JUMA lililopita tulikamilisha kuangalia mambo muhimu katika uandishi wa insha ya tawasifu.

Juma hili tutaanza kuangazia uandishi wa insha ya wasifu.

Wasifu ni maelezo ya kina kuhusu mambo, matendo na tabia za mtu na ambayo huelezwa na mtu mwingine.

Wasifu husimulia kuhusu nyanja zote za maisha ya anayeandikiwa. Aghalabu hujikita katika mambo ya ukweli.

Insha ya wasifu huandikwa kwa lugha nathari, yaani ya mfululizo. Kwa kawaida, kabla ya kuandika wasifu, utafiti wa kina hufanywa kumhusu anayeandikiwa.

Mambo ambayo yanaweza kumwathiri au kumwaibisha huachwa. Yanayoandikwa katika wasifu na mwanafunzi hata kama ni ya kubuni, lazima yaweze kuaminika kwa sababu wasifu hujengwa kwenye misingi ya ukweli na uhalisia.

Muundo

Kichwa cha wasifu hutaja ni wasifu wa nani. Kichwa kiandikwe kwa herufi kubwa na kupigiwa mstari.

Kitone kisiwekwe mwishoni mwa kichwa cha wasifu.

Kwa mfano: WASIFU WA NDUGU YANGU YOHANA

Mwili wa wasifu hutangulia kwa kumtambulisha anayerejelewa.

Hutaja majina kamili ya mhusika, alikozaliwa, utoto wake, alikokulia na kusomea, familia au wazazi wake, jinsi alivyokua, umri wake, lugha anazozungumza na ujumbe mwingine wowote wa kimsingi.

Maelezo haya hujumuisha aya ya kwanza. Matendo aliyotenda, ushindi, pingamizi alizokumbana nazo, tajiriba yake, hali yake ya ndoa na familia yake.

Kumbuka kuwa katika mtihani, maudhui au mambo yatakayosimuliwa au kuandikwa katika wasifu lazima yazingatie mada au swali lililoulizwa.

Aidha, mambo yanayoandikwa katika wasifu yanafaa yatiririke kiwakati. Yaliyotokea mwanzo, kama kuzaliwa, yaje mwanzoni na kutiririka jinsi yalivyotokea, kutegemea miaka.

Wasifu huandikwa katika wakati uliopita kwa sababu yanayosimuliwa huwa tayari yametokea.

Wasifu huandikwa katika nafsi ya tatu na wakati uliopita.

Iwapo anayeandikiwa wasifu yuko hai, wakati uliopo, hali ya kuendelea au hali timilifu huweza kutumiwa, hasa katika hitimisho.

Kwa mfano… Amina ameendelea na kuwa kielelezo bora kwa wasichana wote.

Hata kama wasifu hujikita kwenye ukweli, ni lazima ukweli wenyewe uandikwe kwa njia ya kumvutia msomaji.

Unaweza kuwavutia wasomaji kwa kutoa mifano ya baadhi ya mambo maarufu ambayo yalitendwa na mhusika.

Hitimisho

Aya ya mwisho ndiyo huhitimisha wasifu. Katika kuhitimisha, mwandishi huelezea umaarufu wa anayeandikiwa na sababu za mtu huyo kuhitaji utambulisho au sifa alizopewa.

Zoezi

Andika wasifu wa ndugu yako anayeandaa hafla ya kuchangisha pesa za kujiunga na chuo kikuu ughaibuni kusomea taaluma ya utabibu.