KITUO cha Kudhibiti Magonjwa ya Kuambukizana Afrika (CDC) kimeitaka Saudi Arabia kufikiria upya vikwazo vya usafiri ilivyoweka dhidi ya Kenya kutokana na mkurupuko wa Ebola, kikisema nchi zinazotambua na kudhibiti visa vya ugonjwa huo hazifai kuadhibiwa.

Wito huo unajiri huku Kenya ikifikisha siku 18 bila kurekodi kisa kipya cha Ebola tangu Oktoba 19, 2026.

Mnamo Oktoba 30, Saudi Arabia iliwazima raia wake kusafiri Kenya, ikasitisha utoaji wa visa kwa watu wanaotoka nchini humu na kupiga marufuku kuingia kwa wasafiri waliokuwa Kenya au nchi zenye mkurupuko wa Ebola ndani ya siku 21 zilizotangulia.

Akizungumza Ijumaa, Mkurugenzi wa Kitengo cha Dharura ya Afya ya Umma katika CDC, Dkt Wessam Mankoula, alisema hatua za Kenya kudhibiti ugonjwa huo zinafaa kuwa mfano kwa mataifa mengine.

“Kenya imeonyesha mfano mzuri wa kutambua ugonjwa mapema, kufuatilia watu waliokuwa karibu na wagonjwa, kuwaweka karantini na kuimarisha uwezo wa maabara na hospitali. Nchi hazipaswi kuadhibiwa kwa kuwa wazi kuhusu mkurupuko wa magonjwa. Tujikite katika kutenga virusi, wala si kuitenga nchi,” akasema.

Aliitaka Saudi Arabia kuondoa vikwazo hivyo na kuzitaka nchi nyingine kuepuka hatua kama hizo bila ushahidi wa kisayansi.

Waziri wa Afya Aden Duale alisema Kenya imefanikiwa kufuatilia watu wote 135 waliokuwa wamekutana na mgonjwa wa kwanza, huku 118 wakiwekwa karantini.

Visa vyote tisa vilithibitishwa kuwa vinahusiana na mgonjwa huyo wa kwanza, bila ushahidi wa maambukizi katika jamii.

Kenya imerekodi vifo viwili, wagonjwa sita wamepona huku mmoja akiendelea kutibiwa.

Mkurugenzi Mkuu wa Afya ya Umma Dkt Patrick Amoth alisema nchi itaanza kuhesabu siku 42 baada ya mgonjwa wa mwisho kupona ili kutangaza rasmi mwisho wa mkurupuko huo.

Kenya inaendelea kuchunguza wasafiri katika vituo vyake 26 vya kuingia nchini, ambapo zaidi ya 760,000 wamechunguzwa.

Serikali imesisitiza kuwa hakuna marufuku ya safari, biashara au mikusanyiko ya umma.