HATIMA ya usimamizi wa mitihani ya kitaifa ya mwaka huu iko mashakani baada ya Chama cha  Walimu wa Shule za Sekondari na Vyuo vya Kati (Kuppet) kusisitiza kuwa wanachama wake hawatashiriki  katika shughuli za mitihani hadi malalamishi yao yatatuliwe.

Tishio hilo linajiri siku chache kabla ya wanafunzi kufanya mazoezi ya mwisho ya mitihani ya Cheti cha Elimu ya Sekondari nchini (KCSE), yanayotarajiwa kuanza Ijumaa, Oktoba 16.

Mitihani hiyo itaanza rasmi Oktoba 19, huku wiki ya kwanza ikitengwa kwa mitihani ya Kifaransa, Kijerumani, Kiarabu, Lugha ya Ishara ya Kenya na Muziki.

Mitihani ya masomo mengine inayohusisha idadi kubwa ya watahiniwa itaanza Novemba 2 na kukamilika Novemba 20.

Katika azimio lililotolewa baada ya mkutano wa Baraza la Kitaifa la Uongozi, Kuppet ilielezea wasiwasi kuhusu jinsi Baraza la Kitaifa la Mitihani nchini (Knec) linavyoshughulikia malalamishi ya walimu wanaohusika na usimamizi wa mitihani.

Katibu mkuu wa Kuppet, Bw Akelo Misori, alisema chama hicho huo kimewaagiza wanachama wake kujiondoa katika shughuli zote za mitihani za Knec hadi baraza hilo litakapotoa hakikisho la kuboresha masharti ya kazi na malipo ya wasimamizi wa mitihani.

“Tunaomba wanachama wetu wasishiriki katika mitihani yote inayoendeshwa na Knec. Wasipotoa hakikisho la kuboresha masharti ya kazi na malipo ya watahini, tunatahadharisha baraza hilo kuwa mwaka 2026 hautakuwa wa kawaida. Tutahakikisha usimamizi wa mitihani unavurugika mwaka mzima,” alisema.

Mgogoro huo unahusu malipo ya walimu wanaohusika na usimamizi wa vituo, kusimamia watahiniwa, kupeana mitihani na kusahihisha karatasi za mitihani, miongoni mwa majukumu mengine.