WATAALAM wa afya wameitaka Wizara ya Afya kuharakisha msako wa watu 15 ambao hawajapatikana, licha ya kuwa miongoni mwa watu 128 waliotangamana na mgonjwa wa kwanza wa Ebola nchini Kenya.

Wizara ilisema kufikia Oktoba 13, watu 113 walikuwa wamepatikana, wakiwemo 108 waliowekwa karantini nchini Kenya na wengine watano walio nje ya nchi. Haijafichua waliko watu 15 ambao hawajapatikana.

Wasiwasi huo umeongezeka baada ya Kenya kuthibitisha kisa cha pili cha Ebola Oktoba 14. Mgonjwa huyo, mwanamume wa miaka 39 na jamaa wa karibu wa mgonjwa wa kwanza aliyefariki, alianza kuonyesha dalili akiwa karantini.

Mtaalamu wa magonjwa na mtafiti wa afya ya umma Dkt Ahmed Kalebi alisema kuwapata watu hao ni kipaumbele cha dharura ili kuzuia maambukizi zaidi.

Alionya kuwa ikiwa bado wako miongoni mwa wananchi, wanaweza kuwaweka wengine hatarini. Alisema kila mtu aliyekutana na wagonjwa hao anapaswa kufuatiliwa kwa siku 21.

Profesa Shem Otoi, mtaalamu wa hali ya kuenea kwa magonjwa katika Chuo Kikuu cha Daystar, alisema kisa cha pili kinaonyesha kuwa huenda maambukizi yamevuka kutoka kwa mgonjwa wa kwanza hadi kwa mtu mwingine.

Alitaka watu hao 15 wapatiwe tathmini ya hatari  na kuwekwa karantini inapohitajika.

Mkurugenzi Mkuu wa Afya Dkt Patrick Amoth alisema timu za afya zinawachunguza watu walioweza kukutana na mgonjwa wa pili, wakiwemo wahudumu wa afya na wafanyakazi wa karantini.

Wataalamu pia wametaka wizara itoe taarifa  kila siku kuhusu watu walio karantini, waliopimwa, waliopata dalili na waliomaliza ufuatiliaji.

Dkt Kalebi alisema kimya cha serikali kinaweza kuchochea uvumi na kupunguza imani ya wananchi.

Profesa Omu Anzala, mtaalamu wa virusi na mwanachama wa jopokazi ya kitaifa kuhusu Ebola, alisema wananchi wanahitaji kuhakikishiwa kila siku ili wasiwe na hofu.

Wataalamu hao pia walisisitiza kufuatwa kikamilifu kwa taratibu za mazishi ya wanaofariki kutokana na Ebola, wakionya kuwa mazishi yanaweza kusababisha maambukizi mengi ikiwa tahadhari hazitazingatiwa.

Wizara imesema kwa sasa hakuna ushahidi wa maambukizi yaliyoenea katika jamii na Kenya inaendelea kuruhusu safari, biashara na mikusanyiko ya umma.