Watu wengi huingia katika mahusiano wakiamini wamepata mchumba wa maisha, lakini kadiri siku zinavyosonga hugundua kuwa huenda wanatumika kuziba upweke wa waliyedhani anawapenda.

 Wataalamu wa masuala ya mahusiano wanaonya kuwa si kila mtu anayesema anakupenda ana hisia za dhati za mapenzi.

Kuna dalili kadhaa zinazoweza kukusaidia kutambua ikiwa mpenzi wako anakupenda kweli at au anafurahia tu uwepo wako.

Hamna ukaribu wa kihisia

Kulingana na mtaalamu wa mahusiano Jedida Kanini,  mapenzi ya kweli yanahitaji zaidi ya kuvutiana kimwili au kufurahia kuwa pamoja.

“Wapenzi wanapaswa kuwa na uwezo wa kufunguka, kuelezana hofu, changamoto na matarajio yao. Ikiwa mazungumzo yenu huishia kwenye utani, starehe na mambo ya kimwili bila kugusa kwa undani hisia zenu, huenda uhusiano huo hauna msingi imara wa kihisia na mtu wako anajifanya anakupenda,” asema Kanini.

Uhusiano wenu kila mara uko ukingoni mwa kuvunjika

Kulingana na Kanini,  ikiwa kila mnapokosana unahisi uhusiano wenu unakaribia mwisho, hiyo ni ishara ya kutokuwa na usalama wa kihisia na uhusiano wenu ni bonoko. “Mapenzi ya kweli hayamaanishi kutokubaliana, bali kuwa na uwezo wa kutatua tofauti bila mmoja kutishia kuondoka kila mara. Iwapo anatishia kukuacha au unatishia kufanya hivyo mkitofautiana au mna hisia za kufanya hivyo,” uhusiano wenu si wa dhati.

Amezoea uwepo wako lakini hakupendi

Mwanasaikolojia Benda Kamau anasema kuwa kuna tofauti kubwa kati ya mtu anayekupenda na anayekufurahia kwa sababu tu humfanya asihisi pweke. “Ikiwa unahisi kama umeambatana naye katika shughuli zake badala ya kuwa mtu muhimu anayekuthamini, huenda amekuweka katika maisha yake kwa sababu ya urahisi unaompa na  hakuna  mizizi ya mapenzi kati yenu,” asema Benda.

Anatangaza mapenzi mitandaoni kuliko faraghani

Wataalamu wanasema mpenzi anayependa kuweka picha zenu, kuandika jumbe tamu na kujigamba kuhusu mapenzi yenu mbele ya marafiki, lakini mkiwa faraghani haonyeshi upendo huo, anapaswa kukufanya utafakari. “Upendo wa  kweli haupaswi kuwa maonyesho ya kuwavutia watu wengine bali hisia zinazoonekana hata mnapokuwa wawili pekee,” asema.

Hataki kukutana nawe katikati

Benda asema mahusiano yanahitaji juhudi na maelewano kutoka pande zote. Ikiwa kila mara ni wewe unayepiga simu, kuomba msamaha, kupanga mikutano na kutafuta suluhu, huku mwenzako akibaki mtazamaji, huenda hana nia sawa na yako. Mapenzi ya dhati hayajengwi na mtu mmoja.

 Mnahitaji kuwa pamoja kila wakati ili kuhisi mnapendana

“Ikiwa mnahisi mapenzi yenu yapo tu mnapokuwa pamoja, mkishikana mikono, mkibusiana au kuonyesha mahaba hadharani, huenda mnachanganya mambo mengine na upendo. Mapenzi ya kweli hujengwa pia kwa kuaminiana na kuheshimiana hata mnapokuwa mbali, “ aeleza Benda.

Anaongeza: “Na upendo wa kweli haupimwi kwa maneno matamu, picha za mitandaoni au muda mnaotumia pamoja pekee, bali kwa juhudi, uaminifu, usalama wa kihisia na namna kila mmoja anavyomthamini mwenzake”.