Kimataifa

Papa Leo XIV akataa ombi la mapadri la kuoa

Na REUTERS November 17th, 2026 Kusoma ni dakika: 2

ROMA, Italia:

KIONGOZI wa Kanisa Katoliki duniani, Papa Leo, amesema hana mpango wa kubadilisha mafundisho ya kanisa hilo ili kuruhusu mapadri kufunga ndoa, akionya kuwa suala hilo linaweza kuzua migawanyiko miongoni mwa waumini wake wapatao bilioni 1.4.

Katika matamshi yake ya kwanza kuhusu pendekezo hilo linaloungwa mkono na baadhi ya Wakatoliki, Papa Leo alisema kipaumbele chake kwa sasa ni kuimarisha umoja katika kanisa hilo duniani.

Hata hivyo, hakufunga mlango kabisa kwa uwezekano wa mabadiliko hayo siku zijazo.

Akizungumza na waandishi wa habari ndani ya ndege iliyokuwa ikimrejesha Roma baada ya ziara ya siku 12 Amerika Kusini, Papa Leo alisema kuruhusu mapadri waliofunga ndoa kuhudumu kunaweza kusababisha migawanyiko katika baadhi ya maeneo ya kanisa.

“Huenda baadhi ya mambo yakabadilika siku zijazo. Hata hivyo, kwa sasa ninaamini sehemu muhimu ya huduma yangu kanisani ni kuponya roho na kuwaunganisha watu,” akasema.

Aliongeza kuwa anataka kuwapa Wakatoliki muda wa kutathmini masuala yanayostahili kupewa kipaumbele na kanisa na kuamua namna bora ya kukabiliana nayo.

“Ninafahamu vyema kuwa watu wengi hawakubaliani na msimamo huo. Hilo si tatizo. Suala zima la wanaume waliofunga ndoa kuhudumu kama mapadri ni tata,” akasema.

Mapadri wengi wa Kanisa Katoliki huapa kutofunga ndoa na kujitolea kikamilifu kwa huduma ya kanisa.

Wanaounga mkono kuruhusu mapadri kufunga ndoa wanasema hatua hiyo inaweza kuwavutia wanaume wengi zaidi kujiunga na huduma ya upadri, hivyo kupunguza uhaba wa mapadri katika maeneo mbalimbali duniani, hasa nchi za Magharibi.

Suala hilo limejadiliwa kwa miongo kadhaa, lakini lilipata msukumo zaidi baada ya mkutano wa maaskofu wa Vatican kumtaka aliyekuwa Papa Francis kuruhusu wanaume waliofunga ndoa kutawazwa kuwa mapadri katika maeneo ya mbali kama msitu wa Amazon, ambako uhaba wa mapadri ni mkubwa.

Hata hivyo, Francis, aliyefariki Aprili 2025 baada ya kuongoza kanisa hilo kwa miaka 12, hakutekeleza pendekezo hilo.

Papa Leo pia alisema hatabadilisha uamuzi wa Francis wa kuweka vikwazo kwa matumizi ya ibada ya zamani ya Kilatini (Latin Mass), licha ya shinikizo kutoka kwa makundi ya Wakatoliki wanaoshikilia zaidi mila za zamani.

Alisema kubatilisha uamuzi huo hakutakuwa jambo sahihi kwa sababu ya maslahi ya umoja wa kanisa na waumini wake wengi duniani.