MWANAMKE ni mtu anayestahili kuonyeshwa mapenzi ya kila aina kumfanya mwanamke akudumishe moyoni.

Siri yenyewe ni tabia ndogo ndogo zinazojenga usalama, heshima, uthabiti, ukaribu na kiroho.

Mwanamke ataka kusifiwa, kusikilizwa, kuheshimiwa, kuchekeshwa, kuonyeshwa kuwa anathaminiwa, na kupewa nafasi yake huku ukimweka karibu.

Zungumza naye zaidi ya mambo ya kimwili na uingie katika ulimwengu wake wa hisia na ndoto.

Wataalamu wa mahusiano wanasema kwamba mwanamke hudumisha mwanaume moyoni sio kwa pesa au ahadi tamu pekee, bali kwa jinsi anavyohisi akiwa naye — usalama, thamani, heshima na ukaribu wa kweli.

Tambua misingi muhimu ya kumfanya mwanamke akupende kwa kina na kukuhifadhi moyoni mwake.

Dkt Miriam Aluoch, Mtaalamu wa Saikolojia ya Masuala ya Mapenzi, anasema kwamba mwanamke hutulia kwa mwanaume anayemsikiliza.

“Jambo la kwanza kumvutia mwanamke na kumfanya athamini mwanamume ni kusikilizwa. Mwanamke anapojua kuwa mpenzi wake ana muda na makini ya kusikiliza maoni, hisia na hofu zake, anaona thamani yake ikithibitishwa na hawezi kumsahau,” asema Dkt Aluoch.

Wanaume wengi, asema, huongea zaidi ya kusikiliza, lakini mwanamke anakumbuka sana mwanaume aliyempa sikio kuliko aliyempa zawadi.

Kusikiliza humjengea mwanamke usalama wa kihisia ambao ni msingi muhimu wa mapenzi ya kudumu.

Kulingana na mshauri wa mahusiano ya mapenzi, Bw Peter Mureithi, heshima na uthabiti ni silaha za mwanaume ambazo hufanya vigumu mwanamke kumsahau.

Kwa mujibu wa Bw Mureithi, mwanamke huhifadhi moyoni mwanaume anayejituma, aliye thabiti na anayejiheshimu.

Hii haimaanishi kuwa tajiri, bali kuwa na msimamo, maono na uwezo wa kusimamia maisha yake.

“Heshima ni kivutio kikuu kwa mwanamke. Mwanaume anayejiheshimu, anayethamini muda wa mwanamke na kumjali katika mambo makubwa na madogo, mara nyingi hafutiki ndani ya moyo wake,” asema.

Bw Mureithi pia anasisitiza kuhusu kuthamini mchango wa mwanamke, iwe ni maneno ya ushauri, msaada wa kijamii au kazi za nyumbani. Mwanamke anayehisi kuchukuliwa kwa uzito hupenda kwa undani.

Mtaalamu wa masuala ya maadili ya familia, Bi Salma Ramadhan asema ulinzi wa kihisia humfanya mwanamke ajitoe zaidi kumuenzi mwanamume.

Bi Salma anabainisha kuwa sehemu kubwa ya upendo wa mwanamke hutoka kwenye hisia za usalama.

“Ulinzi huu si wa kuganda kwa wivu au udhibiti, bali wa kumuonyesha kuwa yeye ni wa pekee.

“Wanaume wengi hudhani kulinda ni kumzuia mwanamke. Sivyo. Mwanamke huhisi salama pale mwanaume anapomuonyesha wazi kuwa hana mwanamke mwingine na anatetea heshima yake hata akiwa mbali,” asema Bi Salma.

Ukaribu huu hujengwa kwa kugusa kwa upole, kushikana mikono, kukumbatiana na kufanya mwanamke ahisi kukubalika na kupendwa.

Dkt Aluoch anaeleza kuwa wanawake wengi huangalia upande wa kiroho na maadili ya mwanaume kama kipimo cha utulivu wa maisha.

“Mwanaume mwenye ukwasi wa kiroho, anayeheshimu Mungu au misingi ya maadili aliyo nayo, hutuma ujumbe kwamba ana msingi wa maisha. Mwanamke husikia amani moyoni na kujitoa zaidi,” anasema.

Dkt Aluoch pia anasisitiza umuhimu wa mwanaume kuchukua uongozi wa kihisia, kama vile kuanzisha mazungumzo ya kina, kuuliza hali ya mtoto au watoto wa mwanamke (iwapo wako), hofu zake na ndoto zake, na kushiriki mipango ya maisha pamoja.

“Mwanamke hawezi kusahau mwanaume anayemfanya ajihisi salama, kuthaminiwa, kuheshimiwa na kupendwa kwa kweli,” asema.