AFYA ya manii huathiriwa na lishe, mtindo wa maisha, na afya kwa ujumla.

Kuna baadhi ya vyakula vilivyothibitishwa kusaidia kuongeza ubora, wingi, kasi, na nguvu ya mbegu za kiume. Baadhi ya vyakula hivi muhimu ni pamoja na:

Karanga na mbegu

Kwa mfano, mbegu za mlozi, walnuts, mbegu za boga, chia, flax seeds. Vyakula hivi vina afya kama vile omega-3 fatty acids, madini ya zinki, na selenium — virutubisho vinavyosaidia kuimarisha mwendo, muundo, na uzalishaji wa manii.

Samaki wenye mafuta

Kwa mfano, samoni, sadini na samaki wa jamii ya bangala. Vyakula hivi vina kiwango kikubwa cha omega-3 ambacho husaidia kuboresha mtiririko wa damu kwenye viungo vya uzazi na kuongeza ubora wa mbegu.

Mayai

Mayai yana protini nyingi na virutubisho kama vitamin B12 ambavyo ni muhimu kwa utengenezaji mzuri wa manii.
Mboga za majani ya kijani:Kwa mfano, spinachi na sukuma wiki. Mboga hizi zina viwango vya juu vya folate (vitamin B9), virutubishi ambavyo ni muhimu kwa afya ya kijeni ya manii.

Matunda yenye vitamini C

Kwa mfano, machungwa, matunda ya beri na papai. Vitamini C huongeza idadi ya manii na hupunguza uharibifu wa seli kutokana na uchafu.

Chokoleti ya asili (Dark Chocolate)

Chakula hiki kina kiwango cha juu cha L-arginine, amino acid inayohusishwa na kuongeza kiasi cha manii na nguvu ya kushika mimba.

Maziwa na bidhaa zake

Maziwa yana vitamini D na calcium ambazo huchangia katika usawa wa homoni na afya ya uzazi.

Nyanya

Nyanya zina kiwango kikubwa cha lycopene, kemikali ambayo imehusishwa na uboreshaji wa mwendokasi wa manii.

Mambo mengine ya kuzingatia

Kunywa maji ya kutosha, epuka vyakula vya mafuta mengi, sukari nyingi, na vyakula vya mkebe. Pia, punguza pombe, epuka uvutaji sigara, na dhibiti msongo wa mawazo.

Kwa ujumla, lishe bora yenye virutubisho sahihi inaweza kusaidia sana kuimarisha afya ya manii.

Lakini pia ni muhimu kuzingatia mazoezi ya mwili, usingizi wa kutosha, na kuacha tabia hatari kwa afya ya uzazi.