Korti yaruhusu kaunti izike miili iliyotelekezwa kwa zaidi ya miezi 8

Na Florah Koech

SERIKALI ya Kaunti ya Baringo imepata amri ya korti ili kuzika miili ambayo haina wenyewe na imekuwa katika Hospitali ya Rufaa ya Kaunti ya Baringo mjini Kabarnet kwa miezi kadhaa.

Kulingana na supritendanti wa hospitali hiyo Dkt Charles Maswai, zaidi ya miili minane kutoka hospitali ya kaunti ndogo ya Tiaty imekaa katika hifadhi hiyo na kusababisha nafasi ikosekana kusitiri miili mingine.

Dkt Maswai alisema kuwa mochari hiyo ina uwezo wa kuhifadhi miili 48 pekee na kwa kuwa imekuwa mingi, ile ambayo haijachukuliwa na wenyewe hawapo sasa itazikwa.

“Hifadhi ya maiti ya hospitali hii ilikuwa imejaa ndio maana tukalazimika kuelekea kortini na kupata amri ya kuondoa miili hiyo kisha kuizika. Zaidi ya miili minane katika hospitali ya Tiaty imekaa kwa miezi minane bila kuchukuliwa,” akasema Dkt Mawai.

Hata hivyo, mila na desturi ya jamii ya Pokot inayolazimu miili izikwe siku ambayo mtu amefariki imelaumiwa kwa kuendelea kurundikana kwa miili ndani ya hospitali kadhaa za kaunti hiyo.

Wapokot inasisitiza kuwa mtu lazima asizikwe siku aliyofariki na mahali alikoaga ndiposa wengi wao wanaamua kuiacha miili ya wapendwa wao inayopelekwa kwenye hifadhi ya maiti.

“Pia wanaokaribia au hata kumgusa mtu aliyefariki huchukuliwa kama aliyetiwa najisi. Kwa hivyo, tamaduni inalazimu atengwe kwa siku kadhaa na sherehe hufanyika ya kumtakasa,” akasema Bw Akeno.

Wanaofariki kuzikwa chini ya saa 72

Na SAMMY WAWERU

SERIKALI imeamuru wanaofariki kuzikwa chini ya kipindi cha saa 72.

Rais Uhuru Kenyatta alitoa amri hiyo kupitia hotuba yake kwa taifa Ijumaa.

Kiongozi huyo wa nchi alisema hatua hiyo itasaidia kuzuia watu kukongamana katika maombolezi, kama njia mojawapo kuzuia maenezi zaidi ya Covid-19.

Rais Kenyatta pia alitangaza kupunguza idadi ya wanaohudhuria mazishi kutoka waombolezaji 200 hadi 100.

Baraza la Makundi ya Kidini na ambalo lilitwikwa jukumu la kusaidia serikali kutoa mapendekezo kudhibiti msambao wa Covid-19 nchini, mwaka uliopita lilikuwa limetoa idhini ya watu 200 kuhudhuria hafla za mazishi.

“Kuhusu mazishi, yafanywe chini ya saa 72 baada ya kifo kuthibitishwa. Yahudhuriwe na watu wa familia pekee, na idadi isizidi 100,” akasema Rais Kenyatta.

Rasi pia alisema hafla za harusi zihudhuriwe na idadi ya watu wasiozidi 100.

“Maeneo ya kuabudu, yasizidi thuluthi moja ya idadi jumla,” akasema.

Wakati huo huo, Rais Kenyatta alipiga marufuku hadhara na mikusanyiko ya kisiasa kwa muda wa siku 30 zijazo, huku kafyu ya kitaifa inayotekelezwa kati ya saa nne usiku hadi saa kumi asubuhi ikirefushwa kwa muda wa siku 60 zijazo.

“Amri ya marufuku ya mikusanyiko ya kisiasa itaanzia kwangu kama Rais hadi kwa diwani (MCA). Yule ambaye atathubutu kuvunja hiyo sheria, awe ni nani ama nani atashughulikiwa kulingana na sheria za Kenya,” akaonya.

Mikusanyiko na mikutano ya kisiasa imetajwa kuchangia ongezeko la visa vya maambukizi ya corona nchini.

Rais Kenyatta na kiongozi wa ODM, Bw Raila Odinga chini ya kundi la ‘Kieleweke’ wamekuwa katika mstari wa mbele kuandaa mikutano ya umma katika mchakato wa kupigia debe Ripoti ya Mpango wa Maridhiano (BBI), huku Naibu Rais Dkt William Ruto akiongoza vuguvugu lake la ‘Tangatanga’ kupinga Mswada huo wa Mapendekezo ya Marekebisho ya Katiba 2020.

Bw Odinga amethibitishwa kuambukizwa virusi vya corona.

Tangatanga watimua wahubiri na kuteka mazishi ya diwani

Na WAIKWA MAINA

MAZISHI ya diwani Mburu Githinji wa wadi ya Rurii, Kaunti ya Nyandarua, Jumanne yaligeuka kuwa uwanja wa fujo baada ya wandani wa Naibu Rais William Ruto kuvuruga ratiba na kuanza kumshambulia Rais Uhuru Kenyatta.

Wanasiasa hao walitwaa ratiba na uendeshaji wa mazishi hayo kutoka kwa viongozi wa makanisa kwa nguvu, ambapo waliendeleza harakati za kuipinga ripoti ya Mpango wa Maridhiano (BBI), huku pia wakizindua kampeni za kuwapigia debe watu wanaopanga kuwania nyadhifa mbalimbali kwenye uchaguzi mkuu ujao.

Kizaazaa kilianza wakati Mwakilishi wa Wanawake katika kaunti hiyo, Bi Faith Gitau (pichani juu), alipoalikwa kuwahutubia waombolezaji. Kwenye hotuba yake, Bi Gitau alisisitiza lazima wanasiasa alioandamana nao wapewe nafasi kuhutubu pia.

Mapema wiki hii, wahubiri katika kaunti hiyo walikuwa wametangaza kuwa wanasiasa hawataruhusiwa tena kuhutubu katika hafla zinazoongozwa na kanisa.

Juhudi za viongozi wa kanisa kumrai Bi Gitau kuzingatia mpangilio wa ratiba hazikuzaa matunda baada ya mbunge huyo kusisitiza kuwa lazima wageni pia wahutubu.

Katika kile kilionekana kuwa njama iliyopangwa awali, vijana walevi walielekea kwenye jukwaa na kuanza kuwapigia kelele viongozi wa dini huku wakitishia kuvuruga mazishi hayo.

Polisi walikuwa na wakati mgumu kuwakabili vijana hao, ambao walifanikiwa kwenda kwenye jukwaa na kuanza kuondoa vipaza sauti.

Katika ishara nyingine iliyoonyesha kisa hicho kilikuwa kimepangwa, mbunge wa Olkalou, David Kiaraho alinyakua kipaza sauti kimoja na kusimamia hafla.

Bw Kiaraho alianza kuwaita wanasiasa waliokuwepo kuhutubu huku vijana wakishangilia. Vijana hao wanadaiwa kusafirishwa kutoka miji ya Kinangop, Naivasha na Ol Kalou.

Wanasiasa waliohutubu walimuunga mkono aliyekuwa mbunge wa Embakasi ya Kati, John Ndirangu kuwania ubunge katika eneo hilo.

Kwa pamoja, wanasiasa kutoka mirengo yote miwili walimuunga mkono mwanawe marehemu, Bi Mary Githinji kumrithi babake kwenye uchaguzi mdogo utakaofanyika.

Wabunge Rigathi Gachagua (Mathira), Gathiru Mwangi (Embakasi ya Kati) na Bw Kipkirui Chepkwony kutoka Baraza la Maspika wa Kaunti (CAF) walimpigia debe Dkt Ruto.

huku wakimkashifu Rais Kenyatta, handisheki na BBI.

“Tunaambiwa nchi itakumbwa na mapigano ikiwa tutajadili na kupigia debe siasa za ‘wilbaro’, kupinga BBI au kuzungumza kuhusu njama za mabwanyenye na maslahi ya watu maskini. Hatutatishwa! Tunahitaji kueleza ukweli, BBI si suala muhimu katika eneo la Kati na nchi nzima kwa jumla,” akasema Bw Gachagua.

Majonzi Nyagarama akizikwa na sifa tele

Na DIANA MUTHEU

GAVANA wa Kaunti ya Nyamira, Bw John Nyagarama, alizikwa jana huku viongozi mbalimbali nchini wakimsifia kwa juhudi alizofanya kuendeleza Kaunti hiyo na jamii kwa jumla.

Viongozi hao ambao waliungana na waombolezaji pamoja na familia ya marehemu katika safari ya mwisho ya gavana huyo, walimtaja kuwa mtu aliyekuwa na bidii na ambaye alijitahidi katika majukumu yake, hatua ambayo ilimpatia fursa ya kuzidi kupaa katika nyanja ya uongozi.

Waziri wa Usalama, Dkt Fred Matiang’i akisoma ujumbe wa rambirambi kutoka kwa Rais Uhuru Kenyattta, alimtaja Gavana Nyagarama kama kiongozi aliyekuwa na bidii iliyomfungulia milango mbalimbali ya uongozi.

“Alipenda kutafuta suluhu ya matatizo yanayomkumba mwananchi kila siku, na alipenda amani. Uwezo wake wa kipekee wa kuelewa changamoto anazozipitia mwananchi wa kawaida na maadili yake mema kazini ndiyo yalimwezesha kupanda cheo na kuhudumu katika ofisi mbalimbali za umma na kibinafsi,” akasema Rais Kenyatta katika ujumbe huo.

Rais Kenyatta alimsifia marehemu kwa kuimarisha sekta ya elimu kwa kuhakikisha kila mtoto anapata elimu, na pia kufufua sekta ya majani chai katika kaunti yake.

Aliyekuwa waziri mkuu, Bw Raila Odinga alimtaja marehemu kama simba shujaa, mpole, mungwana, aliyependa maendeleo na kudumisha amani.

Akisimulia kuhusu baadhi ya mikutano yake ya mwisho na marehemu, Bw Odinga aliwahakikishia wakazi wa Nyamira kuwa serikali itahakikisha matakwa aliyokuwa anatazamia kukamilisha yataangaziwa na kushughulikiwa.Bw Odinga alisema kuwa Bw Nyagarama alipenda amani, na kupitia Mpango wa Maridhiano (BBI), Wakenya wanaweza kuungana tena.

“Ningependa kuona Wakenya wakiwa na umoja. Hilo ndilo azimio kuu la handisheki,” akasema huku akiwaomba Wakenya wote kuunga mkono BBI.Waziri wa Ugatuzi, Bw Eugene Wamalwa akizungumza katika hafla hiyo alitoa rambirambi zake na kuwaahidi wakazi wa Nyamira kuwa serikali kuu itaendelea kufanya kazi nao.

Pia aliomba viongozi wa Kaunti hiyo kuhakikisha kuwa Naibu Gavana, Bw Amos Nyaribo anachukua nafasi iliyoachwa na Bw Nyagarama bila matatizo yeyote.

“Natumai Bw Nyaribo atashikilia usukani kukamilisha kazi aliyoianzisha Bw Nyagarama,” akasema Bw Wamalwa.Jaji Mkuu, David Maraga naye alimsifia marehemu kwa uongozi wake na pia kumtaja kama mpenda amani.

“Kwa kweli tumempoteza kiongozi mzuri na mpenda amani,” akasema Bw Maraga.Gavana Nyagarama alifariki Ijumaa iliyopita akiwa na umri wa miaka 74 katika Nairobi Hospital ambako alikuwa akipokea matibabu kwa muda.

Wanasiasa wakosa adabu mazikoni

Na KITAVI MUTUA

WANASIASA mnamo Jumanne waligeuza mazishi ya Seneta Boniface Kabaka wa Machakos kuwa jukwaa la kurushiana cheche za matusi kuhusu siasa za ‘Handisheki’ na ‘Tangatanga’.

Viongozi kutoka mirengo yote ya kisiasa walielekezeana lawama na matusi mbele ya familia ya marehemu bila kujali hisia za waliofiwa, taswira iliyoonyesha mgawanyiko mkubwa wa kisiasa uliopo nchini kuhusiana na ripoti ya Mpango wa Maridhiano (BBI).

Familia ya marehemu na viongozi wa makanisa walionekana kukerwa lakini wasijue cha kufanya wakati wabunge na maseneta walipokiuka miito ya mratibu wa hafla kufupisha hotuba zao.

Siasa hizo zilianzishwa na aliyekuwa gavana wa Nairobi Mike Sonko, aliyewalaumu maseneta kwa kutekeleza majukumu yao kwa kufuata maagizo wanayopewa na aidha Rais Kenyatta, Bw Odinga na Naibu Rais William Ruto.

Bw Sonko aling’olewa mamlakani na Seneti wiki iliyopita, ambapo maseneta wa mrengo wa handisheki walipiga kura ya kumwondoa na wale wa Tangatanga wakapinga.

“Sina machungu kwa sababu mlining’oa mamlakani. Tayari, nimeenda mahakamani kupinga uamuzi huo. Yote nayaachia Mungu kwa sababu ninajua misukumo iliyowafanya kuniondoa uongozini,” akasema Bw Sonko.

Bw Sonko pia alidai kuwa atatoa video zinazoonyesha Bw Odinga na Naibu Mwenyekiti wa Jubilee David Murathe wakimrai kushirikiana nao kwenye njama ya kumzima kisiasa kiongozi wa Wiper Kalonzo Musyoka. Alidai njama hizo zilihusu uchaguzi mdogo ulioisha juzi katika eneobunge la Msambweni, Kaunti ya Kwale.

“Nakwambia Bw Musyoka kuwa hawa watu wanakutumia tu kupata kura za kupitisha ripoti ya BBI. Baada ya hapo, hautakuwa kwenye mikakati yao ya siasa za 2022. Naomba kukutana nawe ili kukuonyesha hayo,” akasema Bw Sonko huku akishangiliwa na waombolezaji.

Baadaye, taharuki ilitanda Mbunge wa Gatundu Kusini Moses Kuria alipomtaja Bw Musyoka kama kiongozi ambaye hana maono, akidai kuwa Makamu Rais huyo wa zamani anaielekeza jamii ya Wakamba kwenye upinzani.

Kutokana na matamshi hayo, Seneta Enoch Wambua (Kitui) na mwenzake Mutula Kilonzo Junior (Makueni) walitishia kuagiza mbunge huyo atimuliwe kwenye hafla hiyo.

Hata hivyo, hafla iliendelea kwa saa kadhaa, huku zaidi ya maseneta 40 waliohudhuria wakitumia nafasi walizopewa kuzungumza kupigia debe mirengo yao ya kisiasa badala ya kumwomboleza marehemu.

Nao maseneta waaminifu kwa Dkt Ruto walitumia fursa hiyo kuhimiza ushirikiano wa kisiasa baina ya kinara wao na Bw Musyoka kwa ajili ya uchaguzi wa 2022.Maseneta hao Kipchumba Murkomen (Elgeyo Marakwet), Aaron Cheruiyot (Kericho), Samson Cheragei (Nandi), Christopeher Langat (Bomet) na Millicent Omanga (Maaum) walidai ushirikiano huo utasaidia jamii ya Wakamba kuingia serikalini.

Lakini Seneta Mutula aliwakemea akiwataja kama wanafiki: ‘Imekuwa vipi leo Kalonzo amekuwa muhimu kwa mipango ya Ruto?

Hali ilipozidi, ilibidi Gavana Alfred Mutua (Machakos) kuingilia kati na kuchukua udhibiti wa hafla hiyo, akisema ilisikitisha hotuba ndefu za wanasiasa zilikuwa zikichelewesha mazishi ya marehemu na kuilazimu familia kumzika kwa giza.

Imekuwa kawaida kwa wanasiasa nchini kutowaheshimu walioaga wala familia zao, na badala yake hutumia mazishi kama majukwaa ya kujipigia debe badala ya kuomboleza.

Wito Waislamu wajihadhari na hafla za mazishi

Na LEONARD ONYANGO

BARAZA Kuu la Waislamu nchini (Supkem), limewataka Waislamu nchini kuendelea kujihadhari wakati wa kuandaa miili ya waathiriwa wa virusi vya corona licha ya wizara ya Afya kusema kuwa maiti haiwezi kueneza virusi.

Baraza la Supkem jana lilishutumu wizara ya Afya kwa kukosa kutoa mwongozo mpya kuhusu jinsi ya kuandaa maiti tangu iliporuhusu familia kuzika wapendwa wao waliofariki kwa corona miezi mitatu iliyopita.

Mkurugenzi wa Huduma za Afya ya Umma Francis Kuria mnamo Septemba, aliruhusu familia kuendesha mazishi ya wapendwa wao bila usimamizi wa maafisa wa afya huku akisema kuwa tafiti zimethibitisha kwamba maiti haienezi virusi vya corona.

“Ni kweli kwamba maiti haiwezi kueneza virusi vya corona kwa sababu haina uwezo wa kukohoa au kupiga chafya. Lakini ni vyema kutambua kwamba majimaji ya mwili yaliyoko kwenye ngozi yanaweza kusambaza virusi vya corona kwa watu wanaouosha,” akasema Prof Mohamed Karama, mwenyekiti wa Kamati ya Kitaifa ya Waislamu ya kukabiliana na Virusi vya Corona (NMCRC).

Prof Karama alisema kuwa tangu serikali kuruhusu jamaa kuzika wapendwa wao, baadhi ya familia zimekuwa zikiosha maiti bila kuvalia mavazi ya kuwalinda dhidi ya virusi vya corona.

“Tangu serikali kutoa tangazo hilo, nyingi ya familia zimekuwa zikizika wapendwa wao bila kuhusisha vikosi maalumu vya Waislamu waliopewa mafunzo kuhusu jinsi ya kuendesha mazishi ya waathiriwa wa virusi vya corona.

“Tunashuku kuwa hali hiyo ndiyo imechangia katika ongezeko la maambukizi ya virusi hivyo nchini,” akasema Prof Karama.

Vikosi maalumu vilivyopewa mafunzo ya kuzika waathiriwa wa corona kwa njia salama, vimeshiriki mazishi ya watu 250, haswa katika Kaunti ya Nairobi, Mombasa, Nakuru na Eldoret.

Kamati ya NMCRC imeagiza kuwa watu wanaoosha maiti (ghusl) kwa mujibu wa imani ya Kiislamu, wavalie mavazi ya kuwalinda dhidi ya virusi vya corona, maarufu PPE.

“Wakati wa kufanya ibada maalumu ya wafu (janaza) watu wazingatie masharti ya wizara ya Afya, ikiwemo kutokaribiana. Maji na eneo linalotumika kuoshea maiti linyunyiziwe dawa ya kuua virusi,” akasema.

Prof Karama pia aliwataka waombolezaji kutawanyika mara baada ya mazishi ili kuzuia maambukizi ya virusi vya corona.

Aliwataka Waislamu wanaohitaji msaada kuhusiana na mazishi ya waathiriwa wa virusi vya corona kuwasiliana na vikosi vya watu waliopewa mafunzo kupitia nambari ya simu: 0800 210 000.

Baraza la Supkem limewataka viongozi wa misikiti kote nchini kuhakikisha kuwa waumini wanavalia barakoa wakati wa sala na wanasimama umbali wa mita 1.5 kwa mujibu wa kanuni zilizowekwa na wizara ya Afya.

“Watu wanaoingia misikitini wapimwe joto na wapewe sabuni na maji safi ya kunawa mikono na misikiti pia inyunyiziwe dawa za kukabili corona mara kwa mara,” akasema mwenyekiti wa Supkem Hassan Ole Naado.

Msanii Omondi Long Lilo kuzikwa leo

NA DICKENS WESONGA

Mwanamziki maarufu wa Benga Erick Omondi Odit anayejulikana kwa jina la kisanii Omondi Long Lilo atazikwa Ijumaa nyumbani kwao Bondo baada ya serikali ya kaunti kupinga ombi la familia la kumzika Jumatano wiki ijayo.

Uamuzi huo ulifikiwa baada ya mkutano wa saa mbili uliofanyika kati ya familia ya mwanamziki na serikali ya kaunti katika makao makuu ya kaunti hio Jumatano.

Serikali ya kaunti ilisisitiza kwamba Long Lilo lazima azikwe Ijumaa huku wakilipa gharama ya chumba cha kuhifadhi maiti, na gavana Cornnell Rasanga akiwapa Sh30,000 za kununua jeneza.

Msemaji wa serikali ya kaunti Olima Gondi alisema kwamba watafuata maagizo ya serikali kwa sababu hawataki mazishi ya utata.

Alisema kwamba serikali inaendelea kulipa Sh160,000 wanazodaiwa baada ya marehemu kulazwa hospitalini kwa miezi miwili katika Hospitali ya Kaunti Ndogo ya Bondo.

Kifo cha mwanamziki huyo wa miaka 37 kiliwacha ulingo wa usanii na kijiji kizima cha Gombe kwenye majonzi mapema wiki hii.

Msanii huyo alitajwa kuwa mpole, mchapakazi na aliyependa marafiki.

Kifo cha mwanamziki huyo kinajiri siku chache baada ya kifo cha mwanamziki Benard Onyago aliyejulikana kama Abenny Jachiga aliyezikwa usiku wa manane kufuatia mzozo wa mzishi yake kati ya polisi na wafuasi wake.

Serikali yazima wafu kuzikwa usiku

Na BENSON MATHEKA

SERIKALI za kaunti zinafaa kuruhusu watu wanaokufa kutokana na virusi vya corona kupatiwa mazishi ya heshima badala ya kuzikwa usiku, Wizara ya Afya imesema.

Mkurugenzi Mkuu wa Afya Dkt Patrick Amoth, alisema japo ni lazima kanuni za kuzuia maambukizi ya corona zizingatiwe kikamilifu, kuzika miili usiku ni kukosea marehemu heshima.

“Kanuni zilitolewa na Shirika la Afya Ulimwenguni (WHO) za kuzika miili ya wanaokufa kutokana na corona zinafaa kuzingatiwa wakati wa mazishi. Lakini tunahimiza serikali za kaunti kukoma kuzika miili usiku. Zipatie jamaa wa marehemu fursa ya kuandaa mazishi ya heshima,” alisema Dkt Amoth akiwa katika hospitali ya Othaya, Kaunti ya Nyeri.

Dkt Amoth alikuwa ameandamana na Waziri wa Afya Mutahi Kagwe kukagua maandalizi ya kukabiliana na janga la corona kaytika kaunti hiyo.

Hata hivyo alisema desturi za kitamaduni zinazoweza kusambaza virusi hivyo hazitaruhusiwa.

Baadhi ya serikali za kaunti zimeagiza mazishi kufanyika saa 24 baada ya kifo kutokea.

Madai ya ubaguzi yameibuka huku baadhi ya waathiriwa wakizikwa usiku na jamaa zao kunyimwa nafasi ya kuhudhuria huku ya wengine yakifanyika mchana na kuhudhuriwa na mamia ya watu.

Dkt Amoth alihimiza watu kuripoti kisa chochote cha dhuluma na ukiukaji wa kanuni hizo.

Kwa mara nyingine, Bw Kagwe alionya wanasiasa na viongozi wengine dhidi ya kukiuka kanuni za kuzuia kusambaa kwa corona na kuwataka machifu kuhakikisha kuwa hakuna mikutano ya hadhara katika maeneo yao.

Bw Kagwe alisema mbali na corona, serikali inakabiliana na ongezeko la maradhi yasiyo ya kuambukiza kama vile saratani, msukumo wa damu na kisukari.

“Mzigo wa maradhi yasiyo ya kumbukizana ungali unaongezeka na kutia wasiwasi. Watu walio na maradhi haya huwa katika hatari kubwa ya kuambukizwa corona, na kuna haja ya kukaguliwa mapema ili kupata matibabu,” alisema Waziri Kagwe.

Alitoa mfano wa saratani akisema inaua watu 32, 000 kila mwaka. Jana, visa vipya 132 vya corona vilithibitishwa nchini na kufikisha idadi ya maambukizi kuwa 3167. Hospitali ya Othaya iliyo chini ya hospitali ya kitaifa ya Kenyatta inatarajiwa kuwa kituo cha kushughulikia wagonjwa wa corona kaunti ya Nyeri. Visa tisa vimethitishwa katika kaunti hiyo.

Pigo kwa familia korti kuikataza kuzika jamaa wake upya

NA DICKENS WASONGA

Mahakama Kuu ya Siaya Jumatatu imekataa kupeana amri kutolewa kwa mwili wa mgonjwa wa kwanza wa corona wa kaunti hiyo ili apewe heshima za mwisho na kuzikwa tena ilivyotakiwa na familia yake.

Familia ya James Oyugi Oyango, mfanyakazi wa zamani wa bandarini Mombasa ambaye mwili wake ulizikwa bila geneza katika kaburi fupi usiku wa manane na maafisa wa kaunti, ilienda kortini kuomba wapewe ruhusa kuufukua mwili huo ili wamzike tena upya katika mazishi yanayfuata utamanduni.

Jamaa hao walikua ni dadake Joan Akoth Ajuang na mwanawe Brian Oyugi, walioomba korti kufanya uchunguzi wa maiti ilikujua kilichosababisha kifo cha Bw Oyugi .

Waliomba korti ili kuwaruhusu watu 15 wa familia washuhudie mazishi ya pili yake katika maombi yaliyowasilishwa kortini Aprili 14.

Lakini jaji Roseline Aburili alisema kwamba hata kama korti ilipata kuwa kaunti ya Siaya ilikiuka amri za kuwazika waathiriwa wa corona, sheria zilizowekwa na shirika la afya duniani zinapinga kufukuliwa kwa mwili huo kwani kutaiweka familia na uma kwenye hatari zaidi.

Ajabu ya mazishi kuhudhuriwa na watu 400 katika eneobunge la Mutahi Kagwe

By NICHOLAS KOMU

Serikali imelaumiwa kwa kukosa kuzingatia usawa kuhusu jinsi kanuni zilizowekwa kuzuia kusambaa kwa virusi vya korona zinatekelezwwa.

Hii ni baada ya madai kuibuka kwamba wanasiasa na viongozi hawafuati kanuni hizo, hasa eneobunge la Mukurweini anakotoka waziri wa Afya Mutahi Kagwe, hapo Jumatano ambapo watu 400 waliruhusiwa kuhudhuria mazishi ya mwalimu mtaaafu.

Serikali ilisema kwamba idadi ya watu wanaopaswa kuhudhuria mazishi ni 15.

Lakini katika mazishi haya watu 400 kutoka Kijiji cha Kihate waliruhusiwa kukusanyika katika shule ya msingi ya Mutwewathi kuhudhuria mazishi chini ya ulinzi wa polisi, viongozi na maafisa wakuu wa Wizara ya Afya.

Mkurungezi wa Afya Dkt Patrick Amoth aliiwakilisha Waziri wa Afya Mutahi Kagwe aliyetarajiwa kuhudhuria mazishi hayo.

Mbunge wa Mukurweni Antony Kiai na spika wa kaunti ya Nyeri John Kaguchia walihudhuria. Kikosi cha polisi na maafisa wa kulinda misitu walikuwa kulinda doria.

Wanahabari walizuiliwa kurekodi mazishi hayo na kuamrishwa kufuta video walizorekodi na kufuta picha walizokuwa wamepiga.

Corona yakata gharama kali ya mazishi nchini

Na BENSON MATHEKA

GHARAMA ya kuandaa mazishi nchini imepungua pakubwa tangu serikali ilipoagiza miili kuzikwa saa 24 baada ya kifo kutokea katika juhudi za kupunguza maambukizi ya virusi vya corona.

Katika muda wa wiki tatu sasa, mazishi yamekuwa yakihudhuriwa na watu wachache wa familia kufuatia agizo la serikali ya watu kutokusanyika kwa shughuli za umma.

Agizo hili la serikali limepunguzia familia nyingi gharama ya mazishi iliyotokana na miili kuhifadhiwa mochari kwa muda mrefu huku mochari za kibinafsi zikiathiriwa kwa kukosa wateja.

Watu wengi hasa maeneo ya mashambani wameamua kutopeleka miili mochari na badala yake wamekuwa wakiizika mara moja, hatua ambayo imepunguza gharama ya mazishi.

“Shughuli katika mochari yetu zimepungua kwa sababu idadi ya miili inayoletwa kuhifadhiwa imepungua pia. Hata wanaoileta wanaichukua baada ya siku moja kwenda kuizika tofauti na awali ambapo miili ilikuwa ikichukua wiki moja hivi watu wakiandaa mazishi,” asema afisa mmoja wa mochari ya Monalisa and Montezuma ambaye aliomba tusitaje jina lake kwa sababu si msemaji wa kampuni hiyo.

Mochari hiyo hutoza Sh1,000 kwa siku kuhifadhi mwili na Sh7,000 kwa muda wa wiki moja. Familia nyingi zilikuwa zikifanya harambee kugharimia mazishi.

“Hatua ya serikali imepunguza gharama ya mazishi kwa kiwango kikubwa kwa sababu hata wageni wamepungua, tofauti na awali ambapo watu walikuwa wakifanya harambee kulisha waombolezaji. Siku hizi ni watu 15 pekee ambao wanahudhuria mazishi na huwa wanatawanyika baada ya kuteremsha mwili kaburini,” asema katibu wa chama cha Kalunga Funeral Welfare Association katika Kaunti ya Machakos, Joseph Kimotho.

Anasema hii ni afueni kwa familia nyingi kwa kuwa hakuna gharama ya kuchapisha vijitabu kuelezea maisha ya marehemu, kuajiri watu wa kupiga picha na video na hafla za kitamaduni zilizokuwa zikigharimu maelfu ya pesa.

“Kwetu kama chama, mzigo umepungua. Tunachoshughulika ni gharama ya kununua jeneza marehemu akifariki akiwa nyumbani na kusafirisha maiti ya wanaofariki wakiwa mbali na nyumbani,” asema.

Kwa watu wanaopoteza wapendwa wao wakiwa maeneo ya mijini, gharama wanayoshughulikia ni ya kusafirisha maiti maeneo ya mashambani ambako inazikwa na watu wachache wa familia?Kabla ya agizo la serikali waliofiwa walikuwa wakisaidiwa na marafiki kukusanya pesa za kugharimia mazishi ya wapendwa wao.

Kila jioni, kulikuwa na mikutano katika mikahawa na kumbi mbalimbali mijini kutayarisha mazishi. Kaunti kadhaa ziliagiza mochari zote kufungwa wakati huu wa kukabiliana na maambukizi ya virusi vya corona.

Hii ilitokana na agizo la serikali kwamba miili yote izikwe saa 24 baada ya kifo kutokea na kuhudhuriwa na watu wasiozidi 15.

Hata hivyo, agizo la serikali limeathiri familia maskini katika maeneo ya mashambani zinazopoteza wapendwa wao wakiwa mbali na nyumbani.?Baadhi yao walikuwa wakitegemea wahisani kupata pesa za kulipa bili za hospitali, mochari na kusafirisha maiti za wapendwa wao kwa mazishi maeneo ya mashambani. Maafisa wa utawala wa mikoa wameagizwa kuhakikisha agizo la serikali limetekelezwa kikamilifu.

CORONA: Watu kufuatilia mazishi ya wapendwa wao kupitia video mitandaoni

Na MASHIRIKA

KITUO cha Kutafiti na Kudhibiti Maradhi (CDC) nchini Amerika kimewataka watu kuepuka misongamano katika matanga na badala yake kufuatilia mazishi ya wapendwa wao kwa njia ya video.

Wasimamizi wa mochari tayari wamepokea mafunzo kuhusu jinsi ya kuendesha mazishi na kupeperusha hafla hiyo moja kwa moja kwa familia ya mwendazake.

Kituo cha CDC tayari kimeshauri serikali kupiga marufuku mkusanyiko wa zaidi ya watu 50 kwa kipindi cha wiki nane zijazo.

Hiyo inamaanisha kwamba ni watu 50 tu wataruhusiwa kuhudhuria matanga na waliosalia watafuatilia shughuli yamazishi kwa njia ya video kutoka nyumbani.

Hatua hiyo ilifuatia baada ya watu 60 waliohudhuria mazishi katika eneo la Basque, Uhispania kupatikana na virusi vya corona.

Rais Mstaafu Daniel Arap Moi azikwa nyumbani Kabarak

Na SAMMY WAWERU

MIAKA 42 iliyopita, taifa lilimpoteza Rais Mwanzilishi wa Jamhuri ya Kenya ndiye Mzee Jomo Kenyatta.

Rais huyo wa kwanza, aliaga dunia Agosti 22, 1978, akiwa madarakani na waliokuwa wamezaliwa wakati huo walishuhudia heshima alizopata Hayati Mzee Kenyatta akizikwa, katika hafla ya kitaifa na iliyoongozwa na kikosi cha kijeshi.

Rais aliye mamlakani ndiye Amiri Jeshi Mkuu, hivyo basi amri zote katika kikosi hicho ziko chini yake.

Kwa mujibu wa mila, itikadi na desturi za wanajeshi, mmoja wao anapofariki akiwa kazini, yaani kabla kustaafu, anazikwa katika hafla ya kipekee ambapo mizinga 21 hufyatuliwa hewani, kuonyesha heshima kwa mwendazake.

Rais akiwa ndiye Amiri Jeshi Mkuu, akifariki akiwa mamlakani anazikwa katika hafla ya kitaifa ambayo inaongozwa na wanajeshi wenye madaraka ya hadi ya juu katika kikosi cha KDF.

Wakati wa kuteremsha jeneza lake kaburini, mizinga 21 inafyatuliwa.

Kwa muda wa wiki moja iliyopita, kifo cha aliyekuwa Rais wa pili wa Kenya, Mzee Daniel Toroitich Arap Moi, kimefichua mengi kuhusu mila, itikadi na tamaduni za kikosi cha kijeshi. Pia, kimekumbusha walioshuhudia kifo cha Mzee Jomo Kenyatta, heshima alizopokezwa wakati akizikwa.

Mzee Moi alifariki mnamo Jumanne, Februari 4, 2020, Nairobi Hospital na Rais Uhuru Kenyatta ndiye alitangaza rasmi kifo cha Rais huyo mstaafu.

Kilichofuata, kikawa mwili wa mwendazake kusafirishwa na wanajeshi kutoka wadi ya kipekee aliyokuwa akihudumiwa ili kuhifadhiwa katika Hifadhi ya Maiti ya Lee jijini Nairobi.

Ulinzi uliimarishwa vikali katika hifadhi hiyo, wanajeshi waliovamilia sare rasmi, nyekundu, wakisimama kwenye lango usiku na mchana. Walioruhusiwa kuutazama mwili wa Mzee Moi ni watu wa familia, marafiki wa karibu na viongozi wakuu serikalini.

Wizara ya Usalama wa Ndani na Mikakati ya Serikali, chini ya Waziri Dkt Fred Matiang’i na Katibu wake Dkt Karanja Kibicho, ilichukua hatamu ya maandalizi ya mazishi, ikiwa ni pamoja na mikakati ya kumuomboleza Moi.

Baada ya kutangaza kifo cha Rais huyo Mstaafu, kiongozi wa taifa Uhuru Kenyatta, pia alisema Mzee Moi ataombolezwa hadi atakapozikwa, ikiwa ni Jumatano, Februari 12, 2020. Mzee Jomo Kenyatta, ambaye ni babake Rais Kenyatta, aliombolezwa kwa muda wa siku 30.

Wakenya walipata fursa ya kuutazama mwili wa Mzee Moi, katika majengo ya bunge jijini Nairobi, ambapo shughuli hiyo ilichukua siku tatu.

Kulingana na bunge ni kwamba zaidi ya watu 200,000 waliutazama mwili wa marehemu.

“Kufikia Jumatatu jioni, zaidi ya watu laki mbili walikuwa wameutazama mwili wa Rais Mstaafu Mzee Daniel Toroitich Arap Moi,” Spika wa bunge la kitaifa Justin Muturi alisema baada ya wabunge kushiriki kikao cha kutuma salamu zao za pole.

Majengo ya bunge na mazingira yake, usalama uliimarishwa, vikosi vya pamoja kutoka idara ya jeshi na polisi wakishika doria katika kila kona.

Mwili wa Mzee Moi ulikuwa ukisafirishwa kwa gari maalum la kijeshi, kutoka Hifadhi ya Lee Funeral hadi majengo ya bunge na pia kurejeshwa, chini ya ulinzi mkali.

Mapema Jumatano, mwili wa Mzee Moi ulisafirishwa kwa ndege ya kijeshi, seneta wa Baringo na ambaye pia ni mwanawe aliandamana nao hadi nyumbani Kabarak, Kaunti ya Nakuru kwa ibada ya mazishi.

Rais Kenyatta ameongoza Wakenya katika kumpungia mkono wa buriani.

Aidha, Mzee Moi amezikwa chini ya itakadi za kijeshi, na kwa kuwa aliwahi kuhudumu kama Amiri Jeshi Mkuu mizinga 19 imefyatuliwa. Ndege za kivita, pia zimepita angani, yote hayo yakiashiria heshima kwa Rais huyo Mstaafu.

Mzee Moi alitawala Kenya kati ya 1978 – 2002.

Viongozi mbalimbali wamemmiminia sifa kemkem, wakimtaja kama kiongozi mzalendo aliyependa nchi yake, amani na umoja na zaidi ya yote Mcha Mungu.

Buriani Mzee Daniel Toroitich Arap Moi.

Ndege iliyobeba mwili wa Rais Mstaafu Moi yawasili Kabarak

Na SAMMY WAWERU

MWILI wa Rais wa pili wa Jamhuri ya Kenya Daniel Toroitich Arap Moi umesafirishwa kwa ndege ya kijeshi kutoka Nairobi ukipelekwa nyumbani kwake Kabarak, Kaunti ya Nakuru, ambako anazikwa leo Jumatano.

Ndege hiyo imewasili uwanja mdogo wa Kabarak dakika chache kabla ya saa tatu za asubuhi.

Awali, ndege iliyobeba mwili wa Rais huyo mstaafu na aliyetawala Kenya kwa miaka 24 iliondoka katika uwanja wa ndege wa Wilson, Nairobi, mwendo wa saa moja na dakika arubaini na tano asubuhi.

Familia ya marehemu ikiongozwa na mwanawe Gedion Moi, imeshuhudia mwili wa marehemu ukiwekwa kwenye ndege ya kikosi cha wanajeshi wa nchi kavu, ndicho Kenya Army.

Kwa mujibu wa itikadi na desturi za hafla ya mazishi, familia na waombolozaji kwa jumla huvalia mavazi meusi, na kipande cha kitambaa hususan cheupe kwenye mfupo wa shati au blauzi. Kipande hicho pia hutundikwa begani.

Mwanawe marehemu, kitinda mimba na pia seneta wa Baringo Gedion Moi na familia yake, wote wamevalia mavazi meusi, kwa mujibu wa picha na video zilizonaswa uwanjani Wilson akishuhudia mwili wa Mzee Moi ukiwekwa kwenye ndege.

Ni taswira ambayo pia inaonekana kwa wengi wa waombolezaji ambao tayari wamefika nyumbani kwake (Mzee Moi) Kabarak. “Mavazi meusi ni ishara ya heshima kwa marehemu,” anasema Dennis Mugambi. Nyingi ya hafla za mazishi, waombolezaji huvalia mavazi meusi.

Mzee Moi aliaga dunia Februari 4, 2020, akiwa na anapewa mazishi ya hadhi ya heshima ya juu kitaifa na kama kiongozi aliyewahi kuwa Amiri Jeshi Mkuu, atasindikizwa na ufyatuaji wa mizinga 19.

Rais Uhuru Kenyatta ataongoza taifa katika kumpungia mkono wa buriani Mzee Moi, hafla ambayo itahudhuriwa na marais kadha wa kigeni pamoja na viongozi na wageni mashuri kutoka serikalini na nchi za kigeni.

Kwa mujibu wa waandalizi wa mazishi hayo, yanatarajiwa kuhudhuriwa na zaidi ya watu 30,000.

Ni mavazi ya KANU pekee yataruhusiwa kwa mazishi ya Moi – Serikali

Na CHARLES WASONGA

WAKENYA wameonywa dhidi ya kuvalia mavazi yenye rangi za vyama vya kisiasa watakapohudhuria hafla ya mazishi ya marehemu rais wa zamani Daniel Arap Moi nyumbani kwake Kabarak Jumatano.

Kwa mujibu wa Mshirikishi wa Rift Valley George Natembeya, ikiwa yeyote anahisi kwamba sharti avalie mavazi ya chama cha cha kisiasa, basi shati lake liwe na nembo ya KANU; chama ambacho marehemu alijihusisha nacho hadi alipostaafu siasa mnamo 2002.

“Hii sio shughuli ya kisiasa, usije hapo ikiwa umevalia tishati ya BBI au chama chochote cha kisiasa. Ikiwa shari uvalie mavazi ya vyama vya kisasa, basi valia yale ya Kanu pekee,” akasema Jumanne kwenye kikao na wanahabari mjini Nakuru.

Bw Natembeya alisema matayarisho ya hafla hiyo yamekamilishwa na jumla ya watu 30,000 wanatarajiwa kuhudhuria mazishi hayo ya kitaifa.

Hata hivyo, alifafanua kwamba ni watu 500 pekee, hususan watu wa familia, wataruhusiwa kufika karibu na kaburi.

Bw Natembeya aliwataka wananchi wanaotaka kuhudhuria mazishi hayo kuwa wamewasili mwendo wa saa moja asubuhi kwani ratiba kamili itaanza saa tatu asubuhi.

Mnamo Jumatatu, Bw Natembeya alisema waombolezaji watapewa soda, mkate na nakala ya ratiba watakapowasili nyumbani kwa Mzee Moi.

Hata hivyo, baadhi ya Wakenya mitandaoni walisisiza kuwa sharti wapewe “lishe kamili” katika mazishi ya Rais mstaafu wakisisitiza kuwa Mzee Moi alikuwa kiongozi mkarimu.

Bw Natembeya alisema hema kubwa zimetundikwa katika uwanja wa Chuo Kikuu cha Kabarak ambako ibada ya mazishi itaendeshwa.

“Zaidi ya viti 30,000 vimewekwa katika mahema na vitatumiwa na wananchi watakaohudhuria mazishi ya Mzee Moi. Na kuna nafasi ya kutosha watu zaidi,” akasema.

Afisa huyo aliongeza kuwa mabasi yote ya shule katika kaunti ya Nakuru yamekodiwa kuwasafirishwa watu hadi Kabarak.

“Serikali ya kaunti ya Nakuru pia itachangia magari mengine,” Bw Natembeya akasema, huku akiongeza kuwa magari hayo yataanza kuwasafirisha watu kuanzia saa kumi na nusu alfajiri Jumatano.

Serikali yatangaza Jumanne siku ya mapumziko Wakenya waomboleze Moi, mazishi kufanyika kesho yake

Na CHARLES WASONGA

SERIKALI imetangaza Jumanne, Februari 11, 2020, kuwa siku ya mapumziko kuwapa Wakenya nafasi kuomboleza Rais Mstaafu Daniel Arap Moi aliyefariki Jumanne Februari 4, 2020, katika Nairobi Hospital.

Tangazo hilo limetolewa Alhamisi na Mkuu wa Utumishi wa Umma Joseph Kinyua kwenye kikao na wanahabari nje ya jumba la Harambee.

Ibada ya wafu itafanyika siku hiyo Jumanne, Februari 11, 2020, katika uwanja wa michezo wa Nyayo.

Na mazishi yatafanyika Jumatano, Februari 12, 2020, nyumbani kwa marehemu, Kabarak, Kaunti ya Nakuru.

Moi kupewa mazishi ya taadhima kuu

Na CHARLES WASONGA

RAIS Uhuru Kenyatta ametangaza kipindi cha maombolezo ya kitaifa kufuatia kifo cha Rais wa zamani Daniel Arap Moi huku akiamuru bendera za kitaifa zipeperushwe nusu mlingoti kote nchini kuanzia leo Jumanne.

Kwenye taarifa rasmi kwa umma kuhusu kifo cha Rais huyo wa pili wa Kenya, Rais Kenyatta amesema kipindi hicho cha maombolezo kitadumu hadi siku ambapo Mzee Moi atazikwa.

Na Rais huyo mstaafu atapewa mazishi ya kitaifa yakiandamanishwa na heshima na taadhima zote za kijeshi, Rais Kenyatta akaongeza.

“Chini ya mamlaka niliyopewa kama Rais wa Jumhuri wa Kenya na Amiri Jeshi Mkuu wa Majeshi yote nchini, naamuru kwamba kwa heshima ya kumbukumbu ya Marehemu Daniel Toroitich Arap Moi, natangaza kipindi cha maombolezo ya Kitaifa kuanzia leo (Jumanne) hadi wakati wa mazishi yake,” akasema kwenye taarifa hiyo iliyotumwa kwa vyumba vya habari.

Akaongeza: “Marehemu Daniel Toroitich Arap Moi atapewa Mazishi ya Kitaifa huku Heshima zote za Kiraia na Kijeshi zikitolewa.”

Awali, Rais Kenyatta alitangaza rasmi kifo cha Moi kilichotokea katika Nairobi Hospital ambako amekuwa akipokea matibabu kwa kipindi cha miezi minne.

“Ni kwa huzuni kuu, natangaza kifo cha Kiongozi Mkuu Afrika Mheshimiwa Daniel Toroitich Arap Moi, Rais wa Pili wa Jamhuri ya Kenya. Rais huyo wa zamani alifariki katika Nairobi Hospital asubuhi mnamo Februari 4, 2020, akiwa na familia yake,” Rais Kenyatta akasema kwenye taarifa.

“Sifa zake zinadumu nchini hadi siku ya leo (Jumanne), zikidhihirishwa ndani ya Filosofia ya Nyayo ya ‘Amani, Upendo na Umoja’ ambayo ilikuwa kaulimbiu yake alipihudumu kama Rais wetu.”

Katika hotuba fupi nje ya Nairobi Hospital Jumanne asubuhi mwanawe Seneta Gideon Moi alisema babake alifariki kwa utulivu.

Alisema familia inawashukuru kwa kumwombea Rais mstaafu alipokuwa amelazwa hospitalini humo akipokea matibabu.

“Nilikuwa kando yake, na kama familia tumekubali. Langu ni kutoa shukrani zangu kwa Wakenya wote kwa kuombea Mzee na familia yetu. Asanteni nyote,” amesema

Mwili wa Mzee Moi umehifadhiwa katika chumba cha kuhifadhi maiti cha Lee, Nairobi.

‘Afufuka’ siku yake ya kuzikwa

Na GEORGE MUNENE

HUZUNI iligeuka kuwa furaha Alhamisi katika kijiji cha Gitaugu, eneo la Mbeere Kusini, Kaunti ya Embu, baada ya mwanaume aliyedhaniwa kuaga dunia, na mwili wake kuhifadhiwa mochari, kupatikana akiwa hai hospitalini.

Familia ya mkulima mashuhuri wa ‘muguka’, Stephen Kivuti aliye na miaka 28, ilikuwa imekamilisha mipango yote ya kumpa mazishi ya heshima jana, lakini walipofika mochari kuchukua maiti yake kwa ajili ya kuizika, wakapata angali hai.

Bw Kivuti alianza kuugua Januari 2 mwaka huu na akakimbizwa hadi hospitali ya kaunti ndogo ya Kiritiri, ambako alilazwa akiwa amepoteza fahamu. Baadaye alihamishwa hadi Hospitali Kuu ya Kaunti ya Embu ambako alidaiwa kufariki.

Jambo lililofanya familia na wanakijiji kuamini kwamba alikuwa amekufa ni babake, James Nyaga wakati alipoenda hospitalini kumwona lakini akamkosa kwenye wodi, na hapo akaamua kuwa mwanawe alikuwa ameaga dunia.

Ripoti zinasema Mzee Nyaga alipomkosa mwanawe kwenye wodi alizirai, na alipopata fahamu wauguzi walikosa kumpa jibu kuhusu alikokuwa mtoto wake. Hapo ndipo alipojiamulia mwenyewe kwamba ameaga dunia.

Kijitabu cha ratiba ya ‘mazishi’ ya Stephen Kivuti. Picha/ George Munene

“Nilipomkosa kitandani na wauguzi wakakosa kunijibu nilifahamu mwanangu hakuwa hai tena. Nilijua alikuwa maiti na sikuona haja ya kupoteza wakati ndipo nikaondoka kurudi nyumbani nikiwa na huzuni tele,” akasema Mzee Nyaga.

Mzee Nyaga alirudi nyumbani na kueleza familia yake, jamaa, marafiki na wanakijiji kuwa mwanawe amefariki na mipango ya mazishi ikaanza.

“Tulikusanya fedha za kununua jeneza, kuandaa vyakula vya waombolezaji na pia tukachapisha nakala ya kitabu chenye maelezo ya maisha ya marehemu na ratiba ya ibada ya mazishi,” akaongeza.

Hapo jana, watu wa familia walipofika kuchukua mwili wake mochari walishangazwa na maelezo ya wauguzi kuwa Bw Kivuti alikuwa akiendelea kupokea matibabu katika wodi.

Walielekea chumba hicho ambapo walimpata akiendelea kutibiwa.

“Tuna furaha kwamba mwana wetu ‘amefufuka’ na ataishi kwa muda mrefu,” mamake Bw Kivuti, Bi Frida Igoki akasema.

Nyumbani, hali ya kuomboleza ilibadilika na kuwa furaha jamaa na wanakijiji wakisheherekea uhai wa mtu waliyeamini wanasubiri mwili wake kuuzika.

“Mara ya kwanza tulibabaika hadi familia ikatueleza ukweli wa mambo. Huu ni muujiza kutoka kwa Mungu,” akasema Bw James Mitaru.

Chifu wa lokesheni hiyo, Josephat Nyaga alidhibitisha kwamba alikuwa ametoa kibali cha mazishi hayo: “Hata nilikuwa nikijitayarisha kuhudhuria mazishi hayo.”

Hospitali Kuu ya Kaunti ya Embu, kupitia afisa anayesimamia mochari, Paul Ngari, ilipuuzilia mbali madai ya “kufufuka” kwa Bw Kivuti.

“Hakuna mtu mwenye jina hilo ambaye mwili wake ulikuwa umehifadhiwa mochari. Madai kwamba alifufuka ni uongo kwa sababu Bw Kivuti hakuondoka kwenye wodi,” akasema Bw Ngari.

Afisa Mkuu Mtendaji wa hospitali hiyo, Dkt Daniel Mugendi alishtumu familia hiyo kwa kueneza habari za kifo cha Bw Kivuti kabla ya kupata thibitisho kutoka kwa hospitali.

“Familia yake haikumanika. Walienda kwenye wodi tofauti na wakamkosa ndiposa wakajiamulia alikuwa ameaga dunia. Wangepata maelezo zaidi kutoka kwa wahudumu wetu kabla ya kuandaa mazishi ya mtu akiwa hai,” akasema Dkt Mugendi.

Waahirisha mazishi hadi shemeji alipe deni

Na JOHN NJOROGE

KISANGA kilizuka Elburgon, Kaunti ya Nakuru wakati familia ilipoahirisha mazishi ya mpendwa wao hadi shemeji yake alipe deni la marehemu la Sh80,000.

Jamaa za mwendazake walibeba jeneza lililokuwa na mwili huo na kuliweka nje ya nyumba ya shemeji yake.

Ilisemekana kabla afariki, marehemu Ruth Wamaitha Njoroge, alikuwa ameagiza ni lazima shemeji yake alipe deni hilo lililodumu kwa zaidi ya miaka 20 kabla azikwe.

Hayo yalifichuliwa na mwanawe mwendazake, Bw Simon Njoroge.

Kulingana na nakala zilizoonwa na Taifa Leo, kiasi cha hela alizodaiwa shemeji huyo na marehemu kilikuwa Sh155,000 ambapo Sh75,000 zilikuwa zimelipwa.

“Nilikuwa mwanafunzi katika Wisdom Institute, Kinangop lakini nikaacha shule kutokana na karo ya shule,” alisema Bw Njoroge.

Waombolezaji waliokuwa wamesafiri kutoka pande za mbali kuhudhuria mazishi ya jamaa na rafiki walipigwa na butwaa wakati mazishi yalipoahirishwa katika dakika ya mwisho.

Watazamaji walifurika nyumbani kwa Bw Dancan Kuria Mbugua, shemeji yake marehemu, kushuhudia jeneza lililoachwa katika boma lake eneo la Kasarani mjini Elburgon.

Wasia wa mfu utakuwa ukizingatiwa utata ukiibuka – Mahakama

NA MAUREEN KAKAH

MAHAKAMA Kuu juzi ilitoa uamuzi ambao unaheshimu wasia wa marehemu kuhusu anakofaa kuzikwa iwapo utata utaibuka na kusema tamaduni haifai kuzingatiwa kamwe.

Jaji Jesse Njagi alisema uamuzi wa marehemu kuhusu namna na anakofaa kuzikwa unafaa kuheshimiwa licha ya uwepo wa tamaduni za jamii mbalimbali zinazotoa mwelekeo kuhusu suala hilo.

“Ni jukumu la mahakama kutumia sheria za kitamaduni panapo haja na isipowezekana inafaa kuzingatia masuala yote yanayozingira utata wa mazishi kabla ya kutoa uamuzi,” akasema Jaji Njagi.

Aidha alidai kwamba hakuna sheria kwenye katiba inayotoa mwongozo kuhusu namna ya kutatua mizozo ya mahala pa kuzika marehemu nchini.

Kesi iliyochochea uamuzi wa Bi Njagi ilihusisha mzozo wa watoto wa mwanamke aliyeaga dunia mwaka jana waliokuwa wakipigania mahala pa kumzika mzazi wao.

Kwenye kesi hiyo, wanawe marehemu Stella Auma Odawa walitofautiana kuhusu mahali pa kumzika ikizingatiwa kwamba aliolewa kwa mumewe Dixon Odawa katika Kaunti ya Vihiga na wakajaaliwa watoto saba kabla ya ndoa yao kutibuka miaka ya 60.

Bi Odawa baadaye alihamia kwa mwanawe moja Samuel Ochieng’ eneo la Kibos Kaunti ya Kisumu hadi alipofariki Julai mwaka jana. Kufuatia kifo chake, kifungua mimba wake, Morris Odawa alielekea kortini kumzima Bw Ochieng’ dhidi ya kumzika mama yao, akitaka marehemu asafirishwe na kuzikwa kwa mumewe.

Ingawa hakimu alitupilia mbali kesi yake, Bw Morris alielekea katika mahakama kuu na kukata rufaa akisema sheria kuhusu utata wa mazishi ilifasiriwa vibaya.

Kulingana na Bw Morris, hakimu huyo alitoa uamuzi usiofaa wa kuzuia mwendazake kuzikwa kwenye boma la mumewe, mahali ambapo wanawe wengine wamekuwa wakiishi.

Bw Morris alifafanulia korti kwamba kulingana na tamaduni za jamii ya Waluo, mwanamke ambaye hujaliwa watoto na mumewe kisha kuachana kutokana na mafarakano kwenye ndoa huzikwa kwa mume huyo anapofariki.

Vile vile, Bw Morris alidai kwamba wazee walijadili suala hilo na kuafikiana kwamba mamake alifaa kupumzishwa kwa mumewe kwa sababu tamaduni ya Waluo haitambui talaka. Aliomba mahakama ibatilishe uamuzi wa awali wa hakimu.

Hata hivyo, Bw Ochieng’ alieleza korti kuwa mamake alimweleza akiwa hai kwamba akifariki, azikwe kwenye makazi yake mapya alikoishi baada ya kuachana na mumewe.

Bw Ochieng’ alidai kwamba itakuwa fedheha na ukiukaji wa haki kwa korti kulazimisha mazishi ya mamake yaandaliwe mahali ambapo aliondoka zaidi ya miaka 50 iliyopita. Pia alidai tamaduni ya Waluo hailingani na katiba na mapenzi ya marehemu mamake.

Japo hakimu alimruhusu Bw Odawa kushiriki kwenye mipango ya mazishi ya mkewe, alikataa kutoa idhini mwili wake uzikwe kwa mumewe.

“Korti lazima izingatie hoja zote na itoe uamuzi wa haki. Haitakuwa vyema kuzika mwili wa mwendazake katika boma lake la zamani alikotoka na hata hakurejea akiwa hai,” uamuzi wa hakimu ulieleza.

‘Afufuka’ kabla ya kuzikwa

NA GEORGE ODIWUOR

KIJIJI cha Godmiaha, eneo la Rachuonyo Mashariki, Kaunti ya Homa Bay kiligeuka uwanja wa kioja Jumamosi wakati mwanamume ambaye mazishi yake yalikuwa yakiendelea alipoingia kwenye boma na kusimama mbele ya waombolezaji akiwa buheri wa afya.

Wanakijiji walibaki midomo wazi wakistaajabu jinsi Bw Kennedy Olwa wa umri wa miaka 38, ambaye walidhani mwili wake ndio uliokuwa ndani ya jeneza tayari kuzikwa, alivyojitokeza mbele yao, wengine wakidhani amefufuka.

Bw Olwa aliondoka nyumbani zaidi ya miaka 20 iliyopita na kuelekea mjini Mbita, ambako alifanya kazi ya uvuvi kabla ya kuhamia ufuo wa Alum katika Kaunti Ndogo ya Rachuonyo Kaskazini.

Muda huo wote wa miaka 20 hakuwa ameenda nyumbani kwa wazazi wake.

Kulingana na Chifu wa Lokesheni ya Ramba, Bw Joseph Ndege, familia ya Bw Olwa ilipata habari kwamba alikuwa amefariki baada ya kuugua, na mwili wake ukapelekwa na maafisa wa polisi katika mochari ya Hospitali ya Kaunti ya Homa Bay.

“Baada ya kupata habari hizo, familia ilianzisha mipango ya mazishi mara moja. Baadhi ya jamaa zake waliotumwa katika mochari walithibitisha mwili huo ulikuwa wa Bw Olwa,” akasema Bw Ndege.

Familia ilienda hatua moja zaidi na kutangaza kifo chake katika redio kisha ikatumia kiasi kikubwa cha pesa kununua vyakula vya kuwalisha waombolezaji, na kufanikisha mipango mingine ya mazishi.

Cha kustaajabisha ni kwamba wakati huo wote Bw Olwa alikuwa akisikiza kifo chake kikitangazwa redioni alipokuwa akiendesha shughuli zake kwenye ufuo wa Alum.

Pia ilifahamika kuwa aliwasiliana na baadhi ya wanakijiji aliowafahamu na kuwaarifu kwamba angali hai. Lakini hakuna aliyeamini wakidhani ni mtu mwingine aliyekuwa akiwachezea, ndiposa wakaendelea na maandalizi ya mazishi.

“Alipiga simu kwa baadhi ya jamaa zake nyumbani na kuwashauri kusitisha mipango ya mazishi. Familia pia iliwatuma jamaa wengine hadi ufuo huo ili kuthibitisha kama bado alikuwa hai au la baada ya kupata habari kuwa alikuwa akisema yupo hai,” akasema Bw Ndege.

Hata hivyo familia haikuamini bado alikuwa hai kwa kuwa hawakuwa wamezungumza naye kwa miaka 20.

Walichukua mwili walioambiwa ni wa jamaa yao kutoka mochari mnamo Ijumaa iliyopita, na Jumamosi mchana walikuwa tayari “kumzika” Bw Olwa bila kufahamu alikuwa hai.

Ukweli ulibainika wakati kikundi cha jamaa wa familia waliotumwa ufuoni Alum waliporudi Jumamosi wakiwa wameandamana na Bw Olwa.

Huku jamaa waliokuwa mazishini wakistaajabishwa na mwenzao aliyekuwa hai, wale ambao waliwasili na Bw Olwa walipigwa na butwaa kupata kwamba ibada ya mazishi yake ilikuwa ikiendelea baada ya ‘mwili’ wake kuletwa nyumbani Ijumaa.

Hafla hiyo ya mazishi ilitibuka baada ya Bw Olwa kuwahakikishia jamaa kwamba yupo hai na mwili uliodhaniwa kuwa wake ukarejeshwa hospitali ya Kaunti ya Homa Bay.

Majambazi wavamia waombolezaji na kuiba pesa za mazishi

WAIKWA MAINA na BENSON AMADALA

FAMILIA moja inayoomboleza kifo cha mpendwa wao katika eneobunge la Kinangop, Kaunti ya Nyandarua, ilipata majonzi zaidi baada ya kuvamiwa na majambazi walioiba Sh18,000 zilizotengewa ununuzi wa jeneza la kuzika marehemu.

Bw Rufa Thiga, mkewe na nduguye walivamiwa na majambazi sita mnamo Jumatano usiku, saa chache tu baada ya waombolezaji waliofika kwao kuwafariji kutokana na kifo cha dada yao kuondoka.

Mkewe Bw Thiga, Margaret Wambui na nduguye Benson Kigo walijeruhiwa kwenye kisa hicho.

Bw Thiga alisimulia jinsi alivyowasikia majambazi hao waking’ang’ana kuvunja lango kuu la kuingia boma lake na jinsi jaribio lake la kutorokea mlango wa nyuma lilivyogonga mwamba.

“Nilipojaribu kutorokea mlango wa nyuma, watu wawili walinivamia kwa panga huku wengine wakiingia ndani ya nyumba na kumpiga mke wangu kwa silaha butu,” akasema Bw Thiga.

Baada ya hapo walimwagiza aingie ndani ya nyumba na awakabidhi pesa ambazo zilikuwa zimekusanywa kugharimia mazishi ya dadake.

“Walinilazimisha kuingia ndani ya nyumba niwape pesa za matanga. Niliwapa Sh18,000 ambazo zilikuwa zimetengewa ununuzi wa jeneza la marehemu,” akaongeza Bw Thiga.

Bi Wambui naye kwa masikitiko alisimulia jinsi majambazi hao walivyomfuata hadi kwenye bafu na kumpiga wakidai awape pesa. “Walitishia kuua familia yote. Nilipata majeraha kwenye mikono, mgongo na kichwani,” akasema.

Bw Kigo naye alisema kuwa wezi hao walimlazimisha aingie ndani ya nyumba na akawapa Sh3,000 ili kunusuru maisha yake. “Walinieleza kwamba walikuwa maafisa wa polisi kabla ya kunipiga kichwani na kuniamrisha nilale chini,” akasema Bw Kigo.

Kwingineko, wakazi wa kijiji cha Shiswa, eneobunge la Shinyalu, Kaunti ya Kakamega bado wanaendelea kuomboleza baada kijana kumuua babake mwenye umri wa miaka 80 kutokana na mzozo kuhusu mlo wa ugali na mahindi choma.

Kijana huyo mwenye umri wa miaka 30 alitoroka baada ya kumuua babake.

Kulingana na wanakijiji, mshukiwa huyo mapema mwaka huu alichimba kaburi kwenye boma baada ya kuzozana na babake na kutishia kumuua na kumzika hapo.

Kamanda wa polisi katika kaunti ndogo ya Shinyalu, Robert Makau alisema polisi wanaendelea kumsaka mshukiwa huku uchunguzi ukiendelea kuhusu kisa hicho.

Idadi ya waliouawa kwenye shambulizi la Boko Haram mazishini yaongezeka

Na AFP na MARY WANGARI

WATU 65 waliokuwa wakihudhuria mazishi walifariki mnamo Jumamosi, 27, kufuatia shambulizi la kigaidi lililotekelezwa na Boko Haram mjini Borno eneo la Kaskazini Mashariki mwa Nigeria, idadi ya vifo ikiwa mara tatu ya idadi ya awali, ripoti zimesema.

Miili zaidi ya mamia ya watu ilipatikana mnamo Jumapili kufuatia shambulizi hilo lililotekelezwa siku iliyotangulia katika kijiji kimoja kilicho karibu na jiji kuu, Maiduguri.

“Ni watu 65 waliofariki na 10 wakajeruhiwa,” alisema Muhammed Bulama, mwenyekiti wa serikali eneo hilo.

Bulama alisema kwamba watu zaidi ya 20 walikuwa wamefariki katika shambulizi la awali katika mkutano wa mazishi.

Mamia waliuawa walipokuwa wakiwakimbiza washambulizi hao.

Kiongozi wa kundi kutoka eneo hilo linalopinga kundi la wapiganaji wa Boko Haram alithibitisha idadi ya waliofariki huku akitoa ripoti tofauti kiasi kuhusu shambulizi hilo.

“Watu 23 waliuawa walipokuwa wakirejea kutoka kwenye mazishi na wengine 42 waliosalia wakauawa walipokuwa wakiwafuata magaidi hao,” Bunu Bukar Mustapha alieleza AFP.

Bulama alisema alifikiri shambulizi hilo jipya lilikuwa juhudi za kulipiza kisasi dhidi ya mauaji ya wapiganaji 11 wa Boko Haram wiki mbili zilizopita yaliyotekelezwa na wakazi wakati wapiganaji hao walipovamia kijiji chao ambapo wakazi walinasa bunduki 10.

Buhari achemka

Mnamo Jumapili, Rais wa Nigeria Muhammadu Buhari alikosoa vikali tukio hilo na kuamrisha kikosi cha jeshi la anga pamoja na jeshi la nchi kavu kuwasaka washambulizi hao kwa mujibu wa taarifa kutoka kwa afisi ya Rais.

Kundi la Boko Haram limekuwa likishambulia wilaya ya Nganzau mara kwa mara.

Kundi hilo la kigaidi limehangaisha eneo la Kaskazini Mashariki mwa Nigeria kupitia mashambulizi yaliyodumu kwa mwongo mmoja ambayo yamesababisha vifo vya takriban watu 27 000 huku watu zaidi ya milioni mbili wakifurushwa makwao.

Kundi hilo limegawanyika baina ya kundi la Boko haramu linaloegemea kiongozi wa jadi Abubakar Shekau na kundi la Iraq la Islamic State pamoja na kundi la Levant (ISIL ama ISIS).

Kundi la Shekau hulenga wahasiriwa wasio na uwezo wa kivita kama vile raia huku kundi la Islamic State West Africa Province (ISWAP) likivamia vikali vikosi vya kijeshi tangu mwaka 2018.

Kanisa la Anglikana Mumias lapiga marufuku mazishi ya wikendi

Na SHABAN MAKOKHA

smakokha@ke.nationmedia.com

KANISA la Aglikana Dayosisi ya Mumias limepiga marufuku shughuli za mazishi wikendi katika kile limesema ni kuchoshwa na mwingilio wa kauli za kisiasa za mara kwa mara.

Askofu Joseph Wandera alisema Jumatano kwamba makubaliano yamepatikana baada ya kikao na wadau muhimu wa kanisa hilo kwamba mazshi yasiandaliwe Jumamosi na Jumapili katika parokia zote 43 chini ya Dayosisi hiyo.

Wakati huo huo, Askofu alisema mazishi yamekuwa yakiathiri ratiba ya kanisa hasa programu za uchangishaji fedha, nikahi, na ubatizo miongoni mwa shughuloi nyinginezo.

“Mkutano wa Nambale, Kaunti ya Busia mnamo Juni 19, 2019, makubaliano yaliafikiwa kwamba kuna sababu za kuridhisha kwamba mazishi yasifanyike wikendi kutoa fursa makasisi kuhudhuria shughuli nyingine hasa harusi, mikutano ya ushirika na pia kutayarisha mafundisho ya kidini ya kusomwa kila Jumapili, alisema Askofu Wandera.

Sasa Mumias inaungana na dayosisi zingine kutoka kaunti zingine nchini Kenya kupiga marufuku mazishi mnamo wikendi.

Dayosisi hizo ni Mount Kenya South, Nyanza, Maseno North na Nambale.

Hilo linamaanisha waliofiwa wanaweza kutoa maiti mochwari Jumatatu hadi Alhamisi na mazishi yafanyike kuanzia Jumatatu hadi Ijumaa.

 

Mume achomoa upanga mazishi ya mke

NA TITUS OMINDE

Kifinko, Kakamega

Kulitokea kizaazaa kwenye sherehe ya mazishi kijijini hapa mwanamume aliyefiwa na mkewe alipotoroka akibeba upanga baada ya kulaumiwa na wakwe zake kwa kuwa mraibu wa bangi hata wakati wa mazishi.

“Huyu mwanamume amepotelea katika uvutaji bangi, huenda tabia hii ndio imechangia kifo cha dada yetu, wakati tunapanga mazishi yeye hutorokea vichakani kuvuta bangi, sijui huyu ni mume wa aina gani,” alisema mama mkwe akihutubia waombolezaji.

Jamaa wa marehemu waliambia waombolezaji kuwa mwanaume alikuwa akiondoka mara mwa mara kwenda kuvuta bangi ibada ikiendelea.

Kulingana nao, tabia hiyo ilikuwa kero kwa dada yao jambo ambalo lilimsababishia msukumo wa damu na magonjwa mengine.

Mwanamume huyo alidaiwa pia wakati mmoja aliteketeza nyumba yake baada ya kuvuta bangi na kudai kuwa marehemu alikuwa amebadilika na kuwa jini.

Shutuma zilipozidi wakati wa ibada jamaa aliamua kutoroka huku akiwa amebeba panga ili kumvamia yeyote ambaye angethubutu kumrudisha katika ibada ya mazishi ya marehemu mke wake.

Polo huyo alitokomea huku akiwaaacha waombolezaji wakiwa wameshangaa.

Juhudi za kumshawishi kuvumilia hadi ibada iishe ziliambulia patupu kwani hakusikia la mtu yeyote.

Inandaiwa kuwa mwanume huyo alirejea baada ya mazishi ambapo aliamrisha wakwe kuondoka haraka bomani mwake hasa baada ya kumharibia jina wakati wa ibada.

“Sitaki kuona mtu yeyote katika boma la mvuta bangi, mmeniharibia jina katika ibada, sasa shikeni safari ya kurudi kwenu la sivyo mtajua huu ni upanga wenye makali,” alisema polo huyo huku akibusu upanga wenye makali aliokuwa ameshika mkononi.

Ilibidi ndugu na jamaa wa marehemu kukimbilia usalama wao kutoka boma hilo.

Familia ya Ivy yaomba msaada kugharimia mazishi

MARY WAMBUI, JEREMIAH KIPLANG’AT na EDITH CHEPGENO

FAMILIA ya mwanafunzi wa Chuo Kikuu cha Moi aliyeuawa wiki jana wameomba msaada wa kifedha kutoka kwa umma ili kugharimia mahitaji wakati wa mazishi yake yanayotarajiwa kufanywa Alhamisi.

Msemaji wa familia hiyo, Bw John King’ori ambaye ni mjombake marehemu Ivy Wangechi, Jumapili alisema kuwa wanatarajia halaiki kubwa ya watu kwenye mazishi hayo na pia wangependa kumpa mazishi ya heshima, mahitaji ambayo yatagharimu pesa nyingi kutimiza.

“Kutokana na matukio yaliyozingira kifo chake, mazishi yake hayatakuwa ya kawaida. Tunawatarajia kati ya waombelezaji 1,500 hadi 2,000 hali ambayo inatuweka katika ulazima wa kutumia kiasi kikubwa cha fedha. Tunawaomba wahisani watume fedha kupitia nambari 855050 ili tusaidiwe kumpa mazishi ya heshima,” akasema Bw King’ori.

Mamake marehemu, Bi Winfred Waithera naye alishutumu wanaoeneza uvumi katika mitandao ya kijamii kuhusu kifo cha mwanawe na kuwataka kukoma tabia hiyo mara moja kwa kuwa inaizidishia familia hiyo machungu.

“Punde tu baada ya marehemu kukata roho, hata kabla ya familia kupashwa habari, inasikitisha kuwa watu walivamia mitandao ya kijamii na kueneza uvumi kuhusu mtu wasiyemjua. Tunawaomba Wakenya wakomeshe tabia hiyo,” akasema Bi Waithera.

Wakati uo huo, mwanamume aliyemuua Bi Wagechi, Naftali Kinuthia, leo anatarajiwa kufikishwa katika Mahakama ya Eldoret baada ya makachero kurekodi taarifa kutoka kwa mashahidi wikendi.

Bw Kinuthia aliruhusiwa kuondoka katika Hospitali ya Mafunzo na Rufaa ya Moi Ijumaa huku maafisa wa polisi wakiahidi kumfanyia uchunguzi kabla ya kumpeleka kortini leo.

Kulingana na Afisa Mkuu Mtendaji wa Hospitali ya Moi Bw Wilson Aruasa, Bw Kinuthia alikuwa amelazwa hospitalini humo tangu Jumanne wiki jana baada ya kupigwa na umati kutokana na hatua yake ya kumvamia Bi Wangechi na kumuua.

Siku ya Ijumaa Afisa Mkuu wa Polisi wa Eldoret Mashariki Lucy Kananu vile vile aliwaomba wenye habari muhimu zitakazosaidia katika uchunguzi kujitokeza na kuziwasilisha kwa polisi kabla ya Bw Kinuthia kupelekwa kortini.

Kati ya waliohojiwa wikendi ni marafikize marehemu na wapitanjia walioshuhudia tukio hilo katika kitengo cha kuwapokea wagonjwa kwenye hospitali ya Moi.

Matapeli wanavyotumia mazishi bandia kulaghai wabunge

Na SAMWEL OWINO

WALAGHAI sasa wanatumia matanga feki kuwatapeli wabunge, imebainika.

Uchunguzi wa Taifa Leo umebaini kuwa wabunge wamekuwa wakitapeliwa na walaghai wanaotumia mazishi hewa na shida nyinginezo kama vile ugonjwa, gharama za hospitalini na karo.

Mnamo Februari 1, mbunge wa Suba Kaskazini Millie Odhiambo alitumia mtandao wa Facebook kuelezea jinsi alivyohudhuria mazishi feki.

Familia ya mtu aliyedaiwa kufariki ilishtuka ilipomuona Bi Odhiambo akiwasili kuhudhuria mazishi ya mpendwa wao ambaye alikuwa hai.

“Kila mara mimi husimama na watu wa eneobunge langu wakati wa furaha na huzuni, haswa wakati wa mazishi ambayo hufanyika Alhamisi au Ijumaa. Leo nilikuwa na orodha ya mazishi ya watu 10.

“Lakini tulibaini kuwa mazishi ya watu wawili yalikuwa feki na ulikuwa utapeli ulioendeshwa na watu wanaotaka kujipatia fedha kwa njia za kilaghai,” akasema Bi Odhiambo.

Bi Odhiambo alielezea namna alivyotuma salamu za rambirambi kwa familia anayoifahamu kwa ‘kupoteza’ mwanao, lakini ikabainika kuwa ‘marehemu’ alikuwa buheri wa afya.

Uchunguzi wetu ulibaini kuwa walaghai hao hupendelea kutapeli wabunge wanaohudumu kipindi cha kwanza ambao wangali wanajitafutia umaarufu wa kisiasa.

Walaghai hao mara nyingine hushirikiana na mameneja wa Hazina ya Ustawi wa Maeneobunge (CDF) na kuongeza idadi ya mazishi kwa lengo la kunufaika na fedha zinazotumwa na mbunge kufariji familia zilizopoteza wapendwa wao.

“Mara nyingi wabunge wanapopata taarifa kuhusu matanga hupigia simu mameneja wa hazina ya CDF ili kuthibitisha. Walaghai hao hushirikiana nao kuongeza idadi ya matanga, ikiwa kuna hafla 10 za mazishi kwa wiki, mameneja husema watu 15 wamefariki ili waweze kunufaika na fedha za ziada,” anasema mbunge wa Kasipul, Bw Charles Were.

Mwakilishi wa Kike wa Kaunti anadaiwa kutapeliwa Sh700,000 miezi mitatu iliyopita na watu waliojifanya kwamba wamefiwa na wameshindwa kulipia gharama za matibabu hospitalini. Matapeli hao pia walihitaji msaada kwa ajili ya mazishi.

Japo mbunge huyo hakuwa na fedha wakati huo, alikopa kwa mwenzake na kuwatumia matapeli hao ambao walitoweka.

Mbunge huyo wa kaunti amekuwa akiona haya kufichua kuhusu kisa hicho

“Hataki kusema masaibu hayo, lakini mimi najua kwa sababu tunatoka naye kaunti moja,” mbunge aliyetaka jina lake libanwe akaambia Taifa Leo.

Mbunge wa Maragwa Mary Wamaua Waithera, alisema kuwa alitapeliwa Sh5,000 na mwanamke aliyedai kuwa mkurugenzi wa elimu wa Kaunti ya Murang’a.

Naye, Mbunge wa Mugirango Kaskazini, Bw Joash Nyamoko alisema kuwa alitapeliwa na watu waliompigia simu wakilia lakini ikabainika kwamba yalikuwa matanga bandia.

Kizaazaa muuaji wa marehemu kujitokeza mazishini

Na MAGDALENE WANJA

Kizaazaa kilitibuka katika makaburi ya Wanyororo eneo la Bahati, kaunti ya Nakuru siku ya Alhamisi wakati wa mazishi ya mwanaume wa umri wa miaka 33 aliyeuawa juma lililopita. 

Kivangaito hicho kilitokea wakati baadhi ya jamaa wake walipinga kuzikwa kwake kabla ya polisi kutoa habari kuhusu kuachiliwa kwa mshukiwa mkuu wa mauaji hayo aliyeachiliwa muda mfupi baada ya kukamatwa.

Kulingana na jamaa hao, marehemu Edward Mwangi alipatikana amefariki mnamo tarehe 3 Desemba shambani katika eneo hilo huku mwili make ukiwa umevuja damu baada ya kudungwa kwa kisu.

Kaburi lililoandaliwa kwa mazishi. Picha/ Maggy Wanja

Chifu wa eneo hilo alipofika katika eneo ambalo marehemu alikuwa ameuawa, aliwauliza wakazi kama kuna yeyote aliyekuwa na habari kuhusu kilichotokea.

“Mwanaume mmoja alijitokeza akiwa na kisu mkononi na kusema kuwa ndiye alimuua Mwangi,” alisema Bw Charles Mucheru ambaye ni mpwa wa mwendazake.

Baada ya kukamatwa na kupelekwa kwenye kituo cha polisi, jamaa wa mwendazake wanasema kuwa mshukiwa huyo aliachiliwa bila ya hatua yoyote kuchukuliwa.

“Maafisa wa polisi waliokuwa katika kituo hicho cha polisi hawakutukabidhi nambari ya OB kuonyesha kwamba kisa hicha kilikuwa kimeripotiwa. Hii ilitushangaza sana,” aliongeza Be Mucheru.

Wanakijiji walikusanyika ka mazishi lakini yakaingia mzozo baina ya polisi na familia ya mwendazake. Picha/ Maggy Wanja

Wakati wa mazishi yaliyopangiwa kufanyika siku ya Alhamisi , baadhi ya jamaa wa mwendazake, akiwemo mkewe marehemu walipinga kuzikwa kwake kabla ya maafisa wa polisi kuwapa majibu kuhusu kuachiliwa kwa mshukiwa huyo.

Mkewe marehemu pamoja na mpwa wa marehemu waliingia ndani ya kaburi lililochimbwa kupinga mazishi hayo na kusababisha mvutano kati ya pande hizo mbili  kwa zaidi ya saa tatu.

Upande mwingine wa jamii hiyo ulitaka mwili wa mwendazake kuzikwa kabla ya kufuatiliwa kwa kesi hiyo.

Mwendazake ambaye alikuwa mchezaji kandanda wa timu ya eneo hio ijulikabayo kama Greenbelt alikuwa baba ya watoto wawili.

Kulingana na wakazi wa eneo hilo, usiku wa kisa hicho, marehemu alihusika katika vita kutokana na mzozo wa kimapenzi.

Hatimaye mwili huo ulizikwa licha ya pingamizi kali.