KIONGOZI wa ODM Oburu Oginga jana alimkumbuka kakake mdogo Raila Odinga akisema uhusiano wao wa kindugu hauwezi kuvunjwa na kifo.

Katika ujumbe katika maadhimisho ya mwaka mmoja tangu kifo cha Raila Oburu alisema kuadhimisha siku yake ya kuzaliwa katika tarehe ambayo Raila aliaga dunia kulimkumbusha uhusiano wa kipekee waliokuwa nao.

Oburu alikosa hafla ya kumbukumbu iliyofanyika Migwena, Bondo, kaunti ya Siaya, kwa sababu ya maagizo ya madaktari ya kupumzika.

“Kuadhimisha mwaka mwingine wa kuzaliwa kwangu siku hii kunanifanya kutafakari kwa furaha na huzuni, nikikumbuka kuwa pia ndiyo siku kaka yangu mdogo  mpendwa, Baba Raila Amolo Odinga, aliondoka kwenda kuwa na Bwana,” alisema.

Aliongeza kuwa kuzaliwa kwake na kifo cha Raila kutokea siku moja ni ishara ya uhusiano wa kipekee kati yao.

“Kutengana kimwili hakuwezi kuvunja undugu ulioandikwa mbinguni,” alisema, huku akimtakia Raila pumziko la amani.

Picha za Oburu akikata keki ya siku yake ya kuzaliwa akiwa amezungukwa na familia na marafiki pia zilisambazwa.

Seneta huyo wa Siaya aliwashukuru wake zake, Dkt Ann Oburu na Mama Judith Oburu, wafanyakazi wa Nairobi  Hospital, wanachama wa ODM, wafanyakazi wake wa nyumbani na timu ya Pawaa Centre kwa kumwandalia sherehe ya kushtukiza.

Pia aliwashukuru wanachama wa chama na wafuasi waliomtembelea na kumfariji katika siku hiyo yenye maana mbili kwake.

Kutokuwepo kwake katika kumbukumbu ya Raila kulizua maswali miongoni mwa waliohudhuria, lakini mjane wa Raila, Mama Ida Odinga, aliwahakikishia wananchi kuwa Oburu alikuwa akiendelea vizuri na alikuwa ameshauriwa kupumzika.

“Oburu yuko sawa. Madaktari wamemwambia apumzike na ajiepushe na mkutano wenye vurugu kama huu,” alisema Ida.

Katika hotuba iliyosomwa na Gavana wa Kisii Simba Arati, Oburu alisema alikuwa akifuata maagizo ya madaktari ya kupumzika kitandani na kuepuka shughuli za umma kwa muda ili apone kikamilifu.

Hata hivyo, alisisitiza kuwa mawazo na moyo wake zilikuwa pamoja na wanachama wa ODM waliokusanyika Migwena.

Alimshukuru mdhamini wa ODM, Mzee Joshua Kawino, kwa kumwakilisha katika hafla hiyo na kuwasilisha salamu zake kwa familia na wafuasi wa chama.

Oburu alisema upendo na usaidizi aliopokea ulimfariji katika siku hiyo iliyokuwa na umuhimu mkubwa kwake na kwa familia yake.

Raila aliaga dunia  Oktoba 15, 2025, na kifo chake kikafunga ukurasa muhimu katika siasa za Kenya, ambako alijulikana kwa mchango wake katika mapambano ya demokrasia na mageuzi ya kisiasa.