BAADA ya mgombea wa chama tawala, Leonard wa Muthende, kumshinda mgombea wa upinzani katika uchaguzi mdogo wa Mbeere Kaskazini, darubini ya siasa sasa inamulika kwa makini ya aliyekuwa Naibu Rais, Rigathi Gachagua.

Bw Muthende alimshinda mgombea aliyeungwa na Bw Gachagua, Newton Kariuki, kwa kura 494  akipata 15,802 dhidi ya 15,308 za mwanamuziki huyo aliyebadilika kuwa mwanasiasa.

Uchambuzi wa kauli kutoka kwa wakosoaji na washirika wa Bw Gachagua unaonyesha mafunzo kumi muhimu ambayo huenda yakamfaidi katika safari yake kuelekea Uchaguzi Mkuu wa 2027.

Funzo la kwanza, kwa mujibu wa wafuasi wake, ni kwamba Bw Gachagua ameonyesha uwezo mkubwa wa kisiasa.

Mbunge Mwakilishi wa Wanawake wa Kirinyaga, Njeri Maina, alisema Bw Gachagua “amejidhihirisha kuwa nguvu” baada ya  wagombeaji wa chama chake kushinda katika wadi za Kariobangi Kaskazini, Narok Township na Kisa Mashariki.

Aliongeza kuwa wagombea wake katika Magarini na wadi ya Purko, Kaunti ya Kajiado, walijinyakulia nafasi ya pili wakiwa wapinzani thabiti.

“Kumbuka huyu ni mtu waliyejaribu kumuondoa madarakani 2024 na wakafikiria atasahaulika wiki moja baadaye.

Lakini kuunda chama chake na kushiriki uchaguzi mdogo tayari ni ishara kwamba si mtu wa kupuuzwa,” akasema Mbunge wa Kipipiri, Wanjiku Muhia.

Somo la pili linahusu utata wa iwapo Bw Gachagua anajitokeza kama kiongozi wa kitaifa au wa kikanda.

Wakosoaji wanasema ameonekana kujifunga na siasa za Mlima Kenya kiasi cha kuonekana kama mkabila.

Baada ya mgombea wa DCP, Stanley Karisa Kenga, kupata kura 8,907 huko Magarini, Bw Gachagua alijivunia matokeo hayo.

“Kwa chama kipya kisicho na mizizi Pwani, kuibuka nambari mbili ni ushindi tosha,” alisema, kauli aliyorudia kuhusu ushindi wa Douglas Masikonde katika wadi ya Narok Township.

Katika kujaribu kupunguza dhana kwamba anaegemea ukanda wa Mlima Kenya, alisema  “hii sasa inanipa mlango wa kuingia ukanda wa Pwani. Nitaenda Pwani kipindi cha Disemba kukutana na wanaotaka kugombea na kufungua ofisi za chama.”

Naibu wake, Cleophas Malala, ambaye alishuhudia ushindi wa DCP katika Kisa East, alisema “sasa tumethibitisha kuwa chama cha kitaifa kinachoweza kushindana.”

Somo la tatu, kwa mujibu wa Waziri wa Utumishi wa Umma, Geoffrey Ruku, ni kwamba siasa za “ubinafsi” za Bw Gachagua lazima zibadilike.

Anasema matokeo ya Mbeere Kaskazini “yanapaswa kumfunza Gachagua kwamba siasa za kudharau, kutukana na kusingizia wengine hazina nafasi.”

Somo la nne linaangazia ajenda ya kampeni ya Bw Gachagua. Rais William Ruto ndiye amekuwa mkosoaji wake mkuu, akimlaumu kwa kauli zisizo na msingi kama “Wantam” na “Kasongo.”

“Hizi si ajenda za uchaguzi. Wananchi wanataka mipango ya utawala,” Rais Ruto akasema.

Mshauri wake wa zamani, Ngunjiri Wambugu, amemtahadharisha akisema Gachagua  anapaswa kuanza kujadili masuala ya msingi, “sio kuhudhuria mazishi na ibada pekee huku akihutubia wafuasi kwa simu.”

Somu la tano, kwa mujibu wa Naibu Rais  Prof Kithure Kindiki, ni kwamba Gachagua anafaa kukubali matokeo  iwe kushinda au kushindwa.

“Alituona kama watu dhaifu na kujiona kuwa ana uhakika wa ushindi. Lakini siasa ni mashindano wazi,” akasema.

Aliongeza kuwa hata baada ya Kariuki kushindwa, “mlete ofisini nipatie kazi. Huyo pia ni kiongozi.”

Somu la sita linahusu kubadili orodha ya washirika wake.
Mfuasi wake, Stanley Wang’ombe, alisema Gachagua “anabeba mizigo mingi ya kisiasa.”

“Ajiulize kwa nini aliondoa mgombea wake na kumuunga mkono mgombea wa Justin Muturi. Kama anataka kuwa mfalme wa Mlima Kenya, lazima awe thabiti,” akasema.

Somu la saba ni hatari ya kuanzisha makabiliano mengi.
Mbunge wa Laikipia Mashariki, Mwangi Kiunjuri, alisema “huyu ni mwanasiasa anayetangaza vita dhidi ya Rais Ruto, Rais Mstaafu Uhuru Kenyatta, vyama vya Mlima Kenya, wafuasi wa Rais, Inspekta Jenerali  wa polisi  Douglas Kanja. Hakuna anayeweza kushinda vita hivyo vyote.”

Somu la nane, kwa mujibu wa Mbunge wa Manyatta Gitonga Mukunji, ni kujiandaa kukabiliana na mbinu za kisiasa za wapinzani, hasa “matumizi ya  maafisa wa usalama katika siasa.”

Somu la tisa ni ufadhili.Baada ya Kiunjuri kusema “si mdomo unaoshinda uchaguzi,” Mukunji aliongeza: “huku Mbeere tulikabili Serikali ambayo ilinunua kura. Tumefunzwa kuwa fedha ni silaha muhimu.”

Somu la kumi, kwa mujibu wa wazee wa Kikuyu, linahusu umoja wa Mlima Kenya. Mwenyekiti wao, Wachira Kiago, alisema ni lazima turudi mezani kujenga umoja wetu. Tunaweza kuwa kwenye mirengo tofauti lakini tukabaki ndugu.”

Aliongeza:“Ni lazima tujue yanayotuumiza na kutuunganisha bila chuki na matusi.”