Jinsi mchezo wa kamari unavyowalemea Wakristo wengi
KAMARI mara nyingi huchukuliwa kama burudani, huku ikitolewa onyo la “ichezwe kwa uwajibikaji.”
Hii inaweza kuwa sababu ya baadhi ya Wakristo kutokuwa na uhakika kuhusu iwapo wanapaswa kucheza kamari au la.
Hata hivyo, viongozi wa makanisa wamesema kamari ni dhambi, ikionyesha tamaa, kutegemea bahati badala ya Mungu, na utunzaji mbaya wa mali.
Shadrack Kiplang’at alianza kucheza kamari akiwa na miaka 18 mwaka 2015, baada ya kuangalia rafiki wake akicheza katika mechi za soka.
Kwanza ilionekana burudani, lakini hatimaye ikawa uraibu.
“Nilipata mshahara wa Sh15,000, lakini ndani ya siku chache nilipoteza kila kitu. Sikuwa na udhibiti,” anasema.
Kushinda mara moja kulimfanya kuendelea kushiriki kamari kwa tamaa ya kupata zaidi, hali iliyompelekea kutumia muda wake wote kufuatilia mechi.
Uraibu huu ulivunja nafsi yake, akahisi anadanganya Mungu.
Mnamo Desemba 2023, alikoma kabisa baada ya kufuta akaunti zake za kamari. “Anza kwa kuamua unataka kuacha. Hata unapoomba, kama hauko tayari, hauwezi kuacha,” anasema.
Kwa upande wake, Solomon Shanana, mwalimu Mkristo, bado hawezi kuacha kamari.
“Kamari ni dhambi, lakini kutokana na gharama ya maisha, wengine huiona kama njia ya kupata pesa za familia,” anasema. Hata baada ya kujaribu kuacha, mara kwa mara anarudi kwenye beti, hususan kwa kuona marafiki wake wakiingiza mapato.
Viongozi wa Kanisa wanaeleza kuwa kamari ni hatari kiroho.
Askofu Kenneth Muruthi wa PCEA Marsabit anasema Biblia haina maneno ya moja kwa moja kuhusu kamari, lakini inaonyesha kuwa tamaa ya pesa na tamaa ya haraka ni hatari.
“Kamari inachochea kutoridhika na kutegemea bahati badala ya Mungu,” anasema. Hii inaweza kupelekea madeni na kujitenga na familia au kanisa.
John Ng’ang’a, mwandishi Mkristo, anasema kamari ni dhambi na hatari kiroho.
“Ikiwa kila mtu atacheza kamari, Wakenya wengi wangekosa chakula kwa sababu wakulima hawatafanya kazi. Mungu anataka tuwe na matokeo ya bidii yetu,” anasema. Ng’ang’a anabaini kuwa kamari hupoteza hisia za kiroho na kuathiri vijana, akitaja visa vya mauaji kwa kujitoa uhai na madeni makubwa.
Tom Otieno, kasisi wa kanisa Kiangilikana, anasema kamari ni dhambi kwa tabia.
“Kila kitu ni halali, lakini si kila kitu kinanufaisha. Kamari inasababisha kutegemea bahati, tamaa ya pesa haraka, na majonzi kwa kupoteza fedha,” anasema.
Anaeleza kuwa hatua za kimsingi kama kuomba, kubadilisha marafiki, kudhibiti mapato na kutumia msaada wa wataalamu ni muhimu kupona uraibu wa kamari.
Wote wanakubaliana kuwa Kanisa limefanya kidogo kuelimisha waumini kuhusu uraibu huu.
Otieno anasisitiza: “Kukosoa tabia si sawa na kuadhibu watu. Kanisa linapaswa kutoa elimu, msaada, na nafasi salama kwa wanaotekwa na uraibu huu.”
Kwa hakika, kamari ni dhambi kwa Wakristo kwani inaonyesha tamaa, kutegemea bahati badala ya Mungu, na utunzaji mbaya wa mali.
Kwa viwango vya Mungu, kamari haiwezi kuhalalishwa.