KUFIKISHA miaka 30 nchini huja na presha si haba na maswali tele.

Umejenga nini? Una kazi? Una biashara? Umeoa au umeolewa? Uko wapi kifedha?

Kwa baadhi ya vijana, maswali haya huwa chanzo cha kujilinganisha na wenzao wanaoonekana kufanikiwa zaidi, hasa katika enzi ambayo mitandao ya kijamii imefanya maisha ya watu yaonekane kana kwamba kila mtu anaendelea isipokuwa wewe.

Kwa wengine, miaka 30 huwa wakati wa kutulia, kuangalia walikotoka na kujiuliza ni hatua gani wanataka kuchukua katika miaka inayofuata.

Hivyo ndivyo mjasiriamali Zedekiah Mukoya, 30, anavyoutazama umri huo.

Mukoya, ambaye kampuni yake ya Wave 360 Africa ilitambuliwa hivi majuzi na serikali kwa mchango wake katika sekta ya ubunifu na kidijitali, anasema kutimiza miaka 30 ni fursa ya kutafakari safari ya maisha.

“Ni wakati wa kutafakari kuhusu hatua uliyopiga kimaisha, iwe ni kujijenga kitaalamu, kuwa na familia na kujenga maisha uliyotaka,” anasema.

Lakini kufikisha umri huo hakumaanishi mtu amekuwa na majibu yote.

Kwa vijana wanaojiajiri, safari inaweza kuhusisha vipindi vya kupata wateja kwa shida, kukabiliana na gharama za biashara, kulipa wafanyakazi na wakati mwingine kuanza upya baada ya mipango kutokwenda sawa.

Hali hiyo ni sehemu ya uhalisia wa vijana wengi wanaojaribu kujijenga katika mazingira ambayo kupata ajira na kuanzisha biashara yenye faida si jambo rahisi.

Mukoya alianzisha Wave 360 Africa mwaka 2022, baada ya kuwa na uzoefu katika sheria na uongozi wa wanafunzi. Kampuni hiyo imekuwa ikijihusisha na mawasiliano, ubunifu, kampeni za kidijitali, matukio na uuzaji nchini Kenya na Uganda.

Anasema safari hiyo imemfundisha umuhimu wa uvumilivu, kujifunza kutokana na makosa na kujenga mahusiano mazuri na watu.

Mbali na kazi, miaka 30 imemfanya pia kutazama upya maisha ya familia na umuhimu wa kusawazisha majukumu ya kazi na maisha binafsi.

Kwa vijana wanaohisi wamechelewa kwa sababu hawajafikia malengo fulani wanapofikisha miaka 30, anasema umri huo haupaswi kuonekana kama mwisho wa safari.

Badala yake, ni hatua nyingine ya maisha ambayo mtu anaweza kutathmini mafanikio yake, kukubali pale ambapo mambo hayakwenda vizuri na kupanga hatua inayofuata.

Kwa Mukoya, hatua hiyo mpya inahusu kuendelea kujenga, kujifunza na kutafuta namna ya kuwa na athari chanya kwa watu walio karibu naye.

“Naingia 30 nikiwa Mkurugenzi Mkuu ambaye bado anajenga, kiongozi ambaye bado anajifunza, rafiki ambaye bado yupo,” anasema.