MASHIRIKA ya serikali yanachunguza kitu cha ajabu kinachosemekana kuanguka kutoka angani na kutua katika kijiji cha Nyabiosi, Gesima kaunti ya Nyamira Jumatano asubuhi.

Kifaa hicho kilichofanana na kifaa cha kielektroniki kilipatikana nyumbani kwa Bw Gisore Atura na kilikuwa kimefungwa kwenye mfuko wa nailoni unaoonekana uwazi.

Kifaa hicho kilikuwa na kipande kirefu chembamba cha waya wa shaba wa takriban mita nane ambacho kilikuwa kimeunganishwa kwenye ubao mdogo wa pikipiki uliokuwa na betri ya simu ya mkononi.

Baada ya ugunduzi wake, wakazi wa kijiji hicho waliingia katika hali ya hofu baada ya kushuku kuwa ni kifaa cha kulipuka.

Walipaza sauti.

“Niliamka Jumatano asubuhi na baada ya kufanya kazi chache, nilienda upande wa pili wa boma langu na kujikwaa na kitu cha ajabu ambacho sijui ni nani aliyekipanda hapo. Niliingiwa na hofu. Tulishuku kuwa kilikuwa kimeanguka kutoka angani na kumfahamisha chifu wa eneo letu ambaye naye alifahamisha polisi,” Bw Gisore alisema.

Timu ya mashirika mengi kutoka Kaunti Ndogo ya Masaba Kaskazini iliitikia kwa haraka simu hizo na kuelekea nyumbani kwa Bw Gisore.

Walilinda eneo la tukio na baadaye wakafahamisha maafisa wa Kitengo cha Kutupa Mabomu (FBDU) kutoka Kisumu ambao walifika na kuchukua kitu hicho kwa uchambuzi zaidi.

Chifu wa eneo la Mochenwa Simon Mosioma alithibitisha kisa hicho na kuongeza kuwa uchunguzi wa awali ulionyesha kuwa kifaa hicho kinaweza kuwa kifaa cha kukusanya data ya hali ya hewa.

“Ilionekana kama kifaa kinachokusanya data na kingeweza kuanguka kutoka angani. Hata hivyo, uchambuzi zaidi utafanywa na wataalamu ili kubaini kifaa hicho kilikuwa ni nini,” Bw Mosioma alisema.

Kisa hicho kinajiri mwaka mmoja baada ya kitu kingine cha ajabu kutua katika kijiji cha Mukuku, Kaunti ya Makueni.

Kitu hicho baadaye kilitambuliwa kama pete ya kutenganisha kutoka kwa roketi.