KABLA ya mwanaume na mwanamke kufunga ndoa, kuna hatua kadhaa za kisheria zinazopaswa kufuatwa. Miongoni mwa hatua hizo ni kutoa taarifa rasmi ya nia ya kufunga ndoa.

Kwa mujibu wa Sheria ya Ndoa, wahusika wanaokusudia kufunga ndoa wanapaswa kutoa taarifa kwa Msajili wa Ndoa pamoja na msimamizi wa mahali ambapo sherehe ya ndoa itafanyika.

Taarifa hiyo inapaswa kutolewa angalau siku 21 lakini si zaidi ya miezi mitatu kabla ya tarehe iliyopangwa ya ndoa.

Taarifa hiyo haiishii tu kutaja kwamba wawili hao wanataka kuoana. Inapaswa kuwa na maelezo muhimu kuhusu wahusika.

Miongoni mwa taarifa zinazotakiwa ni majina na umri wa wanaotarajia kufunga ndoa, pamoja na maeneo wanakoishi kwa kawaida.

Pia, majina ya wazazi wao yanapaswa kutajwa iwapo wazazi hao wanajulikana na bado wako hai, pamoja na maeneo wanakoishi kwa kawaida.

Wahusika pia wanapaswa kutangaza kuwa hawako katika uhusiano wa kindugu uliokatazwa kisheria.

Hali ya ndoa ya kila mmoja pia inapaswa kuwekwa wazi. Ikiwa mmoja wao amewahi kuachana na ndoa kupitia talaka, anapaswa kuwasilisha nakala ya amri husika ya talaka.

Ikiwa mmoja ni mjane au mjane wa kiume, anapaswa kuwasilisha nakala ya cheti cha kifo cha mwenzi wake wa awali.

Taarifa hiyo pia inapaswa kuonyesha tarehe na mahali ambapo sherehe ya ndoa itafanyika.

Muhimu zaidi, taarifa hiyo inapaswa kutiwa saini na wote wawili wanaokusudia kufunga ndoa.

Baada ya Msajili wa Ndoa kupokea taarifa hiyo, anatakiwa kuichapisha kwa njia iliyowekwa kisheria katika eneo ambalo ndoa hiyo itafanyika.

Hatua hii inawapa watu wanaofahamu kuwa kuna kikwazo cha kisheria kwa ndoa hiyo nafasi ya kutoa pingamizi.

Mtu anayefahamu kuwepo kwa kikwazo anaweza kuwasilisha pingamizi kwa maandishi kwa Msajili wa Ndoa au msimamizi wa mahali ambapo taarifa ya nia ya ndoa imebandikwa.

Anayepinga anapaswa kutaja jina lake, uhusiano wake na mmoja wa wanaotarajia kuoana na sababu za kupinga ndoa hiyo.

Hata hivyo, mtu aliyewasilisha pingamizi anaweza kuliondoa baadaye kwa kutoa taarifa ya maandishi.

Kwa hivyo, kwa wanaopanga kufunga ndoa, kutangaza nia si suala la sherehe pekee, bali ni hatua muhimu katika mchakato wa kisheria wa kufunga ndoa. Ni vyema wahusika kufahamu masharti haya mapema ili kuhakikisha maandalizi yao yanafuata utaratibu unaotakiwa.