Kuna msemo maarufu kwamba maneno yanaweza kuumiza zaidi ya upanga. Hii ni kweli hasa kwa mwanamke. Mwanamke ni kiumbe wa hisia, moyo wake umeundwa kupokea na kuchakata maneno kwa undani sana.

 Tofauti na mwanaume ambaye mara nyingi hutazama vitendo zaidi, mwanamke huweka uzito mkubwa kwa kile anachoambiwa, jinsi anavyoambiwa, na sauti inayotumika kusema hayo maneno.

Maneno yanaweza kumjenga au kumharibu kabisa mwanamke. Maneno mazuri kama vile “Nakupenda”, “Nimekumiss”, au “Samahani” hujenga mazingira ya upendo, uaminifu, na usalama wa kihisia.

 Mwanamke huyaweka moyoni, hukumbuka aliyeyasema, mahali alipoambiwa, na hata sauti iliyotumika. Hali hii inaonyesha jinsi anavyoheshimu na kuthamini mawasiliano ya kihisia.

Wanasaikolojia wanasema kwa upande mwingine, maneno ya kuudhi, dhihaka, au ya hasira huweza kuacha jeraha la ndani lisiloonekana kwa macho.

 Mwanamke anaweza kulia, kupoteza usingizi, au hata kupatwa na msongo wa mawazo kwa sababu ya sentensi moja mbaya aliyoambiwa. Maneno mabaya huweza kudhoofisha kujiamini kwake, kuvunja moyo wake, na hata kuathiri namna anavyojiona.

Ni jambo la kusikitisha kuona wanaume wengi wakitumia maneno mazito bila kujua madhara yake kwa mwanamke.

Ahadi zisizotekelezwa, lugha ya kejeli, ukimya wa makusudi, na matumizi ya majina ya mapenzi kwa wanawake wengine, ni baadhi ya mambo yanayoumiza sana mwanamke.

Mara nyingi mwanamke hushikilia ahadi moja ndogo tu, kama vile kuahidiwa ndoa, na akiambulia kuachwa, maumivu yake huwa makubwa kuliko inavyotarajiwa.

Kwa wanawake walio kwenye ndoa, maneno ni kiini cha mawasiliano ya ndani. Mazungumzo ya usiku chumbani, sifa ndogo ndogo, na maneno ya kutuliza baada ya siku ndefu huwa na maana kubwa sana.

Kukosa hayo ni sawa na kuishi bila hewa ya kihisia. Mwanamke anahitaji kuthibitishiwa kwa maneno kuwa anapendwa, anahitajika, na anathaminiwa.

“Kwa hivyo, ni muhimu kwa wanaume kufahamu kwamba maneno yao yanaweza kubeba uzito mkubwa. Kila neno linaweza kuwa daraja la kuunganisha mioyo au ukuta wa kutenganisha nafsi.

 Kabla ya kuzungumza, fikiria. Kabla ya kutoa ahadi, jiulize kama unaweza kuitimiza. Kabla ya kusema “nakupenda”, hakikisha unamaanisha na uko tayari kuthibitisha kwa vitendo,”asema mwanasaikolojia Fenny Wanjiru.

Anasema kwamba mwanamke anaweza kukumbuka maneno uliyomwambia miaka mingi iliyopita.

“Hivyo, ni jukumu la kila mwanaume kutumia ulimi wake kwa hekima. Tumia maneno ya kuponya, kutia moyo, na kujenga. Usitumie maneno kuvunja moyo, kuumiza au kusababisha maumivu yasiyo na sababu,” asema.

Maneno, asema, ni silaha yenye nguvu. “Yanaweza kumpa mwanamke amani au kumwacha na machungu yasiyopona. Chagua kuyatumia kwa hekima, huruma na upendo kwa sababu kwa mwanamke, maneno si maneno tu, ni ujumbe.”