WAKAZI wa Nairobi na kaunti jirani watakabiliwa na mgao mkali zaidi wa maji baada ya viwango vya maji katika Bwawa la Ndakaini kushuka, na kusababisha kupunguzwa kwa uzalishaji katika viwanda viwili vikuu vya kutibu maji kwa asilimia 35.

Kampuni ya Maji ya Nairobi imesema hatua hiyo imeanza mara moja kutokana na kupungua kwa maji yanayoingia bwawani, ambalo ndilo chanzo kikuu cha maji kwa wakazi wa jiji hilo.

Kupunguzwa kwa uzalishaji kutaathiri viwanda vya Ngethu na Kigoro, na hivyo kuvuruga usambazaji wa maji katika Nairobi na sehemu za kaunti za Kiambu, Kajiado na Machakos.

Kampuni hiyo imepunguza kiwango cha maji kinachochotwa ili kuhifadhi akiba iliyopo.

Mgao huo pia utawaathiri wateja wa kampuni za maji za Kiambu, Mavoko, Olkejuado, Githunguri, Karuri na Oloolaiser, ambazo hutegemea maji kutoka Ndakaini.

Wakazi wametakiwa kutumia maji kwa uangalifu.

Katika taarifa yake, kampuni hiyo iliomba radhi kwa usumbufu huo na kuahidi kufuatilia viwango vya maji na hali ya hewa, huku ikipitia uzalishaji mara kwa mara.

Bwawa la Ndakaini lililoko Kaunti ya Murang’a lilikamilishwa mwaka 1994 chini ya Mradi wa Tatu wa Usambazaji Maji Nairobi.

Lina uwezo wa kuhifadhi mita za ujazo milioni 70 na hutoa zaidi ya asilimia 84 ya maji yanayotumiwa jijini.

Maji hayo hupitishwa katika handaki la kilomita nne hadi Mto Chania, kisha kutibiwa Ngethu na kusafirishwa Nairobi kupitia bomba la kilomita 90.

Mgao huo unajiri wakati ambapo jiji limekuwa likikabiliwa na uhaba wa maji kutokana na ongezeko la idadi ya watu na mahitaji yanayozidi uwezo wa uzalishaji.

Mwaka 2018, Nairobi ilikuwa ikipokea mita za ujazo 525,000 za maji kwa siku, ilhali mahitaji yalikuwa mita za ujazo 760,000.

Hali hiyo ilisababisha upungufu wa mita za ujazo 235,000 kila siku.

Wakazi wa baadhi ya maeneo walikuwa wakipata maji mara mbili au tatu kwa wiki, huku wengine wakilazimika kununua kutoka kwa wauzaji binafsi kwa bei ya juu.

Mgao huo huenda ukazidisha uhaba, hasa katika maeneo yenye wakazi wengi.

Hata hivyo, kampuni haikubainisha maeneo yatakayopata mgao kwa ratiba gani, wala muda ambao hatua hiyo itadumu, hivyo wakazi wanatarajiwa kufuatilia matangazo rasmi kuhusu mabadiliko ya usambazaji kwa kipindi hiki cha uhaba wa maji.