RAIS wa Shirikisho la Soka la Kenya (FKF), Hussein Mohamed, amemshutumu aliyekuwa naibu wake McDonald Mariga akidai alikuwa na tamaa ya madaraka na kutaka kumpokonya mamlaka mwezi mmoja tu baada ya wawili hao kuchaguliwa kuongoza shirikisho hilo.

Akizungumza siku moja baada ya Mariga kuondolewa mamlakani pamoja na wajumbe wengine saba wa Kamati Kuu ya Kitaifa (NEC), Mohamed alisema hajutii uamuzi wa wajumbe katika Mkutano Spesheli wa FKF, akisisitiza kuwa uhusiano wake na Mariga ulikuwa umesambaratika kiasi cha kutotengenea.

“Mambo yalianza kuharibika katika mkutano wa kwanza wa NEC uliofanyika Januari 2025, mwezi mmoja tu baada ya kuchaguliwa katika nyadhifa zetu. Mariga alitaka kuwa rais na alikuwa na nia ya kunisukuma pembeni ili ajitwalie kila kitu. Sijutii yaliyompata na wenzake,” Mohamed akaambia Taifa Leo kwenye mahojiano.

Mohamed alidai Mariga alitaka kudhibiti karibu kila shughuli ya shirikisho hilo na kumwacha kama kiongozi butu asiye na usemi kuhusu lolote kwenye shirikisho.

“Alitaka kudhibiti timu za taifa, ligi, usimamizi na hata ufadhili na alitaka awe kila kitu. Mimi ndiye nilichaguliwa kuwa rais na yeye alikuwa naibu wangu. Kwa nini ningekubali hilo? Mariga alisafiri katika karibu ziara zote za timu za taifa, ambazo baadhi nilizifadhili kwa pesa zangu mwenyewe,” akasema.

Aliongeza kuwa Mariga alitaka kuwa katika kila kamati ili kutimiza maslahi yake binafsi.

“Hivi majuzi alidai kuwa hakuwa akilipwa mshahara. Lakini nilipaswa kupata wapi pesa za kumlipa mshahara, walinzi, katibu wa afisi na dereva wa kudumu aliokuwa akitaka? Je, alikuja FKF kuongoza soka au kujinufaisha binafsi?” akauliza Mohamed.

Pia alidai Mariga hakufurahishwa tangu mwanzo na uteuzi wa Harold Ndege kuwa Afisa Mkuu Mtendaji (CEO) wa FKF, akisema naibu huyo wa zamani alikuwa akimpendelea mgombea mwingine.

Hata hivyo, Mohamed alidokeza kuwa Mariga na Ndege walikuwa wameridhiana hivi karibuni na sasa walikuwa wakishirikiana kumpinga.

Alitaja pia madai ya juhudi za Mariga na washirika wake za kusitisha mashindano ya Chapa Dimba mwaka huu kuwa mojawapo ya mambo yaliyomkasirisha zaidi.

Mohamed alisema alijaribu kutatua tofauti zao kwa mazungumzo na kukubali baadhi ya matakwa ya Mariga, lakini baadaye akatambua kuwa alikuwa akisukumwa na tamaa na majitapo.

Alisisitiza kuwa Mariga, ikiwa alitamani urais, alipaswa kusubiri uchaguzi wa 2028 na kuwania nafasi hiyo badala ya kujaribu kubadilisha mamlaka ndani ya uongozi uliochaguliwa.

Aidha, alimshutumu Mariga na mrengo wake kwa kukiuka maagizo ya FIFA kwa kupeleka malalamishi yao mahakamani, kwa Idara ya Upelelezi Nchini (DCI) na Bungeni.

Alisema hatua hizo zinalilemaza usimamizi wa soka na kuenda kinyume na maelekezo ya FIFA.