Waombaji wasiotenda

Na BENSON MATHEKA

VIONGOZI wa kisiasa nchini jana walishutumiwa vikali wakati wa maombi ya kitaifa, kwa kuendelea kuonyesha unafiki mkubwa machoni mwa Wakenya.

“Tuache unafiki. Imani na matumaini peke yake hazitaweza kutusaidia. Tunahitaji vitendo. Kwa hivyo tukitoka hapa, twende tuchukue hatua,” akasema Seneta Amos Wako wa Busia kwenye hafla iliyohudhuriwa na Rais Uhuru Kenyatta na naibu wake William Ruto katika Majengo ya Bunge.

Bw Wako alisema inasikitisha kuwa Wakenya wengi hawawezi kumudu gharama ya matibabu yakiwemo ya Covid 19, licha ya ahadi nyingi za serikali ya Jubilee za kutekeleza mpango wa Afya kwa Wote.

Wakili Peter Waiyaki, ambaye alikuwa mnenaji rasmi kwenye hafla hiyo, alisema Wakenya wanaweza kupata matumaini ya dhati wakipalilia uadilifu katika uongozi, kukumbatia uzalendo, kutekeleza na kuonyesha kwa vitendo kwamba wamejitolea kufanya hivyo.

“Uadilifu ni kutimiza unayoahidi kufanya. Kukosa uadilifu kunawapokonya raia matumaini na kuharibu nchi,” akasema Bw Waiyaki.

Wakili huyo alisema viongozi hawafai kutarajia Wakenya kuwa waadilifu ikiwa wao wanapuuza maadili na utawala wa kisheria.

“Ni jukumu la kila mtu kuwa muadilifu. Ikiwa hauwezi kuzingatia na kudumisha uadilifu, jiuzulu wadhifa wako,” akasisitiza Bw Waiyaki.

Bw Waiyaki alisema kama viongozi wa Kenya wangekuwa wazalendo, hakungekuwa na uporaji wa mali ya umma na kudhulimiwa kwa wananchi.

Jumbe za Bw Wako na Bw Waiyaki ziliwalenga viongozi wa kisiasa ambao wamekuwa wakitenda kinyume na matamshi yao.

Kwenye hotuba yake, Rais Kenyatta aliwataka viongozi kuwajibika zaidi kwa vitendo vyao badala ya kuzungumza mazuri kwenye mkutano kama wa jana na kueneza migawanyiko baadaye.

“Tumesikia yaliyohimizwa hapa na siwezi kuondoa hata moja. Tungekuwa watu wa vitendo, maadili, uwajibikaji na kutenda haki, nchi ingekuwa na matumaini,” akasema.

Rais Kenyatta mwenyewe amekuwa na mazoea ya kukiuka maagizo ya mahakama na kutotimiza ahadi zake kwa umma hasa Ajenda Nne Kuu za afya kwa wote, nyumba za bei nafuu, viwanda na utoshelevu wa chakula.

Hapo jana alilaumu bunge kwa kuchelewesha sheria za kufanikisha ajenda zake hasa kuhusu utekelezaji wa afya kwa wote. Hii ni licha ya ukweli kuwa mpango huo ulikwama katika awamu ya majaribio katika baadhi ya kaunti.

Katika mikutano ya awali ya maombi, wanasiasa hao wakiwemo Rais Kenyatta, Dkt Ruto, Raila Odinga (ODM) na Kalonzo Musyoka (Wiper) wamekuwa wakiahidi makubwa, lakini muda mfupi baadaye huwa wanapuuza ahadi zao.

Hapo jana, viongozi hao wa kisiasa walinukuu maandiko matakatifu na kuomba huku wakitoa jumbe za matumaini kwa Wakenya, ambazo ni kinyume na vitendo vyao.

Walieleza matumaini ya Kenya kushinda janga la corona, ingawa waliodaiwa kupora mabilioni yaliyotengwa kukabili ugonjwa huo hawajachukuliwa hatua hata baada ya Rais Kenyatta kutoa agizo hilo mwaka jana. Baadhi ya waliotajwa katika sakata hiyo ni washirika wa viongozi wakuu serikalini.

Maombi hayo yalifanyika wakati kuna mgawanyiko mkubwa katika serikali na nchi kutokana na tofauti kati ya Rais Kenyatta na Dkt Ruto hasa kuhusu siasa za urithi na mchakato wa BBI.

Ingawa viongozi wa kisiasa, kidini na sekta ya kibinafsi waliozungumza walisema kwamba ni muhimu kuungana kukabili changamoto zinazoikumba nchi, tofauti za rais na naibu wake zilikuwa wazi hata katika mkutano huo wa jana.

Dkt Ruto amekuwa akikosekana katika hafla za Rais Kenyatta ukiwemo ufunguzi wa Bandari ya Lamu, ambao alitaja jana kama mojawapo wa mambo mazuri yanayoleta matumaini nchini.

Viongozi wa kidini wataka wanasiasa kuacha unafiki

Na BENSON MATHEKA

VIONGOZI wa kidini wamewahimiza wanasiasa nchini kuacha unafiki na kutubu kwa dhati ili kuepushia nchi maovu yanayoikumba kama ukabila, ufisadi na uongozi mbaya.

Wakihubiri wakati wa maombi ya kitaifa katika ikulu ya Nairobi, Jumamosi, viongozi hao walisema ni kwa kukubali makosa na kuyatubu kwa dhati na kusameheana ambako kutaunganisha Wakenya, kudumisha amani na kurejesha uthabiti wa kiuchumi na kijamii.

“Maombi ya toba yanafaa kuwa ya kweli. Hilo ndilo nchi inahitaji ili kuwa na uwiano,” alisema Askofu David Oginde wa kanisa la Christ For All Nations.

Maombi hayo yaliitishwa na Rais Uhuru Kenyatta kushukuru Mungu na kuombea nchi. Viongozi wa dini na madhehebu mbalimbali walisisitiza haja ya viongozi kuwa mfano mwema kwa kusameheana, kuvumiliana na kuheshimiana kama njia moja ya kujenga jamii yenye amani na ustawi.

Walisema kwamba, Kenya inateseka kwa sababu ya viongozi kutotubu. “Fungueni macho yenu na muanze kuona. Kenya inaumia, Kenya inateseka. Mungu ahurumie nchi yetu,” alisema Askofu Martin Kivuva wa Dayosisi ya Mombasa ya Kanisa Katoliki.

Viongozi hao walisema toba na msamaha zitaleta amani, upendo na uthabiti nchini.

“Tunahitaji kujikumbuka sisi ni nani tunapokutana kama taifa mbele ya Mungu kuomba kama taifa,” aliongeza Askofu Sapit.

Maombi hayo yalifanyika wakati ambapo Rais Kenyatta na Naibu Wake William Ruto wametofautiana na kusababisha mgawanyiko katika chama tawala cha Jubilee.

Viongozi wa kisiasa huwa wanazungumza vyema wakiwa kwenye mikutano ya maombi lakini matamshi na vitendo vyao katika mikutano ya kisiasa huwa kinyume na vitendo vyao. Matamshi yao yamekuwa yakisababisha chuki na ghasia za kikabila maeneo tofauti.

Rais Kenyatta alisema aliitisha maombi hayo ili kushukuru Mungu kwa kusaidia Kenya kushinda changamoto nyingi.

Baada ya maombi hayo, Rais Kenyatta alisema amewasamehe wote ambao huenda walimkosea na akaomba wale ambao wanahisi aliwakosea wamsamehe pia.

“Tumeambiwa tusameheane na kwa hivyo ninataka kuomba msamaha kwa yeyote ambaye huenda nilimkosea. Ikiwa nilikosea mtu naomba anisamehe,” akasema Rais.

Akaongeza: “Ninachosisitiza na ambacho tumekumbushwa hapa ni amani, amani na umoja wetu kama taifa ndio furaha yangu kuu.”

Hakuna kiongozi mwengine wa kisiasa akiwemo Dkt Ruto ambaye alihudhuria hafla hiyo aliruhusiwa kuhutubu.

DINI: Ukitaka kufanikiwa katika hatua zako maishani, lazima uweke maombi mbele

NA PADRE FAUSTIN KAMUGISHA

Sala haimbadili Mungu, inakubadilisha wewe. Mungu atabaki kuitwa Mungu. Kwa binadamu, kila anapotaka kufanya mbadiliko maishani, lazima asali.

Mtoto wa miaka minne aliona picha ya Yesu akisali, akauliza kuhusu alichokuwa anafanya Yesu katika picha hiyo.

Aliambiwa kuwa Yesu Kristo alikuwa anasali. Mtoto alizidi kuuliza, “Anasali kwa nani?” Alijibiwa, “Anasali kwa Mungu Baba”.

Mtakatifu Cypriani alisema, “Kama alisali yeye ambaye hakuwa na dhambi, basi mwenye dhambi hana budi kusali zaidi.”

Tunasoma katika Biblia, “Yesu aliondoka akaenda mlimani ili kuomba, akakesha usiku kucha katika kumwomba Mungu” (Luka 6:12).

Mwinjilisti Luka anaeleza kwamba Yesu alikuwa akisali katika matukio muhimu au kabla ya kufanya maamuzi mazito.

Uteuzi wa mitume kumi na wawili ulifanyika baada ya Yesu kusali usiku kucha. Musa pia alitumia mtindo kama huu.

Alisali mlimani akipokea maelekezo kuhusu wasaidizi (Kutuko 19: 24) na warithi (Hesabu 27: 15-23) wake. “Kanuni ya sala ni kanuni ya mavuno. Ukipanda haba katika sala, utavuna haba. Ukipanda kwa wingi katika sala utavuna kwa wingi.

“Tatizo ni kuwa, tunajikaza sana kupata kuvuna kutoka juhudi zetu kitu ambacho hatukupanda,” alisema Leonard Ravenhill.

Yeye ambaye amejifunza kusali amejifunza siri ya mafanikio. Ukiona mafanikio yoyote maishani mwa Mkristo, kuna magoti yaliyopigwa.

“Sala inapanua moyo wazi na kukuwezesha kubeba zawadi ya Mungu mwenyewe,” alisema Mt. Mama Teresa Calcutta. Tumuige Bwana wetu Yesu Kristo katika kusali. Tunahitaji kupata nguvu kutoka kwa Mungu kwa ajili ya maisha yetu ya kila siku.

Nguvu hizo zinakuja tu kupitia maombi. Kila hatua iwepo dua.Unapotaka kufanikiwa, kwenda kanisani iwe desturi.

Ombi hili lilionekana katika gazeti la parokia ya Kanisa la Mt. Charles, Uingereza: “Ulipozaliwa, wazazi wako walikuleta kanisani. Ulipooa, mwenzi wako alikuleta Kanisani. Ukiaga dunia, jamaa zako watakuleta kanisani. Huwezi kujaribu kujileta sasa?” Tendo la kwenda kanisani liwe kama kawaida.

Yesu alikuwa na desturi ya kwenda kanisani. Tunasoma hivi katika Biblia, “Yesu alienda Nazareti, hapo alipolelewa; na siku ya Sabato akaingia katika Sinagogi kama ilivyokuwa desturi yake” (Luka 4: 16).

Kawaida ni kama sheria. Ukizoea si rahisi kuacha. Desturi ya Yesu ya kwenda kuabudu kila mara ndiyo siri yake ya mafanikio na mfano kwetu sisi wanafunzi wake.

“Mahali pa kila Mkristo ni kanisa…kushiriki katika ibada, ushirika wake na ushuhuda,” alisema John R. W. Stott.Yesu alipopotea wazazi wake walimtafuta Hekaluni.

Tunaambiwa: “walimkuta hekaluni” (Luka 2:46). Naye aliwaambia: “Kwa nini mmenitafuta? Hamkujua ya kuwa imenipasa kuwa katika nyumba ya Baba yangu?” (Luka 2: 49).

Mara nyingi Yesu alitumia neno “imenipasa.” Inatupasa kuwa katika nyumba ya Baba. Tuwe tunapatikana katika nyumba ya Baba.

Tusimfanye padre arejelee mstari huu kila mara: “Walipo wawili au watatu, nipo kati yao.” Usikose kuhudhuria ibada kanisani kwa sababu wewe ni maskini. Hakuna kiingilio.

Usikose kwenda kanisani kwa sababu mvua inanyesha. Mbona wakati mwingine unaenda kupanda basi kwenda kazini wakati kunanyesha, wala hutoi vijisababu.

Usikose kwenda kanisani kwa sababu nguo zako si za gharama. Kanisani si mahali pa kuonyeshea mitindo ya mavazi.

Usikose kwenda kwa ibada ya kanisa kwa sababu hujaalikwa. Mbona watu huenda kwa mazishi ilhali huwa hawajaalikwa.

Kama unataka kufanikiwa, basi kwenda kanisani iwe kama kawaida. Kuna ambaye alikuwa anasema kuwa haendi kanisani kila siku kwa sababu ibada ni ndefu.

Ibada sio ndefu bali ni uvumilivu wake ulikuwa mfupi. Kabla kila hatua ya maisha piga dua kwanza. Unataka kuanza shule, piga dua.

Unataka kuchumbia, piga dua. Ungependa kufunga ndoa, piga dua.

MSAMAHA: Unafiki katika maombi

Na BENSON MATHEKA

VIONGOZI wanapokutana Alhamisi kwa maombi ya kitaifa ya mwaka huu katika hoteli ya Safari Park, Nairobi, unafiki wao unajitokeza kutokana na kukosa kutimiza msamaha waliotangaza hadharani kwenye sala za 2018.

Kwenye maombi ya mwaka uliopita, Rais Uhuru Kenyatta aliongoza naibu wake William Ruto, Kiongozi wa ODM Raila Odinga na Kalonzo Musyoka wa Wiper kukumbatiana na kutangaza kusameheana.

Hatua hiyo ilileta matumaini makubwa kuwa hatimaye wangeshirikiana kuleta umoja wa kitaifa, kukomesha siasa za chuki, kupigana na ufisadi na kujenga taifa lenye ustawi.

Wakisimama mbele ya wageni walioalikwa na kutazamwa moja kwa moja na Wakenya kwenye televisheni, viongozi hao waliahidi kutuliza joto la kisiasa hadi 2022, kuunganisha Wakenya, kuunga mkono vita dhidi ya ufisadi na kuhubiri umoja wa kitaifa.

Kilele cha maombi hayo kilikuwa ni vigogo hao kuombana msamaha hadharani na kukumbatiana kwa makosa waliyotendeana na kuwatendea Wakenya wakati wa chaguzi mbili za urais 2017 .

“Tulishiriki kampeni kali yenye ushindani, kuitana majina na kurushiana lawama za kila aina. Lakini hapa leo, mbele ya watu hawa na Wakenya kwa jumla, ninaomba msamaha bila masharti,” Rais Kenyatta alimwambia Bw Odinga

Naye Bw Odinga aliomba msamaha kwa niaba ya muungano wa NASA na tangu wakati huo wawili hao wanaonekana kudumisha ahadi yao.

“Kwa niaba yangu binafsi na chama chetu cha Jubilee, na kufuata nyayo za viongozi hawa wa kuigwa (Rais Kenyatta na Bw Odinga), ndugu yangu Stephen, ninakuomba msamaha,” Dkt Ruto naye alisema na kuwakumbatia Bw Musyoka na Bw Odinga.

Lakini mara baada ya kuteremka jukwaani, Dkt Ruto na Bw Odinga walisahau walikuwa wamesameheana na mara moja pamoja na wandani wao wakaendeleza malumbano ya kisiasa.

Tangu hapo wawili hao wamekuwa wakiongoza washirika wao kushambuliana vikali hasa kuhusu vita dhidi ya ufisadi na mageuzi ya kikatiba.

Tofauti zao zimezidi huku Dkt Ruto akimlaumu Bw Odinga kama tapeli wa kisiasa anayetaka kujiunga na serikali kupitia mlango wa nyuma na kuvuruga chama cha Jubilee.

“Hatutakubali propaganda katika serikali. Waliungana nasi kubadilisha nchi lakini nia yao ni kuvunja chama cha Jubilee na serikali. Tunawaambia kwamba tunawatazama,” Bw Ruto amekuwa akidai.

Uhusiano wa Rais Kenyatta na naibu wake pia umekuwa baridi tangu mwafaka wa handisheki mwaka jana.

Bw Odinga na washirika wake naye hajaachwa nyuma kumshambulia Dkt Ruto na wamekuwa wakieneza kampeni ya kutaka kumwonyesha Naibu Rais kama anayetatiza vita dhidi ya ufisadi.

Kwenye maombi ya kitaifa ya 2018, ambapo waliombana msamaha, Rais Kenyatta alisisitiza kuwa vita hivyo havilengi jamii moja, jambo ambalo Dkt Ruto na washirika wake wanasisitiza.

Uhasama wa kisiasa umezidi hivi kwamba wanasiasa wa upinzani wanaoshirikiana na Bw Ruto wamekuwa wakionywa na hata kutimuliwa katika vyama vyao.

Kulingana na Pasta Sam Mboto wa Great Mission Church, malumbano ya viongozi hawa yanaweza kuzua uhasama na chuki za kijamii nchini.

“Viongozi wanapaswa kuwa mfano mwema wa kuigwa na wanaoongoza. Wakitoa msamaha hewa, wafuasi wao watawaiga,” asema.

NGUGI: Wamchao Mungu wana majukumu zaidi ya kuhubiri

Na MWITHIGA WA NGUGI

Kila mja aamkapo na kujiona akiwa mwenye siha, afanyalo kwanza ni kumshukuru Maulana kwa nguvu zake zinazowapa waja wake uhai usiku na mchana.

Na hapa sitosita kuwapa kongole viongozi wote wa dini na madhehebu mbalimbali kote ulimwenguni, kwa jitihada zao za kila wakati za kuwalinda kondoo wote wa Mungu; kwa kuwapa chakula cha kiroho na kuwapa wengi tumaini la maisha na ujio wa pili wa mwana wa adamu.

Makanisani na hata misikitini, mahubiri huwa ni kumtafuta Mungu au Allah kwa minajili ya kutenda haki na kuomba maghufira kila siku.

Hatufai kamwe kusahau viongozi wote wa dini wanafaa kuwa kwenye mstari wa mbele kuzikosoa na hata kuzisuta serikali zao hususan zinapokiuka maandili faafu ya kimaongozi na haki za kibinaadamu.

Kwangu mimi sijaisahau ile historia ya wana Israeli na kwa kweli ina mafunzo mengi kwa viongozi wa sasa wa ki-dini. Imekaririwa bayana katika Biblia Takatifu jinsi wana hawa walivyojipata mateka wa Farao kule Misri na kufanywa watumwa kwa miaka mingi.

Ama kweli jambo hili halikumfurahisha Mungu wetu mwenye Nguvu na pale Mtume Musa hata kama hakuwa wa uzao wa watu Misri, alitumiwa na Mungu kuleta ukombozi wa wana – Israeli.

Hata kama Farao alikuwa na nguvu nyingi na mamlaka kiasi gani ya ki-dunia mwishowe nguvu hizo zake ziliyeyushwa na kudura zake Muumba, na hapa naona kuna funzo makubwa sana kwetu sote na hasa kwa madikteta wote waliosalia katika bara letu la Afrika.

Sikatai najua kwamba mamlaka ya uongozi huwa ni matamu na kwa hakika tumeona yakiwapagawisha marais kadha barani.

Tulikuwa na Idi Amin Dada wa nchi jirani ya Uganda na hata baada ya kuutumia uimla wake kwa wananchi na wapinzani wake, mwisho wake wenye fedheha na majuto ulitimia na hata akafia uhamishoni.

Historia ya ‘mafarao’ wa Afrika ni ndefu, Muammar Gaddafi yu wapi?, Vile vile Saddam Hussein wa Iraq nani hajui mwisho wake alijipata kwenye kitanzi na kuwaacha wananchi wake wajitawale ki-demokrasia?

Orodha ni ndefu, nani angedhani kwamba siku moja rais Al-Bashir wa nchi ya Sudan Kaskazini, angezingirwa na wananchi wake wenye ghadhabu na hatimaye kutimuliwa na wanajeshi wake na kutiwa kizuizini?

Mwenye macho haambiwi tazama, leo hii Afrika kungali na marais wanaotumia kila mbinu kukatalia mamlakani, hawasiti hata kutumia vyombo vya dola kuwakomoa na kuwakomesha wapinzani wao na hata wengine wakizibadilisha katiba za nchi zao ili wabakie mamlakani.

Lakini swali ni je, hali hii itaendelea hadi lini? Hata hivyo najua kwamba Mungu wa Israeli angalipo na halali.

mwalimumzalendo@gmail.com

Mkutano mwingine wa maombi kufanyika Murang’a

NDUNG’U GACHANE na CHARLES WASONGA

MKUTANO mwingine wa maombi na uzinduzi wa santuri ya video (VCD) sasa utafanyika katika uwanja wa Kimorori mjini Kenol wiki moja baada mkutano mwingine wa maombi ambao ungehudhuriwa na Naibu Rais William Ruto kuahirishwa.

Mkutano huu ambao umepangwa na msanii wa injili Martin Wa Janet utafanyika Jumapili kuanzia saa nne asubuhi.

Miongoni mwa wageni waheshimiwa ni; Mbunge wa Gatundu Kusini Moses Kuria, Gavana wa Murang’a Mwangi Wa Iria na Mbunge Mwakilishi wa Wanawake wa kaunti hiyo katika Bunge la Kitaifa Bi Sabina Chege.

Bw Kuria ametangaza azma yake ya kuwania urais mnamo 2022 na pamoja na Gavana Wa Iria, viongozi hao wawili wamesajili vyama vya kisiasa ambavyo wanapanga kutumia kushiriki uchaguzi mkuu wa 2022.

Wadadisi wa kisiasa wanasema hatua ya wawili hao inalenga kudhibiti umaarufu wa Dkt Ruto katika eneo la Mlima Kenya.

Hata hivyo, Bw Martin Alhamisi  aliambia Taifa Leo kwamba mkutano huo sio wa kisiasa na kwamba shughuli kuu ni uzinduzi wa VCD na kuombea taifa.

Alisema aliamua mkutano huo ufanyike mjini Kenol kwa sababu unaweza kufikiwa haraka na wageni na viongozi watakaohudhuria.

Aliongeza kuwa kwa sababu amezaliwa katika kijiji cha karibu cha Kihiu Mwiri, aliamua kuandaa mkutano huo katika uwanja wa Kimorori ili watu wa familia yake na marafiki waweze kuhudhuria kwa urahisi bila kugharamika.

“Hakutakuwa na siasa wakati wa mkutano huo, ni shughuli iliyo imepangwa na waumini wa dhehebu wa Akorino kutoka kote nchini. Pia tutatumia fursa hiyo kuombea taifa kando na kuzindua VCD yangu yenye kichwa ‘Halleluiah’,” akasema.

Alipoulizwa kama amemwalika Naibu Rais katika mkutano huo, Bw Martin alisema alitaka kiongozi huyo ahudhurie lakini juhudi zake za kumfikia ziligonga mwamba.

“Nilitaka kumwalika Naibu Rais. Nilijaribu kumfikia lakini nikashindwa. Ingekuwa fahari yangu kumwona katika hafla yangu,” akasema Martin.

Alisema amepanga hafla hiyo kwa zaidi ya miezi mitatu kwani hata wakati ule mkutano ambao ungehudhuriwa na Dkt Ruto ulipofutuliwa mbali, alikuwa amekodisha uwanja huo.

Mkutano wa kuzindua VCD haujawahi kufanyika katika uwanja wa Kimorori, kwani shughuli ya mwisho ya kuandaliwa hapo ilikuwa ni uzinduzi wa hospitali ya macho na meno ya Kenneth Matiba Eye and Dental Hospitali mnamo Mei 19, 2016.

Rais Kenyatta awatumia Waislamu risala za heri Ramadhani

DIANA MUTHEU na WINNIE ATIENO

RAIS Uhuru Kenyatta amewahimiza Waislamu waombee nchi watakapokuwa kwenye mfungo wa mwezi mtukufu wa Ramadhani unaoanza rasmi Alhamisi.

Kwenye ujumbe wake wa heri njema kwa Waislamu Jumatano, alisema Kenya inahitaji maombi ya kila mmoja, na huu ndio wakati mwafaka kwa waislamu kuzidisha maombi.

“Kwa niaba ya wananchi na Serikali ya Kenya, ninawatakia heri njema na tunaungana na ndugu zetu waumini wa Kiislamu mnapoanza mwezi mtukufu wa Ramadhani.

Ni nguzo muhimu katika dini ambayo inawafunza umuhimu wa nidhani, upole na kujitolea,” akasema kwenye taarifa kwa vyombo vya habari.

Rais Kenyatta aliwahimiza Wakenya wengine kuungana na Waislamu katika kuendeleza mshikamano wa nchi, na kuachana na tofauti ndogo ndogo ambazo zimekuwa zikiigawa nchi.

Wakati huo huo, polisi mjini Mombasa na eneo zima la Pwani wameahidi kushika doria katika maeneo ya ibada, hasa zitakazoendelezwa nyakati za usiku.

Maafisa wakuu wa usalama eneo la Pwani, wakiongozwa na kamanda wao, Bw Noah Mwivanda, walisema polisi watatumwa katika maeneo ya ibada, hasa misikitini kudumisha amani na utulivu.

Pia, idara ya polisi imeweka hatua madhubuti kuzuia uhalifu na kuimarisha upelelezi katika maduka makubwa, maeneo ya kujistarehesha, taasisi za elimu, vivutio vya utalii, barabara kuu na vituo vya mabasi katika eneo la Pwani.

“Maeneo hayo yatakuwa na usalama wa kutosha na yatalindwa vilivyo. Tumeweka hatua zote kuhakikisha Ramadhani inaadhimishwa bila utovu wa usalama. Maeneo yote ya ibada yatakuwa na maafisa wa polisi wa kutosha,” alisema.

Aliwahimiza wakazi kuripoti visa vya uhalifu karibu na makazi yao.

 

Askofu asihi maombi kwa wapatanishi

GITONGA MARETE Na JOSEPH WANGUI

MMOJA wa watu 14 waliochaguliwa kusimamia juhudi za kupatanisha taifa amesihi Wakenya wawaombee kwani majukumu waliyopewa ni mazito.

Rais Uhuru Kenyatta na kiongozi wa upinzani Raila Odinga walichagua kamati hiyo baada ya kuafikiana Machi 9 ili kuleta umoja baada ya mgawanyiko uliosababishwa na siasa za uchaguzi wa mwaka uliopita.

Akihutubu wakati wa harambee ya ujenzi katika Kanisa la Kaaga Methodist, aliyekuwa Askofu Mkuu wa Kanisa la Methodist nchini, Lawi Imathiu, alisema kazi ya kamati hiyo ni kushirikiana na viongozi wote na Wakenya ili kutimiza umoja wa taifa.

“Tutajitahidi na kujitolea katika jukumu hili lakini inafaa pia nyinyi mjitolee kwani hatuwezi kufanikiwa peke yetu. Hii si kazi rahisi na majukumu tuliyopewa yanahitaji maombi mengi na uungwaji mkono. Tukishindwa, sote 14 tutalaumiwa,” akasema.

Aliongeza kuwa endapo watashindwa, Wakenya pia watafaa kulaumiwa kwani ni jukumu lao kuhakikisha kamati inatenda kazi zake ipasavyo.

“Mkiona hatufuati njia inayofaa, msinyamaze. Kuweni huru kutuambia tunapokosea,” akasema.

Aliyekuwa Mbunge Mwakilishi wa Kaunti ya Kiambu, Bi Anne Nyokabi, ambaye alikuwa mgeni mkuu katika hafla hiyo alisema Rais Kenyatta na Bw Odinga walionyesha kuwa nchi ni muhimu kuwaliko walipojitolea kushirikiana.

“Salamu yao ilikuwa muhimu kwa sababu ni wito wa kuboresha nchi yetu,” akasema. Bi Nyokabi.

Wakati huo huo, Katibu Mkuu wa Chama cha Jubilee, Bw Raphael Tuju, alitoa wito kwa wanasiasa kuunga mkono muafaka wa upatanisho.

Bw Tuju, ambaye pia ni waziri alisema chama hicho kinaunga mkono muafaka wa viongozi hao wawili lakini akakiri haujaeleweka vyema kwa wanasiasa.

“Rais alijitokeza akahakikishia kila mmoja kuwa muafaka ni kwa manufaa ya nchi na kupunguza taharuki. Hakuna mtu anafaa kuhisi kwamba atadhulumiwa na muafaka huu. Ni kwa manufaa ya nchi na wanasiasa wote kutoka pembe zote za nchi,” akasema Bw Tuju.

Alizungumza baada ya kuhudhuria mkutano wa uongozi wa Chama cha Jubilee katika Hoteli ya Sportsman Arms iliyo Nanyuki, Kaunti ya Laikipia.

Alisema mkutano huo ulinuia kuamua mwelekeo ambao chama kitachukua kufuatia ushirikiano wa Rais Kenyatta na Bw Odinga.

Kuhusu wito wa marekebisho ya katiba, Bw Tuju alisema Jubilee hakipatii uzito suala hilo lakini kimejitolea kutimiza malengo ya manifesto yake.

Hata hivyo, aliongeza kuwa kila Mkenya ana haki ya kupendekeza kile anachotaka na Jubilee itaheshimu matakwa ya Wakenya.

Wazee sasa wamgeukia Mungu amalize njaa

WINNIE ATIENO na PETER MBURU

HALI mbaya ya kiangazi na njaa imewalazimu wazee wa jamii ya Agikuyu kutoka Kaunti ya Nakuru kumgeukia Mungu kwa maombi, huku watoto wakiwa hatarini kufa kwa njaa kaunti ya Kilifi.

Mnamo Jumamosi, wazee hao walikusanyika eneo la Maili Sita, Bahati ambapo kwa njia za kitamaduni walifanya matambiko wakimlilia Mungu kumaliza janga la kiangazi.

Maombi hayo yalifanywa huku shirika la Msalaba Mwekundu likisema watu 241,000 wanahangaishwa na njaa, hasa katika kaunti za Kilifi, Tana River na Taita Taveta.

Ziara ya Taifa Leo katika Kaunti ya Kilifi ilionyesha Mto Sabaki umebadili mkondo wake, huku mabwawa manne pekee kati ya 25 yakiwa na maji ambayo yanang’ang’aniwa na mifugo na binadamu.

Meneja wa shirika la Msalaba Mwekundu eneo la Pwani, Bw Hassan Musa, alisema kuwa huenda hali hiyo ikawa mbaya hata zaidi kutokana na hali ya anga isiyotabirika.

“Katika Kaunti ya Taita Taveta takriban watu 77,000 wanakabiliwa na njaa, Tana River ni 35,000 na Kilifi 129,000. Kilifi ndiyo imeathiriwa zaidi haswa eneo la Magarini ambapo watu 51,000 wanapata taabu kwa sababu ya uhaba wa chakula na maji. Bamba-Ganze ni watu 41,000, Kaloleni 20,000 na Malindi 10,000,” Bw Musa alisema.

Waziri wa Maji, Misitu na Mazingira katika Kaunti ya Kilifi, Bw Kiringi Mwachitu, alisema kuwa wakazi wengi hujihusisha na biashara ya kuchoma makaa kwa sababu ya umaskini.

Katika kaunti hiyo, maeneo yaliyoathiriwa zadi na ukame ni Magarini na Malindi.

“Kwa sasa wakazi wa Bamba wana maji. Hata hivyo kuna changamoto za maji katika eneo la Magarini na Malindi na tunazishughulikia. Katika eneo la Ganze tumewekeza mno katika sekta ya maji,” akasema.

Hata hivyo Bw Musa ameitaka serikali kuwaelimisha wakazi kuhusu upanzi wa miti.

“Kiangazi cha muda mrefu kimefanya maji kuwa machafu. Wakazi wanatumia maji ambayo hayajatiwa dawa na pia wanalazimika kutumia maji hayo na mifugo,” akasema.

Hali hiyo ya kiangazi ni mbaya mno, kiasi kwamba baadhi ya wakazi wameanza kuathiriwa na ugonjwa wa ngozi, unaotokana na utapia mlo.