ALIYEKUWA kiongozi wa Mungiki, Maina Njenga, anajiandaa kuwa mhusika mkuu wa siasa za eneo la Mlima Kenya huku akitangaza nia yake ya kupatia jamii za eneo hilo mwelekeo katika siku zijazo.

Haya yanajiri baada ya uamuzi wa hivi majuzi wa mahakama uliomwondolea tuhuma za kuhusika na makundi ya wahalifu, shtaka ambalo amekuwa akikanusha mara kwa mara.

Bw Njenga anaamini kuwa wakati umefika kwa eneo la Mlima Kenya kuamua mkondo wake wa kisiasa na ameahidi kutoa tangazo kuu mnamo Januari 2025 kuhusu maono yake kwa maslahi ya jamii.

“Ninataka kuwaambia watu wetu kuwa watulivu kwani tunasuka mipango bora zaidi kwao. Tutatangaza mwelekeo ambao nchi inapaswa kuchukua Januari,” akasema Bw Njenga akiwasihi watu wa Mlima Kenya kutopoteza matumaini na kusisitiza kuwa eneo hilo lina viongozi wenye uwezo na ambao wako tayari kujitokeza kuliongoza.

Tangazo lijalo la Bw Njenga linafuatia tamko sawa na la Naibu Rais aliyetimuliwa Rigathi Gachagua na kuangazia ushindani wa kisiasa unaoendelea katika eneo hilo la Mlima Kenya.Tangu uchaguzi mkuu wa Agosti 2022 uliokuwa na ushindani mkali ufanyike, mvutano kati ya Bw Njenga na Bw Gachagua umedhihirika wazi.

Bw Gachagua alipochaguliwa kuwa Naibu wa Rais William Ruto, alimshutumu Bw Njenga kwa kuwahadaa vijana wa eneo hilo na kuwaingiza katika makundi ya wahalifu.Akimjibu, Bw Njenga alidai kuwa Bw Gachagua alikuwa akitumia rasilimali za serikali kuwalenga na kuwahangaisha vijana wa eneo hilo.

Kufuatia ushindi wake wa hivi majuzi katika mahakama ya Nakuru, Bw Njenga anashikilia kuwa mashtaka dhidi yake yalichochewa kisiasa. Katika shambulio lililomlenga Bw Gachagua, alidokeza kwamba wale waliotaka kumwangusha sasa wanakabiliwa na mashtaka.

“Nina furaha kuwa niko huru kwa sababu tuliundiwa njama na baadhi ya watu ingawa wao ndio sasa wanapambana na kesi kama walivyonifanyia,” alisema katika mahojiano ya kipekee na Taifa Leo

.Huku akilenga siasa za Mlima Kenya, Bw Njenga anatafuta uungwaji mkono na vijana ambao anasema kuwa watakuwa muhimu katika uchaguzi wa 2027. Ametoa wito kwa vijana kulinda vitambulisho vyao na kuwa tayari kupiga kura.

“Ninataka kutoa wito kwa vijana wote kwenda kuchukua vitambulisho vyao ili kufanya sauti zao kusikika na kuwa za kuhesabiwa ili wapate mabadiliko wanayohitaji. Tuko nyuma yao na tutawaunga mkono katika mchakato huu,” alisema.

Ingawa aliwania kiti cha Seneti ya Laikipia bila mafanikio kwa tikiti ya KANU katika uchaguzi uliopita wa 2022, hakubainisha ikiwa atawania kiti hicho.Hata hivyo, alisema angali katika muungano wa Azimio la Umoja ambao anaamini kuwa ndio chombo sahihi cha uongozi mbadala nchini Kenya.

‘Niko pamoja na viongozi wengine wa Azimio akiwemo kiongozi wa Wiper Kalonzo Musyoka na kinara wa ODM Raila Odinga, ambao tunaunga mkono kupata kiti cha mwenyekiti wa Tume ya Muungano wa Afrika,’ akabainisha.

Kujitokeza kwa Njenga na Gachagua kuwania ubabe wa siasa za Mlima Kenya , ushindani mkali unatazamiwa katika eneo hilo na nchi kwa jumla.

IMETAFSIRIWA NA BENSON MATHEKA