Majangili wavamia kituo na kuiba bunduki

Na JAMES MURIMI

MAJANGILI waliokuwa na silaha kali, Jumatatu walivamia kituo cha polisi katika Kaunti-ndogo ya Laikipia Kaskazini ambapo waliiba bunduki moja na sare za polisi.

Majangili wanne, wote waliokuwa na bunduki aina ya AK47, walivamia kituo hicho saa sita mchana na kuiba bunduki aina ya G3 na risasi kadhaa.

Mkuu wa polisi eneo la Laikipia North (OCPD), Ancent Kaloki Jumanne alisema majangili hao walimkabili konstebo Elisho Okoth Wasonga aliyekuwa katika ofisi ya kupokea ripoti katika kituo hicho.

“Majangili hao walimuamuru afisa huyo kuwapa bunduki ya G3 aliyokuwa nayo au wampige risasi. Afisa huyo aliwapa silaha hiyo na risasi 40 za milimita 7.62,” alisema Bw Kaloki kwa simu.

Kituo hicho kiko mkabala na kituo cha kibiashara cha Ewaso kilichoko kwenye mpaka wa Kaunti ndogo ya Isiolo North.

Mkuu huyo wa polisi pia alisema kwamba majangili hao walivunja nyumba ya Bw Okoth iliyo ndani ya kituo hicho na kuiba sare zake za polisi.

Afisa wa GSU aangamiza wenzake wawili kwa risasi na hatimaye kujiua Trans-Nzoia

Na SAMMY WAWERU

HALI ya huzuni imetanda katika kambi ya maafisa wa polisi wa kukabiliana na ghasia (GSU) ya Chepchoina, Kaunti ya Trans-Nzoia baada ya afisa mmoja kuua wenzake wawili kwa kuwapiga risasi Jumanne jioni kisha akajitia kitanzi.

Kulingana na taarifa ya idara ya polisi, afisa huyo aliyetambulika kama Bw Paul Kuria alifyatua risasi kiholela, tukio ambalo lilisababisha maafa ya maafisa wawili na kadha kujeruhiwa.

“Baadaye alijipiga risasi kupitia chini ya kidevu, akafa papo hapo,” inaeleza taarifa ya polisi.

Aidha, inasemekana hakukuwa na ugomvi wowote kati ya afisa huyo na wenzake, kabla kutekeleza tukio.

“Uchunguzi umeanzishwa kubaini kiini cha kitendo hicho,” idara ya polisi imesema.

Visa vya maafisa wa usalama kuua wenzao na pia raia vinaendelea kushuhudiwa.

Mwishoni mwa mwaka uliopita, 2020 na mwanzoni mwa mwaka huu, visa kadha vya maafisa wa polisi kuangamiza wenzao na pia raia viliripotiwa katika Kaunti ya Nairobi na Kirinyaga.

Wabunge wandani wa Ruto wapokonywa walinzi, bunduki

VINCENT ACHUKA na CHARLES WASONGA

USALAMA wa wanasiasa wandani wa Naibu Rais William Ruto sasa uko hatarini baada ya kupokonywa walinzi na leseni zao za bunduki kwa kutuhumiwa kuchochea fujo wakati wa chaguzi ndogo zilifanyika Alhamisi.

Kwenye taarifa Bodi ya Kutoa Leseni za Bunduki (FLB) ilisema kuwa imefutulia leseni za bunduki za wabunge; Didmus Barasa (Kimilili) na Fred Kapondi (Mlima Elgon).

Taarifa hiyo iliyotolewa Machi 5 na kutiwa saini na mwenyekiti wa bodi hiyo Charles Mukindia, ilisema kuwa hatua hiyo imechukuliwa kufuatia amri ya Inspekta Jenerali Hillary Mutyambai na baada ya uchanganuzi wa mienendo ya utovu wa nidhamu ya wanasiasa iliyoshuhudiwa katika chaguzi katika maeneo bunge ya Kabuchai na Matungu.

Wabunge hao waliamriwa warejeshe leseni za bunduki na bunduki “zikiwemo risasi” walizonazo kwa bodi hiyo au kituo cha polisi kilichoko karibu ndani ya saa 24.

“Ukikaidi amri hii utachukuliwa hatua kali na bodi hii au asasi zingine za kisheria,” Bw Mukindia akaonya.

Aliongeza za kuwa bodi hiyo itaendelea kufuatilia visa vya matumizi mabaya ya silaha hizo na watu ambao wamepewa lesi za kuzimiliki.

Mnamo Jumapili Bw Barasa aliambia Taifa Leo kuwa ameagizwa na kurejesha leseni na bunduki yaka katika kituo cha polisi kilichoko karibu au katika afisi za LFB.

“Kando na hayo mlinzi wangu hakuripoti kazini Jumamosi asubuhi. Aliniambia amepokea agizo kutoka kwa wakubwa wake katika Tume ya Kitaifa ya Polisi (NPSC) arejeshe aripoti katika makao makuu ili apewe majukumu mengine,” akasema.

Wanasiasa wengine waliopokonywa bunduki zao ni Seneta wa Nandi Samson Cherargei na wabunge Nelson Koech (Belgut), Fred Kapondi (Mlima Elgon) na Wilson Kogo (Chesumei).

Mbw Barasa, Cherargei, Koech na Kogo Ijumaa walifikishwa katika mahakama ya Bungoma na kushtakiwa kwa kosa la kupanga kuzua ghasia katika uchaguzi mdogo wa Kabuchai. Ilidaiwa kuwa silaha butu silipatikana katika magari ya wanasiasa hao waliofika huku kuhudumu kama maajenti wa mgombeaji wa chama cha United Democratic Alliance (UDA) Evans Kakai.

Walikana makosa hayo na kuachiliwa huru kwa dhamani ya Sh50,000 pesa taslim na mdhamini ya Sh100,000. Kesi yao itasikizwa mnamo Aprili 4, 2021.

Seneta Maalum Millicent Omanga pia alilalamika Ijumaa kwamba alipokonywa mlinzi lakini akadai kuwa hatishwi na hatua hiyo kwa sababu “Mlinzi wangu Mkuu ni Mungu.”

Hatua hiyo ilichukuliwa dhidi ya wanasiasa hao baada ya Waziri wa Usalama Fred Matiang’i kuonya kwamba hatua kali itachukuliwa dhidi ya wanasiasa wanaochochea fujo katika shughuli za kisiasa. Vile vile, aliamuru kwamba wanasiasa kama hao wapokonywe bunduki zao “wasije wakasababisha madhara makubwa zaidi.”

Vile vile, Dkt Matiang’i alisema serikali itasaka idhini ya Mahakama ili wanasiasa kama hao wazuiwe kushikilia nafasi za umma kwa msingi ya kukiuka hitaji la Sura ya Sita ya Katiba kuhusu maadili na uongozi bora.

Tishio sawa na hili lilitolewa na Tume ya Kitaifa ya Uwiano na Utangamano (NCIC) Jumamosi.

Mwanajeshi na polisi waliofyatuliana risasi kimakosa wafariki

Na FARHIYA HUSSEIN

MWANAJESHI na polisi waliopata majeraha kwa kufyatuliana risasi kimakosa wamefariki kutokana na majeraha waliyopata Bura Mashariki, Fafi, Kaunti ya Garissa.

Konstebo Emmanuel Ngao na afisa wa KDF David Mbugua walikuwa wamewahiwa katika Hospitali ya Bura na baadaye wakafariki na miili yao kusafirishwa hadi mochari katika Kaunti ya Nairobi.

“Miili miwili; mmoja wa afisa wa polisi na mwingine wa mwanajeshi imesafirishwa Chiromo na Forces Memorial, Nairobi na kwamba itafanyiwa upasuaji,” inasema ripoti ya polisi.

Kabla ya kufariki, wawili hao na mwanajeshi mwingine Jeremy Malusi walipata majeraha baada ya kufyatuliana risasi eneo la Bura Mashariki, kaunti ndogo ya Fafi, Garissa.

Mkasa huo ulitokea maafisa hao waliposhambuliana kimakosa kila upande ukishuku mwingine kuwa ni wa magaidi.

Akithibitisha tukio hilo, kamanda wa polisi eneo la Fafi, George Sangalo alisema kulikuwa na hali ya mkanganyiko kati ya vikosi maalum.

“Lilikuwa kosa. Helikopta iliyokuwa na maafisa kutoka Nairobi ilikuwa inaelekea Bura Mashariki huko Fafi,” akasema Sangalo.

Ni mkasa wa ndugu kupigana na kuumizana kimakosa.

“Konstebo wa polisi alimiminiwa risasi na wanajeshi wawili wa KDF naye akiwashuku kwamba maafisa hao ni wapiganaji wa kundi la kigaidi, naye aliwapiga risasi na kuwajeruhi vibaya,” inasema sehemu ya ripoti hiyo.

Afisa huyo wa polisi alikuwa akitembea kwa miguu akitoka katika nyumba moja eneo la mji huo.

Kulingana na ripoti ya polisi, “timu ya maafisa wakuu wakiongozwa na Luteni Jacinta Wesonga na Carey Nyawinda imefika eneo la mkasa huko Bura Mashariki”.

Maganda kadhaa ya risasi zilizotumika yamepatikana na “yatatumika katika uchunguzi zaidi.”

Wanajeshi wawili na polisi wauguza majeraha baada ya kushambuliana kimakosa

Na FARHIYA HUSSEIN

WANAJESHI wawili kutoka kikosi cha Kenya (KDF) na polisi mmoja wanaendelea kuuguza majeraha waliyopata baada ya kufyatuliana risasi eneo la Bura Mashariki, kaunti ndogo ya Fafi, Garissa.

Maafisa hao wamejipata katika mkasa huo baada ya kila moja ya pande hizi kudhani upande mwingine ni wa magaidi.

Akithibitisha tukio hilo, kamanda wa polisi eneo la Fafi, George Sangalo amesema kulikuwa na hali ya mkanganyiko kati ya vikosi maalum.

“Lilikuwa kosa. Helikopta iliyokuwa na maafisa kutoka Nairobi ilikuwa inaelekea Bura Mashariki huko Fafi,” amesema Sangalo.

Taarifa ya polisi ambayo Taifa Leo imeona inasema kwamba afisa mmoja wa polisi na wanajeshi wawili walipata majeraha baada ya kumiminiana risasi kimakosa.

“Konstebo wa polisi alimiminiwa risasi na wanajeshi wawili wa KDF naye akiwashuku kwamba maafisa hao ni wapiganaji wa kundi la kigaidi, aliwapiga risasi na kuwajeruhi vibaya,” inasema sehemu ya ripoti hiyo.

Afisa huyo wa polisi alikuwa akitembea kwa miguu akitoka katika nyumba moja eneo la mji huo.

Genge laiba bunduki za polisi wakati wa kafyu

NA WAANDISHI WETU

KITUO cha polisi eneo la Muhoroni, Kaunti ya Kisumu kilivamiwa Jumamosi usiku na wezi wakaiba bunduki tatu na risasi 155 wakati wa kafyu.

Wakuu wa usalama katika eneo la Nyanza walianzisha msako mara moja kutafuta silaha zilizoibiwa, wakiongozwa na Mkuu wa Idara ya Ujasusi (DCI) eneo la Nyanza, Bw James Kipsoi na Kamanda wa polisi katika eneo hilo, Dkt Vincent Makokha.Kisa hicho kilitokea huku wahalifu wakiendelea kuhangaisha wakazi mitaani na vijijini, polisi wakishika doria zaidi mijini.

Katika usiku wa Ijumaa na Jumamosi wakati wa kafyu, wezi walivamia nyumba za watu katika mitaa ya Lolwe, Migosi, Kenya Re na Carwash mjini humo.

Maduka pia hayakusazwa katika uhalifu uliotokea.Katika mtaa wa Lolwe, mtunzaji nyumba alivamiwa na genge lililomkatakata kwa panga kichwani na tumboni.

Bw Eric Kimwet Bii alikimbizwa hadi Hospitali ya Jaramogi Oginga Odinga ambapo alitibiwa na kuruhusiwa kwenda nyumbani.

Genge lingine lilivamia mitaa ya Migosi na Aliwa lakini likazidiwa nguvu na wakazi.

Katika Kaunti ya Kakamega, afisa wa jeshi la wanamaji nusura aporwe na jambazi aliyekuwa akiendesha boda boda katika eneobunge la Lurambi, usiku wa Ijumaa.Alisema alifanikiwa kumpiga jambazi huyo akamwacha akigaagaa kisha akaenda kupiga ripoti kwa polisi.

Ripoti za Victor Raballa, Rushdie Oudia, Benson Amadala na Shaban Makokha

Ngunjiri asalimisha bunduki yake kwa polisi

ERICK MATARA NA RICHARD MAOSI

Mbunge wa Bahati Kimani Ngunjiri Jumanne alisalimisha bunduki yake katika makao makuu ya DCI Nakuru baada ya maafisa wake wote wa ulinzi kuondolewa na serikali.

Leseni ya kumiliki bunduki pia ilifutiliwa mbali, ikiaminika kuwa hii ni njia mojawapo ya kuwahangaisha wandani wa naibu rais Dkt William Ruto.

Akizungumza na Taifa Leo Dijitali Bw Ngunjiri alisema masaibu yake yalianza baada ya kutoa maoni yake kuhusu jinsi naibu rais alivyofurushwa kutoka kwenye makao yake mjini Mombasa.

Alieleza kuwa baadhi ya watu wenye ushawishi mkubwa serikalini, walikuwa na njama ya kumhangaisha naibu rais.

Kamanda wa polisi kutoka kaunti ya Nakuru Stephen Matu alithibitishahabari hizo akisema kuwa Bw Ngunjiri alikuwa amesalimisha silaha yake kwa DCI , isipokuwa hakuwa na uhakika endapo ni matamshi aliyotoa kumtetea naibu wa rais ndiyo yalimtia mashakani.

Mbunge wa Bahati Kimani Ngunjiri afika kwenye makao ya makuu ya DCI Nakuru kusalimisha bunduki yake. Picha/Richard Maosi

“Ni kweli mbunge wa Bahati amesalimisha silaha yake kama agizo lilivyotolewa siku ya Jumatatu,” akasema.

Hata hivyo mmoja wa makachero wakuu alisema Ngunjiri aliandikisha taarifa kuhusiana na matamshi aliyokuwa ametoa kuhusu naibu rais siku ya Jumatatu.

“Bw Ngunjiri aliandikisha taarifa Jumatatu lakini Jumanne pia alilazimika kufika mbele ya DCI,” Matu aliongezea akisema kuwa alipokonywa silaha yake kwa sababu uchunguzi kuhusu matamshi yake ulikuwa ukiendelea.

Hapo Jumatatu Bw Ngunjiri alifika katika makao ya DCI mwendo wa saa tatu asubuhi na kufanyiwa mahojiano kwa zaidi ya saa moja.

Akizungumza katika makao ya DCI, muda mfupi baada ya kusalimisha silaha yake, alisema hatayumbishwa na chochote kwa kumuunga naibu rais mkono.

Bw Ngunjiri akiwa na wafuasi wake baada ya kusalimisha bunduki. Picha/Richard Maosi

“Ninafahamu nimepokonywa bunduki yangu pamoja na maafisa wangu wa usalama kuamuriwa warudi Nairobi, hii ni katika mojawapo ya njama za kuninyamazisha kisiasa,”akasema.

Alimlaumu waziri wa usalama wa ndani Dkt Fred Matiang’i kwa kuwazima wale wanaounga mkono mrengo wa naibu rais.

Bw Ngunjiri anahitimisha idadi ya viongozi sita ambao kufikia sasa wamepokonywa silaha zao, kutokana na agizo la Inspekta Mkuu wa Polisi Hillary Mutyambai.

Mutyambai alisema viongozi wote walio kwenye uchunguzi ni lazima wasalimishe silaha zao, wakiwamo seneta wa Nandi Samson Cherargei, wabunge Moses Kuria, Aisha Jumwa na Babu Owino.

 

Wanaomiliki bunduki haramu Samburu waonywa

Na GEOFFREY ONDIEKI

Ogeoffrey2017@gmail.com

Serikali imetoa onyo kwa wakazi wa kaunti ya Samburu wanaomiliki bunduki kinyume na sheria kuzisalimisha mara moja kabla ya zoezi la kuzitwaa kwa lazima halijang’oa nanga.

Kamishna wa kaunti ya Samburu John Korir alisema kuwa makataa ya kusalimisha silaha hizo yalikamilika na mkazi yeyote anayemiliki silaha hatasazwa kwenye zoezi la kuwapokonya bunduki linalotarajiwa kung’oa nanga wakati wowote.

Kulingana naye, serikali itawapokonya kwa lazima wakazi ambao watakaidi amri ya kurejesha silaha hizo.

“Baadhi bado wanamiliki bunduki na nahimiza wazisalimishe tu hata kama makataa yalikamilika kwa sababu mwishowe tutawapokonya kwa lazima,” alisema Bw Korir.

Matamshi ya kamishna huyo yanajiri wakati serikali imepanga kufanya msako mkali katika maeneo ya kaskazini mwa Bonde la ufa kutwaa silaha zinazomilikiwa na wakazi kinyume na sheria.

Bw Korir aliongeza kuwa zoezi hilo halitasaza wafanyakazi wa umma, wanasiasa na viongozi wengine wenye ushawishi katika kaunti ya Samburu ambao huenda wanafadhili mashambulizi na wizi wa mifugo.

Alihimiza machifu na manaibu wao kuwa katika mstari wa mbele kupigana na wizi wa mifugo kwa sababu wanawafahamu watu vizuri katika maeneo yao.

Bw Korir alitoa wito kwa viongozi kuwashawishi wakazi kusalimisha silaha. “Tunajaribu kutwaa bunduki haramu kwa usaidizi wa machifu na maafisa wengine wa usalama hapa. Naomba viongozi watusaidie kutekeleza hilo,” aliongeza Bw Korir.

Idadi kubwa ya watu wametoroka makwao kutoka sehemu ya kaskazini ya Samburu hasa maeneo ya Baragoi, baada ya misururu ya mashambulizi na wizi wa mifugo.

Hivi majuzi viongozi kadhaa walishutumu serikali kwa hatua ya kuwapokonya bunduki polisi wa akiba katika maeneo hayo.

Lakini serikali ilitetea hatua hiyo ikisema kuwa baadhi ya polisi wa akiba walikuwa nyuma mashambulizi hayo. Zaidi ya bunduki 3,000 zilitwaliwa kutoka kwa polisi wa akiba.

Mnamo Septemba, Mshirikishi wa eneo la Bonde la Ufa George Natembeya alitangaza kuwa zoezi la kuwapokonya bunduki wakazi katika maeneo ya kaskzini mwa Bonde la Ufa litang’oa naga hivi karibuni baada ya makata kukamilika.

Kaunti ambazo zinalengwa ni pamoja na Turkana, West Pokot, Baringo, Elgeyo Marakwet, Samburu na Laikipia.

Polisi azuiliwa kwa kupoteza bunduki

Na Dickens Wasonga

POLISI mmoja anazuiliwa katika Kituo cha Polisi cha Siaya baada ya kupoteza bunduki yake.Kulingana na Kamanda wa Polisi katika kaunti hiyo Bw Francis Kooli, haikubainika hali iliyomfanya polisi huyo kupoteza bunduki hiyo.

Kundi maalum la polisi tayari limebuniwa ili kuchunguza suala hilo.

Duru ziliiambia ‘Taifa Leo’ kwamba polisi huyo alishambuliwa na watu wawili waliokuwa wakisafiri kwa pikipiki, ambapo wanaaminika kupotea na bunduki hiyo baada ya kumnyang’anya.

Duru zilieleza kuwa polisi huyo alikumbana na kisa hicho mwendo wa saa tatu usiku mnamo Jumanne alipokuwa akielekea kituoni. Alikuwa akilinda afisi ya kamishna wa kaunti.

“Tunachunguza ikiwa polisi huyo alikuwa peke yake na ikiwa alikuwa kazini. Kwa kawaida, polisi walio kazini huwa wawili wawili. Hayo ni mambo makuu tutakayozingatia tutakapokuwa tukiendesha uchunguzi wetu,” akasema Bw Kooli.

Operesheni kuitafuta bunduki ya afisa aliyeuawa Lamu yaendelea

Na KALUME KAZUNGU

OPERESHENI ya kusaka bunduki na risasi 60 zilizomilikiwa na afisa aliyeuawa kinyama eneo la Lamu Mashariki imeingia wiki yake ya tatu bila ya kuzaa matunda yoyote kufikia sasa.

Oktoba 2, 2019, afisa wa polisi wa cheo cha Konstebo, Hesbon Okemwa Anunda, aliripotiuwa kutoweka akiwa amebeba bunduki na risasi hizo 60 kabla ya mwili wake kupatikana siku tatu baadaye ukiwa umetupwa kwa kichaka karibu na barabara ya Kizingitini-Mbwajumwali.

Katika mahojiano na Taifa Leo, Kamishna wa Kaunti ya Lamu, Irungu Macharia, amesema Jumatatu kwamba huenda bunduki hiyo ikatumika vibaya endapo haitapatikana.

Bw Macharia amesema idara ya usalama, Kaunti ya Lamu ina imani kubwa kwamba bunduki hiyo haijavukishwa mpaka na kuingizwa nchi jirani ya Somalia bali iko mikononi mwa wananchi wa Lamu Mashariki.

Amewasihi wakazi kushirikiana na maafisa wa usalama na kutoa ripoti zitakazosaidia kupatikana kwa bunduki hiyo kabla haijatumika vibaya, ikiwemo kuendeleza wizi wa mabavu miongoni mwa jamii.

“Tumekuwa tukitafuta bunduki hiyo katika kipindi chote cha majuma mawili yaliyopita bila mafanikio. Bado hatujakufa moyo. Tunaendelea na operesheni kwenye vichaka, hasa sehemu ambapo mwili wa afisa wa polisi ulipatikana. Bunduki haijavukishwa nchini Somalia. Tuna imani kubwa kwamba bado iko mikononi mwa jamii. Tunawasihi kuitoa silaha hiyo kwani huenda ikatumika vibaya, ikiwemo kuendeleza wizi wa mabavu kwenye maeneo husika,” amesema Bw Macharia.

Mshukiwa

Kamishna huyo pia amesema hakuna mshukiwa yeyote ambaye kufikia sasa amekamatwa kuhusiana na mauaji ya afisa huyo wa polisi lakini akasisitiza kuwa uchunguzi bado unaendelea ili kubaini wahusika wa mauaji hayo.

“Hatujakamata yeyote kufikia sasa lakini tunajaribu kufuatilia mazungumzo ya simu; hasa kipindi cha mwishomwisho kabla ya afisa kuuawa. Tukiwapata waliozungumza naye tutawatia mbaroni na kuwauliza maswali kuhusiana na mauaji hayo,” akasema Bw Macharia.

Naye Kamanda wa Polisi wa Kaunti ya Lamu Muchangi Kioi pia amethibitisha kwamba bunduki hiyo haijapatikana lakini akasisitiza kuwa operesheni bado inaendelea kote Lamu Mashariki.

“Bunduki bado haijapatikana lakini operesheni inaendelea bado. Tunasihi jamii kujitokeza na kutupa taarifa zitakazosaidia kupatikana kwa silaha hiyo,” akasema Bw Kioi.

‘Watakaorejesha bunduki wanazomiliki kinyume cha sheria kufikia mwisho wa Septemba hawataadhibiwa’

Na CHARLES WASONGA

SERIKALI imewataka Wakenya wanaomiliki bunduki kinyume cha sheria kutumia muda wa msamaha wa mwezi mmoja uliotolewa kuzirejesha.

Mkurugenzi wa Shirika la Kitaifa la Kudhibiti Matumizi ya Silaha (KNFP) Mohamed Amin amesema Jumamosi uchunguzi ulioendeshwa na shirika la Africa Amnesty umefichua kuwa Kenya ina zaidi ya bunduki 600,000 mikononi mwa watu kinyume cha sheria.

Bw Amin ameahidi kwamba wale ambao watarejesha bunduki haramu kabla ya Septemba 30 hawatachulikuwa hatua zozote za kisheria.

“Uchunguzi wa hivi majuzi imefichua kuwa kati ya bunduki 550,000 na 650,000 ziko mikononi mwa raia kinyume cha sheria. Silaha hizi zinafaa kuerejeshwa kwa serikali ili zisitumiwe kutekeleza uhalifu,” akasema Bw Amin.

“Serikali imeweka mikakati ya kutwaa silaha haramu. Kwa hivyo, wale watakaorejesha bunduki hizo kabla ya Septemba 30, watasamehewa katika kipindi hiki cha msamaha kilichoanza Septemba 1,” akawaambia wanahabari katika mkahawa wa Serena, Nairobi.

Bw Amin amesema wenye bunduki hizo haramu wanapaswa kuzisalimisha kwa vituo vya polisi vya karibu, kwa viongozi wa kidini au viongozi wa kijamii bila kuhofia kukamatwa.

Mkurugenzi huyo amesema serikali itaharibu silaha hizo – zitakazokuwa zimesalimishwa – hadharani mwishoni mwa mwaka 2019.

“Ulimwengu utafurahia amani ya kudumu ikiwa silaha haramu zitatwaliwa kutoka kwa watu wanaozimiliki,” Bw Amin akasema.

Wakati huu serikali inahodhi zaidi ya bunduki 8,000 zinazomilikiwa kiharamu na zilizotwaliwa kutoka kwa wananchi.

Uamuzi wa viongozi

Hatua ya serikali ya kuwaruhusu raia kusalimisha bunduki haramu katika mwezi huu wa Septemba inaenda sambamba na Uamuzi wa Marais wa Mataifa wanachama wa Umoja wa Afrika (AU).

Marais hao 52 walitangaza Septemba kuwa mwezi wa kusalimishwa kwa silaha zinazomilikiwa na wananchi kinyume cha sheria.

Mnamo Februari mwaka huu serikali ilianzisha mchakato wa kuwapiga msasa upya wenye leseni ya kumiliki bunduki kuhakikisha kuwa ni wale walio na ujuzi wa kutumia silaha hizo pekee wanapewa leseni mpya.

Serikali ilisema shughuli hiyo pia ililenga kuhakikisha kuwa raia wenye leseni za kumiliki bunduki hizo wanafuata kanuni mpya za matumizi yazo zilizoanzishwa na Wizara ya Usalama wa Ndani.

Amerika si salama tena, ulimwengu waonywa

Na VALENTINE OBARA

TAHADHARI ya usalama imetolewa kimataifa kwa watu wanaosafiri kwenda Amerika, kufuatia ongezeko la mashambulio ya bunduki nchini humo.

Mnamo Jumamosi, watu 20 waliuawa katika duka kuu lililo El Paso, Texas kisha wengine tisa wakauliwa kabla saa 13 kupita katika eneo la Dayton, Ohio.

Huku mataifa mengi yakiepuka kutoa tahadhari kwa raia wao, pengine kwa kuhofia kughadhabisha Amerika iliyo na ushawishi mkubwa ulimwenguni, Shirika la haki za kibinadamu la Amnesty International liliamua kujitwika jukumu hilo jana.

Wakati mwingi Amerika huwa haichelewi kutoa tahadhari kwa raia wake dhidi ya mataifa mbalimbali hata kunapokuwa na maandamano ya umma lakini mataifa mengine huwa hayatoi tahadhari yoyote hata mikasa ya kutisha inapotokea katika taifa hilo linaloongozwa na Rais Donald Trump.

Kufikia jana, nchi mbili pekee ambazo ni Venezuela na Uruguay ndizo zilikuwa zimetahadharisha raia wao wawe waangalifu kama ni lazima wasafiri Amerika.

“Kuwa mwangalifu zaidi kila wakati na ujihadhari na watu wanaobeba bunduki. Epuka maeneo ambako watu wengi hukusanyika hasa hafla za kitamaduni, maeneo ya ibada, shule na majengo ya kibiashara. Kuwa mwangalifu zaidi unapoenda katika baa, vilabu na kasino,” ikasema taarifa ya shirika hilo ambalo makao yake makuu ya Afrika Mashariki yako Kenya.

Ripoti ya 2018 kutoka shirika la Bloomberg inaonyesha kuna Wakenya wasiopungua 120,000 ambao wanaishi Amerika kihalali.

Rais Trump amekuwa akilaumiwa kwa muda mrefu kutokana na jinsi alivyoshawishi serikali yake isipitishe sheria ambazo zingefanya iwe vigumu kwa raia kumiliki bunduki.

Kando na haya, kuna wanaolaumu utawala wake kwa kufanya chuki ikite mizizi zaidi miongoni mwa watu wa rangi tofauti, dini na misimamo mengine ya kijamii.

Amnesty ililaumu Serikali ya Trump kwa kushindwa kuweka mikakati ya kutosha kulinda usalama wa umma dhidi ya mashambulio kutoka kwa wenye bunduki.

“Kwa msingi wa sheria za kimataifa kuhusu haki za kibinadamu, Amerika ina jukumu la kupitisha mipango mbalimbali katika madaraja yote ya uongozi na kudhibiti umiliki wa bunduki ili kulinda haki za raia kuishi na kusafiri wakiwa huru bila tishio la mashambulio ya bunduki,” ikasema.

Mbunge ataka wasimamizi wa Nyumba Kumi wapewe bunduki

Na KALUME KAZUNGU

MBUNGE Mwakilishi wa Kike wa Kaunti ya Lamu, Bi Ruweida Obbo, ameiomba serikali kuwapatia wanachama wa Nyumba Kumi bunduki ili waweze kujilinda wanapotekeleza majukumu yao mashinani.

Bi Obbo pia amependekeza serikali iwalipe wanachana hao mishahara kutokana na jukumu lao zito la kuhakikisha usalama unadhibitiwa mashinani.

Akihutubia wakazi mjini Lamu Alhamisi, Bi Obbo alisema inasikitisha kuwa wanachama wa Nyumba Kumi wamekuwa wakitelekezwa na serikali hasa kimiundomsingi licha ya kuwa kiungo muhimu katika kudhibiti usalama wa taifa.

Alisema wanastahili kupewa silaha na pia walipwe vilivyo kama njia mojawapo ya kuwapa motisha kazini.

Wanachama wengi wa Nyumba Kumi wamepoteza maisha yao wakiwa kazini kwani hulengwa zaidi na wahalifu hasa wale wa ulanguzi wa dawa za kulevya na ugaidi.

Wahalifu hao mara nyingi huwachukulia viongozi wa Nyumba Kumi kuwa maadui na pia kizingiti cha wao kuendeleza maovu yao katika jamii.

“Siridhishwi na jinsi maafisa wa Nyumba Kumi wanavyotelekezwa na serikali hasa kimiundomsingi ya kuwasaidia kutekeleza majukumu yao. Hawa viongozi wa Nyumba Kumi ndio wa kwanza kufuatwa na wahalifu ambao mara nyingi huwatishia maisha na hata kuwaua mashinani. Ni vyema wapewe bunduki ili kujilinda kazini. Isitoshe, serikali iwazingatie maafisa hao kwa kuwapa mishahara,” akasema Bi Obbo.

Alitoa mfano wa chifu aliyevamiwa na kuuawa na wahalifu mchana eneo la Mbwajumwali, Kaunti ya Lamu kuwa tukio linalofaa kuisukuma serikali kuwapa maafisa wa Nyumba Kumi bunduki.

“Najua kuna mjadala kuhusu machifu kupewa bunduki. Tayari kumekuwa na mafunzo maalum ya kiusalama kwa machifu hao kote nchini. Ikiwa chifu anaweza kuvamiwa na kuuawa mchana siku ya Ramadhani eneo hili, sembuse afisa wa Nyumba Kumi ambaye hana silaha yoyote?” aliuliza.

Aliongeza, “Nyumba Kumi wapewe silaha ili kuwahimiza kutekeleza majukumu yao kwa ukamilifu zaidi.”

Wakati huo huo, alihimiza serikali kuzingatia angalau uwepo wa thuluthi mbili za kila jinsia inapoajiri maafisa wa usalama kote nchini.

Uchu wa raia kumiliki bunduki na jinsi ambavyo wanatapeliwa

Na MWANGI MUIRURI

MJADALA unaoendelea nchini Kenya kuhusu ufaafu au ubutu wa kuwahami askari rungu umechora taswira ya jinsi wengi hupenda bunduki.

Bunduki huaminika na wengi kuwa silaha tosha ya kujiepusha na masaibu mengi pamoja na uwezo wa kukabiliana na wahalifu.

Wapo wanayoiona kuwa ni ya kupendeza kijumla.

Ni silaha ambayo Inspekta Mkuu wa Polisi Hillary Mutyambai anaonya raia wafahamu “sio mwiko wa kutumika kusonga ugali.”

“Ukicheza nayo utajipata pabaya sana kiafya,” anatahadharisha Mutyambai.

Bw Mutyambai alisema hayo akitangaza kuwapokonya bunduki askari wote wa akiba ili wapigwe msasa na hatimaye wale watakaotimiza vigezo vya msasa huo warejeshewe bunduki hizo.

Mapenzi ya raia kwa bunduki hujiangazia tena katika sera kadha za serikali; ya hivi majuzi ikiwa ni ya kuwapokonya wote ambao wanamiliki bunduki lakini hawako katika vitengo vya kiusalama ili nao wapigwe msasa. Ni hatua iliyosababisha wengi – hasa wanasiasa na wafanyabiashara mashuhuri – kukimbia mahakamani kupinga hatua hiyo.

Hali hii ya Wakenya kupenda kujihami kwa bunduki imezua kero kuu ya kiusalama ambapo magenge kila kuchao yanazuka yakivamia kila mahali kuliko na uwezekano wa kuwa na bunduki, maafisa wa polisi wakijipata pabaya wakilengwa na kuuawa wakipokonywa silaha zao.

Ni katika hali hiyo ambapo Kamishna wa Kaunti ya Uasin Gishu, Abdi Hassan anateta kuwa raia hapa wanatapeliwa kwa kiwango kikuu wakiahidiwa bunduki iwapo watatuma pesa kwa nambari fulani.

“Kuna makundi ya matapeli ambayo yamezuka hapa Uasin Gishu na ambayo kazi yao kuu ni kujifanya eti wao ni Makamishna wa Kaunti. Wanasema wanaitwa Abdi Hassan na wana bunduki za kutoa kwa wafanyabiashara mashuhuri. Nao wafanyabiashara hao wanawaamini na kutii maelekezo ya wakora hao,” anasema Barre.

Anasema kuwa wale wanaolengwa wanatakiwa watume kati ya Sh100,000 na Sh300,000 ili wapewe bunduki za kujihami.

“Ubaya ni kwamba, kuna wale ambao wamejawa na ubutu wa kimaisha kiasi kwamba wanatuma pesa hizo. Wanaambiwa wakutane mitaani ili wapewe bunduki zao. Mtu anakupigia simu akikwambia mkutane nje ya soko au kando mwa barabara ili akupe bunduki. Waza hilo: Eti Kamishna wa Kaunti anakuambia mkutane kando mwa soko au nyuma ya maduka…” anasema.

Anasema kuwa ametoa amri kwa maafisa wote wa usalama wawajibikie suala hilo na wawasakame wote ambao wanaendeleza njama hiyo.

Pia, anaonya kuwa kumejaa matapeli wa kuombea pesa za wenyewe ziongezeke.

“Tangu lini ukasikia pesa ikizalishwa kwa kuombewa mitaani na wahubiri bandia? Ukiangalia hao wanaokuambia wataombea pesa zako wao ndio wangeanza kuombea zao. Lakini unapata watu wakifuata maagizo hayo ya matapeli na kuwapa pesa zao ambapo wanaishia kutapeliwa,” akateta.

Mshukiwa asakwa

Hali ni hiyo katika Kaunti za Bomet na Murang’a ambapo vitengo vya usalama vinamsaka mshukiwa wa kiume ambaye amekuwa akitapeli wafanyabiashara maarufu wa eneo hilo akiwaahidi kuwapa bunduki za kujilinda.

Imeripotiwa kwamba mshukiwa huyo amekuwa akiwapigia simu wafanyabiashara hao akijifanya kuwa kamanda wa polisi wa Murang’a, na Bomet ambao ni Josephat Kinyua na Naomi Ichami mtawalia na ambao wako na mpango huo wa kuwahami wafanyabiashara.

Kwa mujibu wa Kamishna wa Kaunti ya Murang’a Mohammed Barre, mwanamume huyo ambaye kwa sasa hawajafanikiwa kumnasa ametapeli wafanyabiashara kadha katika njama hiyo ya hadaa.

Alisema kuwa mwanamume huyo akimlenga mwathiriwa wa utapeli huo, humwagiza atume Sh4,000 za kuidhinisha cheti cha kinidhamu na Sh10, 500 za mafunzo ya utumiaji bunduki na pia gharama za kuratibu uidhinishaji.

“Ni njama ya kutapeli Sh14, 500 kutoka kwa mwaathiriwa mmoja na tayari tumepata malalamishi ya wafanyabiashara 18. Kuna wengine ambao tunashuku pesa zao zilizama katika utapeli huo wa mwezi mmoja sasa na wakaamua kunyamaza,” akasema Barre.

Kamishna huyo alisema kuwa njama hiyo ilianza kutibuka wakati baadhi ya walengwa waligundua kuwa Ichami sio mwanamume bali ni mwanamke na hivyo basi shaka zao zikawasilishwa kwa maafisa wa kiusalama kumhusu mtekelezaji huyo wa njama hiyo.

“Ndio sababu tumezindua uchunguzi wa kina kuhusu mkora huyo na kwa hakika tutamnasa. Aidha awe ndani ya kikosi cha kiusalama chochote, awe raia au awe nani. Tutamnasa tu,” akasema.

Alisema kuwa juhudi za kuhami raia kwa bunduki hazitekelezwi kupitia kwa mawakala bali ni suala la uwazi na ambalo huanza na anayetaka huduma hiyo kutuma ombi kupitia kwa Kamishna wa Wilaya.

“Ombi hilo hupigwa msasa na jopo maalum la kamati ya kiusalama ya Kaunti ndogo na hatimaye ukaguzi wa utimizaji wa matakwa ya kupewa bunduki unatekelezwa na hatimaye ukifaulu, unapewa bunduki,” akasema.

Aliwataka wenyeji wakae chonjo na wakifanikiwa kumnasa mshukiwa huyo anayesakwa, wamuwasilishe kwa maafisa wa polisi.

“Ushirikiano mwema ambao maafisa wetu wanapata kutoka kwa raia umetuwezesha kutegua kitendawili vingi vya kiusalama katika Kaunti hii. Hata kwa hili, najua tutapata dokezi muhimu na tufanikiwe kumnasa mkora huyu wa uigizaji kinyume cha sheria akitumia majina ya maafisa wakuu vitengoni vya kiusalama,” akasema.

Walinzi wapewe bunduki, PSRA yapendekeza

NA CECIL ODONGO

MAMLAKA ya Kusimamia Shughuli za Walinzi wa Kibinafsi Nchini (PSRA) sasa imependekeza walinzi wanaolinda maeneo spesheli wapewe bunduki ili kutokomeza visa vya utovu wa usalama.

Afisa Mkuu Mtendaji PSRA Fazul Mohamed Jumatano amesema sheria ya sasa inayoharamisha walinzi kupokezwa bunduki inafaa kubadilishwa ili wale wanaolinda maeneo maalum kama benki, maduka ya jumla, hoteli maarufu na watu wanaotambulika wapewe silaha hizo kutekeleza wajibu wao.

“Unatarajia vipi mlinzi aliyejihami kwa rungu kumkabili gaidi wa Al Shabaab ambaye amejihami kwa silaha hatari? Tunataka sheria ibadilishwe ili walinzi wa maeneo spesheli wapewe bunduki wanapokuwa kazini.

“Walinzi wetu hutoa huduma bora katika nchi nyingine duniani na hata hutamba kwenye mashindano ya nje lakini hapa nchini hatuwathamini na kazi zao,” akasema Bw Mohamed.

Mnamo Januari 2019, Bw Mohamed alitangaza kwamba walinzi wa kibinafsi wanaolinda sehemu hizo maalum wangepokezwa bunduki baada ya miezi sita ya mafunzo kabambe ila hilo litatimia tu baada ya sheria inayowazuia kupewa bunduki kubadilishwa bungeni.

Aidha alitaka kampuni za kibinafsi na watu waliowapa ajira walinzi kuhakikisha wanawalipa mishahara mizuri badala ya kuwanyanyasa kutokana na dhana ya tangu zamani ya kuwadunisha walinzi kwa malipo ya mlalahoi.

“Kampuni ambazo zinaweza kuwalipa walinzi vizuri zimekataa kufanya hivyo kimakusudi kwasababu zinaweza kupata huduma hizo kwa malipo ya chini kwingineko.

“Inawezekanaje mlinzi wa benki analipwa Sh4,000 au 5,000? Na analinda jengo zima yenye umuhimu mkubwa. Hali hii ndio huchangia baadhi ya walinzi kushirikiana na wakora ambao huwapa pesa kidogo na kutekeleza mashambulizi.

“Pia kuna kampuni ambazo zinaendelea kuleta walinzi kutoka nje, tunawapa siku 60 kuhakikisha kwamba wanawaajiri walinzi kutoka Kenya. Kabla ya kutoa walinzi kutoka nje lazima watushawishi ili tuwaruhusu kufanya hivyo maana kuna walinzi wataalam nchini,” akaongeza Bw Mohamed katika mkahawa wa Laico Regency wakati wa mkutano wa Muungano wa Wakazi wa Jiji la Nairobi (KARA).

Sekta ya ulinzi wa kibinafsi inatoa ajira kwa karibu Wakenya 500,000 huku taifa likijivunia karibu kampuni 2,500 za kutoa huduma za ulinzi nchini.

Wakati wa mkutano huo, kulikuwa na pendekezo la mtaala unaoongoza mafunzo ya walinzi yaimarishwe pamoja na mazingira yao ya kufanya kazi.

MATHEKA: Mbinu mpya kudhibiti silaha haramu zinafaa

Na BENSON MATHEKA

Hatua ya waziri wa usalama wa ndani Fred Matiang’i ya kuagiza wanaomiliki silaha wakaguliwe upya na kupatiwa leseni za kidijitali inafaa.

Ni hatua ambayo inafaa kutiliwa mkazo na bodi ya kutoa leseni za kumiliki silaha. Bodi inafaa kuitekeleza kwa umakini bila upendeleo wowote.

Nasema hivi kwa sababu tumeshuhudia watu wakitumia vibaya silaha wanazomiliki kisheria jambo linaloibua maswali kuhusu ufaafu wao wa kumiliki silaha. Ninachozungumzia hapa ni kwamba kuna tofauti ya kuwa na leseni ya kumiliki silaha na ufaafu wa mtu kumiliki silaha.

Kuna watu ambao licha ya kuwa na leseni halali za kumiliki silaha, wamekuwa wakizitumia kuua watu wasio na hatia. Mfano mzuri ni mgonjwa aliyeingia katika hospitali moja jijini Nairobi na kuua tabibu.

Baadhi ya wanaopatiwa silaha huwa na matatizo ya akili. Hii ilifanya mfumo uliokuwa ukitumiwa kutathmini waliopaswa kupatiwa leseni kutiliwa shaka. Ikizingatiwa kwamba baadhi ya watu waliokuwa na leseni za kumiliki silaha walikuwa wakikodisha bastola zao kwa wahalifu, ilifaa kuwe na masharti makali ya kumiliki silaha na ndivyo anavyofanya Dkt Matiang’i.

Hata hivyo, ni jukumu la bodi kuhakikisha kuwa masharti hayo yemezingatiwa kikamilifu ikiwa matumizi mabaya ya silaha yatapungua nchini.

Visa vya watu kuwa na leseni bandia za kumiliki silaha vitakuwa historia kwa sababu ya mfumo mpya wa kielektroniki ambao Bw Matiang’i aliagiza utumiwe. Bodi inafaa kubaini kuwa haitaepuka lawama kwa kudai kwamba mtu akitumia silaha yake vibaya atakuwa na leseni bandia kwa sababu inatakiwa kutoa nambari maalumu kwa kila anayepata leseni.

Haitaweza kuepuka lawama kwa kutoa leseni kwa watu walio na matatizo ya kiakili kwa sababu inapaswa kuhakikisha kila anayemiliki silaha kihalali anafaa kuwa na akili timamu.

Baada ya Bw Matiang’i kulainisha utoaji wa leseni za kumiliki silaha, anafaa kuelekeza juhudi zake kwa wanaomiliki silaha haramu zinazotumiwa na majangili kuiba mifugo. Hili limekuwa tatizo la miaka mingi nchini.

Wakazi wa maeneo yanayokabiliwa na wizi wa mifugo wamekuwa wakihangishwa na majangili wanaomiliki silaha hatari na serikali inapaswa kutafuta njia za kuwapokonya bunduki hizo.

Ninaamini kwamba japo awali imekuwa ni mlima kuwapokonya majangili hawa silaha, kukiwa na mikakati thabiti na nia njema, shughuli hii inaweza kufaulu.

Silaha haramu ni tisho kwa usalama wa taifa na kila hatua zinafaa kuchukuliwa kuhakikisha haziingizwi nchini. Sio siri kwamba silaha hizi huwa zinaingizwa nchini kutoka mataifa jirani yanayokumbwa na misukosuko na kwa sababu hilo linajulikana usalama unafaa kuimarishwa mipakani.

Najua sio Kenya pekee inayokabiliwa na tatizo la silaha haramu, ni tatizo la ulimwengu mzima. Hata hivyo, kujitolea kwa serikali kukabiliana na suala hili kunaweza kuzuia hasara inayosababishwa na silaha haramu. Hii ni kuanzia kwa utendakazi wa bodi ya kutoa leseni za kumiliki silaha na maafisa wa usalama kwa makini katika kazi yao mipakani.

Uhuru apokea leseni mpya ya kumiliki silaha

Na BENSON MATHEKA

RAIS Uhuru Kenyatta, Ijumaa alipokea leseni yake mpya ya kisasa ya kumiliki silaha kufuatia agizo lililotolewa na Waziri wa Usalama wa Ndani Dkt Fred Matiang’i kwamba watu wote wanaomiliki silaha wakaguliwe upya.

Rais Kenyatta alikabidhiwa leseni yake katika ikulu ya Nairobi na mwenyekiti wa bodi ya kutoa leseni za silaha Charles Mongera Mukindia ambaye alikuwa ameandamana na wanachama wengine wa bodi hiyo.

Kulingana na agizo hilo, wanaomiliki silaha wanatarajiwa kutuma maombi upya kufikia Machi 18 mwaka huu.

“Leo nimepokea leseni yangu mpya ya kisasa ya kumiliki silaha kutoka kwa bodi ya kutoa leseni za silaha baada ya kukaguliwa na kupata nambari maalum,” alisema Rais Kenyatta kwenye anwani yake ya Twitter.

Katika mfumo mpya ambao serikali ilianzisha mwaka jana, bodi ya kutoa leseni za kumiliki silaha itahifadhi habari zote za wamiliki wa bunduki kwenye kadi mpya ya kidijitali.

Kila anayemiliki silaha anafaa kuonyesha maafisa wa serikali kadi hiyo kila wakati akitakiwa kufanya hivyo.

Kadi hiyo ina picha ya mwenye leseni miongoni mwa habari nyingine za kumtambua.

Kulingana na Bw Matiang’i sheria hii mpya inalenga kuimarisha usalama wa kitaifa kwa kuthibiti umiliki na matumizi ya silaha.

Mtoto wa miaka 4 ampiga mamake mjamzito risasi

MASHIRIKA Na PETER MBURU

MTOTO wa miaka minne kutoka Marekani alimpiga mamake mja mzito risasi wakati alipopata bunduki chini ya godoro,  na kumwacha na jeraha.

Msemaji wa polisi eneo la King County Ryan Abbott alitaja kisa hicho cha kiajali, akisema kuwa mamake mtoto huyo ambaye ana ujauzito wa miezi minane ametibiwa, baada ya kukimbizwa katika hospitali moja na majeraha mabaya.

Mtoto huyo alikuwa katika chumba cha kulala Jumamosi alasiri wakati alipata bunduki hiyo iliyokuwa na risasi na bila kufahamu alichokuwa akifanya akampiga mamake risasi.

Baba na mamake mtoto huyo walikuwa wamelala kitandani wakati huo.

“Aliipata bunduki na kumpiga mamake risasi usoni,” akasema Abbott.

TAHARIRI: Walinzi wote wakaguliwe kabla ya kupewa bunduki

NA MHARIRI

WALINZI wa kibinafsi wanatekeleza jukumu muhimu la kulinda mali hapa nchini.

Katika nyumba za makazi, biashara na shughuli nyingine muhimu, walinzi hawa huwa wanahakikisha kuwa wahalifu hawaibi au kusababisha hasara.

Afisi nyingi mijini na vijijini hulindwa, hasa nyakati za usiku wenye mali wanapokuwa wamelala raha mstarehe.

Kumekuwa na matukio mbalimbali ambapo wezi na wahalifu wanapovamia maeneo kama vile shule, benki au makazi ya watu, huwafunga walinzi kwa kamba kabla ya kutekeleza wizi. Wakati mwingine walinzi hao huuawa.

Kwenye tukio la majuzi katika hoteli ya Dusit jijini Nairobi, walinzi waliokuwa wakishika doria waliuawa na magaidi.

Punde baada ya tukio hilo , kulizuka hoja kuhusu iwapo maafisa hao wanastahili kupewa bunduki au la. Mwenyekiti wa bodi ya Kusimamia walinzi wa Kibinafsi, Bw Fazul Mohamed, alitoa rai kuwa walinzi hao wa kibinafsi wapewe silaha sawa na maafisa wa polisi.

Walinzi kama hao wamekuwa wakipewa silaha katika mataifa mengi, ikiwemo nchi jirani ya Uganda. Hata hivyo, umeibuka mjadala kuhusu iwapo hapa Kenya wananchi watakuwa salama mikononi mwa walinzi hao.

Sababu kubwa inayofanya wengi kupinga jambo hilo, ni tabia ya Wakenya kupenda kutumia nguvu kujipatia riziki. Walinzi wengi wa kibinafsi wanafanya kazi katika mazingira duni, baadhi wakiwa hawana hata vibanda ambapo wanaweza kujikinga mvua au jua.

Wengi wao au karibu wote, hupokea mshahara duni, kiasi kwamba hawana uwezo wa hata kukidhi mahitaji yao muhimu.

Ikizingatiwa kuwa jamii yetu imekuwa na watu wengi walio na upungufu wa maadili, kuwapa walinzi hao silaha kunapingwa na wengi. Ikiwa baadhi ya polisi wamehusishwa na kukodisha silaha zao kwa majambazi, sembuse walinzi hawa?

Pendekezo la kuwapa silaha huenda likawa na manufaa kwa walinzi hao kujilinda dhidi ya majambazi, lakini pia yafaa wapigwe msasa na Idara ya Jinai (DCI), ili kufahamu rekodi zao kuhusu uhalifu.

Bali na kuwapiga msasa, walinzi hao yafaa wapewe mafunzo maalum ya kijeshi, ili wawe wanaweza kukabiliana na hatari wakati wowote.

Mwanafunzi wa chekechea ashtua shule kufika akiwa na bunduki

MASHIRIKA Na PETER MBURU

MTOTO wa miaka sita nchini Marekani alishangaza watu wakati alipofika katika shule ya chekechea anaposomea akiwa amebeba bunduki Ijumaa.

Iliripotiwa kuwa mtoto huyo kutoka jimbo la Ohio alionekana kuwa na kitu kizito kwenye suruali yake alipofika katika shule hiyo ya Columbus Africentric Early College, ndipo akapatikana kuwa na bunduki, japo polisi hawakuripoti ikiwa ilikuwa na risasi.

Hata hivyo, picha walizosambaza polisi zilionyesha bunduki pamoja na risasi zilizoaminika kupatikana pamoja na bunduki hiyo.

“Wafanyakazi wa shule walishauriwa na mtu aliyewapigia simu kuwa  mwanafunzi huyo alikuwa akiingia shuleni na kitu kilichoonekana kuwa kizito katika suruali yake,” polisi wakasema.

“Mwanafunzi huyo alikabiliwa mlangoni na bunduki ya mkononi ikapatikana.”

Hata hivyo, polisi walisema kuwa hawatamfungulia mashtaka mtoto huyo kwani nimchanga sana. Lakini wanachunguza mahali alitoa silaha hiyo.

Shirika moja la habari nchi hiyo liliripoti kuwa kupitia barua, mwalimu mkuu wa shule hiyo alisema kuwa mwanafunzi huyo “ataadhibiwa ifaavyo” japo bila maelezo zaidi.

Ripoti hiyo ilisema mwalimu huyo, Tyree Pollard alisisitiza namna shule hiyo hairuhusu silaha, huku akirai wazazi kushauri wanao kutofika na vitu hivyo shuleni.

“Watu wachanga wanafaa kufahamu hatari za kuwa na bunduki ama silaha nyingine, hata ziwe feki zinazokaa kuwa za kweli,” Pollard akaandika.

Alisema kuwa familia zinafaa kuzungumza na wanao kuhusu vitu ambavyo havifai kamwe kufikishwa shuleni.

Hofu wafanyabiashara wakilipa wahuni kuua washindani wao

Na NICHOLAS KOMU

WAFANYABIASHARA mjini Nyeri sasa wanatumia magenge ya wahalifu kuhangaisha na kuwaua washindani wao wa kibiashara, polisi wamefichua.

Kukamatwa kwa mfanyabiashara na washukiwa wawili wa ujambazi wikendi iliyopita kumewezesha polisi kufanya uchunguzi wa kina kuhusiana na ongezeko la magenge ya wahalifu wa kukodishwa mjini Nyeri.

Katika siku za hivi karibuni kumekuwa na ongezeko la visa vya majambazi, wanaosadikiwa kukodishwa, kuvamia biashara mbalimbali mjini Nyeri pamoja na viunga vyake.

Sasa uchunguzi wa polisi umebaini kuwa uvamizi huo ni uhasama unaosababishwa na ushindani wa kibiashara.

Wiki iliyopita, visa vitatu vya ujambazi viliripotiwa katika maeneo ya Ruring’u na Skuta na polisi wanaamini kiini cha uhalifu huo ni ushindani wa kibiashara miongoni mwa wafanyabiashara wa maeneo hayo.

Kulingana na polisi katika visa hivyo vyote, mashambulio yalionekana kama ya kulipiza kisasi.

Kamanda wa Polisi wa Kaunti ya Nyeri Ali Nuno jana alithibitisha kwamba wanaamini kwamba mfanyabiashara mashuhuri ambaye ametiwa mbaroni, alikodisha majambazi kushambulia mshindani wake wa kibiashara.

“Mwezi huu wa Desemba kulikuwa na visa vitatu vya ujambazi vilivyoripotiwa na maafisa wa upelelezi walipochunguza walibaini kuwa kuna magenge ya majambazi ya kukodisha,” akasema Bw Nuno.

Ijumaa Usiku, mfanyabiashara Patrick Njuguna Maina alikamatwa kutokana na madai kwamba alikodisha majambazi kushambulia mshindani wake wa kibiashara.

Polisi pia walikamata washukiwa wawili; Paul Maingi Nderitu na William Wachira Kariuki wanaodaiwa kutekeleza uvamizi huo.

“Mmoja wao aliwafyatulia polisi risasi mbili na kisha kutupa bunduki yake kichakani. Hata hivyo, alishikwa na sasa polisi wameanzisha operesheni ya kusaka bunduki hiyo. Wanatarajiwa kuikishwa mahakamani kujibu mashtaka ya kuhusika na ujambazi,” akasema mkuu wa polisi.

Mshukiwa wa tatu wa ujambazi anadaiwa kutorokea Nairobi ambapo maafisa wa polisi wanaendelea kumsaka.

Kulingana na polisi, biashara zinazolengwa na majambazi hao ni maeneo ya burudani kama vile baa, ambayo kwa sasa ni kivutio kikubwa wakati wa msimu wa sherehe za Krismasi na Mwaka Mpya.

Hii si mara ya kwanza kwa visa vya ujambazi kuripotiwa ambapo wamiliki wa biashara wanalengwa na biashara zao kuharibiwa na wahalifu.

Inadaiwa kuwa genge linakodishwa kuanzia Sh5,000 na wafanyabiashara kwenda kuua washindani wao wa kibiashara.

Mara nyingine huvizia njiani mwathiriwa na kisha kumshambulia anapokuwa akirejea nyumbani kutoka kazini.

“Visa vya uhalifu vimepungua kuanzia Agosti, mwaka huu. Lakini uvamizi ambapo wafanyabiashara wanakodisha majambazi kushambulia wenzao ni suala ambalo limetupa wasiwasi,” akasema Bw Nuno.

Washukiwa hao walifikishwa mahakamani jana ambapo walifunguliwa mashtaka ya kuhusika na wizi wa mabavu.

Pasta ampiga risasi na kumuua mvamizi mwenye bunduki

Na MASHIRIKA

WASHINGTON, AMERIKA

PASTA alimpiga risasi na kumuua mvamizi aliyeshambulia duka la jumla la Walmart.

Ripoti zilisema mshambuliaji aliyetambuliwa kama Tim Day mwenye umri wa miaka 44 alishambulia duka hilo mashuhuri na kufyatua risasi zilizojeruhi watu wawili.

Ilisemekana pia mvamizi huyo alijaribu kuiba magari sita kwa kulazimisha waendeshaji waondoke akitishia kuwapiga risasi.

Pasta mwenye umri wa miaka 47 ambaye anamiliki bunduki kihalali aliingilia kati na kufanikiwa kumuua Day kabla asababishe hasara zaidi.

Kulingana na mashirika ya habari, pasta huyo ambaye aliomba aitambuliwe pia ni afisa wa zimamoto wa kujitolea na ni daktari.

“Bila yeye watu wangapi wangeuawa?” akauliza mmoja wa waathiriwa aliyepigwa risasi mkononi alipokataa kusimamisha gari lake.

Polisi walinukuliwa kusema kuwa waliitwa mwendo was aa kumi na moja jioni kuhusu jamaa aliyekuwa akijaribu kuteka watu nyara kwenye magari yao.

Walisema Day alifika katika duka hilo la jumla dakika 30 baadaye baada ya kushindwa kuiba gari akaanza kufyatua risasi kiholela.

Pasta alimpiga risasi alipokuwa akijaribu kumwibia mtu mwingine gari lake. Baada ya kumpiga risasi, pasta huyo alichukua vifaa vyake vya matibabu akampa huduma ya kwanza kabla madaktari kuwasili.

Ripoti zinasema mshambuliaji alikuwa mraibu wa dawa za kulevya aliyekumbwa pia na matatizo ya kiakili.

-Imekusanywa na Valentine Obara

Kobia alimteka nyara na kumtesa raia wa Congo kwa bunduki, mahakama yaambiwa

Na RICHARD MUNGUTI

RAIA wa Congo aliyedaiwa kumlaghai mfanyabiashara maarufu wa humu nchini Bw Paul Kobia Sh40 milioni akidai angemuuzia madini alitumia gari lake muundo wa Mercedez Benz kujikomboa baada ya kutekwa nyara na kuteswa, afisa mkuu wa polisi aliambia mahakama Alhamisi.

Inspekta Joseph Kituyi alimweleza hakimu mkuu Bw Francis Andayi kuwa Bw Kobia (pichani juu) alimteka nyara na kumtesa Bw Londole Iseka Blanchard kutoka kilabu cha Boston kilichoko eneo la Kilimani, Nairobi na kumzuilia nyumbani kwake mtaani Kileleshwa.

Inspekta Kituyi alisema alifika nyumbani kwa Bw Kobia mwendo wa saa nane unusu usiku wa manane na kumpata Londole amelala kwenye sakafu akilia huku mshtakiwa akiteta kwa ghadhabu akisema, “Mtu hawezi kunipora Sh40 milioni na kuzitumia kuninyang’anya mke wangu.”

Akitoa ushahidi, Inspekta Kituyi alisema aliandamana katika oparesheni hiyo na Sajini Hellen Wambui aliyemjulisha kuhusu kutekwa nyara kwa Londole na wanaume watano.

“Sajini Wambui alinipigia simu nikiwa kwenye doria na kunieleza amejulishwa raia wa Congo alitekwa nyara kutoka kilabu cha Boston na watu waliokuwa wamejihami kwa bunduki,” alisema Insp Kituyi.

Hakimu alijulishwa Bw Kobia alienda kwenye kilabu hicho kinachomilikiwa na Bi Irene Bambashi na kumpata Londole mle ndani.

Paul Kobia akiwa kizimbani Juni 7, 2018 kwa kosa la kufyatua bunduki hadharani kutisha umma na kumteka nyara raia wa Congo jijini Nairobi. Picha/ Richard Munguti

Risasi ya kutisha

“Bw Kobia ambaye ni mteja kwenye kilabu hicho alitoka nje alipomwona Londole na kurudi tena akiwa amejihami na bunduki. Alikuwa ameandamana na wanaume watano waliokuwa wamejikwatua suti nyeusi. Aliwaamuru wamshike Londole. Alipodinda kuandamana nao Bw Kobia alifyatua risasi ya kutisha ndipo Londole akakubali kuandamana nao,” Insp Kituyi alidokeza.

Hakimu alifahamishwa kuwa Londole aliingizwa kwenye gari jeusi muundo wa Range Rover kisha ikachomoka kama mshale.

Afisa huyo wa polisi alisema kisa hicho kiliripoptiwa katika kituo cha Polisi cha Kilimani kwa njia ya simu na Bi Irene Bambashi.

Mwenye kupokea simu hiyo alikuwa Sajini Wambui ambaye alimjulisha Insp Kituyi.

Habari za kutekwa nyara kwa Londole zilisambazwa kwa vituo vyote jijini na kwa maafisa wote wa polisi waliokuwa wanashika doria usiku huo wa Machi 9 2017.

“Tulifahamishwa kuwa Bw Kobia ndiye alimteka nyara Londole. Tulipelekwa kwa Bw Kobia usiku huo kisha nikabisha. Lango lilikuwa limefungwa lakini kulikuwa na watu ndani wakiongea,” Bw Andayi alifahamishwa.

Hakimu aliambiwa Bw Kobia alitoka kufungua lango mwenyewe.

“Kobia aliinua mikono alipokuta sisi ni maafisa wa polisi. Alituelekeza ndani ndipo tukampata Londole akiwa amelala chini akilia huku akiwa na majeraha,” Insp Kituyi alisema.

Bunduki inayomilikiwa na Paul Kobia pamoja na bahasha yenye risasi zilipowasilishwa kortini kama ushahidi Juni 7, 2018. Picha/ Richard Munguti

Bunduki kwa kiti

Alisema walipekua nyumba hiyo na kupata alikuwa ameificha bunduki kwenye kiti cha sofa na wanaume wanne waliokuwa wamejikwatua Suti nyeusi kila mmoja wamejificha kwa choo.

Mahakama iliambiwa kwenye eneo la egesho kulikuwa na Range Rover KBY 506Y (rangi nyeusi) na Mercedez nambari ya usajili KCK 306H.

Baada ya kumhoji Londole alisema “alikuwa amempa Bw Kobia Mercedez yake ajinusuru.”

“Je ,kulikuwa na ripoti yoyote ya Bw Kobia kwamba alikuwa ametapeliwa Sh40 milioni na Londole?” kiongozi wa mashtaka Bw Solomon Naulikha alimwuliza Insp Kituyi

“La,” alijibu.

“Je, wakati Bw Kobia alimshika Londole alimpeleka kituo cha polisi au la?” akauliza Naulikha

“La. Alimpeleka nyumbani kwake ambapo sio Kituo cha Polisi,” alijibu Insp Kituyi.

Wakili Kirathe Wandugi (kushoto ) akimhoji Sajini Helllen Wambui kuhusu bunduki ya Paul Kobia kutummika kumtesa raia wa Congo. Picha/ Richard Munguti

Sajini Wambui na Insp Kituyi walimtambua Bw Kobia kortini kama mtu yule aliyemteka nyara Londole na kupatikana na bunduki. Bunduki hiyo na risasi nne zilitolewa kortini kuwa ushahidi.

Wakili Kirathe Wandugi anayemwakilisha Bw Kobia aliambia kortini  mshtakiwa alipeleka leseni ya umiliki wa bunduki hiyo kwa polisi.

Maafisa hao wa polisi walitoa bunduki hiyo kama ushahidi pamoja na risasi nne na ganda moja.

Bw Kobia anashtakiwa kwa kuwa na utundu hadharani wa kubeba bunduki. Yuko nje kwa dhamana. Kesi iliahirishwa. Mashahidi watatu watatoa ushahidi kesi ikisikizwa tena.

Hoteli inayowapa wateja ‘bunduki’ kukabiliana na ndege wasumbufu

VALENTINE OBARA Na MASHIRIKA

PERTH, AUSTRALIA

HUKU Serikali ya Kaunti ya Mombasa ikipanga kutumia Sh30 milioni kuangamiza kunguru wasumbufu, hoteli iliyo Australia imevumbua njia ya kuzuia ndege wengine wasumbufu kuhangaisha wageni wake.

Kulingana na mashirika ya habari, hoteli iliyo katika eneo la Perth, Australia, huwapa wageni wake bunduki bandia za kurushia ndege wa baharini maji ili kuwafukuza wanapokula ufuoni.

Mmiliki wa hoteli ya 3Sheets, Bw Toby Evans, alinukuliwa kusema kuwa ndege hao wanaofahamika kama ‘seagulls’ huhangaisha sana wageni na ilibidi hatua zichukuliwe dhidi yao.

Ilisemekana kila meza huwekewa bunduki hizo za maji na kufikia sasa wateja wameridhishwa na uwezo wao kuwafurusha ndege hao kwa njia ambayo pia huwaburudisha.

Bila shaka, wawekezaji katika sekta ya utalii Mombasa wanaweza kuiga mbinu hii au wavumbue mbinu zingine bora zaidi za kukabiliana na kunguru wakorofi.

Manusura akejeli Trump kwa kuzembea kudhibiti umiliki wa bunduki

Na MASHIRIKA

MANUSURA wa shambulio katika shule ya Parkland, Jumamosi alimlaumu Rais Donald Trump kwa kuwa na uhusiano na chama cha taifa cha bunduki (NRA) huku maelfu ya watu wakikusanyika Florida kushinikiza hatua za haraka zichukuliwe kudhibiti umiliki wa silaha.

Siku tatu baada ya mvulana aliyekuwa na bunduki kufyatua risasi na kuua watu 17 katika shule ya upili ya Marjory Stoneman Douglas, Emma Gonzalez 18, alitoa hotuba kwa wanafunzi, wazazi na wakazi wa mtaa ulio karibu wa Ft. Lauderdale.

“Kwa kila mwanasiasa anayepokea michango kutoka kwa NRA, aibu kwako!” alisema mwanafunzi huyo na kumshtumu Trump kwa kupokea mamilioni ya pesa kutoka kwa chama hicho kufadhili kampeni yake ya uchaguzi. Umati ulijibu kwa kusema : “Aibu kwake!”

“Haya yatakuwa mauaji ya mwisho ya kufyatuliwa risasi. Tutabadilisha sheria,” aliapa na kumshutumu Nikolas Cruz 19 ambaye alinunua bunduki halali licha ya kujulikana kwamba alikuwa na tabia ya kuzua ghasia.

“Suala la iwapo watu wanafaa kuruhusiwa kumiliki silaha si suala la kisiasa. Ni suala la uhai na kifo na linapaswa kukoma kuwa suala la kisiasa,” alisema Gonzalez.

Jijini Washington, wanasiasa walisema kwamba NRA halitaguswa huku Trump mwenyewe akisema sababu ya watu kuwamiminia risasi wengine linahusu matatizo ya akili bila kuzungumzia suala la kuthibiti umiliki wa silaha.

“Ikiwa rais anataka kuja na kuniambia ana kwa ana kwamba huu ulikuwa mkasa mbaya na kwamba hakuna hatua zitakazochukuliwa, basi nitafurahia kumuuliza ni pesa gapi alizopata kutoka kwa NRA,” alisema Gonzalez kwenye hotuba yake.