SENETA wa Nairobi Edwin Sifuna ameiomba Mahakama Kuu itupilie mbali kesi inayotaka kuwalazimisha viongozi wa Linda Mwananchi kueleza jinsi fedha walizochangishiwa na Wakenya kupitia nambari ya Paybill, zilivyotumika.

Katika majibu yake kwa ombi lililowasilishwa na Alan Masakhalia, Bw Sifuna anasema Mahakama Kuu haina mamlaka ya kusikiliza kesi hiyo kwa kuwa masuala yaliyoibuliwa yanapaswa kushughulikiwa kupitia mifumo ya kutatua mizozo iliyoainishwa katika Kifungu cha 21 cha Sheria ya Ufadhili wa Kampeni za Uchaguzi.

Bw Masakhalia aliwasilisha kesi hiyo Septemba, akitaka mahakama imwamuru Bw Sifuna na vuguvugu la Linda Mwananchi kutoa hesabu kamili ya michango yote iliyopokelewa kupitia nambari ya Paybill 3033049 na njia nyingine za kuchangisha fedha.

Hata hivyo, kiongozi huyo wa Linda Mwananchi anasema malalamishi yanaweza kutatuliwa kupitia njia nyingine zilizowekwa kisheria.

“Ni jaribio lililopangwa la kukwepa mifumo ya kutatua mizozo iliyowekwa wazi katika sheria. Kwa kupuuza utaratibu huo wa lazima, kesi hii haina msingi na inapaswa kutupiliwa mbali huku mlalamishi akiamriwa kulipa gharama za kesi,” akasema Bw Sifuna.

Sheria hiyo inaruhusu mtu yeyote kuwasilisha malalamishi kwa Tume Huru ya Uchaguzi na Mipaka (IEBC) akidai ukiukaji wa masharti yake.

Iwapo tume itathibitisha ukiukaji, inaweza kutoa onyo rasmi, kutoza faini, kumpiga marufuku mgombeaji au chama kufanya kampeni kwa kipindi fulani, au kumwondoa mgombeaji kwenye kinyang’anyiro.

Bw Masakhalia anasema alichangia Sh55 kwa mradi wa Linda Mwananchi na anataka vuguvugu hilo lieleze jinsi fedha zilizokusanywa zilivyotumika.

Pia anataka mahakama iamue hatua za kisheria zinazoweza kuchukuliwa iwapo mradi huo wa kisiasa utaachwa, kuelekezwa kwingine au kubadilishwa kutoka madhumuni yaliyotangazwa wakati wa kuomba michango.

Anasisitiza kuwa kesi hiyo haichochewi na mapendeleo yake ya kisiasa kuhusu iwapo Bw Sifuna anapaswa kuwania urais, bali ni kutaka ufafanuzi kuhusu wajibu wa kisheria unaohusishwa na fedha zinazochangwa na umma.

Anasema Bw Sifuna anaweza kuamua kutowania urais, kuhamishia uungwaji mkono na miundombinu ya kisiasa iliyojengwa kupitia mradi huo kwa mgombeaji mwingine, au kutumia fedha hizo kwa madhumuni tofauti.

Bw Masakhalia anataka mahakama iamue iwapo ni halali kwa Bw Sifuna kuchangisha fedha kwa ajili ya azma ya urais na baadaye kuachana nayo au kumuunga mkono mgombeaji mwingine.

Bw Sifuna alizindua nambari hiyo ya Paybill Julai 21, 2026, akiwahimiza Wakenya kuchangia fedha kuunga mkono vuguvugu la Linda Mwananchi.