JUMA hili tutaangalia uandishi wa mwili wa insha ya tahakiki. Tahakiki ni maandishi yanayoandikwa kwa nia ya kuchambua kazi fulani ya kisanii

Mwili wa tahakiki hufafanua au hujadili kwa kina maudhui yanayojitokeza katika kitabu au kazi ya kisanii na jinsi yanavyochangia kukuza dhamira ya mwandishi.

Maelezo kuhusu wahusika na jinsi wanavyosaidia katika kukuza dhamira huweza kuelezwa. Wakati mwingine ufafanuzi hutolewa kuhusu mgogoro mkuu katika kitabu kwa kulinganua na kulinganisha na migogoro katika vitabu vingine.

Mwili pia huweza kueleza mtazamo wa kijumla kuhusu mtindo uliotumika katika kitabu. Unaweza kufanya hivi kwa kunukuu baadhi ya sehemu zinazotoa kielelezo bora cha fani hiyo, ama kwa kueleza jinsi mwandishi alivyodumisha msuko wa kazi yake.

Vilevile, mbinu zilizotumiwa katika kuwasilisha kazi yenyewe zinaweza kufafanuliwa kwa kina.

Fauka ya hayo, mwili hutoa maelezo zaidi kuhusu kitabu chenyewe – Je, kinavutia? Kinaweza kukumbukwa? Kinaburudisha? Je, kimejitosheleza kimaudhui ama kimeacha baadhi ya maudhui ama kimepungukiwa kimaudhui? Maudhui yaliyoachwa yangeweza kushughulikiwa kwa njia ipi?

Hili linaweza kufanywa kwa kurejelea vitabu vingine. Hatimaye, mwili huangazia kwa kina athari ya kitabu kwa hadhira lengwa – maudhui katika kitabu hiki yana athari gani?

Je, yamebadilisha vipi mtazamo kuhusu mada fulani? Yana uhusiano gani na mazingira husika? Je, yanajikita vipi katika mandhari lengwa? Katika hitimisho, tahakiki hutaja umuhimu wa kitabu kwa ujumla na ikiwezekana, ushauri hutolewa kuhusu kitabu hicho.

Zoezi: Andika tahakiki ya riwaya ya ‘Nguu za Jadi’.

Na Simon Ngige, Alliance High School