TUME ya Kuajiri Walimu (TSC) imemteua Eveleen Mitei kama Kaimu Afisa Mkuu Mtendaji huku Dkt Nancy Macharia, ambaye anatazamiwa kustaafu Juni 30, 2025 akianza likizo yake.

Dkt Macharia alitangaza kuwa ameanza likizo yake ya mwisho, akiondoka rasmi kabla ya kustaafu kwake Juni 30, 2025. Kuondoka kwake kunaashiria mwisho wa uongozi wake katika  Tume hiyo, ambapo alihudumu katika nyadhifa mbalimbali na kusimamia mageuzi makubwa ya sekta ya elimu nchini Kenya.

“Ninaendelea na likizo kuanzia leo Juni 1, 2025, nikisubiri kustaafu kwangu kutoka Tume ya Utumishi wa Walimu mnamo Juni 30, 2025, baada ya kuitumikia Tume katika nyadhifa mbalimbali. Wakati huo huo, kumbuka kuwa Tume imemteua Bi Eveleen Mitei, kuwa kaimu Afisa Mkuu Mtendaji wa Tume wakati akisubiri uteuzi wa mrithi wangu.”

Haya yanajiri baada ya Mahakama ya Ajira na Mahusiano mjini Mombasa kutoa maagizo ya muda ya kusimamisha shughuli ya kuajiri Afisa Mkuu Mtendaji mpya wa TSC.

Hatua hii ilichukuliwa kujibu ombi lililowasilishwa na mkazi wa Mombasa, Thomas Mosomi Oyugi, ambaye anadai shughuli ya kuajiri watu imekumbwa na ukiukaji wa katiba na inatawaliwa na vigezo vya ubaguzi.

Katika ombi hilo, mlalamishi alidai kuwa mchakato mzima wa kuajiri haufuati katiba na kwamba unatawaliwa na ubaguzi.

Katika notisi iliyochapishwa katika MyGov mnamo Mei, TSC ilialika waliohitimu kutuma maombi ya kazi. Jukumu hilo linahusisha kusimamia mwelekeo wa kimkakati wa tume na kusimamia shughuli zake za kila siku.

Mkurugenzi Mtendaji ajaye atahudumu kwa muda wa miaka mitano kulingana na Kifungu cha 16 cha Sheria ya TSC.

Pia wanatakiwa kutimiza matakwa ya Sura ya 6 ya Katiba na kuwa na uzoefu wa angalau miaka kumi katika sekta ya elimu, utawala na usimamizi, utawala wa umma, rasilimali au usimamizi wa fedha.