Liverpool, Manchester City nguvu sawa ligini

Na MASHIRIKA

MABINGWA watetezi wa Ligi Kuu ya Uingereza (EPL), Manchester City pamoja na Liverpool walitarajia kudengua Chelsea kudengua Chelsea kileleni mwa jedwali waliposhuka dimbani kupimana ubabe uwanjani Anfield mnamo Jumapili.

Hata hivyo, sare iliyosajiliwa na vikosi hivyo ilidumisha masogora wa kocha Thomas Tuchel kileleni mwa jedwali la EPL.

Man-City walitamalaki kipindi cha kwanza cha mchezo ila wakapoteza nafasi nyingi za wazi. Waliadhibiwa baadaye na Sadio Mane aliyeshirikiana vilivyo na Mohamed Salah katika dakika ya 59.

Hata hivyo, uongozi wa Liverpool ulidumu kwa dakika 10 pekee kabla ya Phil Foden kumzidi ujanja James Milner na kukamilisha krosi ya Gabriel Jesus.

Salah alifungia Liverpool bao la pili katika dakika ya 76 kabla ya kombora lililovurumishwa na Kevin De Bruyne katika dakika ya 81 kumbabatiza beki Joel Matip na kujaa ndani ya lango lililokuwa chini ya ulinzi wa Alisson Becker.

Kufikia sasa, Liverpool ya kocha Jurgen Klopp inajivunia alama 15, moja pekee kuliko Chelsea ambao wamepoteza mechi moja na kuambulia sare mara moja kutokana na michuano saba iliyopita ya EPL msimu huu.

Man-City kwa upande wao wanashikilia nafasi ya tatu jedwalini kwa alama 14 sawa na Manchester United, Everton na Brighton.

Ushindi kwa Man-City ungeshuhudia Liverpool wakipoteza mechi yao ya kwanza ligini muhula huu. Mabingwa hao wa EPL 2019-20 ndicho kikosi cha pekee ambacho hakijapigwa ligini hadi kufikia sasa muhula huu.

Man-City walishuka dimbani wakipania kujinyanyua baada ya Paris Saint-Germain (PSG) kuwalaza 2-0 katika mechi iliyopita ya Klabu Bingwa Ulaya (UEFA). Liverpool nao walikuwa wakilenga kuendeleza ubabe uliowavunia ushindi mnono wa 5-1 dhidi ya FC Porto ya Ureno kwenye kipute hicho cha bara Ulaya ugani Estadio do Dragao.

Japo matokeo ya Liverpool katika UEFA yamekuwa yakiridhisha baada ya kufungua kampeni zao kwa ushindi wa 3-2 ugani Anfield, uthabiti wao ligini ulitikiswa na limbukeni Brentford waliowalazimishia sare ya 3-3 katika mchuano uliotangulia kabla ya kumenyana na Man-City.

Liverpool sasa hawajapoteza mechi katika jumla ya mapambano 11 yaliyopita ugani Anfield na wamefunga mabao 17 kutokana na mechi saba zilizopita ligini.

TAFSIRI NA: CHRIS ADUNGO 

Vigogo Man-U, Chelsea na Liverpool mawindoni leo

Na MASHIRIKA

MANCHESTER, Uingereza

MIAMBA wa Manchester United, Chelsea na Liverpool watalenga kuanza msimu mpya wa Ligi Kuu ya Uingereza (EPL) kwa kishindo hii leo Jumamosi watakapokutana na wanyonge Leeds, Crystal Palace na Norwich mtawalia.

Red Devils wa Man-United wataalika Leeds ugani Old Trafford, Chelsea wakiwa nyumbani Stamford Bridge nao Liverpool wanafunga safari kuzuru Norwich.

Man-United hawajawahi kupoteza dhidi ya Leeds katika mechi 15 zilizopita za ligi uwanjani mwao.

Vile vile, vijana wa kocha Ole Gunnar Solskjaer hawajapoteza mara nne mfululizo katika mashindano yote.

Walikung’uta Leeds ya kocha Marcelo Bielsa 6-2 ugani Old Trafford msimu uliopita.

Red Devils watakosa huduma za wachezaji kadhaa nyota wakiwemo Marcus Rashford na Edinson Cavani, ingawa kikosi cha leo kitajumuisha mshambuliaji matata Mason Greenwood, viungo stadi Paul Pogba na Fernandes pamoja na beki Harry Maguire.

Sajili mpya Jadon Sancho kutoka Borussia Dortmund anaweza kuonja dakika zake za kwanza dhidi ya Leeds.

“Nimekuwa nikisubiri kwa muda mrefu uhamisho huu kufanyika, kwa hivyo nafurahi kuwa sasa niko hapa. Niko tayari kuanza msimu dhidi ya Leeds,” alisema mshambuliaji Sancho.

Leeds itakuwa bila Diego Llorente, lakini mastaa wake Raphinha, Kalvin Phillips na Patrick Bamford wapo.

Man-United iko katika orodha ya timu zinazotazamiwa kuwa wawaniaji halisi wa taji la EPL msimu huu.

Walimaliza msimu uliopita wa 2020-21 katika nafasi ya pili, nao wapinzani wao wa leo Leeds waliridhika na nafasi ya tisa.

Mabingwa wa Klabu Bingwa Ulaya (UEFA) pamoja na Kombe la Uefa Super Cup, Chelsea, watafukuzia ushindi wao wa nane mfululizo dhidi ya Palace.

Macho yatakuwa kwa straika hodari Romelu Lukaku ambaye amerejea kutoka Inter Milan, na mshambuliaji matata wa Palace, Wilfried Zaha.

Chelsea, almaarufu The Blues, wananolewa na Mjerumani Thomas Tuchel naye Mfaransa Patrick Vieira yuko usukani Palace.

Chelsea walimaliza msimu jana katika nafasi ya nne huku Palace ikilikunja jamvi la EPL ikiwa nambari 14.Liverpool inatarajiwa kumkaribisha kikosini beki matata Virgil van Dijk baada ya kuwa mkekani kwa muda mrefu msimu uliopita.

Reds wa kocha Jurgen Klopp watalenga kudumisha rekodi ya kutoshindwa na Norwich hadi mechi 15.Baadhi ya silaha ambazo Klopp atatumia leo dhidi ya Norwich ni pamoja na Mohamed Salah, Sadio Mane na Roberto Firmino.

Kwa upande wa pili Teemu Pukki na Todd Cantwell watakuwa tegemeo kwa wenyeji ugani Carrow Road.

Leo pia itakuwa zamu ya Leicester kufungua msimu itakapopepetana na Wolves, Watford itazipiga dhidi ya Aston Villa nayo Newcastle italimana na West Ham. Everton na Southampton, Burnley dhidi ya Brighton pia ni leo.

Liverpool wapepeta Burnley na kuingia ndani ya mduara wa 4-bora EPL

Na MASHIRIKA

KOCHA Jurgen Klopp wa Liverpool alifananisha ushindi wa kikosi chake dhidi ya Burnley na ufanisi wa “nusu-fainali” ambao kwa sasa umewapa tiketi ya “fainali” dhidi ya Crystal Palace katika mchuano wa mwisho kwenye Ligi Kuu ya Uingereza (EPL) msimu huu.

Chini ya Klopp, Liverpool waliwapokeza Burnley kichapo cha 3-0 mnamo Jumatano usiku ugani Turf Moor na kutinga ndani ya mduara wa nne-bora kwenye msimamo wa jedwali.

Miamba hao waliotawazwa wafalme wa EPL mnamo 2019-20, waliingia ugani kuvaana na Burnley wakilenga kuendeleza ubabe uliowapa ushindi wa 2-1 dhidi ya West Bromwich Albion katika mechi ya awali mnamo Mei 16, 2021. Ushindi huo uliimarisha zaidi nafasi yao ya kuingia ndani ya orodha ya nne-bora na hivyo kufuzu kwa soka ya Klabu Bingwa Ulaya (UEFA) msimu ujao wa 2021-22.

Wakicheza dhidi ya Burnley, Liverpool walifungua ukurasa wa mabao kupitia kwa fowadi Roberto Firmino mwishoni mwa kipindi cha kwanza. Chipukizi Nathaniel Phillips alipachika wavuni goli la pili katika dakika ya 52 kabla ya Alex Oxlade-Chamberlain kuzamisha kabisa chombo cha wenyeji wao mwishoni mwa kipindi cha pili. Goli la Nathaniel lilikuwa lake la kwanza ndani ya jezi za Liverpool.

Liverpool almaarufu ‘The Reds’ sasa wanakamata nafasi ya nne kwa alama 66 sawa na Leicester City wanaoshikilia nafasi ya tano kutokana na uchache wa mabao.

Masogora wa Klopp watafunga rasmi kampeni za EPL msimu huu dhidi ya Palace mnamo Mei 23 mbele ya mashabiki 10,000 ugani Liverpool na mchuano huo utakuwa wa mwisho kwa kocha Roy Hodgson wa Palace kusimamia.

Kwa upande wao, Leicester almaarufu ‘The Foxes’ watakuwa wenyeji wa nambari saba Tottenham Hotspur uwanjani King Power. Chelsea ambao wanakamata nafasi ya tatu kwa alama 67 wakiwaendea Aston Villa ugani Villa Park.

“Leo ilikuwa nusu-fainali ambayo tulikuwa na ulazima wa kushinda. Nafurahi kwamba tulifaulu kufanya hivyo. Kazi bado haijakamilika. Tungali na fainali ya kusakata na hilo ndilo jambo tulilolitaka,” akatanguliza Klopp.

“Tulistahili ushindi kwa sababu tuliweka wazi maazimio yetu mapema dhidi ya Burnley. Itakuwa raha tele kuwapa mashabiki wetu 10,000 kitu cha kujivunia katika gozi lijalo ugani Anfield,” akasema.

Chini ya kocha Sean Dyche, Burnley kwa sasa wana rekodi mbovu ya kupoteza jumla ya mechi 10 mfululizo za EPL katika uwanja wa nyumbani tangu Januari 2021. Kikosi hicho kitakachofunga kampeni za muhula huu dhidi ya Sheffield United ugani Bramall Lane, sasa kinashikilia nafasi ya 17 jedwalini kwa alama 39.

TAFSIRI NA: CHRIS ADUNGO

Liverpool wazamisha RB Leipzig na kujikatia tiketi ya robo-fainali za UEFA

Na MASHIRIKA

LIVERPOOL waliwapokeza RB Leipzig kutoka Ujerumani kichapo cha 2-0 mnamo Jumatano usiku katika mchuano wa mkondo wa pili wa hatua ya 16-bora ya Klabu Bingwa Ulaya (UEFA) jijini Budapest, Hungary.

Ushindi huo uliwawezesha Liverpool ambao ni mabingwa watetezi wa Ligi Kuu ya Uingereza (EPL) kuwadengua Leipzig kwa jumla ya magoli 4-0 na kufuzu kwa robo-fainali za UEFA msimu huu.

Ni matokeo ambayo yaliweka hai matumaini ya Liverpool angalau kutia kibindoni taji hilo muhula huu baada ya kampeni zao za kuhifadhi ufalme wa EPL kudidimizwa na matokeo duni ambayo yamewashuhudia wakipoteza jumla ya mechi sita zilizopita kwa mfululizo katika uwanja wao wa nyumbani wa Anfield.

Chini ya kocha Jurgen Klopp, huenda Liverpool sasa wakaelekeza mawazo yao yote katika kushinda taji la UEFA msimu huu, ufanisi utakaowashuhudia wakitawazwa wafalme wa kipute hicho mara mbili chini ya kipindi cha misimu mitatu iliyopita.

Sawa na mchuano wa mkondo wa kwanza, gozi hilo la marudiano lilitandaziwa uwanjani Puskas Arena jijini Budapest kwa sababu ya ukali wa masharti ya kudhibiti maambukizi ya virusi vya corona nchini Ujerumani.

Baada ya kupoteza nafasi nyingi za wazi katika kipindi cha dakika 69 za kwanza za mchezo, Liverpool hatimaye walifungua ukurasa wa mabao kupitia kwa fowadi matata raia wa Misri, Mohamed Salah katika dakika ya 70 kabla ya Sadio Mane kutikisa nyavu dakika nne baadaye.

Bao la Mane lilikuwa zao la ushirikiano mkubwa kati yake na Divock Origi – mshambuliaji raia wa Ubelgiji aliye na usuli wake nchini Kenya. Wanasoka wengine waliotia fora zaidi kwa upande wa Liverpool ni kiungo Thiago Alcantara na mshambuliaji Diogo Jota aliyesajiliwa kutoka Wolves mwanzoni mwa msimu huu wa 2020-21.

Liverpool watasubiri hadi Ijumaa ya Machi 19 kufahamu mpinzani wao katika hatua ya robo-fainali.

TAFSIRI NA: CHRIS ADUNGO

Mashabiki wa Liverpool hawanitaki, wanataka Klopp asalie kuwa kocha wao – Steven Gerrard

Na MASHIRIKA

KOCHA wa Rangers, Steven Gerrard, amesema ingawa kubwa zaidi katika maazimio yake ni kuwa mkufunzi wa Liverpool siku moja, anatarajia kwamba Jurgen Klopp atasalia ugani Anfield kuendelea kudhibiti mikoba ya miamba hao kwa “miaka mingi zaidi”.

Chini ya Klopp, Liverpool wamepoteza jumla ya mechi sita zilizopita za nyumbani kwa mpigo kwenye Ligi Kuu ya Uingereza (EPL). Ni matokeo ambayo yanadidimiza matumaini yao ya kumaliza kampeni za msimu huu ndani ya mduara wa nne-bora na hatimaye kufuzu kwa soka ya Klabu Bingwa Ulaya (UEFA) muhula ujao.

Baada ya kupigwa na Fulham 1-0 ugani Anfield wikendi iliyopita, Klopp alikiri kwamba msimu huu wa 2020-21 ndio wa kusikitisha zaidi katika taaluma yake ya ukocha. Ni kauli ambayo ilifasiriwa na mashabiki kuwa ishara za mkufunzi huyo kutaka kuondoka Liverpool huku tetesi zinazomhusisha na uwezekano wa kuyoyomea Real Madrid au Bayern Munich zikishika kasi.

Gerrard ambaye ni kiungo na nahodha wa zamani wa Liverpool, aliongoza waajiri wake Rangers kutia kapuni ufalme wa Ligi Kuu ya Scotland kwa mara ya kwanza baada ya miaka 10. Ni ufanisi ambao tayari umeibua gumzo kuhusu uwezo wake wa kudhibiti mikoba ya Liverpool iwapo Klopp atahiari kuondoka ugani Anfield.

“Mashabiki wa Liverpool hawanitaki kuwa kocha wao kwa sasa. Wanataka Klopp aendeleze kazi nzuri ambayo amekuwa akifanya ugani Anfield. Mimi nawaunga mkono mashabiki hao asilimia mila fil mia,” akasema Gerrard wakati akihojiwa na ITV.

“Sidhani tunapaswa kuwa na gumzo la aina hii kwa wakati huu. Klopp ni miongoni mwa wakufunzi bora zaidi duniani kwa sasa na anawaniwa na timu maarufu ulimwenguni. Namstahi sana na natarajia aendelee kuwa kocha wa Liverpool kabla nihitimu kuwa mrithi wake,” akaongeza Gerrard, 40.

Klopp ambaye pia amewahi kunoa Mainz na Borussia Dortmund, tayari amesema atakataa ofa ya kuwa kocha mpya wa Ujerumani na azma yake ni kusalia kambini mwa Liverpool hadi mkataba wake wa sasa utakapotamatika rasmi mnamo 2024. Timu ya taifa ya Ujerumani itasalia bila kocha mwishoni mwa Julai 2021 wakati ambapo mkufunzi wa sasa Joachim Loew anatarajiwa kuondoka baada ya kukamilika kwa fainali za Euro 2021.

Gerrard aliyechezea Liverpool jumla ya mechi 710, aliwahi kuwa kocha wa chipukizi wa kikosi hicho kabla ya kupokezwa mikoba ya ukufunzi kambini mwa Rangers mnamo 2018.

Liverpool walinyanyua taji la EPL msimu uliopita wa 2019-20 wakijivunia pengo la alama 18 kati yao na Man-City walioambulia nafasi ya pili. Hadi Liverpool walipopigwa na Burnley mnamo Januari 2021, miamba hao wa soka ya Uingereza hawakuwa wamepoteza mechi yoyote ya nyumbani kutokana na mapambano 68 ya EPL.

Kwa sasa wanashikilia nafasi ya nane kwa alama 43 huku pengo la pointi 22 likitamalaki kati yao na viongozi wa jedwali la EPL, Man-City. Liverpool wamepoteza jumla ya mechi sita mfululizo katika EPL kwa mara ya kwanza tangu 1953-54.

TAFSIRI NA: CHRIS ADUNGO

COVID-19: Kocha Jurgen Klopp akosa kusafiri Ujerumani kuhudhuria mazishi ya mama yake mzazi

Na MASHIRIKA

KOCHA wa Liverpool, Jurgen Klopp hakuweza kurejea nchini Ujerumani kwa minajili ya mazishi ya mamaye mzazi mnamo Februari 10 kwa sababu ya masharti makali ya kudhibiti msambao wa virusi vya corona nchini humo.

Ujerumani imepiga marufuku safari zote za nje kutoka mataifa yanayoshuhudia maambukizi mapya ya Covid-19, ikiwemo Uingereza anakofanyia kazi Klopp.

Kupitia akaunti yao ya mtandao wa Twitter, Liverpool walitumia Klopp ujumbe wa kumfariji mnamo Jumatano uliosema: “Hutawahi kutembea peke yako Jurgen.”

Akihojiwa na gazeti la Schwarzwalder Bote nchini Ujerumani, Klopp alisema mama yake mzazi alikuwa “kila kitu kwake na alimaanisha mengi maishani mwake”.

“Alikuwa mama niliyemstahi sana kwa pendo halisi. Sina neon jema na bora zaidi la kuelezea uzuri wake kwangu. Hata hivyo, ugumu wa hali inayopitiwa kwa sasa duniani kote kwa sababu ya Covid-19 ulinifanya kutohudhuria mazishi yake,” akatanguliza.

“Mambo yatakapotengenea, naahidi kusafiri Ujerumani kuandaa hafla ya kukumbuka yote mema aliyonifanyia mamangu katika uhai wake,” akaeleza kocha huyo wa zamani wa Borussia Dortmund.

Wakijibu ujumbe aliotumiwa na Liverpool, vinara wa Ligi Kuu ya Uingereza (EPL) walisema: “Tunatuma rambirambi zetu kwa familia nzima ya Klopp, marafiki zake na wote walioguswa na msiba huo kwa namna moja au nyingine. Tunamweka Jurgen katika mawazo yetu wakati huu mgumu.”

Baadhi ya klabu ambazo pia zilituma rambirambi na jumbe la kumliwaza Klopp ni Arsenal, Manchester United, Tottenham, Atletico Madrid na Barcelona.

Masharti makali ya kudhibiti maambukizi mapya ya Covid-19 nchini Ujerumani yalichochea vinara wa Klabu Bingwa Ulaya (Uefa) kuratibu michuano ya mkondo wa kwanza katika hatua ya 16-bora ya Klabu Bingwa Ulaya (UEFA) kati ya RB Leipzig na Liverpool kisha Borussia Monchengladbach na Manchester City kupigiwa jijini Budapest, Hungary wiki ijayo.

TAFSIRI NA: CHRIS ADUNGO

Southampton yaipokeza Liverpool kichapo cha 1-0

Na MASHIRIKA

MATUMAINI ya Liverpool kuhifadhi taji la Ligi Kuu ya Uingereza (EPL) msimu huu yaliyumbishwa Jumatatu usiku baada ya Southampton kuwapokeza kichapo cha 1-0 uwanjani St Mary’s.

Bao la pekee na la ushindi kwa upande wa Southampton lilipachikwa wavuni na Danny Ings ambaye ni mchezaji wa zamani wa Liverpool. Bao hilo lililojazwa wavuni katika dakika ya pili, lilitokana na frikiki ya James Ward-Prowse aliyemtatiza sana kipa Alisson Becker wa Liverpool katika kipindi cha pili.

Japo Liverpool wanasalia kileleni mwa jedwali la EPL kwa alama 33, masogora hao wa kocha Jurgen Klopp wamejizolea alama mbili pekee kutokana na mechi tatu zilizopita. Hofu zaidi kwa Liverpool ni kwamba wamesakata mchuano mmoja zaidi kuliko nambari mbili Manchester United ambao pia wana alama 33.

Leicester City waliotawazwa mabingwa wa EPL mnamo 2015-16, wanashikilia nafasi ya tatu jedwalini kwa alama 32, tatu pekee mbele ya Tottenham Hotspur, Manchester City, Southampton na Everton.

Liverpool kwa sasa wapo katika hatari ya kupitwa na vikosi hivi vyote iwapo watajikwaa katika mechi yao ijayo dhidi ya Man-United mnamo Januari 17 ugani Anfield.

Baada ya kuchuana na Man-United, Liverpool wameratibiwa kucheza dhidi ya Burnley, Tottenham, West Ham United, Brighton, Man-City na Leicester kwa usanjari huo katika EPL.

Ushindi uliosajiliwa na Southampton dhidi ya Liverpool ulikuwa wa kwanza kwa vijana hao wa kocha Ralph Hassenhuttl kutokana na mechi tano zilizopita za EPL.

Liverpool wadhalilisha Palace kwa kichapo cha 7-0 ligini

Na MASHIRIKA

LIVERPOOL waliweka wazi azma ya kutetea ubingwa wa Ligi Kuu ya Uingereza (EPL) msimu huu kwa kudhalilisha Crystal Palace 7-0 mnamo Disemba 19, 2020.

Ilikuwa mara ya kwanza kwa Liverpool kufunga jumla ya mabao saba tangu waipepete Derby County mnamo 1991.

Ushindi huo ulitosha kusaulisha mashabiki wa Liverpool kichapo cha 7-2 ambacho kikosi chao kilipokezwa na Aston Villa kwenye EPL ugenini mnamo Oktoba 2020.

Liverpool walishambulia sana wenyeji wao baada ya kila dakika na wakasajili ushindi wa kwanza wa ligi ugenini tangu Septemba 2020.

Siku mbili baada ya kutawazwa Kocha Bora wa Mwaka 2020 katika tuzo zilizotolewa na Shirikisho la Soka Duniani (FIFA), kocha Jurgen Klopp alimpa chipukizi Takumi Minamino fursa ya kuanza mechi katika kikosi cha kwanza na kumweka benchi fowadi Mohamed Salah.

Ilikuwa mara ya kwanza kwa benchi ya klabu za EPL kuungwa na wachezaji tisa wa akiba.

Minamino aliwafungulia Liverpool ukurasa wa mabao katika dakika ya tatu. Bao hilo lilikuwa la kwanza kwa nyota huyo kufunga katika EPL baada ya miezi 12.

Sadio Mane na Roberto Firmino walifunga mabao mengine ya Liverpool katika kipindi cha kwanza. Hata hivyo, Mane alionekana kukerwa na hatua ya kuondolewa kwake uwanjani katika kipindi cha kwanza na nafasi yake kutwaliwa na Salah katika dakika ya 57.

Straika wa Liverpool Sadio Mane asherehekea baada ya kufunga bao la pili Liverpool ilikaribishwa na Crystal Palace uwanjani Selhurst Park, London, Desemba 19, 2020. Wenyeji walipoteza mchezo Liverpool ikifunga 7-0. Picha/ AFP

Henderson alipachika wavuni goli la nne la Liverpool kabla ya Firmino kupachika wavuni la tano. Salah alicheka na nyavu za Palace kwa mara nyingine katika dakika za 81 na 84 na kuzamisha kabisa chombo cha wenyeji wao.

Mchuano huo ulimpa kocha Klopp fursa ya kumchezesha kiungo Alex Oxlade-Chamberlain kwa mara ya kwanza tangu apate jeraha dhidi ya Newcastle United mnamo Julai.

Ushindi kwa Liverpool uliwawezesha kufungua mwanya wa alama sita kileleni mwa jedwali la EPL.

Liverpool wapiga Ajax na kusonga mbele UEFA huku chipukizi Curtis Jones akiweka historia

Na MASHIRIKA

CHIPUKIZI Curtis Jones wa Liverpool alifunga bao lake la kwanza katika kipute cha Klabu Bingwa Ulaya (UEFA) baada ya kuchuma nafuu kutokana na kosa la kipa Andre Onana wa Ajax mnamo Disemba 1, 2020 uwanjani Anfield, Uingereza.

Ushindi huo uliosajiliwa na Liverpool uliwasaidia kufuzu kwa hatua ya 16-bora ya UEFA kutoka Kundi D wakiwa kileleni.

Onana alichelewa kufikia mpira uliolekezwa langoni mwake na Neco Williams na kusuasua kwake kumpa Jones, 19, fursa ya kucheka na nyavu katika dakika ya 58.

Kipa Caoimhin Kelleher aliyewajibishwa na Liverpool katika nafasi ya mlinda-lango chaguo la kwanza, Alisson Becker pia alichangia pakubwa ushindi wa Liverpool baada ya kufanya kazi ya ziada ya kupangua fataki alizoelekezewa na fowadi Klaas-Jan Huntelaar aliyeingia uwanjani katika kipindi cha pili.

Kiungo wa zamani wa Everton, Davy Klaassen naye alipoteza nafasi nyingi za wazi huku David Neres akishuhudia kombora lake likibusu mwamba wa lango la Liverpool sekunde chache kabla ya kipenga cha kuashiria mwisho wa mchuano kupulizwa.

Jones naye alishuhudia fataki yake ikigonga mhimili wa lango la Ajax dakika nne kabla ya kucheka na nyavu za wageni wao. Liverpool ambao kwa sasa watacheza na Midtjylland ya Denmark katika mchuano wao wa mwisho kundini mnamo Disemba 9, wanaungana na Manchester City na Chelsea ambao ni wawakilishi wengine wa soka ya Uingereza ambao tayari wamefuzu kwa hatua ya 16-bora ya UEFA msimu huu.

Liverpool walishuka dimbani wakitawaliwa na kiu ya kusajili ushindi ili kuepuka presha ambayo vinginevyo ingewakosesha dira baada ya Atalanta ya Italia kuwaduwaza kwa kichapo cha 2-0 katika mechi nyingine ya Kundi D uwanjani Anfield wiki moja iliyopita.

Baada ya Atalanta kulazimishiwa sare ya 1-1 na Midtjylland nchini Denmark, Liverpool kwa sasa wanajivunia alama 12, nne zaidi kuliko nambari mbili Atalanta kwenye Kundi D.

Huku Liverpool wakitumia mchuano dhidi ya Ajax kumkaribisha kikosi nahodha Jordan Henderson aliyekuwa akicheza kwa mara ya kwanza tangu Novemba 8 kwa sababu ya jeraha, Liverpool walifichua kwamba kipa Alisson huenda sasa akasalia mkekani kwa kipindi kirefu.

Jeraha la Alisson ambaye sasa atakosa mechi mbili zijazo za Liverpool dhidi ya Wolves kwenye EPL na Midtjylland kwenye UEFA, linamaanisha kwamba kocha Jurgen Klopp atakosa maarifa ya wanasoka tisa wa kikosi cha kwanza wakiwemo Naby Keita, Trent Alexander-Arnold, Virgil van Dijk, Joe Gomez, Xherdan Shaqiri, James Milner, Thiago Alcantara na Alex Oxlade-Chamberlain.

Maamuzi ya Klopp kumchezesha kipa Kelleher dhidi ya Ajax badala ya Adrian ambaye amekuwa siku zote akichukua nafasi ya Alisson, yanaibua maswali mengi kuhusu mustakabali wa Adrian uwanjani Anfield.

Adrian aliyesajiliwa mwanzoni mwa msimu wa 2019-20, anajivunia kucheza zaidi ya mechi 200 zilizopita akivalia jezi za Real Betis, West Ham United na Liverpool.

Jones (miaka 19 na siku 306) ndiye mchezaji wa tatu mwenye umri mchanga zaidi kuwahi kufungia Liverpool kwenye UEFA baada ya David N’Gog mnamo 2008 (miaka 19 na siku 252 dhidi ya PSV Eindhoven) na Trent Alexander-Arnold mnamo 2017 (miaka 19 na siku 10 dhidi ya Maribor).

Liverpool wadandia kilele cha jedwali la EPL kwa kutoka sare ya 1-1 dhidi ya Brighton

Na MASHIRIKA

PENALTI ya utata iliyofungwa na Pascal Gross mwishoni mwa kipindi cha pili iliwawezesha Brighton kusajili sare ya 1-1 dhidi ya Liverpool katika mechi ya Ligi Kuu ya Uingereza mnamo Novemba 28, 2020 uwanjani American Express.

Penalti hiyo ilikuwa ya pili kwa Brighton kupokezwa katika mchuano huo baada ya fowadi Neal Maupay kupoteza mkwaju wa kwanza katika kipindi cha kwanza.

Liverpool ambao ni mabingwa watetezi wa taji la EPL walidhani walikuwa wamechukua uongozi wa mapema kupitia kwa Mohamed Salah baada ya kushirikiana vilivyo na Roberto Firmino katika dakika ya 17. Hata hivyo, bao lake halikuhesabiwa na refa Stuart Attwell baada ya teknolojia ya VAR kuthibitisha kwamba lilifumwa wavuni akiwa ameotea.

Sajili mpya Diogo Jota alicheka na nyavu za Brighton katika dakika ya 60. Bao hilo lilikuwa lake la tisa hadi kufikia sasa tangu aingie katika sajili rasmi ya Liverpool mwanzoni mwa muhula huu.

Fowadi Sadio Mane aliingia uwanjani katika kipindi cha pili na akashuhudia bao lake pia likikataa kuhesabiwa baada ya kubainika kwamba alikuwa ameotea.

Liverpool waliondoka uwanjani Amex wakiwa wengi wa majuto baada ya kupoteza nafasi nyingi za wazi. Kusuasua kwao kuliwapa wenyeji motisha ya kuwavamia zaidi na Brighton wakapata fursa ya kusawazisha mambo mwishoni mwa kipindi cha pili kupitia penalti baada ya Andy Robertson kumchezea visivyo Danny Welbeck ndani ya kijisanduku.

Kocha Jurgen Klopp alionekana mwingi wa hasira akiondoka uwanjani huku akiwachemkia marefa waliosimamia mchuano huo kwa kutoa baadhi ya maamuzi ambayo kwa mujibu wake, yalipendelea Brighton.

“Tulinyima ushindi wa wazi na mabao bayana ambayo hata kipofu angejua ni ya halali. Ni hujuma na maonevu kwa Liverpool ambao kwa kweli walicheza vizuri, kumiliki asilimia kubwa ya mpira na kuwazidi wenyeji wao katika kila idara. Haileti raha yoyote iwapo hali itazidi kuwa hivi,” akasema mkufunzi huyo raia wa Ujerumani.

Pigo zaidi kwa Liverpool ni jeraha ambalo kiungo James Milner. Brighton walilazimika kuondoa Maupay na Adam Lallana baada ya dakika nane pekee kutokana na majeraha.

Klopp alilalamikia pia maamuzi ya vinara wa EPL kuratibu mchuano wao dhidi ya Brighton kusakatwa mapema Novemba 28 ikizingatiwa kwamba walikuwa wamechuana na Atalanta ya Italia kwenye gozi la Klabu Bingwa Ulaya (UEFA) mnamo Novemba 25, 2020 ugani Anfield. Liverpool walipokezwa kichapo cha 2-0 katika mchuano huo.

Ushindi wa Liverpool uliwakweza kileleni mwa jedwali la EPL kwa alama 21, moja pekee mbele ya Tottenham Hotspur ambao watakuwa wageni wa Chelsea mnamo Novemba 29 ugani Stamford Bridge. Brighton kwa upande wao walipaa hadi nafasi ya 16 kwa alama 10.

Wanasoka 7 waliotemwa na Liverpool na wakaishia kuwa masupastaa kwingineko

Na CHRIS ADUNGO

LIVERPOOL waliibuka mabingwa wa Ligi Kuu ya Uingereza (EPL) mnamo 2019-20 kwa mara ya kwanza baada ya miaka 30.

Katika kipindi hicho cha kusubiri ufalme wa taji la EPL, miamba hao wa soka walishuhudia idadi kubwa ya wanasoka wakija na kuondoka uwanjani Anfield.

Kati ya wachezaji walioruhusiwa na Liverpool kuagana nao waliishia kuwa masogora wa haiba kubwa kwingineko. Baadhi yao ni hawa:

CONOR COADY

Aliingia katika sajili rasmi ya Liverpool mnamo 2005 akiwa na umri wa miaka 12 pekee. Alijitahidi na kupata uhakika wa kuunga kikosi cha kwanza cha Liverpool ambao walimwajibisha mara mbili pekee katika EPL.

Baada ya kutumwa kambini mwa Sheffield United kwa mkopo mnamo 2013-14, Coady alitiwa mnadani na akasajiliwa na Huddersfield Town aliowachezea mara 45 kwenye Ligi ya Daraja la Kwanza (Championship).

Alijiunga baadaye na Wolves na kuwasaidia kupanda ngazi hadi kwenye EPL na kushiriki pia soka ya bara Ulaya. Kuimarika kwa makali yake akiwa Wolves ni kiini cha kuteuliwa kwake kuunga kikosi cha kwanza cha Uingereza dhidi ya Denmark mnamo Septemba 2020.

Aliridhisha zaidi kwenye mchuano huo uliomshuhudia akitawazwa mchezaji bora kabla ya kuongoza Uingereza, ambao kwa sasa wamechezesha mara tatu, kupepeta Wales 3-0 kirafiki mwishoni mwa Septemba.

PETER GULACSI

Kipa huyu raia wa Hungary alihudumu kambini mwa Liverpool kwa miaka sita. Hata hivyo, hakuwajibishwa katika mechi yoyote, mara nyingi akipangwa kuwa kipa chaguo la pili au la tatu nyuma ya walinda-lango Pepe Reina na Brad Jones.

Gulacsi alitumwa baadaye kuchezea Hereford, Tranmere na Hull City kwa mkopo kabla ya kuuzwa kambini mwa RB Salzburg mnamo 2013.

Baada ya kufufua makali yake katika Ligi Kuu ya Austria, kipa huyo aliyoyomea Ujerumani kuvalia jezi za RB Leipzig inayoshiriki Ligi Kuu ya Bundesliga.

Gulacsi kwa sasa amewadakia Leipzig kwa misimu mitano akiwa kipa chaguo la kwanza na amewasaidia kuendeleza ushindani mkali katika Bundesliga na Klabu Bingwa Ulaya (UEFA). Hapana shaka kwamba Liverpool wangetamani sana kuwa na kipa matata kufu ya Gulacsi kwa sasa ili atoe ushindani mkali zaidi kwa nyota wao Alisson Becker.

RAHEEM STERLING

Alisajiliwa na Liverpool mnamo 2010 baada ya kuvalia jezi za Queens Park Rangers (QPR) kwa miaka saba.

Aligonga vichwa vya habari mnamo 2011 alipofunga mabao matano na kuwaongoza Liverpool kuwapepeta chipukizi wa Southend 9-0.

Sterling alianza kuchezeshwa katika kikosi cha kwanza cha Liverpool mnamo 2012 na akawajibishwa kwa kipindi cha misimu mitatu pekee. Japo aliondoka Liverpool akiwa tayari anajivunia jina kubwa katika ulingo wa soka, hapana shaka kwamba Sterling ameboreka zaidi tangu atue ugani Etihad kuchezea Manchester City ya kocha Pep Guardiola.

Akiondoka Liverpool, Sterlinga hakuwa amenyanyua taji lolote. Lakini kwa sasa amewaongoza Man-City kutwaa mataji mawili ya EPL, Kombe la FA na mataji manne ya League Cup.

Kati ya mabao 13 ambayo Sterling amefungia Uingereza, 12 yamepachikwa wavunia akiwa mwanasoka wa Man-City.

ALVARO ARBELOA

Beki huyu raia wa Uhispania alihudumu Liverpool kwa misimu miwili pekee, akiwa kizibo cha Steven Finnan katika mingi ya michuano.

Mnamo 2008-09, Arbeloa aliimarika zaidi na akayoyomea Uhispania kuchezea Real Madrid waliompa hifadhi uwanjani Santiago Bernabeu kwa miaka saba. Katika kipindi hicho, alipangwa mara kwa mara kwenye kikosi cha kwanza cha Uhispania.

Alichezea Real mara 233 na kuwaongoza kutia kapuni taji moja la La Liga na mawili ya UEFA. Alichezea Uhispania mara 56 na kuwasaidia kutwaa mataji mawili ya Euro (2008, 2012) na Kombe la Dunia mnamo 2010 nchini Afrika Kusini.

IAGO ASPAS

Aspas alichezea Liverpool mara 14 bila kufunga bao lolote. Atakumbukwa zaidi na mashabiki wa Liverpool kwa masihara yake ya 2013-14 dhidi ya Chelsea – mechi iliyochangia kushindwa kwao kutwaa taji la EPL.

Aspas aliagana na Liverpool baada ya msimu mmoja pekee na akatua Sevilla kabla ya kurejea Celta Vigo waliompokeza malezi ya soka katika umri mdogo.

Tangu wakati huo, amefunga mabao 92 katika La Liga kutokana na mechi 172 na kupokezwa fursa ya kuchezea timu ya taifa ya Uhispania mara 18. Alifunga bao muhimu katika sare ya 2-2 iliyosajiliwa na Uhispania dhidi ya Uingereza mnamo 2016. Aspas alikuwa sehemu ya kikosi kilichotegemewa na Uhispania kwenye fainali za Kombe la Dunia nchini Urusi mnamo 2018.

SUSO FERNANDEZ

Suso alijiunga na Liverpool mnamo 2010 baada ya kuagana na Cadiz. Hata hivyo, ilimchukua miaka miwili kabla ya kukwezwa ngazi hadi kikosi cha kwanza cha Liverpool.

Baada ya kuchezea waajiri wake mara 14 pekee kwenye msimu mmoja wa EPL, Suso alitumwa kuvalia jezi za Almeria kwa mkopo. Huduma zake zilinadiwa baadaye hadi AC Milan baada ya kuchezea Genoa mara tano pekee kwa mkopo. Hata hivyo, tangu 2016, Suso amekuwa supastaa huku akiwa tegemeo kubwa ugani San Siro kwa misimu mitatu na nusu kabla ya kutua Uhisapnia kuchezea Sevilla. Suso alikuwa sehemu ya kikosi cha Sevilla kilichozamisha Inter Milan kirahisi mwishoni mwa msimu wa 2019-20 na kutwaa ufalme wa Europa League.

DANNY INGS

Alijiunga na Liverpool mnamo 2015 akijivunia kuwa miongoni mwa wafungaji bora zaidi katika timu ya chipukizi nchini Uingereza.

Hata hivyo, Ings alichezea Liverpool mara 14 pekee katika mechi za EPL katika kipindi cha miaka minne ugani Anfield. Alikuwa mwepesi wa kupata mejaraha mabaya.

Alinunuliwa na Southampton mnamo 2019 waliojivunia huduma zake kwa mkopo wa mwaka mmoja ugani St Mary’s. Tangu apokezwe mkataba wa kudumu kambini mwa Southampton, Ings amefungia kikosi hicho mabao 26 kutokana na mechi 43 za EPL.

Mabao 22 aliyoyafunga katika msimu wa 2019-20 yalimkosesha kidogo (kwa goli moja pekee) fursa ya kutawazwa Mfungaji Bora wa EPL.

Ings kwa sasa amepata uhakika wa kuunga kikosi cha kwanza cha Uingereza, akifunga bao katika ushindi wa 3-0 dhidi ya Wales na kuchangia magoli mengine mawili hadi kufikia sasa msimu huu.

Liverpool watoka nyuma na kurefusha mkia wa Sheffield United kwenye EPL

Na MASHIRIKA

MABINGWA watetezi wa Ligi Kuu ya Uingereza (EPL), Liverpool walitoka nyuma na kuwapokeza Sheffield United kichapo cha 2-1 katika mchuano uliochezewa uwanjani Anfield mnamo Oktoba 24, 2020.

Fabinho aliyeaminiwa kujaza nafasi ya beki Virgil van Dijk anayeuguza jeraha, alisababisha penalti iliyowaweka Sheffield kifua mbele kunako dakika ya 13. Penalti hiyo iliyofungwa na Sander Berge ilitokana na tukio la Fabinho kumchezea Oliver McBurnie visivyo ndani ya kijisanduku.

Licha ya Liverpool kuonekana kuzidiwa maarifa katika safu ya kati na kuwekewa presha zaidi na Sheffield, masogora hao wa kocha Jurgen Klopp walipata bao la kwanza katika dakika ya 41 baada ya Roberto Firmino kushirikiana vilivyo na Sadio Mane.

Liverpool waliingia uwanjani wakitawaliwa na kiu ya kusajili ushindi baada ya kupigwa kwenye mechi mbili zilizopita ikiwemo ile iliyowashuhudia wakipepetwa 7-2 na Aston Villa. Ushindi wa Liverpool uliwawezesha kuchupa hadi kileleni mwa jedwali la EPL kwa alama 13 sawa na watani wao wakuu wa Merseyside, Everton ambao watavaana na Southampton uwanjani St Mary’s mnamo Oktoba 24.

Bao la pili la Liverpool lilifungwa na sajili mpya Diogo Jota katika dakika ya 64 baada ya kushirikiana vilivyo na Mohamed Salah ambaye kwa pamoja na beki Trent Alexandre-Arnold, walipoteza nafasi nyingi za wazi.

Chini ya kocha Chris Wilder, Sheffield United hawajasajili ushindi wowote kutokana na mechi sita zilizopita na wanajivunia alama moja pekee sawa na limbukeni Fulham waliopigwa 2-1 na Crystal Palace uwanjani Craven Cottage mnamo Oktoba 24.

Jeraha ambalo litamweka Van Dijk mkekani kwa kipindi kirefu kijacho linamweka Klopp katika ulazima wa kutegemea Fabinho na Joe Gomez kwenye safu ya ulinzi hadi mwishoni mwa Novemba 2020 ambapo wawili hao watapigwa jeki na Joel Matip atakayekuwa amepona jeraha.

Liverpool kwa sasa wameshinda mechi nne zilizopita za EPL dhidi ya Sheffield United kwa jumla ya mabao 9-1. Mabingwa hao watetezi wa EPL wanajivunia pia rekodi ya kushinda mechi 28 za ligi kati ya 29 zilizopita uwanjani Anfield. Chini ya Klopp, Liverpool hawajapoteza pia mechi 13 zilizopita ambazo zimewashuhudia wakifungwa kwanza na wapinzani wao.

Kufikia sasa, Liverpool wamefungwa mabao 14 kutokana na mechi sita za kwanza za EPL msimu huu. Katika kampeni za muhula wa 2019-20, iliwachukua jumla ya mechi 15 kwa nyavu zao kutikiswa mara hizo.

Jota ni mchezaji wa pili baada ya Mane mnamo Septemba 2016, kufunga bao katika mechi mbili za kwanza za Liverpool uwanjani Anfield.

Liverpool kwa sasa wanajiandaa kuwaalika FC Midtjylland katika mechi yao ya pili ya Klabu Bingwa Ulaya (UEFA) mnamo Oktoba 27 uwanjani Anfield kabla ya kuvaana na West Ham United ligini mnamo Oktoba 31.

Kwa upande wao, Sheffield United watawaalika Manchester City ugani Bramall Lane mnamo Oktoba 27 kabla ya kuwaendea Chelsea uwanjani Stamford Bridge wiki moja baadaye.

Pigo Liverpool Van Dijk akihofiwa kusalia nje kwa msimu mzima kutokana na jeraha

Na MASHIRIKA

BEKI matata wa Liverpool, Virgil van Dijk, amesema atapania kurejea ugani kwa matao ya juu zaidi baada ya kuarifiwa kwamba atahitaji kufanyiwa upasuaji wa goti.

Sogora huyo mwenye umri wa miaka 29 alipata jeraha kwenye gozi la wikendi lililoshuhudia Liverpool wakilazimishiwa sare ya 2-2 na Everton katika Ligi Kuu ya Uingereza (EPL) uwanjani Goodison Park.

Van Dijk alikabiliwa visivyo na kipa Jordan Pickford na ikabidi aondolewe ugani katika dakika ya 11 na nafasi yake kutwaliwa na difenda Joe Gomez. Ingawa haijulikani atasalia mkekani hadi lini, Liverpool wanahofia kwamba huenda nyota huyo akakosa mechi zote zilizosalia msimu huu.

“Jeraha la Van Dijk ni baya na kutokuwepo kwake kwa muda mrefu ni pigo kubwa kwa Liverpool. Huenda asalie nje hadi mwisho wa muhula japo tunasubiri tathmini ya madaktari baada ya upasuaji,” akasema kocha Jurgen Klopp kumhusu difenda huyo wa zamani wa Celtic na Southampton.

Tangu ashawishike kubanduka Southampton kwa Sh10.5 bilioni mnamo Januari 2018, Van Dijk amekuwa nguzo muhimu ugani Anfield na alisaidia Liverpool kutinga fainali ya Klabu Bingwa Ulaya (UEFA) katika msimu wa 2017-18 na pia katika EPL msimu wa 2018-19, kabla ya kutwaa mataji ya mashindano hayo misimu iliyofuata ya 2018-19 na 2019-20 mtawalia. Liverpool walinyanyua pia ubingwa wa Kombe la Dunia mnamo 2019.

Hadi alipopata jeraha katika gozi la Merseyside dhidi ya Everton, sogora huyo raia wa Uholanzi alikuwa amechezea Liverpool mara saba katika mechi zote za msimu huu wa 2020-21.

Kutokuwepo kwa Van Dijk kambini mwa Liverpool kutamsaza kocha Jurgen Klopp katika ulazima wa kutegemea zaidi maarifa ya Gomez na Joel Matip pamoja na chipukizi Nathaniel Phillips, Rhys Williams na Sepp van den Berg.

Gomez na Matip hawajawahi kupangwa pamoja katika kikosi cha kwanza cha Liverpool tangu Oktoba 2017 kwenye mechi iliyoshuhudia wakipokezwa kichapo cha 4-1 kutoka kwa Tottenham Hotspur uwanjani Wembley.

Ni matarajio ya kocha Frank de Boer wa timu ya taifa ya Uholanzi kuwa Van Dijk atakuwa amepona vilivyo kwa minajili ya fainali za Euro ambazo sasa zimeahirishwa hadi Juni 11 – Julai 11, 2021.

Pigo kwa Klopp Mane kupatikana na corona

Na MASHIRIKA

FOWADI Sadio Mane wa Liverpool ameugua Covid-19 na kwa sasa amejitenga.

Habari za kuugua kwa mwanasoka huyo raia wa Senegal zinajiri siku tatu baada ya sajili mpya Thiago Alcantara kupatikana pia na virusi vya corona.

Kwa mujibu wa Liverpool, Mane alionyesha dalili za kuugua kwa kipindi kifupi kabla ya kuthibitisha kwamba ameanza kujihisi vizuri.

Mane, 28, alikuwa sehemu ya kikosi cha Liverpool kilicholaza Arsenal 3-1 katika Ligi Kuu ya Uingereza (EPL) mnamo Septemba 28, 2020. Mfumaji huyo hakupangwa katika kikosi kilichobanduliwa na Arsenal kupitia penalti katika EFL/Carabao Cup mnamo Oktoba 1.

“Sawa na hali iliyomtokea Alcantara, Liverpool wataendelea kuzingatia kanuni zote zilizopo za kukabiliana na Covid-19 na Mane atajitenga kwa muda unatakikana,” ikasema sehemu ya taarifa ya Liverpool.

Nyota huyo ambaye amefungia Liverpool jumla ya mabao matatu kufikia sasa, atakosa mechi ya EPL itakayowakutanisha waajiri wake na Aston Villa mnamo Oktoba 4 kabla ya EPL kuingia mapumzikoni.

Mechi ya kwanza ya Liverpool baada ya pumziko fupi litakalopisha mashindano ya kimataifa ni gozi la Merseyside litakalowakutanisha na Everton uwanjani Goodison Park mnamo Oktoba 17, 2020.

Mnamo Septemba 28, 2020, vinara wa EPL walifichua kwamba jumla ya watu 10 walikuwa wamepatikana na virusi vya corona katika matokeo ya hivi punde ya vipimo vya afya – hiyo ikiwa idadi ya juu zaidi kuwahi kushuhudiwa tangu mwanzo wa msimu huu wa 2020-21.

TAFSIRI NA: CHRIS ADUNGO

Liverpool kuvaana na Arsenal huku Spurs wakionana na Chelsea raundi ya 16-bora ya Carabao Cup

Na MASHIRIKA

MIAMBA wa soka ya Ligi Kuu ya Uingereza (EPL), Liverpool, watakutana sasa na Arsenal kwenye raundi ya 16-bora ya kipute cha Carabao Cup mnamo Oktoba 1, 2020 baada ya kuwakomoa Lincoln 7-2 uwanjani Sincil Bank mnamo Alhamisi.

Arsenal ya kocha Mikel Arteta, ilifuzu kwa hatua ya 16-bora baada ya kuzamisha chombo cha Leicester City kwa mabao 2-0 mnamo Septemba 23 uwanjani King Power.

Wakicheza dhidi ya Lincoln, Liverpool ambao kwa sasa wananolewa na kocha Jurgen Klopp, walifungiwa mabao yao na Takumi Minamino, Curtis Jones, Xherdan Shaqiri, Marko Grujic na Divock Origi.

Tottenham Hotspur walifuzu kwa hatua ya 16-bora bila ya kutoa jasho baada ya kupokezwa tiketi ya bwerere. Hatua hiyo ilichangiwa na tukio la idadi kubwa ya wachezaji wa kikosi cha kwanza cha Leyton Orient waliokuwa wavaane na Spurs kuugua Covid-19. Spurs ya mkufunzi Jose Mourinho sasa itachuana na Chelsea ya kocha Frank Lampard.

Chini ya kocha Pep Guardiola, waliwapepeta Bournemouth 2-1 na kujikatia tiketi ya kuvaana na Burnley katika raundi ijayo ya 16-bora.

Kati ya mechi nyinginezo zilizotandazwa Septemba 24, Aston Villa walisajili ushindi wa 3-0 dhidi ya Bristol City ugani Ashton Gate na kufuzu kumenyana na Stoke City kwenye gozi litakaloshuhudia mshindi akitinga hatua ya robo-fainali ya Carabao Cup msimu huu.

DROO YA 16-BORA CARABAO CUP:

Tottenham na Chelsea

Newport County na Newcastle

Burnley na Man-City

Brighton na Man-United

Everton na West Ham

Brentford na Fulham

Aston Villa na Stoke City

Liverpool na Arsenal

Salah afunga mabao matatu na kuongoza Liverpool kupepeta Leeds United ligini

Na MASHIRIKA

LEEDS United walirejea katika Ligi Kuu ya Uingereza (EPL) kwa mara ya kwanza baada ya miaka 16 kwa matao ya juu katika mechi iliyowashuhudia wakitikisa uthabiti wa Liverpool ugani Anfield mnamo Septemba 12, 2020.

Liverpool ambao walitawazwa mabingwa wa EPL kwa mara ya kwanza baada ya miaka 30 msimu uliopita, walioongoza mechi mara tatu huku Leeds ya kocha Marcelo Bielsa ikitoka nyuma kila mara na kusawazisha.

Ilikuwa penalti ya dakika ya mwisho kutoka kwa fowadi Mohamed Salah ndiyo iliyowezesha Liverpool kuwazamisha Leeds United kwa mabao 4-3 katika mechi hiyo ya ufunguzi wa msimu mpya wa 2020-21.

Penalti iliyofumwa wavuni na Salah ilitokana na tukio la sajili mpya wa Leeds, Rodrigo Moreno, kumchezea Fabinho visivyo katika dakika ya 88.

Salah aliyefunga mabao matatu katika mechi hiyo, alifungua ukurasa wa magoli kunako dakika ya nne kupitia penalti baada ya beki raia wa Ujerumani, Robin Koch kunawa mpira.

Hata hivyo, Leeds walisawazisha kupitia kwa Jack Harrison katika dakika ya 12 kabla ya masihara ya mabeki yao kumruhusu difenda Virgil van Dijk kurejesha Liverpool uongozini katika dakika ya 20.

Utepetevu wa Van Dijk katika dakika ya 30 uliwapa Leeds fursa ya kusawazisha kupitia kwa Patrick Bamford kabla ya Salah kukamilisha ufungaji katika kipindi cha kwanza dakika tatu baadaye.

Mechi hiyo ilishuhudia refa akikataa kuhesabu jumla ya mabao manne. Dalili zote ziliashiria kwamba Leeds wangaliondoka Anfield wakiwa na alama moja kapuni baada ya Mateusz Klich kufunga bao la kusawazisha katika dakika ya 66.

Liverpool waliendeleza rekodi yao ya kutoshindwa katika uwanja wao wa nyumbani katika jumla ya mechi 60 za EPL. Kufikia sasa, miamba hao wameibuka na ushindi katika mechi 49 na kuambulia sare mara 11.

Chelsea waliwahi kupiga jumla ya mechi 86 bila ya kushindwa katika uwanja wao wa Stamford Bridge kabla ya rekodi hiyo kukomeshwa mnamo Oktoba 2008. Awali, Liverpool walikuwa wamepiga jumla ya mechi 63 bila ya kushindwa hadi kufikia Disemba 1980.

Ilikuwa mara ya pili kwa mechi ya EPL kuchezewa katika siku ya kwanza ya msimu kushuhudia jumla ya mabao matano yakifungwa kufikia mwisho wa kipindi cha kwanza. Manchester United waliwahi kupiga Fulham 5-1 mnamo Agosti 2006 huku Man-United wakiongoza kwa 4-1 kufikia mwisho wa kipindi cha kwanza.

Ilikuwa pia mara ya kwanza kwa Liverpool kufungwa mabao matatu katika mechi ya ligi nyumbani tangu Septemba 1982.

Liverpool kwa sasa wameshinda kila mojawapo ya mechi zao 35 zilizopita ligini ambapo Salah amefunga. Raia huyo wa Misri amevunja rekodi ya Wayne Rooney aliyewahi kufunga jumla ya mabao 34 mfululizo katika mechi zilizoshuhudia Man-United wakiibuka washindi kati ya Septemba 2008 na Februari 2011.

Liverpool kwa sasa wana wiki nzima ya kujiandaa kwa gozi dhidi ya Chelsea mnamo Septemba 20, 2020 uwanjani Stamford Bridge huku Leeds wakitarajiwa kunogesha raundi ya pili ya Carabao Cup dhidi ya Hull City uwanjani Craven Cottage mnamo Septemba 16, 2020.

EPL: Liverpool kuagana rasmi na afisa mkuu mtendaji Peter Moore

Na CHRIS ADUNGO

AFISA Mkuu Mtendaji wa Liverpool, Peter Moore anatazamiwa kuondoka rasmi uwanjani Anfield mwishoni mwa Agosti 2020 baada ya kuhudumu katika wadhifa huo kwa kipindi cha miaka mitatu.

Nafasi ya Moore itatwaliwa sasa na Billy Hogan ambaye kwa sasa ni mkurugenzi msimamizi na afisa mkuu wa masuala ya kibiashara kambini mwa Liverpool.

Kwa miaka mitatu iliyopita, More ameshuhudia Liverpool wakirejea katika ubora wao wa zamani kiasi cha kujinyanyulia ubingwa wa kwanza wa Ligi Kuu ya Uingereza (EPL) baada ya miaka 30 ya kusubiri, ufalme wa Klabu Bingwa Ulaya (UEFA) na Kombe la Dunia la FIFA.

“Haya ni mafanikio makubwa ambao tumeongozwa na kocha Jurgen Klopp, wachezaji na maafisa wetu wote katika benchi la kiufundi kupata. Kikosi cha Liverpool kimerejesha hadhi yake ya zamani na kwa sasa ni tishio kubwa kwa mpizani yeyote barani Ulaya na duniani,” akasema Moore.

“Hizi ni kumbukumbu zitakazodumu kwangu milele. Kwa kweli tulistahiki kutamba jinsi tulivyofanya baada ya kufanya yote tuliyoyafanya!” akaongeza kinara huyo.

Hadi kutua kwake kambini mwa Liverpool, Moore ambaye atarejea kwao Amerika, aliwahi kuwa mfanyakazi wa masuala ya teknolojia katika kampuni za Sega, Microsoft, EA Sports na Reebok ambayo hutengeneza vifaa vya michezo.

“Nilikuja Liverpool mnamo 2017 baada ya kuhudumu Amerika kwa zaidi ya miaka 30. Nimekuwa na kipindi spesheli sana uwanjani Anfield,” akasema Moore.

Liverpool wapepeta Newcastle na kukamilisha kampeni za msimu wa 2019-20 kwa alama 99

Na CHRIS ADUNGO

MABINGWA Liverpool walikamilisha kampeni za Ligi Kuu ya Uingereza (EPL) kwa idadi kubwa zaidi ya alama katika historia yao ya kushiriki kivumbi hicho baada ya kutoka nyuma na kuwazamisha Newcastle United 3-1 uwanjani St James’ Park mnamo Julai 26, 2020.

Masogora hao wa kocha Jurgen Klopp walitia kapuni jumla ya alama 99, moja zaidi kuliko zile walizojizolea katika msimu wa 1978-79. Liverpool walidumisha pengo la pointi 18 kati yao na nambari mbili Manchester City waliowaponda Norwich City 5-0 katika mchuano wao wa mwisho wa msimu huu uwanjani Etihad.

Liverpool ambao walijizolea alama 97 mnamo 2018-19, walifikia pia rekodi ya Man-City ambao hadi mwanzoni mwa msimu wa 2019-20, walikuwa wakijivunia kushinda idadi kubwa zaidi ya mechi katika msimu mmoja; yaani 32 katika msimu wa 2017-18 na 2018-19.

Hata hivyo, Liverpool walishindwa kufikia rekodi ya Man-City ambao walikamilisha msimu wa 2017-18 wakijivunia pengo la alama 19 kati yao na nambari mbili Machester United. Man-City walifunga kampeni zao za msimu huo kwa alama 100, mbili kuliko za muhula wa 2018-19.

Nyota Dwight Gayle aliwaweka Newcastle kifua mbele baada ya dakika 25 pekee za ufunguzi wa kipindi cha kwanza baada ya kukamilisha kwa ustadi mpira wa ikabu uliochanjwa na Jonjo Shelvey. Goli hilo lilikuwa la haraka zaidi kuwahi kufungwa katika siku ya mwisho ya kampeni za EPL.

Liverpool walioanza mechi hiyo kwa kuwaweka benchi wavamizi wao watatu wakuu yaani Mohamed Salah, Sadio Mane na Robert Firmino; walisawazishiwa na beki Virgil van Dijk aliyefunga kwa kichwa kunako dakika ya 38.

Divock Origi aliwaweka Liverpool kifua mbele kunako dakika ya 59 baada ya kushirikiana vilivyo na beki Andrew Robertson kisha Mane akazamisha kabisa chombo cha wenyeji wao mwishoni mwa kipindi cha pili.

‘Miamba wa soka’ wanyanyua kombe la EPL baada ya miaka 30

Na CHRIS ADUNGO

MABINGWA Liverpool walisherehekea kupokezwa kombe la Ligi Kuu ya Uingereza (EPL) msimu huu kwa mara ya kwanza baada ya miaka 30 mwishoni mwa mechi iliyowashuhudia wakiwafunga Chelsea jumla ya mabao 5-3 uwanjani Anfield.

Nahodha Jordan Henderson ambaye kwa sasa anauguza jeraha la paja, alipokezwa taji la Liverpool kutoka kwa mkufunzi wao wa zamani Sir Kenny Dalglish katika eneo mahsusi lililojengwa uwanjani Anfield kwa minajili ya shughuli hiyo.

Ushindi wa Liverpool dhidi ya Chelsea uliendeleza rekodi ya kutoshindwa kwa masogora wa kocha Jurgen Klopp katika uwanja wao wa nyumbani katika jumla ya misimu mitatu iliyopita kwenye soka ya EPL.

Chelsea kwa sasa wanahitaji alama moja pekee kutokana na mchuano wao wa mwisho wa msimu huu dhidi ya Wolves ili kujipa uhakika wa kukamilisha kampeni za msimu huu ndani ya mduara wa nne-bora na hivyo kufuzu kwa kipute cha Klabu Bingwa Ulaya (UEFA) msimu ujao.

Ikiwa Chelsea watazidiwa maarifa na Wolves, nao Leicester City wawaangushe Manchester United katika mchuano wao wa mwisho uwanjani King Power, basi Chelsea wataambulia nje ya mduara wa nne-bora msimu huu. Hata hivyo, bado watapata fursa ya kunogesha kivumbi cha UEFA iwapo wataibuka mabingwa wapya wa Kombe la FA katika fainali itakayowakutanisha na Arsenal uwanjani Wembley, Uingereza mnamo Agosti 1, 2020.

Chini ya kocha Frank Lampard, Chelsea kwa sasa wanashikilia nafasi ya nne kwa alama 63 sawa na Manchester United walioambulia sare ya 1-1 dhidi ya West Ham United uwanjani Old Trafford. Leicester wanakamata nafasi ya tano kwa alama 62. Watatu hao wanapigania nafasi mbili zilizoachwa na Liverpool na Manchester City katika vita vya kufuzu kwa gozi la UEFA msimu ujao wa 2020-21.

Liverpool walifungua ukurasa wao wa mabao kupitia kwa Naby Keita kunako dakika ya 23 kabla ya beki Trent Alexander-Arnold kupachika wavuni goli la pili katika dakika ya 38. Georginio Wijnaldum aliyafanya mambo kuwa 3-0 kabla ya mvamizi wa zamani wa Arsenal, Olivier Giroud kuwarejesha Chelsea mchezoni mwishoni mwa kipindi cha kwanza.

Hata hivyo, matumaini yao hayo yalizamishwa na Roberto Firmino aliyewafungia Liverpool bao la nne katika dakika ya 54 baada ya kushirikiana vilivyo na Alexander-Arnold.

Ujio wa chipukizi Christian Pulisic katika kipindi cha pili ulichangia ufufuo wa makali ya Chelsea waliofunga mabao mawili ya haraka kupitia kwa Tammy Abraham na Pulisic aliyefanya mambo kuwa 4-3 kufikia dakika ya 73.

Fataki zilizokuwa zikifyatuliwa na mashabiki waliokuwa wameanza kukongamana nje ya uwanja wa Anfield zilionekana kuwatia hamasa vijana wa Liverpool waliofunga bao la tano kupitia kwa Alex Oxlade-Chamberlain aliyekamilisha krosi ya Andy Robertson kwa ustadi mkubwa katika dakika ya 84.

Licha ya uwanja kuwa mtupu bila mashabiki, Liverpool walisherehekea ubingwa wao wa kwanza wa EPL ambao walikuwa wamesubiri kwa miaka 30.

Mohamed Salah angalifunga mabao matatu katika mechi hiyo na kuweka hai matumaini ya kutawazwa taji la mfungaji bora msimu huu. Hata hivyo, alipoteza nafasi nyingi za wazi alizoandaliwa na Keita katika kipindi cha kwanza kilichotamalakiwa na Chelsea.

Bao la Firmino lilichangiwa na Alexander-Arnold aliyevunja rekodi yake mwenyewe kwa kuchangia mabao 13 msimu huu, hii ikiwa idadi kubwa zaidi kuwahi kuchangiwa na beki katika msimu mmoja wa EPL.

Liverpool kwa sasa wamejizolea alama 55 kutokana na jumla ya 57 ambazo walikuwa na uwezo wa kujinyakulia uwanjani Anfield msimu huu baada ya kusajili ushindi mara 18 na kuambulia sare moja katika mechi 19 za ligi walizozichezea katika uwanja wao wa nyumbani.

Liverpool kwa sasa wanajiandaa kufunga rasmi kampeni za EPL msimu huu dhidi ya Newcastle United mnamo Julai 26 uwanjani St James Park.

Liverpool kunyanyua kombe la EPL nyumbani Anfield

Na CHRIS ADUNGO

LIVERPOOL watapokezwa kombe la Ligi Kuu ya Uingereza (EPL) waliloshinda msimu huu mwishoni mwa mechi itakayowakutanisha leo usiku Jumatano ya Julai 22, 2020 na Chelsea uwanjani Anfield.

Kocha Jurgen Klopp amesema kunyanyua taji hilo kutakuwa sawa na “Krismasi” kwake.

“Imekuwa safari ndefu kabla ya kufikia hapa tulipo. Tumekuwa mabingwa wa EPL kwa mwezi mmoja uliopita, na hatimaye tutatawazwa wafalme rasmi hii leo,” akatanguliza Klopp.

“Ni kama Krismasi ambapo unajua unapata zawadi fulani mahsusi kisha ulazimike kusubiri tena kwa kipindi kirefu ndipo zawadi nyingine kwa minajili ya kusherehekea kitu hicho hicho ije,” akasema mkufunzi huyo mzawa wa Ujerumani.

Klopp ambaye aliwaongoza Liverpool kutia kapuni ubingwa wa taji la EPL kwa mara ya kwanza baada ya miaka 30 aliongeza: “Itakuwa spesheli. Nafurahi sana vijana wangu hatimaye watakuwa na kipindi hicho cha kusherehekea ushindi wao. Wanastahili zaidi kuliko yeyote mwingine kwa sababu tunaelewa matukio mengi ambayo wamekabiliana nayo hadi kufikia leo.”

Ingawa hivyo, Klopp amewataka masogora wake kumakinikia zaidi mchuano wao ambao utakuwa wa pili kutoka mwisho wa kampeni za msimu huu badala ya kuweka mawazo zaidi kwenye kombe.

“Ladha ya kunyanyua kombe hili itakolezwa zaidi na ushindi dhidi ya Chelsea. Hii ni mechi ambayo imekuwa vigumu zaidi kwangu kujiandaa kwayo kwa sababu yapo mambo mawili yatakayofanyika leo usiku: kucheza dhidi ya kikosi kilicho na maazimio makubwa ligini na kusherehekea ufalme,” akasema Klopp, 53.

Japo anauguza jeraha, nahodha Jordan Henderson atawaongoza wenzake wa Liverpool kunyanyua taji la EPL katika jukwaa maalum ambalo tayari limejengwa katika uwanja wa Anfield.

Mkuu wa Polisi katika jiji la Merseyside, Andy Cooke amewaonya mashabiki wa Liverpool dhidi ya kukongamana nje ya uwanja wa Anfield kusherehekea tukio la Liverpool kunyanyua ubingwa wa soka ya Uingereza kwa mara ya kwanza baada ya miaka 30 ya kusubiri.

Klopp amesema kwamba gwaride la heshima litakaloshirikisha maelfu ya mashabiki litaandaliwa kwenye barabara kuu za Merseyside baada ya janga la corona kudhibitiwa vilivyo.

Si wakati wa kuwazia kuvunja rekodi za Guardiola EPL – Klopp

Na CHRIS ADUNGO

KOCHA Jurgen Klopp wa amesema ingawa matamanio makubwa ya Liverpool kwa sasa ni kuvunja rekodi za Manchester City, ni mapema sana kwa vijana wake kuanza kuwazia ufanisi huo.

Ushindi wa 2-0 uliosajiliwa na mabingwa hao wapya wa Ligi Kuu ya Uingereza (EPL) dhidi ya Aston Villa mnamo Julai 5, 2020 uliendeleza rekodi yao ya kutopoteza wala kuambulia sare katika mechi zote 17 za hadi kufikia sasa msimu huu uwanjani Anfield.

Liverpool ambao mabao yao yalifungwa na Sadio Mane na chipukizi Curtis Jones, kwa sasa wanajivunia alama 89 kutokana na mechi 33.

Masogora hao wa Klopp wanahitaji sasa alama 12 pekee kutokana na mechi tano za mwisho wa msimu huu ili kuivunja rekodi ya Man-City waliojizolea jumla ya alama 100 katika msimu wa 2017-18.

“Tumekuwa tukimakinikia kila mchuano kwa wakati wake. Sidhani hilo litabadilika. Iwapo tutavunja rekodi kwa kufanya hivyo, ifahamike kwamba hatukuwahi kuandaa kikao na kuafikiana kwamba tuna ulazima wa kufanya hivyo,” akatanguliza kocha huyo mzawa wa Ujerumani.

“Tutaanza kuwazia rekodi baadaye. Pengine msimu huu, au muhula ujao kwa kuwa tutalenga zaidi kufanya mambo makubwa spesheli,” akaongeza.

Mbali na kuweka rekodi mpya kwa kuzoa alama nyingi zaidi katika msimu mmoja wa EPL na kukamilisha kampeni za muhula huu wakijivunia pengo kubwa zaidi kati yao na nambari mbili Man-City, Liverpool pia wana uwezo wa kufikia rekodi ya miaka 128 ya Sunderland waliokamilisha msimu kwa kushinda mechi zao zote za nyumbani.

Kufikia sasa, Liverpool wamesajili ushindi katika mfululizo wa mechi 24 uwanjani Anfield tangu walazimishiwe sare ya 1-1 na Leicester City mnamo Januari 2019.

Mechi dhidi ya Villa ilikuwa ya kwanza kwa Liverpool kutandaza uwanjani Anfield tangu kutawazwa mabingwa wa taji la EPL. Ni matarajio ya Klopp kwamba vijana wake sasa watapata hamasa ya kukamilisha kampeni zilizosalia kwa matao ya juu zaidi baada ya kuweka kando maruerue ya kichapo cha 4-0 kutoka kwa Man-City mnamo Julai 2, 2020.

Chini ya kocha Dean Smith, Villa kwa sasa wamepoteza mechi tatu kati ya tano zilizopita tangu kurejelewa kwa kipute cha EPL mnamo Juni 17, 2020. Kichapo kutoka kwa Liverpool kilididimiza zaidi matumaini yao ya kusalia ligini kwa minajili ya msimu ujao.

Villa kwa sasa wanashikilia nafasi ya 18 kwa alama 27 sawa na Bournemouth. Ni pego la alama sita ndilo linatamalaki kati yao na Norwich City wanaovuta mkia.

Liverpool watakuwa wageni wa Brighton uwanjani American Express mnamo Julai 8, 2020 huku Villa wakiwaalika Manchester United siku moja baadaye.

Ni rasmi Liverpool ndio mabingwa wa EPL

Na CHRIS ADUNGO

LIVERPOOL walinyakua ubingwa wa Ligi Kuu ya Uingereza (EPL) kwa mara ya kwanza baada ya miaka 30 mnamo Juni 25 kufuatia ushindi wa 2-1 uliosajiliwa na Chelsea dhidi ya mabingwa watetezi Manchester City.

Ushindi kwa Man-City uwanjani Stamford Bridge ungalichelewesha zaidi karamu ya Liverpool wanaotiwa makali na kocha mzawa wa Ujerumani, Jurgen Klopp.

Katika kipindi cha misimu miwili iliyopita ya EPL, Man-City walikuwa wamepoteza jumla ya michuano sita pekee na kutawazwa wafalme wa 2017-18 na 2018-19 kwa alama 100 na 98 mtawalia.

Ingawa hivyo, kichapo kutoka kwa Chelsea, ambacho kilikuwa chao cha nane kupokea msimu huu, kiliwasaza na alama 23 zaidi nyuma ya Liverpool.

Liverpool walitwaa rasmi ubingwa wa soka ya Uingereza msimu huu zikisalia mechi saba zaidi katika kampeni za kivumbi hicho.

Fowadi Christian Pulisic ambaye ni mzawa wa Amerika, aliwaweka Chelsea kifua mbele kunako dakika ya 36 kabla ya juhudi zake kufutwa na kiungo matata wa Ubelgiji, Kevin De Bruyne aliyesawazishia Man-City katika dakika ya 55.

Liverpool walithibitishiwa ufalme wa EPL kunako dakika ya 78 baada ya kiungo Fernandinho kuunawa mpira ndani ya kijisanduku chao na kuwapa Chelsea penalti iliyofumwa wavuni na Willian.

Ushindi huo wa Chelsea unamaanisha kwamba Man-City kwa sasa watalazimika kuandalia Liverpool gwaride la heshima watakapokutana kwa gozi jingine la EPL uwanjani Etihad mnamo Alhamisi ya Julai 2, 2020.

Chini ya kocha Pep Guardiola, Man-City wangali na matumaini hai ya kujitwalia jumla ya mataji mawili zaidi katika kampeni za msimu huu. Baada ya kuhifadhi ubingwa wa League Cup, Man-City wamo katika robo-fainali za Klabu Bingwa Ulaya (UEFA) na robo-fainali za Kombe la FA ambapo watavaana na Newcastle United mnamo Juni 28, 2020 uwanjani St James’ Park.

Subira ya Liverpool ya kutwaa taji la 19 la EPL ilirefushwa zaidi na likizo ya miezi mitatu iliyosababishwa na janga la corona lililositisha kampeni za msimu huu mnamo Machi 13, 2020. Kipute hicho kilirejelewa mnamo Juni 17, 2020.

Liverpoool wakubaliwa kuchezea mechi zao Anfield

Na CHRIS ADUNGO

MEYA wa Liverpool, Joe Anderson, amepiga abautani na kuwakubalia Liverpool kuchezea mechi zao zilizosalia za nyumbani ugani Anfield na kuidhinisha pia gozi la Merseyside kati ya miamba hao na Everton kusakatiwa Goodison Park.

Awali, Anderson alihofia uwezekano wa mashabiki kushindwa kujidhibiti na kukongamana nje ya uwanja wa Anfield, tukio ambalo lingezua rabsha, vurugu na makabiliano makali kati yao na maafisa wa usalama.

Hili ni jambo ambalo lingeenda kinyume na kanuni za afya zilizopo katika juhudi za kudhibiti maambukizi zaidi ya virusi vya homa kali ya corona.

Ligi Kuu ya Uingereza (EPL) imeratibiwa kuanza upya mnamo Juni 17 bila mahudhurio ya mashabiki. Viwanja vitakapovyotumiwa na Liverpool kucheza dhidi ya Everton na mabingwa watetezi Manchester City bado havijathibitishwa.

“Tupo mahali pazuri na nafuu zaidi kuliko tulipokuwa wiki nne zilizopita. Dalili zote zinaashiria kwamba tunaelekea kufaulu kusadikisha mashabiki wetu kuhusu umuhimu wa kutokongamana nje ya uwanja wa Anfield wakati wa mechi dhidi ya Everton au Man-City,” akasema Anderson.

Hadi kipute cha EPL kiliposimamishwa kwa muda mnamo Machi 13, Liverpool walikuwa wakiselelea kileleni mwa jedwali kwa alama 82 huku pengo la pointi 25 likitamalaki kati yao na nambari mbili Man-City.

Mchuano wao wa kwanza kwa mujibu wa ratiba mpya ya EPL ni gozi dhidi ya Everton mnamo Juni 21. Ushindi kwa Liverpool katika pambano hilo utawahakikishia ufalme wa soka ya Uingereza kwa mara ya kwanza baada ya miaka 30.

Kati ya mechi ambazo zina historia ya kuwa kivutio kikubwa miongoni mwa mashabiki wa Liverpool ni gozi la Merseyside na kivumbi ambacho huwakutanisha na Man-City au Manchester United.

Maafisa wa usalama wanapendekeza haja ya kuandaliwa kwa michuano hiyo, ambayo kihistoria hushuhudia mahudhurio ya idadi kubwa ya mashabiki, katika viwanja mbadala visivyo vya nyumbani kwa kikosi chochote.

Aston Villa wataialika Sheffield United mnamo Juni 17 kabla ya Man-City kuvaana na Arsenal ugani Etihad siku hiyo hiyo. Mechi hizo mbili ni zile zilizokuwa zimesalia kwa vikosi hivyo kucheza ili kufikia idadi ya michuano 29 ambayo wapinzani wote wengine 16 walikuwa wamepiga hadi kipute hicho kilipositishwa kwa muda kutokana na janga la corona.

Mechi zote za raundi nzima ya 30 zimeratibiwa kusakatwa kati ya Ijumaa ya Juni 19 na Jumapili ya Juni 21. Jumla ya mechi 92 zimesalia kutandazwa katika EPL muhula huu.

SAKA ASAKWA: Liverpool wajitosa katika vita vya kuwania huduma za chipukizi matata

Na MASHIRIKA

LONDON, Uingereza

LIVERPOOL wamejitosa katika vita vya kuwania huduma za chipukizi matata wa Arsenal, Bukayo Saka ambaye sasa ametaka Arsenal kusitisha mazungumzo kuhusu uwezekano wa kurefusha mkataba wake uwanjani Emirates.

Saka, 18, amekuwa kivutio kwa vikosi vingi vya bara Ulaya tangu apate nafasi ya kuwa sehemu ya kikosi cha kwanza cha Arsenal baada ya mabeki Sead Kolasinac na Kieran Tierney kujeruhiwa.

Japo ni matamanio ya kocha Mikel Arteta kuendelea kujivunia maarifa ya Saka kwa miaka mitano zaidi, huenda kinda huyo akashawishika kuyoyomea Liverpool baada ya wakala wake kufichua kwamba anatawaliwa na kiu ya kusakata soka ya Klabu Bingwa Ulaya (UEFA).

Kufikia sasa, Saka anajivunia kuchangia mabao tisa kutokana na mechi 29 zilizopita ndani ya jezi za Arsenal.

Alipangwa katika kikosi cha kwanza cha Arsenal kwa mara ya kwanza mwaka jana katika kivumbi cha Europa League chini ya kocha Unai Emery aliyetimuliwa Novemba 2019.

Mbali na Liverpool, klabu nyingine inayokeshea maarifa ya Saka ni Borussia Dortmund ya Ujerumani ambayo imepania kumsajili iwapo itaagana na Jadon Sancho anayehusishwa na uwezekano mkubwa wa kujiunga na Manchester United kwa kima cha Sh17 bilioni.

Akijivunia jumla ya mabao 17 na kuchangia mengine 19 hadi kufikia sasa muhula whuu, Sancho, 20, anawaniwa pia na Juventus, Real Madrid na Bayern Munich.

Gazeti la The Sun limesisitiza kwamba Saka atakuwa radhi kupokea mamilioni ya Dortmund au Liverpool badala ya Sh420,000 pekee ambazo kwa sasa analipwa kwa wiki uwanjani Emirates.

Kinda huyo angali na mwaka mmoja pekee katika kandarasi yake na Arsenal ambao wameanza kumvizia chipukizi Jude Bellingham, 16, wa Birmingham katika juhudi za kuziba pengo litakaloachwa na Saka.

Wakati uo huo, Liverpool wamemweleza Philippe Coutinho kwamba hawapo tayari kuwania upya huduma zake mwishoni mwa msimu huu baada ya ajenti wa kiungo huyo, Kia Joorabchian, kuulizia uwezekano wa kurejea kwa mteja wake ugani Anfield.

Coutinho ametatizika sana kufufua makali aliyokuwa akijivunia zamani uwanjani Anfield kabla ya kuyoyomea Uhispania kuvalia jezi za Barcelona mnamo Januari 2018.

Barcelona walimshawishi Coutinho, 27, kuagana na Liverpool kwa kima cha Sh14 bilioni japo akashindwa kusadikisha mashabiki wa miamba hao kwamba alistahili kununuliwa kwa kiwango hicho cha fedha.

Kushindwa kwake kutamba ugani Camp Nou ni kiini cha Barcelona kumtuma kwa mkopo wa mwaka mmoja kambini mwa Bayern Munich mwanzoni mwa msimu huu.

Japo ilitarajiwa kwamba Bayern wangalikuwa wepesi wa kumpokeza mkataba wa kudumu, mabingwa hao wa Ligi Kuu ya Ujerumani (Bundesliga) hawajaonyesha ari ya kuziwania huduma za nyota huyo mzawa wa Brazil.

Badala yake, ameanza kuhusishwa na uwezekano mkubwa wa kuingia kambini mwa Leicester City ambao kwa sasa watalazimika kuwapiga kumbo Everton, Chelsea na Man-United.

Yerry Mina kukosa mechi ya Liverpool

Na CHRIS ADUNGO

BEKI matata wa Everton, Yerry Mina atakosa mchuano wa kwanza wa kurejelewa kwa Ligi Kuu ya Uingereza (EPL) baada ya kupata jeraha la mguu akishiriki mazoezi.

Kwa mujibu wa taarifa ya Everton, sogora huyo mzawa wa Colombia alipata jeraha la misuli kwenye mguu wake wa kushoto.

Atasalia mkekani kwa “majuma kadhaa” na huenda akakosa kunogesha gozi la Merseyside litakalowakutanisha Everton na Liverpool baada ya soka ya muhula huu kuanza upya.

Mina, 25, kwa sasa yuko chini ya uangalizi wa matabibu wa kikosi cha Everton uwanjani Goodison Park. Hadi kufikia sasa, Yeri anajivunia kuwajibikia Everton katika jumla ya mechi 25.

UEFA: Mipango ipo kukamilisha Champions League na Europa League Agosti 2020

CHRIS ADUNGO na MASHIRIKA

RAIS wa soka ya bara Ulaya (Uefa), Aleksander Cerefin, amesema kwamba shirikisho hilo lina “mipango madhubuti” ya kukamilisha kampeni zote za Klabu Bingwa Ulaya (UEFA) na Europa League kufikia mwisho wa Agosti, 2020.

Robo-fainali na nusu-fainali za vipute hivyo zitahusisha michuano ya mikondo miwili; yaani mechi kuchezwa na kila kikosi nyumbani na ugenini.

“Mambo yalivyo, nina hakika kwamba tutakamilisha kampeni za soka ya Uefa msimu huu,” akasema Cerefin.

Kinara huyo amesisitiza kwamba michuano yote iliyosalia itatandazwa ndani ya viwanja vitupu na ni matumaini yake kwamba ligi kuu nyingi za bara Ulaya zitakamilisha kampeni za muhula huu.

Ligi Kuu ya Uingereza (EPL) inayotazamiwa kuanza upya mnamo Juni 12 imesalia na raundi tisa zaidi muhula huu huku Paris Saint-Germain (PSG) wakitawazwa mabingwa wa Ligi Kuu ya Ufaransa baada ya msimu huu wa 2019-20 kufutiliwa mbali.

Ligi Kuu ya Ujerumani (Bundesliga) ilirejelewa Mei 16, 2020, na ni matumaini kwamba vipute vya Uhispania (La Liga) na Italia (Serie A) vitaanza upya mnamo Juni 13 baada ya wanasoka wote wa klabu za ligi hizo kurejea kambini na kuanza mazoezi.

Kwa mujibu wa Cerefin, klabu zote ambazo ligi zao hazitatamatika rasmi muhula huu zitalazimika kushiriki mchujo ili kufuzu kwa mashindano ya Uefa muhula ujao.

“Hiyo ndiyo itakuwa fomula ya pekee ya kujikatia tiketi za kunogesha vipute vya UEFA na Europa League muhula ujao,” akasema.

Mashindano ya Euro 2020 yaliyokuwa yaandaliwe kuanzia Juni 12 – Julai 12, 2020 sasa yameahirishwa hadi Juni 11 – Julai 11, 2021 baada ya mwafaka wa kuyasogeza mbele kufikiwa mnamo Machi 2020.

Nusu-fainali na fainali ya kipute hicho cha Euro zitapigiwa uwanjani Wembley, London, Uingereza huku michuano ya hatua nyinginezo ikisakatiwa katika miji ya Amsterdam, Baku, Bilbao, Bucharest, Budapest, Copenhagen, Dublin, Glasgow, Munich, Rome na St Petersburg.

Kwa mujibu wa Cerefin, maazimio yao ni kufanikisha maandalizi ya Euro 2021 katika miji mitatu ya awali na Uefa kwa sasa inajadiliana na wasimamizi miji mingine tisa tofauti itakayokuwa wenyeji wa baadhi ya michuano.

“Sioni uwezekano wa kampeni za Euro kufanyika katika miji mitatu pekee. Tunazidi kushauriana na miji mingine tisa ili tuwe na jumla ya 12 japo 10, tisa au hata minane bado itakuwa sawa,” akaongeza.

Polisi wataka mamlaka ya kusitisha EPL iwapo watashindwa kudhibiti mashabiki

CHRIS ADUNGO na MASHIRIKA

POLISI wa Uingereza wanataka wapewe ruhusa ya kufutilia mbali soka ya Ligi Kuu ya Uingereza (EPL) msimu huu iwapo mashabiki hawatazingatia kanuni mpya za afya pindi michuano hiyo itakaporejelewa baada ya janga la corona kudhibitiwa.

Haya ni kwa mujibu wa afisa mkuu wa polisi nchini Uingereza, Mark Roberts aliyehojiwa na gazeti la ‘The Daily Telegraph’.

Roberts ambaye pia ni mkuu wa kitengo cha polisi wanaosimamia usalama wa washidakau wa soka nchini Uingereza, amesema hakuna mashabiki watakaoruhusiwa kukongama nje ya viwanja kabla, baada na wakati ambapo mechi zitakuwa zikiendelea katika kipindi hiki ambapo virusi vya corona bado ni tishio kubwa.

“Ambacho tusingependa kushuhudia ni hali ambapo mashabiki wanavunja kanuni zilizowekwa katika juhudi za kukabilia na maambukizi zaidi ya virusi hivi,” akatanguliza Roberts.

“Itakuwa heshima kubwa kwa maafisa wetu wa afya iwapo mashabiki watatii sheria na maagizo kutoka kwa wadau mbalimbali hadi msimu huu wa EPL ukamilike kwa mujibu wa taratibu zitakazowekwa.”

“Kadri sheria zinavyoheshimiwa ndivyo inavyokuwa rahisi kwa maazimio ya msimu huu katika ulingo wa soka kutimia. Vinginevyo, tungependa kupewa mamlaka ya kusitisha kabisa kivumbi hicho iwapo tutashindwa kuwadhibiti mashabiki” akaongeza.

Ligi Kuu ya EPL ilisitishwa mnamo Machi 13, 2020, kutokana na janga la corona ambalo limetikisa pakubwa ulingo wa michezo duniani kote.

Liverpool wakataza Coutinho kurejea Anfield

CHRIS ADUNGO na MASHIRIKA

LIVERPOOL wamemweleza Philippe Coutinho kwamba hawapo tayari kuwania upya huduma zake mwishoni mwa msimu huu baada ya ajenti wa kiungo huyo, Kia Joorabchian kuulizia uwezekano wa kurejea kwa mteja wake ugani Anfield.

Coutinho ametatizika sana kufufua makali aliyokuwa akijivunia zamani uwanjani Anfield kabla ya kuyoyomea Uhispania kuvalia jezi za Barcelona mnamo Januari 2018.

Barcelona walimshawishi Coutinho, 27, kuagana na Liverpool kwa kima cha Sh14 bilioni japo akashindwa kusadikisha mashabiki wa miamba hao kwamba alistahili kununuliwa kwa kiwango hicho cha fedha.

Kushindwa kwake kutamba ugani Camp Nou ni kiini cha Barcelona kumtuma kwa mkopo wa mwaka mmoja kambini mwa Bayern Munich mwanzoni mwa msimu huu.

Japo ilitarajiwa kwamba Bayern wangalikuwa wepesi wa kumpokeza mkataba wa kudumu, mabingwa hao wa Ligi Kuu ya Ujerumani (Bundesliga) hawajaonyesha ari ya kuziwania huduma za nyota huyo mzawa wa Brazil.

Badala yake, ameanza kuhusishwa na uwezekano mkubwa wa kuingia kambini mwa Leicester City ambao kwa sasa watalazimika kuwapiga kumbo Everton, Chelsea na Manchester United wanaomkeshea sogora huyo.

Kwa mujibu wa Joorabchian, kubwa zaidi katika maazimio ya Coutinho ni kurejea Uingereza kuvalia jezi za kikosi chochote cha EPL iwapo Barcelona wataamua kumtia mnadani.

Kocha Brendan Rodgers aliyemsajili Coutinho kambini mwa Liverpool yuko tayari kushawishi Leicester kufungulia mifereji yao ya fedha na kumsajili kiungo huyo ambaye pia ni kivutio kikubwa cha kocha Carlo Ancelotti wa Everton.

Ingawa hivyo, Barcelona wako tayari kumdumisha Coutinho kambini mwa Bayern kwa msimu mwingine mmoja wa mkopo iwapo hakuna kikosi kitakachomuda bei yake mpya ya Sh10 bilioni.

Hadi alipobanduka ugani Anfield, Coutinho alikuwa ametawazwa Mchezaji Bora wa Mwaka kambini mwa Liverpool mara mbili na alikuwa amepachika wavuni zaidi ya mabao 50 katika kipindi kizima cha misimu mitano.

Ujio wa kocha Jurgen Klopp uwanjani Anfield ulimkosesha Coutinho nafasi katika kikosi cha kwanza cha Liverpool. Hii ni baada ya mfumo mpya ulioletwa na Klopp kutowiana na mtindo wa kucheza kwa Coutinho ambaye alipachika wavuni mabao 21 kutokana na mechi 76 ugani Camp Nou.