Ruto asema upinzani ‘unampigia debe’ kwa kukosoa miradi yake ya maendeleo
RAIS William Ruto amewajibu viongozi wa upinzani wanaokosoa rekodi yake ya maendeleo akisema kwa kufanya hivyo wanasaidia kuitangaza miradi yake kwa wananchi bila malipo.
Akizungumza mjini Wundanyi, Kaunti ya Taita Taveta, Jumamosi, Rais Ruto alisema ataendelea kutekeleza miradi ya maendeleo kote nchini licha ya madai kuwa baadhi ya miradi hiyo inafaidi maeneo yanayohusishwa naye kisiasa.
“Upinzani wanasema Ruto anajenga barabara kwao. Ni kweli, nitajenga barabara zote na Mungu ananisaidia. Wanaonikosoa wanathibitisha ukweli kwamba nimetekeleza miradi mingi na kwa kufanya hivyo wanaitangaza bure,” alisema Rais Ruto.
Kiongozi huyo alisema yuko tayari kukosolewa mradi tu aendelee kutimiza ahadi zake za maendeleo kabla ya kumalizika kwa muhula wake wa kwanza.
Kauli hiyo ilitolewa wakati Rais alipoanza ziara ya maendeleo katika eneo la Pwani, ambapo ameelekeza juhudi zake kwenye miradi ya barabara, elimu na umiliki wa ardhi.
Akiwa Wundanyi, Rais alishangazwa na hali mbaya ya moja ya barabara katika eneo hilo akisema alielezwa kuwa ilikuwa katika hali nzuri.
“Salala! Balaa kubwa,” alisema baada ya kuona hali ya barabara hiyo na kuahidi kuwa serikali itachukua hatua za haraka kuiboresha.
Rais pia aliahidi kushughulikia tatizo la wakazi wanaoishi kama maskwota katika Kaunti ya Taita Taveta kwa kuharakisha utoaji wa hati miliki za mashamba.
Alisema wiki hii serikali itatoa hati miliki 20,000 kwa wakazi wa kaunti hiyo na kuongeza kuwa kabla ya uchaguzi wa 2027 atarejea kutoa hati kwa wale ambao hawatafaidika katika awamu ya kwanza.
“Hatupaswi kuendelea kuishi kama maskwota katika ardhi ya mababu zetu,” alisema.
Katika ziara hiyo, serikali inatarajiwa kusambaza karibu hati miliki 200,000 katika kaunti sita za Pwani kama sehemu ya juhudi za kutatua migogoro ya ardhi ya muda mrefu.