WAKAZI wa Nairobi wanakabiliwa na ongezeko la gharama ya maisha kuanzia Julai mwaka ujao baada ya madiwani wa Kaunti kupitisha sera mpya ya ada kwa kipindi cha miaka mitano, ambayo itaongeza kwa kiasi kikubwa gharama za huduma za kila siku kuanzia maegesho hadi leseni za biashara.

Mfumo huo mpya wa sera unafungua njia ya kupandisha ada za maegesho mara tu utakapotekelezwa kikamilifu na serikali ya kaunti.

Kulingana na taarifa za kaunti, kugharamia huduma moja ya maegesho hugharimu kaunti takriban Sh520, kiwango ambacho kitaongoza uundaji wa viwango vipya katika Miswada ya Fedha ijayo.

Ingawa sera hiyo haitoi ongezeko la moja kwa moja kwa sasa, inawezesha kaunti kisheria kurekebisha ada kwenda juu.

Makadirio ya mapato tayari yanaonyesha kupanda kwa kiasi kikubwa kwa malipo yanayotarajiwa kukusanywa kutoka kwa huduma za maegesho katika mwaka ujao wa fedha.

Msimamizi wa Mapato wa Kaunti, Bw Tairus Njoroge, alisema Serikali ya Kaunti itazingatia maoni ya wananchi na tathmini ya uchumi kabla ya kuweka ada mpya.

“Tutaangalia hali ya uchumi na uwezo wa wananchi kulipia kabla ya kupendekeza ada yoyote. Haya yote yatazingatiwa,” Bw Njoroge alisema.

Kupitia sera hiyo ya 2025–2030, ada ya kila siku ya maegesho inapangwa kupanda hadi Sh520, huku baadhi ya leseni za biashara zikitarajiwa kufikia Sh74,743 — mojawapo ya ongezeko kubwa zaidi katika miaka ya hivi karibuni — na hivyo kuongeza shinikizo kwa familia na wafanyabiashara ambao tayari wanakabiliwa na mfumuko wa bei.