JUMA hili tunaangazia uandishi wa insha ya tawasifu. Tawasifu ni maelezo yanayoandikwa na mtu binafsi kuhusu maisha na sifa zake.

Tawasifu huandikwa kwa lugha nathari au kwa masimulizi ya mfululizo.

Huangazia kuzaliwa kwa mwandishi, aghalabu familia yake, alikosomea, kwa kurejelea viwango mbalimbali, wakati aliposoma, alichosomea katika ngazi hizo, na alivyofaulu katika tathmini mbalimbali.

Tawasifu pia huangazia tajriba mbalimbali alizonazo, shughuli zake za kujikimu, uhusiano wake na watu: uzuri na ubaya wake, mafanikio yake maishani, pingamizi alizokumbana nazo na mambo mengine muhimu.

Tofauti kuu kati ya tawasifu na wasifu ni kuwa wasifu huandikwa na mtu mwingine kuhusu maisha ya mtu fulani ilhali tawasifu huandikwa na mtu binafsi kuyahusu maisha yake.

Kichwa

Kichwa cha tawasifu huonyesha ni tawasifu ya nani kwa kulitaja jina lake. Hakuna maelezo mengi ambayo hutolewa katika kichwa cha tawasifu isipokuwa tu huko kutambulisha kuwa ni tawasifu yako.

Hata hivyo kichwa aghalabu huandikwa kwa herufi kubwa, kupigiwa mstari na kisitoneshwe. Si lazima kiwe na zaidi ya maneno sita. Mfano wa kichwa: TAWASIFU YANGU

Utangulizi

Katika utangulizi wa tawasifu, mwandishi hueleza usuli wake: tarehe, siku na mahali alikozaliwa na familia yake. Utangulizi huu ndio hujenga msingi wa kuandika tawasifu.

Ikumbukwe kuwa tarehe huandikwa kwa maneno si kwa tarakimu. Juma lijalo tutaangazia mwili wa tawasifu.

Baada ya kutoa maelezo ya jumla kuhusu usuli wako, aya zinazofuata huelezea maisha yake kuanzia utotoni.

Maelezo ya utotoni hupewa umuhimu zaidi kwa sababu ndiyo huweka msingi wa utu uzima. Taarifa hizo zinafaa kuakisi kila sifa ya mwandishi wa tawasifu husika.

Fauka ya hayo, maelezo ya kina kuhusu elimu na shule alikosomea pamoja na maeneo aliyokulia huelezwa kwa kina.

Aidha, hueleza mafanikio katika elimu, kazi anayofanya ili kujikimu, tajriba aliyonayo katika kazi husika, taaluma yoyote aliyosomea, hadhi yake ya ndoa na watoto alionao.

Isitoshe, maazimio yake katika maisha, ufanisi wake pamoja na pandashuka alizopitia maishani. Maelezo haya hupangwa kiwakati kama yalivyofuatana.

Haya yote huandikwa kwa njia ya nathari.

Ili kumsisimua msomaji, tawasifu iandikwe ikilenga mambo yenye umuhimu na yafafanuliwe, ikiwezekana kwa kutolewa mifano.

Mikasa ambayo alikumbana nayo na jinsi alivyokabiliana nayo au alivyoathirika hujadiliwa. Ubunifu na matumizi ya mapambo ya lugha pia huhimizwa ili kuipa tawasifu mvuto na mnato.

Hitimisho

Katika kuhitimisha tawasifu, kwa kawaida mtu hujitanua na kujifaragua kwa sifa kemkem kuhusu uzuri wake pamoja na sifa alizopata. Ifanywe hivyo kwa kujikita katika mada.