JIONI ya Jumatano, wanaume wawili waliketi katika mkahawa ulioko barabara ya Kimathi jijini Nairobi wakila chakula cha mchana huku wakisubiri kwa hamu Spika wa Bunge la Taifa, Moses Wetang’ula, kufunga shughuli za bunge kwa siku hiyo.

Wakenya wengi walikuwa wakifuatilia shughuli za bunge, wakimsikiliza kwa makini Bw Wetang’ula. Kwa wengi waliokuwa wakitazama, walikuwa wakisubiri kujua ikiwa Mswada wa Fedha wa mwaka 2025 ungetangazwa rasmi.

Kwa wabunge, kufungwa kwa shughuli za siku hiyo kulikuwa kama mwamuzi wa mpira kupuliza kipenga kumaliza mchezo, kwani walitarajiwa kwenda likizo ya mwezi mmoja.

Lakini kwa wale wanaume wawili waliokuwa wakila, ambao sasa wanachukuliwa kama washukiwa wakuu wa mauaji, ilikuwa ishara ya kuanza mpango wao: kumvamia na kumuua Mbunge wa Kasipul, Charles Ong’ondo Were.

Walikuwa katika hatua ya mwisho ya kile ambacho maafisa wa Idara ya Upelelezi wa Jinai (DCI) wanaamini kuwa lilikuwa tukio la mauaji lililopangwa kwa uangalifu mkubwa.

Uchunguzi wa awali kuhusu kuuawa kwa mbunge huyo Jumatano usiku unaonyesha kuwa wanaume hao wawili, pamoja na washirika wao, huenda walimfuatilia kwa siku kadhaa, kwani walijua hata gari alilokuwa akilitumia na sehemu aliyokuwa ameketi.

Inaaminika wauaji hao walifanya upelelezi wa maeneo aliyokuwa akitembelea Bw Were kabla ya mauaji.

Vyanzo vya polisi vimedokeza kuwa Bw Were hivi majuzi aliuza gari ambalo wengi walimfahamu nalo, na kununua Toyota Crown nyeupe ambayo alifika nayo katika majengo ya Bunge Jumatano.

Picha kutoka kwa kamera mbalimbali jijini zimeonyesha mienendo ya washukiwa hao wawili, zikitoa vidokezo muhimu kwa polisi.

Picha kutoka kamera za mkahawa walimokuwa wakila tayari ziko mikononi mwa polisi, ikionyesha kuwa wachunguzi tayari wanajua sura za wanaodaiwa kuwa wauaji.

Mmoja wa wanaume hao, kwa mujibu wa mpelelezi aliye karibu na uchunguzi, alikuwa na begi dogo.

“Uchambuzi wa kina umetupatia taarifa muhimu na kuwawezesha wachunguzi kuwalenga washukiwa wa mwanzo. Ingawa nia ya kitendo hiki bado inachunguzwa, taarifa za awali zinaonyesha kuwa lilikuwa tukio lililopangwa,” alisema Mkurugenzi wa Mawasiliano wa DCI, John Marete, katika taarifa Ijumaa.

Wakati Bw Were aliondoka bungeni mnamo saa moja na robo jioni, wauaji walikuwa wamekamilisha chakula chao na walikuwa tayari wamejificha, wakimsubiri.

Wanaume hao wawili walikuwa wakiendesha pikipiki ya kasi ya juu, na maafisa wa DCI wanachambua picha nyingi za CCTV kutambua aina, mfano na nambari ya pikipiki hiyo.

Kinyume na taratibu za usalama za viongozi duniani, Bw Were aliketi kwenye kiti cha mbele cha abiria badala ya kiti cha nyuma kushoto. Mlinzi wake alikuwa ameketi nyuma.

Wauaji waligundua hili, walipokuwa wakimfuatilia katikati ya jiji hadi eneo la Nairobi Funeral Home.

Gari la Bw Were lilipita barabara ya City Hall na kuingia ile ya Wabera ambapo lilisimama kwa muda.

Mlinzi alishuka na kuingia kwenye duka la M-Pesa kuweka Sh20,000 kwenye simu ya Bw Were.

Mhudumu wa M-Pesa tayari ameandika taarifa kwa DCI na kuwapa picha za CCTV.

Dereva na mlinzi pia wameandika taarifa kwa DCI.

Baada ya shughuli hiyo, mlinzi alirejea kwenye kiti cha nyuma na wakaondoka katikati ya jiji. Wakati wote huo, wauaji walikuwa wakiwafuatilia kwa subira, wakisubiri fursa nzuri ya kushambulia.

Gari linaonekana kwenye kamera za CCTV likijiunga na Barabara ya Kenyatta saa moja na dakika kumi na tisa jioni, likivuka mzunguko wa GPO, ambapo Mbunge mwingine, George Muchai wa Kabete, aliuawa zaidi ya miaka 10 iliyopita.

Dereva wa Bw Were aliingia Barabara ya Jakaya Kikwete baada ya kuona msongamano katika barabara ya Valley Road. Wauaji bado walikuwa wanawafuata bila kugunduliwa.

Gari lilionekana tena Barabara ya Argwings Kodhek dakika chache baadaye, huenda dereva alijiunga na Barabara ya Lenana kutoka Jakaya Kikwete.

Saa moja na dakika arobaini jioni, walikuwa katika mzunguko wa Nairobi Funeral Home ambapo walikumbana na msongamano wa magari.

Msongamano huo uliwapa wauaji fursa nzuri ya kushambulia.

Mmoja alishuka kutoka kwenye pikipiki na kutembea haraka hadi kando ya mlango wa mbele wa gari alilokuwa ameketi Bw Were.

Mtu huyo, aliyekuwa amevaa kofia ya kufunika, alifyatua risasi nne kwa karibu. Risasi zilivunja dirisha na kumgonga Bw Were mkononi na kifuani.

Dereva wa pikipiki alikuwa tayari watoroke. Muuaji aliporudi kwenye pikipiki, waliondoka kwa kasi kuelekea katikati ya jiji.

Mlinzi aliyekuwa ameketi nyuma ya Mbunge huyo aliambia polisi kuwa tukio hilo lilimshangaza, na alijificha kabla ya kutoka kujaribu kuwafuata wauaji.

Aliwakimbiza wauaji lakini bila mafanikio, kwa mujibu wa mashahidi.

Baada ya kugundua pikipiki imetoweka, mlinzi alirudi kumsaidia Mbunge.

Bw Were alikuwa akivuja damu sana na kuomba msaada.

Walimkimbiza hadi Nairobi Hospital, umbali mfupi kutoka hapo. Lakini madaktari walimtangaza kuwa amefariki.

Dereva na mlinzi hawakujeruhiwa, na tukio hilo linasemekana kuchukua chini ya dakika moja kwenye barabara yenye msongamano.

Wapelelezi wa mauaji walitembelea eneo hilo Alhamisi asubuhi na walipata maganda matatu ya risasi yaliyotumika ambayo yatapelekwa kwa uchunguzi wa kitaalamu.

Baadaye, wachunguzi walipiga kambi Wabera Street, eneo la mwisho alikoonekana Mbunge huyo kabla ya kuuawa.

Uchunguzi umeelekezwa pia katika eneo bunge la Kasipul, ambako inadaiwa Bw Were alikuwa na maadui wengi, huku polisi wakichunguza iwapo mauaji hayo yalihusiana na siasa.

Ijumaa, wanasiasa mbalimbali waliomboleza kifo cha mwenzao.

Mbunge wa Uriri, Mark Nyamita, alisema bado yeye na wenzake wameshtushwa na tukio hilo.

“Ikiwa Mbunge anayehudumu anaweza kupigwa risasi akiwa na walinzi, basi tuko katika hatari kubwa,” alisema Bw Nyamita.

Ingawa wabunge wengi wanaruhusiwa kuwa na angalau mlinzi mmoja, wengi wao huamua kutembea bila walinzi wao wa kibinafsi.

Mauaji ya Bw Were, baadhi ya wabunge wamekiri, yamewafanya kufikiria upya kuhusu usalama wao.

“Hata mimi hutembea bila mlinzi jijini Nairobi. Mara nyingi niko peke yangu. Ninawaita walinzi nikielekea katika eneobunge langu kudhibiti umati,” alisema Mbunge mmoja.

“Tatizo ni kuwa mlinzi hawezi kutumia magari ya umma akiwa na bunduki. Hivyo lazima umpeleke kwake kwanza, jambo linalokuacha peke yako. Madereva pia hukataa kuwaacha walinzi kabla ya kwenda nyumbani. Kwa hiyo, sisi hubeba bunduki zetu na kwenda nyumbani na dereva pekee,” aliongeza.