TUME ya Kuajiri Walimu nchini (TSC) imewataka walimu kote nchini kukumbatia maendeleo endelevu ya kitaaluma ili kuimarisha utendakazi wao wanapofunza CBE.

Mwenyekiti wa TSC, Dkt Jamleck Muturi alisema mabadiliko katika Elimu ya Msingi yanawahitaji walimu ambao sio tu wenye ujuzi bali pia wenye maadili, wabunifu na wanaoweza kukumbatia mabadiliko.

Dkt Muturi aliwataka walimu kukumbatia mfumo wa Maendeleo ya Kitaaluma ya Walimu (TPD) uliotangazwa na TSC ili kuhakikisha wana uwezo wa kuoanisha ujuzi wao na matakwa ya kisasa ya elimu.TPD ni programu za lazima.

Awali, walimu wakiongozwa na vyama vyao vya wafanyakazi walipinga mpango huo.

Mpango huo unalenga kuwapa walimu fursa za maendeleo endelevu ya kitaaluma. Alikuwa akizungumza kwenye kongamano la Chama cha Wakuu wa Shule za Msingi nchini (KEPSHA) mjini Mombasa jana.