MAGAVANA 21 wamewekeza Sh4.21 bilioni katika miradi ya maendeleo ambayo imekwama huku ikiwa imesalia miezi tisa pekee kabla ya uchaguzi mkuu wa 2027.

Ripoti mpya ya Mdhibiti wa Bajeti (COB) Margaret Nyakang’o kuhusu utekelezaji wa bajeti za kaunti kwa mwaka wa kifedha wa 2025/2026 imefichua kuwa miradi 189 yenye thamani ya Sh10.51 bilioni ilikuwa imekwama kufikia Juni 30, 2026.

“Kaunti zilikuwa zimelipa Sh4.21 bilioni kwa miradi hiyo kabla ya kusimama,” inasema ripoti hiyo.

Nairobi inaongoza kwa miradi mingi zaidi iliyokwama, ikiwa na miradi 57 yenye thamani ya Sh2.24 bilioni. Kaunti hiyo ilikuwa imelipa wakandarasi Sh208.9 milioni kabla ya miradi hiyo kusimama.

Inafuatwa na Kakamega yenye miradi 26 ya Sh848.95 milioni, Baringo (23) ya Sh163.32 milioni na Machakos yenye miradi 22 ya Sh891.58 milioni.

Isiolo ina miradi saba yenye thamani ya Sh1.77 bilioni iliyokwama.

Katika Nairobi, miradi iliyoathirika ni pamoja na jengo la hospitali ya Mbagathi lenye thamani ya Sh255.87 milioni, ambalo lilikuwa limekamilika kwa asilimia 15 pekee.

Ukumbi wa kijamii wa Mwiki wa Sh76 milioni, jumba la vijana la Dandora II la Sh50 milioni na ukarabati wa soko la Makina wa Sh42 milioni pia umekwama kutokana na wanakandarasi kutolipwa.

Baringo, inayoongozwa na Gavana Benjamin Cheboi, ilikuwa imelipa Sh83.69 milioni kwa miradi iliyokwama kabla ya kazi kusimama.

Baadhi ilikwama kutokana na ukosefu wa usalama katika maeneo yanayokumbwa na uhuni wa kutumia silaha.

Kakamega ilikuwa imelipa Sh218.98 milioni kabla ya miradi hiyo kusimama. Miradi hiyo inajumuisha barabara ya Ingotse-Navakholo-Chebuyusi yenye thamani ya Sh100 milioni.

Machakos ilikuwa imelipa Sh314.26 milioni kwa miradi iliyokwama, ikiwemo hospitali ya jamii ya Mua na kituo cha afya cha Kwa Mwatu, Matuu.

Nakuru ina miradi mitatu ya Sh60.65 milioni iliyokwama, huku Nandi ikiwa na sita yenye thamani ya Sh23 milioni.

“Sababu za miradi kusimama ni pamoja na ufadhili usiotosha, kuchelewa kulipa wakandarasi, upangaji mbaya na udhaifu katika usimamizi wa mikataba,” akasema Bi Nyakang’o.

Alizitaka kaunti kuandaa orodha iliyothibitishwa ya miradi yote iliyokwama na kuweka mikakati yenye muda maalumu ya kuikamilisha.

Pia alizitaka kutatua mizozo ya kimikataba haraka na kuelekeza fedha kwa miradi inayoweza kukamilishwa na kuanza kutumiwa na wananchi.