiwa kupanda ndani ya miaka michache iliyopita baada ya filamu alizoigiza kufanya vizuri sana sokoni. Kwa sasa inaripotiwa kwamba, ada anayotoza kuigiza haipungui dola 15 milioni.

Ada hiyo hupanda hata zaidi pale atakapohusika kama mwigizaji, mwelekezi na produsa wa filamu husika.

Dau lake lilipanda ghafla kwa mara ya kwanza 2014 na 2015 alipojumulishwa kwenye listi ya Forbes ya waigizaji waliolipwa mshahara mkubwa.

Mwaka 2014 alilipwa dola 46 milioni kutokana na ufanisi wa filamu za Hangover Part II, American Hustle na Guardian of the Galaxy.

Mwaka uliofuatia alitengeneza dola 41.5 milioni baada ya Wet Hot American Summer, Aloha na American Sniper kufanya vizuri vilevile.

Filamu yake mpya iliyotumia bajeti ya dola 35 milioni A Star Is Born, aliyohusika kama mwigizaji, produsa na mwelekezi, tayari imeshaingiza dola 434 milioni kimauzo. Mshahara wake unaripotiwa hautakuwa chini ya dola 20 milioni.

Mjengo

Kule New York, anamiliki mjengo alioununua kwa dola 13 milioni. Huko ndiko anakoishi na mpenzi wake Irina Shayk ambaye kamzalia mtoto mmoja wa kike mwenye miaka miwili.

Usafiri

Anapenda mashine za nguvu, we acha tu. Hili ni jambo ambalo anakiri waziwazi. Kati ya mashine anazomiliki ni pamoja na Toyota Prius, AMG Mercedes G55, Vespa, BMW Z8 na Mercedes G Wagon.

Usichokijua

Mpenzi wake, kichuna Irina ni demu wa zamani wa fowadi matata wa Juventus, Cristiano Ronaldo, ambaye utajiri wake unakadiriwa kuwa usiopungua dola 450 milioni.

Alianza kutoka na Irina 2015 baada ya kichuna huyo kuvunja uhusiano wake wa miaka mitano na Cristiano.

Kipindi wakikutana, Bradley alikuwa ametoka kwenye uhusiano mwingine na kichuna Suki Waterhouse uliovunjika baada yao kuwa pamoja kwa miaka miwili.