Wakazi wa Nairobi wamekuwa wakishuhudia ongezeko lisilo la kawaida la joto, hali iliyozua maswali kuhusu iwapo jiji  linapitia wimbi la joto kali.

Idara ya Hali ya Hewa Kenya (KMD) sasa imejifafanua dhana ya wimbi la joto, hasa katika muktadha wa Kenya.

Katika taarifa yake Jumapili, Februari 1, Idara ilieleza kuwa wimbi la joto nchini Kenya hufafanuliwa kama kipindi cha siku tatu au zaidi mfululizo za joto kali kupita kiasi wakati wa mchana, ambapo viwango vya joto hupita kiwango kilichobainishwa kwa eneo husika.

Viwango hivi huamuliwa kwa kuzingatia rekodi za kihistoria za halijoto pamoja na data za kiafya kutoka hospitalini.

Kwa mujibu wa KMD, kiwango cha wimbi la joto jijini Nairobi ni halijoto ya juu ya kila siku ya nyuzi joto 32  au zaidi kwa siku tatu mfululizo. Jijini Kisumu, kiwango hicho ni  nyuzi joto 37, huku Mombasa kikiwa ni nyuzi joto 36.

Kwa kuzingatia data ya hivi punde ya hali ya hewa, Nairobi kwa sasa inashuhudia joto la wastani na linalostahimilika, huku halijoto ya mchana ikiwa kati ya nyuzi joto 28–29.

Hali hii ni ya kawaida kwa msimu huu na iko chini ya kiwango cha nyuzi joto 32 kinachotambulika kama wimbi la joto.

Kulingana na mwenendo huu, Nairobi haijakumbwa na wimbi la joto kwa sasa kwa kuwa viwango vya joto kali havijaendelea kwa siku tatu mfululizo au zaidi.

Badala yake, jiji  linapitia joto la kawaida la msimu, huku Idara ya Hali ya Hewa ikifafanua kuwa hakuna tahadhari zozote za wimbi la joto zilizotolewa popote nchini.

Iwapo Nairobi ingekuwa inapitia wimbi la joto lisilo la kawaida, dalili zingekuwa wazi kwani shughuli za kila siku kama vile kazi za nje, usafiri na shughuli za kimwili zingekuwa ngumu zaidi kuliko kawaida.

Makundi yaliyo hatarini zaidi ni watoto, wazee, wanawake wajawazito na watu wanaougua magonjwa sugu.

Makundi haya yangekuwa katika hatari kubwa ya kupata uchovu wa joto na upungufu wa maji mwilini, huku wengi wao wakipata dalili kama kizunguzungu, uchovu, kichefuchefu na maumivu ya kichwa.

Katika hali mbaya zaidi, baadhi ya watu wangepata kiharusi cha joto kwani joto kali huweka shinikizo kubwa kwa moyo na mapafu.

Hali hii huongeza hatari kwa watu wanaougua pumu, maradhi ya mapafu ya muda mrefu (COPD) na magonjwa ya moyo.

Ulimwenguni, baadhi ya nchi hukumbwa na mawimbi ya joto kali zaidi. Mnamo 2023, kwa mfano, maeneo kadhaa barani Ulaya yalishuhudia halijoto ikipanda hadi zaidi ya  nyuzi joto 40 kwa siku kadhaa mfululizo, hali iliyopelekea vifo kadhaa vilivyohusishwa na joto kali.