GAVANA wa Trans Nzoia George Natembeya amemtaka Inspekta Jenerali wa Polisi Douglas Kanja kueleza sababu za kuondolewa kwa maafisa wa usalama waliokuwa wakimlinda, saa chache baada ya ziara ya Rais William Ruto kaunti hiyo.

Walinzi hao waliondolewa Jumatano saa tano usiku, baada ya Rais Ruto kukamilisha ziara yake katika maeneo ya Kiminini na Cherangany.

Katika taarifa yake Alhamisi, Bw Natembeya alisema ni mara ya pili walinzi wake kuondolewa na akataka serikali kueleza sababu za uamuzi huo.

Alitaja Ibara ya 47 ya Katiba inayohakikisha haki ya kila mtu kutendewa kwa haki katika maamuzi ya kiutawala, akisisitiza kuwa hatua zinazoathiri usalama wake lazima zifuate sheria.

Pia alitaja Ibara za 238 na 244 zinazohitaji idara za usalama kuheshimu utawala wa sheria, haki za binadamu na taaluma.

“Si kwamba napinga ukaguzi halali wa usalama wangu. Ninachotaka ni mchakato huo kufanywa kitaaluma, bila ubaguzi au ushawishi usiofaa wa kisiasa,” alisema.

Mnamo Novemba 2025, walinzi wa gavana huyo waliondolewa, hatua iliyomfanya kumshutumu Rais Ruto kwa kujaribu kumtisha kwa sababu ya misimamo yake ya kisiasa.

Bw Natembeya alirejelea uamuzi wa Mahakama Kuu wa Mei 29, 2025, uliosisitiza kuwa walinzi wa viongozi hawawezi kuondolewa bila notisi ya maandishi, nafasi ya kusikilizwa na sababu zilizoandikwa.

Mvutano huo unatokea huku kukiwa na kutokuelewana kati yake na Waziri wa Usalama wa Ndani Kipchumba Murkomen.

Hadi Alhamisi asubuhi, serikali  haikuwa imetoa maelezo rasmi kuhusu kuondolewa kwa walinzi hao.