WATU saba, wakiwemo maafisa wawili wa polisi wa akiba (NPR), waliuawa baada ya gari walimokuwa wakisafiria kushambuliwa na washukiwa wa kundi la kigaidi la Al-Shabaab mjini Mandera Jumanne asubuhi.

Kamanda wa polisi wa Kaunti ya Mandera Robinson Ndiwa, alisema shambulio hilo lilitokea mwendo wa saa moja asubuhi katika eneo la Hagarsu, kwenye barabara ya Mandera-Arabia-Fino-Lafey-Elwak, karibu na mpaka wa Kenya na Somalia.

Alisema waathiriwa walikuwa wakielekea kazini wakati washambuliaji waliokuwa na silaha walipowavizia na kumiminia risasi gari lao.

“Tumepoteza watu saba, wakiwemo maafisa wawili wa polisi wa akiba, baada ya kuviziwa na washukiwa wa Al-Shabaab. Gari lao lilimiminiwa risasi walipokuwa wakielekea kazini,” alisema Bw Ndiwa kupitia simu.

Kamanda huyo alisema sababu ya shambulio hilo bado haijabainika, huku maafisa wa usalama wakianzisha uchunguzi na msako  kuwakamata washambuliaji.

Alisema eneo hilo limekuwa tulivu kwa muda, na kuongeza kuwa maafisa kutoka vitengo mbalimbali vya usalama wameungana kuwasaka washukiwa waliotorokea vichakani baada ya kutekeleza shambulio hilo.

“Bado hatujajua nia ya washambuliaji. Tumeanzisha uchunguzi huku maafisa wa usalama wakifuata waliohusika, ambao walitorokea vichakani vilivyo karibu,” alisema.

Walioshuhudia walisema washambuliaji hao waliokuwa wamejihami kwa silaha nzito walifunga barabara kabla ya kushambulia kwa risasi nyingi gari lililokuwa likipita.

Eneo la Hagarsu limewahi kushuhudia mashambulizi mabaya ya kigaidi. Mnamo Desemba 2, 2014, watu 36 waliokuwa wakifanya kazi katika machimbo ya mawe waliuawa baada ya kushambuliwa na wanamgambo wa Al-Shabaab usiku wakiwa wamelala kwenye mahema karibu na machimbo hayo.

Waathiriwa wote walikuwa wanaume watu wazima.

Shambulio la Jumanne pia linarejesha kumbukumbu za mashambulizi yaliyolenga wafanyakazi na vifaa vya ujenzi wa barabara ya Mandera-Arabia-Lafey.

Mnamo Desemba 22, 2019, washukiwa wa Al-Shabaab walitumia vilipuzi vya kujitengenezea kulipua mitambo ya kampuni ya Abdulahi Khalif katika eneo la Hagarsu Bida.

Mitambo hiyo ilikuwa na thamani ya Sh39.8 milioni.

Hata hivyo, polisi hawajathibitisha iwapo shambulio la Jumanne lilikuwa na uhusiano wowote na mashambulizi ya awali katika eneo hilo.