WAKENYA 18 wamerejeshwa nchini kutoka Urusi, baadhi yao wakiwa na majeraha mabaya baada ya kushiriki katika shughuli za kijeshi.

Hali hii imesababisha Serikali ya Kenya kuvuta zaidi ya mashirika ya uajiri yaliyochangia kuwapeleka Urusi.

Aidha, kuna mazungumzo na Ukraine ili kuhakikisha Wakenya waliokamatwa kama wafungwa wa vita wanarudishwa nyumbani salama.

Ripoti zinaonyesha kuwa angalau Wakenya 82 wako kwenye shughuli za kijeshi za Urusi, kadhaa wamefariki, wengine wametekwa, huku wengine wakiishi mbali na nyumbani baada ya kulaghaiwa wakidhani walikuwa wamepata kazi halali.

Ripoti zinaonyesha kuwa Wakenya hao wako katika miji mbalimbali ikiwa ni pamoja na Belgorod, Istra (Kituo cha Mamluki wa Wagner), Saint Petersburg, Rostov-On-Don, na maeneo mengine yasiyoelezeka.

Wakenya 18 waliorejeshwa nyumbani walipata Hati za Usafiri za Dharura na wamepokelewa salama nchini.

Kati yao ni Benson Osomo Osieko, Shaquille Wambo, Pius Mwika, Derrick Njaga, Kevin Kariuki Nduma, George Rimba Mwagona, Vincent Odhiambo Awiti, Wilson Mwaoka Mwanyalo, Orima Jobick Otieno, Daniel Moogi, Daniel Muriuki, Chitsangi Matano Athman, Newton Maliro, Charles Lengine, John Ngeru Kariuki, Stanley Mungai, Brian Kimutai na Michael Barasa.

Mkuu wa Mawaziri, Musalia Mudavadi, amesema kuwa Serikali ina kitengo cha ushauri na msaada wa kisaikolojia kwa waliorejeshwa, familia zao, na Wakenya wengine walio katika hatari. Waliorejeshwa na wengine wenye matatizo yanayofanana watapitia mpango wa kuwarudisha katika maisha ya kawaida.

Tangu kuanza kwa mgogoro wa Urusi–Ukraine mwaka 2022, Waafrika wamekuwa wakiajiriwa katika jeshi la Urusi. Ripoti zinaonyesha Wakenya zaidi ya 200 wanaweza kuwa wameajiriwa, na mitandao hii bado inafanya kazi Kenya na Urusi.

Mudavadi amesisitiza kwamba vijana wanaopata fursa za kazi nje ya nchi washauriane na Wizara za Masuala ya Kigeni na Kazi ili kuthibitisha uhalali wa nafasi hizo. Aidha, mashirika yote ya ajira lazima yajisajili na kuthibitishwa na Mamlaka ya Ajira ya Taifa (NEA), huku yasiyo halali yakikabiliwa na adhabu.

Balozi wa Kenya nchini Urusi, Peter Mutuku Mathuki, amesema kuwa ubalozi unaendelea kushirikiana na Wakenya walioko katika hatari ili kuwarudisha salama.