NAIBU Kiongozi wa chama cha Jubilee, Dkt Fred Matiang’i, amerushia serikali ya Rais William Ruto ‘makombora’ makali, akiishutumu kwa ubadhirifu wa rasilimali za umma na matumizi mabaya ya mamlaka wakati wa uchaguzi mdogo uliokamilika hivi majuzi.

Alisema mamilioni ya fedha za walipa ushuru yalitumika kupigia debe wagombeaji wa UDA kote nchini badala ya maendeleo, na akaapa kwamba juhudi za “kuondoa serikali dhalimu na isiyo na huruma” mwaka 2027 haziwezi kuzimwa.

“Waanzilishi wa taifa hili wangekuwa wanaweza kugeuka kaburini wakiona haya matumizi mabaya ya mamlaka yasiyokuwa na kifani, ubadhirifu wa rasilimali za umma na kiburi cha kupindukia, wangeshangaa,” akasema Dkt Matiang’i.

Akaendelea: “Serikali imetumia pesa za wananchi kufanya kampeni na kutisha Wakenya. Serikali ya Dkt Ruto itakuwa ya muhula mmoja tu.”

Alikuwa akizungumza katika Kanisa la Anglikana la St John’s Kanyuambora, Mbeere Kaskazini, Kaunti ya Embu, wakati wa ibada ya mazishi ya Penina Ciambogo, 91, mamake Seneta wa zamani wa Embu, Lenny Kivuti.

Dkt Matiang’i alisema upinzani umeungana na una azma ya kuondoa serikali ya Kenya Kwanza kwa njia ya kidemokrasia kupitia kura.

Alishutumu serikali kwa “kuharibu nchi na kuwafanya Wakenya maskini ili iwe rahisi kuwashawishi”.

“Serikali inaiba pesa na kutumia kununua wapigakura, ndiyo maana hakuna fedha za mgao wa shule wala za afya. Wanataka kutukandamiza, lakini siku moja uongozi huu utaondoka. Hatuwezi kupiga magoti mbele ya wanadamu,” akasema.

Aliwahimiza Wakenya wasimame imara na kudumisha mshikamano.

“Msiwe na hofu. Nchi yetu ni nzuri; tatizo ni uongozi mbaya, na titashinda hilo. Wakenya waendelee kuwa na matumaini,” alisema.

Seneta wa Nyamira, Okong’o Mogeni, alisema walifanya vyema kwenye uchaguzi mdogo na kuonyesha serikali kwamba upinzani ni nguvu halisi.

“Serikali ilitumia helikopta kufanya kampeni ya MCA. Hili ni jambo zito na tutapigana kushinda serikali ya Kenya Kwanza 2027,” alisema.

Kiongozi wa Democratic Party, Justin Muturi, alisema uchaguzi mdogo wa Mbeere Kaskazini “ulikumbwa na udanganyifu” na akaapa kupinga ushindi wa mgombea wa UDA, Leonard Muthende.

“Tunakusanya ushahidi na tutawasilisha kesi wakati ufaao,” akasema.

Aliyekuwa waziri wa Kilimo, Mithika Linturi, alidai serikali ilitumia Sh600 milioni kumpigia debe mgombea wa UDA Mbeere Kaskazini.

“Huu ni ubadhirifu mkubwa wa pesa za umma huku Wakenya wakiteseka,” alisema.