SIASA za Kenya zinazidi kutawaliwa na vijembe, majina ya kejeli na mashambulizi binafsi huku viongozi wakionekana kutumia muda mwingi kushambuliana badala ya kueleza mipango yao ya kuboresha maisha ya wananchi.

Mvutano huo umeongezeka kati ya Rais William Ruto na aliyekuwa naibu wake Rigathi Gachagua, huku kila mmoja akimtupia mwenzake tuhuma na majina ya kumdhalilisha kuelekea uchaguzi mkuu wa 2027.

Katika ziara yake ya siku tatu eneo la Gusii, Ruto alimlaumu Gachagua kwa kuwatoza kwa vitisho fedha wafanyabiashara, magavana na wanaotaka tiketi za chama chake cha DCP ili kuwapa tiketi na hata kuzungumza katika mikutano ya kisiasa.

Hakutoa ushahidi wa kuthibitisha madai hayo.

Gachagua alijibu kwa kejeli, akisema Rais amekuwa akitoa ahadi za maendeleo Kisii na Nyamira bila kutekeleza miradi inayotarajiwa.

Alisema yeye si barabara, mradi wa maji wala uwanja wa ndege kuzungumziwa katika mikutano ya rais eneo hilo.
Ruto baadaye alimwita Gachagua “Bwana Texas”, akirejelea kauli ya aliyekuwa naibu rais kwamba atahamia Amerika iwapo Ruto atachaguliwa tena.

Hata hivyo, wachambuzi wanasema majina hayo ya kejeli yanaweza kuficha tofauti kati ya tuhuma, ukweli uliothibitishwa na matusi ya kisiasa.

Mwanaharakati Boniface Mwangi anasema wananchi hawapaswi kufurahia matusi pekee, bali kuchunguza madai yanayotolewa na viongozi na kutaka ushahidi.

Analaumu pia vyombo vya habari na umma kwa kupatia nafasi kubwa kauli zinazozua burudani huku ajenda za maendeleo zikisahaulika.

Mtaalamu wa utawala Javas Bigambo anasema matumizi ya majina ya kisiasa yanaweza kusaidia viongozi kuwasilisha ujumbe wao, lakini pia yanapunguza nafasi ya mijadala inayozingatia sera.

Chris Owalla wa Community Initiative Action Group-Kenya anasema tabia hiyo inadhoofisha uwajibikaji na imani ya wananchi kwa taasisi za umma.

Katiba inataka viongozi kuheshimu utu, umoja wa kitaifa, uadilifu na uwajibikaji. Hata hivyo, si kila kauli kali ni ukiukaji wa Katiba.

Mchambuzi wa siasa Dismas Mokua anasema siasa za Kenya zimetoka ushindani wa sera na mawazo hadi vita vya watu binafsi, ambapo majina ya kejeli yanatumika kuelekeza hasira za wananchi kwa wapinzani.

Wakati huo huo, raia wanakabiliwa na gharama ya maisha, ukosefu wa ajira, ushuru na huduma duni za umma.

Swali kuu si nani anatoa tusi kali zaidi, bali ni nani anaweza kueleza alichotekeleza, alichoshindwa kufanya na mipango yake ya kuboresha maisha ya Wakenya.