SIASA za upinzani nchini Kenya zimefika mahali ambapo umaarufu wake hauwezi tena kuficha madhaifu katika ngazi ya uongozi wake.

Linda Mwananchi ilipoibuka, ilionyesha kusudi la kujenga kizazi kipya cha upinzani na kumweka Edwin Sifuna katika nafasi ya kuwania urais.

Swali linabakia iwapo vuguvugu hili linajenga mashine ya uchaguzi au linazalisha vyama vya kuyeyusha nguvu zake?

Mvutano kuhusu ni chama kipi cha kutumia katika uchaguzi wa 2027 unajenga ufa ulio wazi.

Babu Owino anaegemea Mwananchi Party, huku George Natembeya akiunga mkono Ukombozi People’s Party kama chombo cha Sifuna.

Ripoti kinzani zinaonyesha Sifuna anatarajiwa kuzindua chama chake mwanzoni mwa Oktoba, naye Babu akielekeza nguvu zaidi katika Mwananchi Party na azima yake ya ugavana Nairobi.

Lakini pia imetokea kwamba Kalonzo Musyoka amebadilisha muungano wa Azimio kuwa The Ukombozi Alliance.

Hili ndilo donda la kisiasa linafyonza Linda Mwananchi. Uaminifu uko wapi?

Muungano wa kisiasa hauhitaji makubaliano katika kila jambo ila lazima kuwe na msingi kuhusu nani anaongoza, chombo gani kinatumika na kila mmoja yuko tayari kutoa nini kwa ajili ya mradi wa pamoja.

Ikiwa kila kiongozi anajenga chama chake, bila shaka kila chama kitakuwa na maslahi, wagombea, mtandao na mamlaka yake ya kibinafsi na kuhatarisha muungano huo.

Urais haujengwi kwa umaarufu wa mikutano pekee.

Unahitaji muundo wa kitaifa, wagombea katika maeneo mbalimbali, mawakala, rasilimali, ujumbe mmoja na makubaliano ya kisiasa yanayoweza kustahimili joto la uchaguzi.

Historia ya Kenya imejaa mafunzo mazito kisiasa. Katika mwaka wa 1992, katika uchaguzi wa kwanza wa vyama vingi, wapinzani waligawanyika kila mmoja kwa tamaa yake huku Daniel arap Moi akipata ushindi wa rahisi dhidi ya wapinzani Kenneth Matiba, Mwai Kibaki na Jaramogi Oginga Odinga na wengine.

Tatizo lilikuwa kugawanyika kwa nguvu hiyo ya upinzani miongoni mwa wagombea kadhaa.

Huenda picha hiyo ya mwaka 1992 isijirudie 2027 kwani mazingira ya kisiasa ni tofauti lakini kanuni za kisiasa hazina tofauti: kura zilizogawanyika haziwezi kuhesabiwa kama kura moja wakati wa kuamua urais.

Mgogoro unaokumba Linda Mwananchi si suala dogo la chama.

Ni mjadala kuhusu mamlaka, urais na udhibiti wa mamlaka ya kisiasa. Babu anadai kumuunga mkono Sifuna, huku msimamo wake kuhusu Mwananchi Party ukiashiria picha kinzani.

Sifuna ana kibarua cha pekee kuviunganisha vyama vyote vinavyochipuka ndani ya Linda mwananchi kwa makubaliano madhubuti ili kuepuka mgawanyiko unaoshuhudiwa sasa.

Ni sharti ahakikishe majadiliano ya kina kuelekea kuimarisha muungano mpana wa Linda Mwananchi.

Ikiwa kila mmoja ataendelea kujenga himaya yake, Sifuna atajikuta akiwa na jina, umaarufu na jukwaa bila asasi thabiti za kushindana kwenye uchaguzi.

Hapo huenda ikawa ndipo mwanzo wa urais wake kubaki tu kuwa wazo lenye mvuto na msisimko maridadi kisiasa ambalo bado halijageuzwa kuwa mradi wa uchaguzi uliokamilika.

Suala muhimu kwa sasa si kushabikia kuwa Linda Mwananchi ina watu wanaoishabikia bali kutathmini iwapo uongozi wake una uaminifu, nidhamu na umoja wa kutosha kuwageuza watu hao kuwa nguvu moja ya kisiasa.