Chai: Bomet yapata soko Iran

Na KENYA NEWS AGENCY

SERIKALI ya Kaunti ya Bomet kwa ushirikiano na kampuni za eneo hilo itauza majanichai yanayokuzwa kaunti hiyo moja kwa moja nchini Iran, ili kuwezesha wakulima kupata faida.

Akihutubu alipoanzisha usafirishaji wa tani 84 za majanichai kutoka kampuni za kibinafsi, Gavana wa Bomet, Bw Hillary Barchok alisema Kaunti hiyo imepata idhini kutoka kwa Wizara ya Kilimo kuuza zao hilo nchini Iran.

Alisema utawala wake umejitolea kusaidia katika mauzo ya majanichai yanayotayarishwa na viwanda vilivyoko Bomet ili kuimarisha bei kwa manufaa ya wakulima na kampuni hizo za kibinafsi.

“Tutazisaidia kampuni za umma na za kibinafsi kufikia soko za ng’ambo kwa sababu hapa Bomet hatuna kampuni za kuongeza thamani kwa zao la chai,” Bw Barchok akasema.

Gavana huyo, ambaye alikuwa ameandamana na Balozi wa Iran nchini, Jafar Barmaki alisema licha ya mpango huo kukabiliwa na changamoto nyingi ana matumaini kuwa utafaulu.

Akirejelea Sheria mpya ya Chai yenye kipengele kinachopiga marufuku uuzaji zao hilo moja kwa moja, Bw Barchok alipongeza mahakama kwa kukubali kesi yake inayopinga kipengele hicho.

“Tuko hapa kuanzisha usafirishaji wa shehena ya kwanza ya majanichai inayopelekwa moja kwa moja hadi Iran, kwa sababu mahakama ilikubaliana na ombi letu. Tulitaka utekelezaji wa kipengele kinachozima uuzaji majanichai moja kwa moja usimamishwe ili tuweze kuuza zao hili kwa bei nzuri kwa manufaa ya wakulima wadogo,” akaeleza.

Gavana Barchok alisema kuna jumla ya wakulima wadogo 100,000 katika Kaunti ya Bomet ambao wamekuwa wakinyanyaswa na wanunuzi wa zao hilo humu nchini. Aliongeza kuwa wakulima hao hawajafaidi chini ya mpango wa majanichai kuuzwa na Shirika la Ustawishaji Majani Chai Nchini (KTDA) na kupitia mnada wa Mombasa.

“Mkataba ambao tumetia saini na Iran unaanza kutekelezwa kuanzia leo (Ijumaa) na nina imani kuwa wakulima wetu watafaidi pakubwa,” akasema

Gavana Barchok pia alifurahishwa na hali kwamba mkataba huo wa kibiashara umepata uungwaji mkono kutoka kwa asasi husika za serikali, na kuiwezesha Bomet kuanzisha usafirishaji wa zao hilo.

Alisema baada ya kuanza na tani 84, serikali yake ina matumaini kwamba kufikia mwaka ujao watakuwa na uwezo wa kuuza tani 100 za majani chai nchini Iran.

Kwa upande wake balozi wa Iran, Barmaki, alipongeza Kaunti ya Bomet kwa kufanikisha mpango huo.

Nao wakulima wakiongozwa na Bw John Terer alisema mpango wa uuzaji chai moja kwa moja nchini Iran ni mwamko mpya katika kilimo cha zao hilo.

Terer alisema ukiritimba wa KTDA na wadau wengine unafaa kudhibitiwa kwa manufaa ya wakulima.

Hillary Barchok aapishwa kuwa Gavana wa tatu wa Bomet

Na VITALIS KIMUTAI

HILLARY Barchok ndiye Gavana mpya wa Kaunti ya Bomet baada ya kuapishwa Alhamisi kufuatia kifo cha Dkt Joyce Laboso.

Anakuwa gavana wa tatu wa kaunti hiyo.

Naibu Rais Dkt William Ruto ni miongoni mwa viongozi mashuhuri waliohudhuria sherehe hiyo.

Safari yake katika ulingo wa kisiasa ilianza miaka mitatu iliyopita. Wakati huo, Hillary Barchok alikuwa mhadhiri katika Chuo Kikuu cha Chuka bila kujua kwamba aliyekuwa Gavana marehemu Laboso na washauri wake kisiasa walikusudia kumteua awe mgombea mwenza baada ya kuamua kuwania ugavana akilenga tiketi ya Jubilee.

Miongoni mwa wasomi, ni Dkt Barchok ndiye aliibuka kama mtu bora.

Gavana wa Kaunti ya Bomet, Hillary Barchok. Picha/ Maktaba

Mtaalamu huyu wa Kemia na Hisabati alikuwa ni Mkuu wa Kitivo cha Elimu na Nguvukazi katika Chuo Kikuu cha Chuka.

Pia alikuwa ni mwanachama wa Mamlaka ya Mapato ya Kustaafu (RBA).

“Tulipoenda kumtafuta tulitaabika sana na hata karibu tubebe bango. Tulipata kama yuko ziarani nje ya nchi kikazi,” alisema Edward Abonyo (mume wa marehemu Laboso).

Barchok mwenyewe anakiri alikuwa limbukeni katika siasa.

“Sikuwa na tajriba katika siasa, lakini nina bahati kushirikiana na mabingwa wa siasa,” anasema Dkt Barchok.

Kwenye uchaguzi wa mwaka 2017 Laboso alimshinda Isaac Ruto wa Chama Cha Mashinani (CCM) ambaye alikuwa Gavana wa kwanza wa Bomet.

Sasa Barchok ameahidi kufuata nyayo za Laboso ambaye alizikwa Jumamosi, Agosti 3, 2019.

Laboso alifariki baada ya kuugua saratani kwa miaka mingi. Mumewe alisema aligundulika kuwa na saratani mwaka 1991.

Dkt Barchok anasikitika kumpoteza “rafiki, mama, mhadhiri mwenzangu na mtu ambaye alipenda maisha ya utulivu yasiyo na vituko na sakata”.

“Licha ya  kwamba kiongozi wetu ametangulia mbele ya haki, tuna Mpango Kabambe wa Maendeleo ya Kaunti (CIDP) ambao tutaendelea kuufuata,” Barchok aliambia Taifa Leo na NTV kwenye mahojiano.

Alikuwa akishughulikia masuala ya kaunti muda wote ambao Laboso alisafiri kuenda Uingereza Mei 29, 2019. Laboso baadaye alienda India na aliporejea akawa katika chumba cha wagonjwa wanaohitaji uangalizi wa karibu zaidi katika Nairobi Hospital kabla ya kufariki.

Barchok ni shabiki wa Chelsea na timu ya taifa Harambee Stars.

Kabla ya kuapishwa alikuwa amesema suala la usawazishaji na kuhakikisha kila jinsia inainuka katika jamii ni mojawapo ya malengo aliyo nayo.

Julai 2019 Kaunti ya Bomet ilizindua mradi wa Kuku na Mama ambapo vifaranga 5,000 vilipeanwa kwa makundi ya kina mama 40,000 katika wadi 25 kuinua wakazi kiuchumi na vilevile masuala ya lishe.

Miili ya maafisa wawili kutoka Bomet yapatikana Homa Bay

Na BARACK ODUOR

MIILI ya watu wawili wanaoaminika kuwa wafanyakazi wa serikali ya Kaunti ya Bomet, ilipatikana imetupwa katika Kaunti ya Homa Bay Jumatatu jioni.

Polisi wanachunguza vifo hivyo baada ya kupata miili hiyo katika kijiji cha Kanga Omuga, kaunti ndogo ya Rachuonyo Kusini, ikiwa na majeraha mbalimbali.

Miili hiyo ilipatikana imetupwa kichakani katika barabara iliyo kwenye mpaka wa kaunti za Homa Bay na Kisii.

Kulingana na chifu wa eneo hilo, Bw Joshua Otieno Oluso, wakazi waliona gari aina ya probox likitupa miili hiyo kisha likaondoka kwa kasi kuelekea mahali pasipojulikana.

Kamanda wa Polisi katika Kaunti ya Homa Bay, Bw Maris Tim, alisema wawili hao walitambuliwa kama Bw Bernard Kimutai Kirui na Bw Rotich Kipkorir Dominic.

Kamanda huyo wa polisi alisema wanaume hao walikuwa wamepeleka pesa kwa benki kugharamia kesi inayoendelea mahakamani katika kaunti. Alisema risiti za benki na pesa zilipatikana kando ya miili hiyo.