Umuhimu wa kubadilisha kifaa cha kuoshea vyombo nyumbani
Je, mara ya mwisho kubadilisha kifaa unachotumia kuoshea vyombo ilikuwa lini?
Ni kifaa kinachopatikana jikoni katika kila makazi lakini mdahalo kuhusu kinapaswa kubadilishwa baada ya muda upi, unatofautiana pakubwa kuanzia ‘mara moja kwa wiki.’
“Kinapoanza kunuka, hadi ‘kinapochakaa kabisa.’
Wataalam, hata hivyo, wanasema kifaa cha kuoshea vyombo jikoni kinapaswa kubadilishwa kila siku.
Matumizi ya sifongo yako jikoni yanaelekeza jinsi unavyoishi na kuibadilisha.
Kwa mfano, iwapo utaitumia jikoni mnamosheheni mboga chafu au nyama mbichi, unashauriwa kuitupa baada ya kuitumia kwa sababu sio rahisi kuondoa vijidudu vyote kwenye kifaa hicho.
Ili kutatua mdahalo huu kuhusu kifaa cha kuoshea vyombo jikoni, wanasayansi walitumia sifongo ya kuoshea vyombo kwa vipindi tofauti kuanzia siku moja hadi miezi mitano.
Sifongo hizo zilisafishwa mara kwa mara kwa kutumia kemikali za kuua vijidudu kabla ya watafiti kuchunguza kuwepo kwa vijidudu vyovyote vilivyosalia, wakiongozwa na Dkt Primrose Freestone Mtaalam wa Sayansi kuhusu Vijidudu hatari kiafya.
Matokeo yaliashiria “bakteria kadhaa” kwenye sifongo baada ya kutumika kwa saa 14 pekee – hata baada ya kuosha kwa sabuni ya kuua vijidudu na maji moto.
Sifongo iliyotumika kwa siku tatu “ilikolea” bakteria huku zilizotumika kwa miezi miwili hadi mitatu zikiashiria “kusheheni fangasi.”
Wataalam wanaonya kuwa “aina yoyote ya vijidudu hatari jikoni mwako au chochote kilichotagusana na sifongo yako kitakuwa kwenye sifongo hiyo.”
Hii inajumuisha vijidudu vinavyosababisha sumu ya chakula, homa ya matumbo na vijidudu vingine sugu visivyosikia dawa za kuua bakteria.
Kutokana na matokeo, wataalam wanapendekeza kutumia sifongo mpya kila siku wakihoji “sifongo sio ghali na ushauri wangu ni kuzibadilisha kila siku.”
Kwa kuhofia kiwango cha juu cha bakteria kwenye sifongo, baadhi ya watu wamegeukia kutumia brashi kuosha vyombo jikoni.
Japo ni uamuzi wa busara ikizingatiwa “brashi ni safi zaidi kuliko sifongo” kulingana na wanasayansi, brashi vilevile zinaweza kukusanya vijidudu hatari baada ya muda.