Oparanya apinga Arati, Oburu kuhusu suala la kugawana maeneo na UDA
MJADALA kuhusu mpango wa kugawana maeneo ya kisiasa unaendelea kuibua tofauti ndani ya ODM, huku Waziri wa Vyama vya Ushirika Wycliffe Oparanya akipinga pendekezo hilo na kuunga mkono ushindani wa kirafiki kati ya ODM na UDA katika uchaguzi wa 2027.
Mpango huo, ambao unalenga vyama washirika kukubaliana kutowasilisha wagombea dhidi ya wenzao katika maeneo fulani, ni miongoni mwa masuala tata katika mazungumzo ya makubaliano ya kabla ya uchaguzi kati ya ODM na UDA.
Bw Oparanya, anayesemekana kuwa miongoni mwa wanaoweza kuchaguliwa kuwa mgombea mwenza wa Rais William Ruto, alisema ODM na UDA zinapaswa kuruhusu ushindani katika maeneo ya uchaguzi badala ya kuyagawana.
“Tunataka vyama hivi viwili vikubwa viunde serikali imara mwaka ujao kwa sababu kila kimoja kinapaswa kuwa na nguvu. Tumekubaliana kuhusu kiongozi na tunataka ODM na UDA ziwe na nguvu hapa na kule tushindane kwa urafiki,” akasema Bw Oparanya katika uwanja wa Mayuba, Kaunti ya Bungoma mnamo Jumamosi.
“Hatutaki ugawaji wa maeneo bali tushindane kwa urafiki kwa sababu sasa tuna baba mmoja. Mshindane huku mkijua kwamba tuna baba mmoja,” akaongeza.
Msimamo wake unatofautiana na ule wa kiongozi wa ODM, Oburu Oginga, ambaye amekuwa akitaka maeneo yanayochukuliwa kuwa ngome za chama yalindwe katika makubaliano na UDA.
“Baadhi ya watu wanasema hatutaki maeneo yatengwe. Ikiwa hamtaki, mnataka nini? Tunataka yatengwe kwa sababu Homa Bay ni eneo letu. Hatutaki UDA Homa Bay,” akasema Dkt Oginga.
Amependekeza maeneo ambako chama kina magavana, wabunge na madiwani wake yahesabiwe kuwa ngome zake moja kwa moja.
Msimamo huo umeungwa mkono na baadhi ya viongozi wa ODM, akiwemo Gavana wa Homa Bay Gladys Wanga na Mbunge wa Homa Bay Mjini Peter Kaluma.
Hata hivyo, baadhi ya viongozi wa ODM wamepinga mpango huo wakisema unaweza kuzuia ushindani wa kisiasa na kupunguza nafasi ya wapiga kura kuchagua viongozi wanaowataka.
Mnamo Aprili, wabunge Millie Odhiambo, Jared Okello, Onyango Koyoo, Phelix Jalang’o na Elisha Odhiambo walipinga ugawaji wa maeneo na kutaka uteuzi wa wagombea ufanywe kwa njia huru na ya haki.
“Tunaihimiza chama chetu kufanya mchujo wa kuaminika kwa sababu tukifanya hivyo hatutahitaji kuwa na wasiwasi kuhusu ugawaji wa maeneo. ODM bado itashinda viti,” akasema Bw Odhiambo.
Mjadala huo pia umeenea Magharibi, ambako Naibu Gavana wa Kakamega Ayub Savula amepinga mpango wa kuzuia vyama kuwasilisha wagombea katika maeneo fulani.
Alisema makubaliano ya serikali pana hayapaswi kutumiwa kuzuia ushindani wa uchaguzi.
“Makubaliano ya Serikali Jumuishi hayapaswi kutafsiriwa kuwa makubaliano ya kunyima vyama vya kisiasa nafasi ya kuwasilisha wagombea. Vyama vinapaswa kushindana” akasema Bw Savula.
Katika ziara ya Rais Ruto Nyanza, suala hilo pia liliibua hisia tofauti. Mbunge wa Uriri Mark Nyamita alisema viongozi wa ODM wanapaswa kuruhusiwa kushindana katika viti vyao bila kuingiliwa na makubaliano ya vyama.
Kwa upande mwingine, Naibu Kiongozi wa ODM Simba Arati alitaka UDA kuachwa nje ya Nyanza, akisema eneo hilo ni ngome ya ODM.