RAIS Mstaafu Uhuru Kenyatta amewataka viongozi wa upinzani kuweka kando tamaa zao za kibinafsi za kuwania urais na kuungana nyuma ya mgombea mmoja, akisema Wakenya tayari wameamua kumwondoa Rais William Ruto mamlakani katika uchaguzi mkuu wa Agosti 2027.

Bw Uhuru alisema changamoto kubwa inayokabili upinzani si ukosefu wa wananchi wanaotaka mabadiliko, bali viongozi wake kukosa kukubaliana kuhusu mwelekeo mmoja wa kisiasa.

Alionya kuwa ushindani wa viongozi kutaka kuwania urais unaweza kuvuruga juhudi za kuunda muungano ulio na msimamo mmoja dhidi ya utawala wa Kenya Kwanza.

Alitaja kiongozi wa Wiper Kalonzo Musyoka, aliyekuwa Naibu Rais Rigathi Gachagua na kiongozi wa DAP-K Eugene Wamalwa, akiwakumbusha kuwa kiti cha urais kinaweza kushikiliwa na mtu mmoja pekee kwa wakati mmoja.

“Tunapaswa kuwa na wasiwasi kuhusu mustakabali wa nchi yetu, wala si yaliyopita. Ninawaambia ndugu zangu Kalonzo, Rigathi Gachagua na Eugene kwamba mtu mmoja pekee ndiye anaweza kukalia kiti hicho kwa wakati mmoja,” alisema.

Alikuwa akizungumza jana wakati wa ibada ya mazishi ya binamu yake Beatrice Wambui Muturi katika Kanisa la PCEA Nairobi West, Lang’ata, Nairobi.

Bw Kenyatta alisema mazungumzo yake na Wakenya wa kawaida, hata anapokwenda “kununua uji”, yamemshawishi kuwa wananchi wanataka mabadiliko ya uongozi.

Hata hivyo, alisema wanataka kwanza kuona viongozi wa upinzani wakimaliza tofauti zao.

“Ingawa nimestaafu, masikio yangu hayajafungwa. Ninazungumza na watu na kuwasikiliza. Ninapokwenda kununua uji na kuwauliza wanataka nini, kuna jambo moja wanalosisitiza: watu wameamua. Wako tayari wakati huu, lakini tatizo pekee ni umoja wa upinzani,” alisema.

Aliwataka viongozi hao kutimiza matarajio ya wananchi kwa kuonyesha umoja na kuweka maslahi ya nchi mbele ya matarajio yao binafsi.

Kauli yake inaongeza uzito katika mazungumzo yanayoendelea kuhusu kuunda muungano wa upinzani kabla ya uchaguzi wa 2027, huku suala la mgombea mmoja wa urais likiwa miongoni mwa masuala yanayohitaji makubaliano.

Upinzani unaojumuisha DCP ya Gachagua, Wiper ya Kalonzo, DAP-K ya Wamalwa, vuguvugu la Linda Mwananchi linaloongozwa na Edwin Sifuna, Jubilee ya Fred Matiang’i na vyama vingine vinavyohusishwa na Martha Karua, Justin Muturi na aliyekuwa Jaji Mkuu David Maraga, bado unakabiliwa na changamoto ya kuunganisha maslahi ya kila mmoja.

Ingawa viongozi wamekuwa wakiahidi kumuunga mkono atakayeteuliwa kuwa mgombea wa urais, bado kuna maswali kuhusu nani atakayeongoza muungano huo, utaratibu wa kufanya maamuzi na namna ya kumpata mgombea wa pamoja.

Uhuru pia aligusia uhusiano wake na Gachagua, ambaye amekuwa akitumia makazi yake ya Wamunyoro, Kaunti ya Nyeri, kama kitovu cha shughuli zake za kisiasa na mikutano na washirika wake.

Alisema atatembelea Wamunyoro wakati ufaao, akisisitiza kuwa anataka amani na umoja licha ya kujiondoa katika siasa za uchaguzi.

“Nimepoteza mtu aliyekuwa muhimu sana katika kukua kwangu. Sina mengi ya kusema kwa sababu nimestaafu. Hata hivyo, nataka kusema nitakuja Wamunyoro wakati ufaao. Tunataka amani na umoja,” alisema.

Kwa upande wake, Gachagua, alisema jamii ya Mlima Kenya imeamua kutoruhusu tena migawanyiko ya kisiasa kuidhoofisha.

Alikiri kuwa alifanya makosa wakati wa uchaguzi wa 2022 na kusema amejifunza kutokana na yaliyotokea.

“Tumeamua kuwa hatutamruhusu mtu yeyote kugawanya jamii yetu. Nilifanya kosa kubwa mwaka 2022 na nimejifunza kwa njia ngumu. Ninafurahi kwamba sasa tuko pamoja kama jamii na tutaendelea mbele pamoja,” alisema.

Kalonzo, aliyezungumza katika hafla hiyo, aliunga mkono haki ya Uhuru kutoa maoni yake kuhusu mustakabali wa nchi.

Kwingineko, Rais Ruto alimshambulia mtangulizi wake Uhuru, akimtaja kama dalali wa kisiasa anayepoteza muda kwa kujaribu kuwaunganisha viongozi wa upinzani badala ya kushughulikia changamoto zinazowakabili Wakenya.

Ruto alisema Uhuru ameachana wajibu wake kama kiongozi wa kitaifa na sasa anashughulika kutafuta mgombea mmoja wa upinzani kuelekea uchaguzi mkuu wa 2027.

Alikuwa akizungumza jana alipohitimisha ziara yake ya siku nne katika eneo la Gusii, iliyohusisha kaunti za Kisii na Nyamira.

“Nimesikia kuhusu huyo sponsa, rafiki yangu. Je, hamumjui? Ameacha kuwa kiongozi wa kitaifa na sasa amekuwa dalali. Anajaribu kuunganisha huyu na yule. Namwambia aharakishe kazi yake ya udalali na atafute mtu anayemtafuta,” alisema Ruto.