Na THOMAS MATIKO

KUNA kichuna kwa sasa anayetrendi kwelikweli baada ya picha zake kuibuka akionekana kuwa kwenye mapozi tatanishi na mwigizaji staa Mkenya Lupita Nyong’o.

Ukuruba wao kutokana na picha hizo mbalimbali za hivi karibuni umeishia kuibua tetesi kwamba huenda wawili hao sasa wapo kwenye mahusiano ya kimapenzi. Kwa kifupi, uhusiano wa usagaji.

Hilo limesababisha wengi kutaka kumfahamu kwa uketo Janelle Monae.

Hivi ni nani na anafanya nini na ni vipi amekutana hadi kuishia kuwa na ukaribu na nyota Lupita?

Chimbuko

Janelle ni rapa wa Kimarekani, mtungaji mashairi, produsa na pia mwigizaji. Kwa sasa kasaini katika lebo ya Atlantic Records lakini pia anamiliki lebo yake kwa jina Wondaland Arts Society.

Ana umri wa miaka 33, hivyo ni rika moja kabisa na Lupita aliyemzidi umri na mwaka mmoja pekee.

Usanii wake aliuanza miaka 16 iliyopita alipoachia demo ya albamu yake ya kwanza The Audition.

Miaka minne baadaye 2007 aliachia EP yake Metropolis Suite (The Chase) iliyoishia kufanya vyema kiasi cha haja. Miaka mitatu baadaye aliachia albamu The ArchAndroid.

Umaarufu alianza kuupata 2011 baada ya kuhusika kwenye wimbo We Are Young ulioishia kuwa ‘hit’. 2013 adondosha albamu nyingine The Electric Lady iliyozidi kumfungulia milango kwenye gemu.

Miaka mitatu baadaye alijitosa katika ulimwengu wa uigizaji akitokea kwenye filamu ya Hidden Figures iliyoifanya vizuri kimauzo kwa mujibu wa Box Office na pia Moonlight iliyoishia kushinda tuzo ya Oscar kwenye Makala ya 89.

Mwaka 2018 aliangusha albamu mpya kabisa Dirty Computer iliyoangukia teuzi mbili kwenye Makala ya 61 ya tuzo za Grammy.

Umaarufu wake unaweza ukawa haujapenyeza sana kote duniani ila hatua ya yeye kupokea teuzi nane katika tuzo za Grammy kufikia sasa, ni habari tosha kwamba huyu anahesabika kuwa nyota.

Maisha ya kibinafsi

Licha ya kuwa ni mwanamke mrembo, kwenye upande wa kimahusiano, anaweza kutoka na mtu wa jinsia yeyote ilimradi tu wamependana.

Mwaka 2018 kwenye mahojiano na jarida la Rolling Stone, alikiri kwamba huwa hana tatizo kuingia kwenye mahusiano na mwanamume au mwanamke ilimradi tu nafsi zao zinaendana.

Hapo awali alihusishwa sana kuwa anatoka na mwigizaji Tessa Thompson kutokana na wao kuonekana mara kwa mara wakila bata katika kumbi mbalimbali za kiburudani. Hata hivyo waliishi kusisitiza kuwa ni marafiki tu huku baadhi ya wadau wakipinga.

Pia amewahi kuhusishwa kutoka kimapenzi na dereva maarufu wa Formula One, Lewis Hamilton.

Usuhuba huo sasa umeonekana kuhamia hadi kwake Lupita na stori iliyopo ni kwamba huenda wakawa na mahusiano.

Hata hivyo ni mtihani mgumu wa kubaini ikizingatiwa kuwa Lupita amekuwa mjanja wa kuficha mahusiano yake huku akiishia kuvumishwa kutoka na mastaa kibao akiwemo Jared Leto, K’naan na sasa Janelle.

Mkwanja wake

Utajiri wake unakadiriwa kufikia dola 6 milioni. Sehemu kubwa ya utajiri wake inasemekana ilitokana na mafanikio ya filamu hizo mbili Moonlight na Hidden Figures. Mwaka jana alitokea kwenye filamu ya tatu Welcome to Marwen.

Ukiachana na filamu, pia kampuni yake ya Wondaland inamwingizia mtaji. Mwaka jana iliingia kwenye mkataba wa usambazaji wa kazi za sanaa na kampuni kubwa ya shughuli hizo Universal Pictures.

Vilevile, anavuta posho kupitia ubalozi wa bidhaa za kampuni mbalimbali. Anaripotiwa kulipwa mkwanja mrefu baada ya kulivaa jarida la Cover Girl 2012.

Usafiri na mjengo

Anamiliki jumba la kifahari kule Kansas City, alikozaliwa.

Kwa upande wa usafiri, ana mikebe kadhaa ya adabu Lamborghini, Audi, Ferrari na Mercedes Benz.