Majina ya wanakamati bungeni kuidhinishwa Jumanne

Na CHARLES WASONGA

BUNGE la Kitaifa litafanya kikao maalum Jumanne kuidhinisha majina wa wabunge waliopendekezwa kuhudumu katika nafasi zilizobaki katika kamati mbalimbali baada ya wandani wa Naibu Rais William Ruto kutimuliwa.

Hii ni baada ya mirengo ya  NASA na Jubilee kusuluhisha tofauti kati yao kuhusu kuhusu uteuzi wa wanachama wa kamati ya Haki na Masuala ya Sheria (JLAC) na Kamati kuhusu Sheria Mbadala (Delegated Legislation).

Kamati hizo mbili zitakuwa na wajibu mkubwa katika utayarishaji wa sheria zitatakazotumiwa kufanikisha utekelezaji wa mageuzi yatakayopendekezwa  kwenye ripoti ya mpango wa maridhiano (BBI). Kamati hizo mbili pia mswada wa kura ya maamuzi na miswada mingine ya marekebisho ya katiba.

Hii ndio maana kiongozi wa wachache John Mbadi alipinga hatua ya kiongozi wa wengi Amos Kimunya kuteua idadi kubwa wa wabunge wa mrengo wa Tangatanga katika kamati ya JLAC kwa misingi wamekuwa wakipinga mpango wa BBI na muafaka kati ya Rais Uhuru Kenyatta na kiongozi wa ODM Raila Odinga.

Kwa mfano, Mbadi alipendekeza majina ya wabunge Gladys Shollei (Mbunge Mwakilishi wa Uasin Gishu), Gitonga Murugara (Tharaka) na John Kiarie (Dagoreti Kusini) ambao ni wandani wa Dkt Ruto waondolewa kutoka orodha ya wanachama wa JLAC.

Kulingana na Mbunge huyo wa Suba Kusini wabunge kama hao ambao wamekuwa wakipinga mpango wa BBI wanaweza kuhujumu mipango ya kupitishwa kwa ripoti hiyo ambayo inasubiri kuwasilishwa kwa Rais Kenyatta.

Hii ndio maana wiki jana, Bw Kimunya alilazimika kuondoa orodha ya wanachama wapya wa kamati hizo mbili ili kutoa nafasi kwa majadiliano na kupatikana kwa muafaka.

Hatimaye mnamo Jumatatu, Julai 6, 2020, Kimunya alikubalia kuondoa majina ya wabunge wa mrengo wa tangatanga kutoka orodha ya wanachama wa JLAC na kamati kuhusu Sheria Mbadala.

Katika mkutano uliohudhuriwa na kiranja wa wachache Junet Mohamed, ilikubaliwa pia kwamba upande wa wachache (Nasa) atapewa nafasi za uenyekiti wa kamati za Fedha na Elimu. Hii ni baada ya Bw Kimunya kukubali kujumuisha kuorodhesha wabunge wa Jubilee ambao wanaweza kuwachagua wabunge wa upinzani kuongoza kamati hizo.

“Nilifanya mkutano na Kiongozi wa Wengi kuhusu suala la uteuzi wa wanachama wa kamati za bunge. Tumekubaliana kuhusu orodha ambayo itawalishwa bungeni juma lijalo,” Juneti akasema.

Orodha hiyo mpya itaidhinishwa na Kamati kuhusu Uteuzi mnamo Jumatatu wiki ujao kabla ya kuwasilishwa bunge siku itakayofuata. Kamati hiyo yenye wanachama 19, akiwemo kiongozi wa wachache,  huongozwa na kiongozi wa wengi.

Wajibu mkuu wa Kamati hiyo ya Uteuzi huwa ni kuteua majina ya wabunge watakaohudumu katika kamati mbalimbali za bunge, isipokuwa Kamati ya Kuratibu Shughuli za Bunge na Kamati ya Kuwapiga Msasa watu waliopendekezwa kushikilia nyadhifa kuu serikalini.

Mbw Kimunya na Mbadi watawasilisha ombi kwa Spika wa Bunge la Kitaifa Justin Muturi ili aitishe kikao maalum cha bunge. Wabunge walioaliza likizo ya majuma matatu mnamo Jumatano wiki jana.

Ni katika kikao hicho ambapo ripoti ya Kamati ya Fedha iliyompiga msasa mteule wa wadhifa wa Mkaguzi Mkuu wa Matumizi ya Fedha za Serikali Nancy Janet Kabui Gathungu itajadiliwa na kupitishwa.

MBADI na Kimunya bado hawaelewani kuhusu uanachama bungeni

Na CHARLES WASONGA

VUTA nikuvute kuhusu uteuzi wa wanachama wa kamati mbili za bunge Jumatatu iliendelea kutokota chama cha ODM kiliibua hofu kuwa wawakilishi wa Jubilee katika kamati hiyo watahujumu mchakato wa maridhiano, BBI.

Mwenyekiti wa ODM John Mbadi alisema wabunge waliopendekezwa na Jubilee kuiwakisilisha katika Kamati ya Bunge kuhusu Sheria na Masuala ya Kikatiba (JLAC) na Kamati ya Bunge kuhusu Sheria Mbadala (Committee on Delegate Legislation) ni wakosoaji wa BBI.

Katika kile kinachoonyesha kuwa kudhoofika kwa ukuruba kati ya Jubilee na ODM, kwa moyo wa handisheki, Bw Mbadi alidai kuwa hatua ya Jubilee kujuisha wabunge wa mrengo wa tangatanga katika kamati hizo “kunaonyesha kuwa sasa hawana haja na BBI”.

“Kamati hizi mbili zitatekeleza wajibu mkubwa katika utayarishaji wa sheria zitakazofanikisha kupitishwa kwa ripoti ya mpango wa maridhiano (BBI) ambayo hivi karibuni itawasilishwa kwa Rais Uhuru Kenyatta na kiongozi wetu Raila Odinga. Kwa hivyo, wanachama wazo wanapasa kuwa wabunge wanaounga mkono mchakato huu,” akasema Bw Mbadi.

Mbunge huyo wa Suba Kusini alisema kuwa wabunge wa tangatanga waliopendekezwa kuhudumu katika kamati hizo ni wengi kiasi kwamba wanaweza kuhujumu mpanngo wa BBI.

“Ripoti hii ni muhimu kwa sababu itasheheni mapendekezo kuhusu mageuzi ya Katiba ambayo Rais na Mheshimiwa Odinga wamekuwa wakiupigia debe,” akaeleza Bw Mbadi.

Kwa mfano, akasema, ni wabunge watatu pekee miongoni mwa wabunge 12 wa Jubilee waliopendekezwa kuhudumu katika JLAC, wanaunga mkono BBI na handisheki kati ya Rais Kenyatta na Bw Odinga. Kamati hiyo inapasa kuwa na wanachama 19 ambapo saba miongoni mwa ni wa mrengo wa upinzani, NASA.

“Ikiwa miongoni mwa wabunge 12 wa Jubilee waliopendekezwa, tisa ni wanachama wa tangatanga ni watatu pekee wanaweza kutegemewa. Hii ina maana kuwa wanaweza kuhujumu ajenda ya BBI,” Bw Mbadi akasema.

“Nilimwambia kiongozi wa wengi Bw Amos Kimunya kuwa sikuwa na imani na wabunge kama Gladys Shollei (Mbunge Mwakilishi wa Uasin Gishu), Gitonga Murugara (Tharaka), Johna Kiarie (Dagoreti Kusini) kuwa wanachama wsa JLAC kwa sababu hawa ni watu ambao wamekuwa wakikosoa handisheki na BBI,” akaongeza.

Bw Mbadi alisema kuwa wengi wa wawakilishi wa Jubilee katika Kamati ya Sheria Mbadala pia ni wanachama wa tangatanga ambao watahujumu mchakato wa BBI

“Kile tunaomba ni kwa upande wa Jubilee kuteuwa wabunge ambao wataendeleza ajenda ya Rais kuhusiana na mageuzi yanayopendekezwa katika BBI,” akasema.

Lakini Bw Kimunya alisema kuwa kamati hizo haziundwi upya kupitisha ripoti ya BBI bali kutekeleza “wajibu wa kuwa kiungo muhimu cha bunge katika mchakato wa utungaji sheria.”

Wiki jana Kimunya alilazimishwa kuondoa orodha ya wanachama wa Jubilee katika kamati mbalimbali za bunge zilizoundwa upya baada ya wabunge wandani wa Naibu Rais William Ruto kuondolewa, baada ya mrengo wa wachache kupinga orodha ya wawakilishi wa Jubilee katika kamati hizo mbili.

“Walisema wanataka mashauriano zaidi lakini hawawezi kushauriana kuhusu wanachama wetu,” Bw Kimunya akasema Jumatatu.

“Ni makosa kwa watu wengine kudhani kuwa shughuli zima la kuundwa upya kamati za bunge ilidhamiria kuwaondoa wale wabunge wanaosawiriwa kuwa wanachama wa tangatanga. Lengo sio kuwaondoa watu fulani walivyodhani. Siwezi kuwaondoa watu kwa sababu watu fulani wanataka nifanye hivyo,” akasema.

Bw Kimunya alisema upande wa upinzani unapasa kujizatiti kupalilia umoja bungeni namna ambavyo Rais Kenyatta anajizatiti kuunganisha nchini.

Naibu kiranja wa wengi Maoka Maore na mwenzake wa upinzani Junet Mohammed pia wanapanga kuandaa mkutano kuleta maridhiano kuhusu suala la uanachama wa kamati hizo mbili.

Mbadi ajitosa kwa ubishi wa kurithi Gavana Awiti

Na GEORGE ODIWUOR

MWENYEKITI wa ODM John Mbadi amejiingiza katika mjadala kuhusu urithi wa Gavana wa Homa Bay Cyprian Awiti huku wanasiasa wanaokimezea kiti hicho wakijiandaa kwa kinyang’anyiro hicho 2022.

Bw Mbadi, ambaye pia ametangaza nia ya kuwania kiti hicho, anapinga pendekezo la wanasiasa hao kwamba kuwe na makubaliano kuhus

u ugavi wa nyadhifa za juu katika kaunti hiyo kuelekea uchaguzi mkuu ujao, ikiwemo ugavana.

Wanashikilia kuwa makubaliano hayo, yaliyowekwa mnamo 2013, yatumike katika uchaguzi mkuu wa 2022.

Wanasiasa hao wanasema Gavana Awiti kutoka Rachuonyo na aliyekwua Seneta marehemu Otieno Kajwang’ kutoka Suba na Mbunge Mwakilishi Bi Gladys Wanga kutoka Homa Bay mjini ni miongoni mwa waliofaidi kutokana na mwafaka huo uliofikiwa kabla ya uchaguzi mkuu wa 2013.

Wanataka mkataba huo utumiwe tena kubaini mrithi wa Gavana Awiti ambaye anakamilisha muhula wake wa pili na wa mwisho uongozini 2022.

Lakini Bw Mbadi ambaye alikuwa pamoja na Mwenyekiti wa Mamlaka ya Ustawi wa Eneo la Ziwa Victoria Odoyo Owidi alifafanua kuwa wananchi wa kaunti hiyo hawakuhusishwa “wanasiasa walipokuwa wakijigawia nyadhifa.”

Akiongea katika mkutano wa kuchanga fedha katika Shule ya Upili ya Ojijo Oteko katika eneo bunge la Karachuonyo, Bw Mbadi alisema makubaliano ya 2013 yalifikiwa na wanasiasa kama watu binafsi na hayana mashiko wakati huu.

“Makubaliano hayo yalifikiwa na wanasiasa kama watu binafsi wakati huo na hayafai kutumiwa katika uwaniaji wa wadhifa wa ugavana mnamo 2022,” akasema Bw Mbadi.

Mbunge huyo wa Suba Kusini aliongeza kuwa mwafaka huo uliofikiwa katika mkutano uliofanyika katika hoteli moja jijini Nairobi unaeleweka vibaya na wanasiasa wengi katika kaunti ya Homa Bay.

“Nilihudhuria mkutano huo ambapo mwafaka huo uliwekwa. Nakumbuka kuwa washiriki walidhani kuwa wadhifa wa seneti ulikuwa na nguvu zaidi na ndipo tukakubaliana umwendee Otieno Kajwang’ kwa sababu ndiye alikuwa mwenye uzoefu mkubwa kisiasa kati yetu. Lakini sasa hayo yamepitwa na wakati,” Bw Mbadi akasema.

Kauli yake iliungwa mkono na Bw Owidi aliyedai kuwa kuna baadhi ya wanasiasa wanaoshikilia kuwa watu kutoka Rachuonyo hawafai kuwania kiti cha ugavana kwa sababu Gavana Awiti anatoka eneo hilo.

ODM yashukuru Rais kuhusu BBI

NA JUSTUS OCHIENG’

CHAMA cha ODM kimepongeza Rais Uhuru Kenyatta kutokana na kauli yake kuhusu ripoti ya Jopokazi la Maridhiano (BBI) na uchaguzi mdogo wa eneobunge la Kibra wakati wa mkutano kati yake na viongozi wa Mlima Kenya katika ikulu ndogo ya Sagana Ijumaa.

Kupitia taarifa ya Mwenyekiti John Mbadi, chama hicho kinachoongozwa na aliyekuwa waziri mkuu Raila Odinga kimesema matamshi hayo yanaonyesha dhahiri kwamba Rais ana nia njema ya kuunganisha taifa hili.

Bw Mbadi alisifu mtazamo wa Rais kuhusu uchaguzi mdogo wa Kibra, akisema kauli yake inaoana na ile ya ODM kuhusu kura hiyo.

“Kwa niaba ya chama cha ODM na Wakenya wote ambao wamemakinika kuona taifa lenye umoja na amani, ningependa kumshukuru Rais Uhuru Kenyatta kwa kusimama na ‘handisheki’ na BBI ambazo ni njia muhimu ya kuwaunganisha Wakenya,” ikasema taarifa ya Bw Mbadi.

“Pia tungependa kumshukuru Rais Kenyatta kwa kauli yake kwamba uchaguzi mdogo wa Kibra ulikuwa amani, ishara tosha kwamba kupitia umoja wa viongozi wetu, uchaguzi wa amani unaweza kufanyika siyo tu Kibra pekee bali eneo lolote nchini,” ikaongeza taarifa.

Taarifa ya ODM inajiri huku cheche za maneno zikiendelea kuhusu uchaguzi mdogo wa Kibra, Naibu Rais Dkt William Ruto na wabunge wa Tangatanga wakilalamikia ghasia na vitisho dhidi ya wabunge wa Jubilee wakati wa kampeni na siku ya uchaguzi.

Ni kutokana na ghasia hizo ambapo Dkt Ruto alimtaka Bw Odinga kuomba radhi hadharani huku ODM ikishikilia kwamba wabunge wa Jubilee walikumbana na ghadhabu za wapigakura waliotibua njama yao ya kununua kura kabla na wakati wa uchaguzi huo.

Rais Kenyatta pia akihutubu katika ikulu ya Sagana aliwashukuru wapigakura wa Kibra kwa kufanya uchaguzi wa amani, matamshi yaliyokinzana na aliyoyatoa Dkt Ruto ambaye amekuwa akivamia Bw Odinga kuhusu Kibra kupitia mtandao wa kijamii.

Kwenye taarifa yake, Bw Mbadi pia aliwashukuru Wanakibra kwa kutekeleza majukumu muhimu kuhakikisha uchaguzi huo ulikuwa wa amani.

“Kutokana na uchaguzi huo, wakazi wa Kibra waliandikisha historia kwa kuongoza katika kuzaliwa upya kwa taifa letu,” akasema Bw Mbadi.

Aidha mbunge huyo wa Suba Kusini aliwaomba Wakenya na wafuasi wa ODM waunge mkono ripoti ya BBI ambayo inatarajiwa kukabidhiwa Rais na Bw Odinga hivi karibuni.

Ingawa hivyo, alisisitiza kauli ya Rais na Bw Odinga kwamba BBI haihusiani kivyovyote na siasa za 2022 au azma ya Urais ya mtu binafsi.

Vilevile alitoa wito kwa viongozi hao wawili wakuu kutopoteza dira kuhusu nia yao ya kuleta taifa hili pamoja huku akiwaahidi uungwaji mkono wa viongozi wote waliochaguliwa kwa tiketi ya ODM.

Mbadi atofautiana na Orengo

Na CHARLES WASONGA

MWENYEKITI wa ODM John Mbadi amepuuzilia madai ya Seneta wa Siaya James Orengo kwamba kiongozi wa chama hicho Raila Odinga na Rais Uhuru Kenyatta wamekubaliana kushirikiana katika uchaguzi mkuu wa 2022.

Mbadi ambaye ni Mbunge wa Suba Kusini, amesema chama hicho hakitajiunga na muungano wowote wa kisiasa, akisema madai ya Orengo ni ya kibinafsi na hayawakilishi msimamo rasmi wa chama.

“Ningependa ieleweke kuwa ODM haibuni muungano na chama au mtu yeyote. Msimamo wowote unaokinzana na huu unafaa kuchukuliwa kama wa kibinafsi,” akasema Mbadi.

Akiongea na wanahabari afisini mwake katika majengo ya bunge Alhamisi, Bw Mbadi alisema muafaka kati ya Rais Kenyatta na Bw Odinga uliotiwa saini Machi 2018 haukuhusu masuala ya siasa na uchaguzi mkuu wa 2022.

“Kwa hivyo, ni makosa kwa mtu kudai kuwa tumebuni mwafaka wa kisiasa na mtu yeyote. Labda haya ni matamanio ya Bw Orengo ambayo sio mbaya lakini hafai kuwakanya wafuasi wetu na Wakenya kwa jumla kwamba ni msimamo wa chama chetu,” Bw Mbadi akasema.

Mbunge huyo ambaye ni kiongozi wa wachache katika bunge la kitaifa alisema msimamo wa ODM ni kwamba huu sio wakati wa kuchapa siasa za 2022 na msimamo huo haujabadilika.

“Kama chama tumekuwa tukiwaonya wanachama wetu dhidi ya kuanza kampeni za mapema za uchaguzi mkuu wa 2022 na kamwe hatujabadili msimamo huo,” akasema Bw Mbadi.

Urais

Mnamo Jumatatu, akihojiwa katika runinga ya KTN, Bw Orengo alisema ODM inafanya kazi kichinichini na Rais Kenyatta kwa lengo la kumwezesha Bw Odinga kutwaa urais mnamo 2022.

“ODM inalenga mamlaka ya kisiasa; na tunafanya mikutano kama hii. Macho yetu yanaelekezwa katika uchaguzi mkuu wa 2022. Ung’ang’aniaji huu wa mamlaka utaendelezwa na muungano katika ya ODM kwa upande mmoja na Jubilee kwa upande mwingine na Uhuru Kenyatta anachangia mchakato wa kuundwa kwa muungano huu,” Bw Orengo akasema.

Seneta huyo ambaye ni kiongozi wa wachache katika Seneti pia alisema kuwa amefanya mkutano wa faragha na Rais Kenyatta kwa saa nne ambapo alimshawishi kuwa ataunga mkono azma ya Odinga kuingia Ikulu mwaka 2022.

Siogopi kuvuliwa mamlaka, Mbadi aambia wabunge wanaomtishia

Na MWANDISHI WETU

KIONGOZI wa wachache katika Bunge la Kitaifa John Mbadi amewataka wabunge wa upinzani wanaomkashifu kutokana na msimamo wake wa kuunga mkono marekebisho yaliyopendekezwa na Rais Uhuru Kenyatta katika mswada wa fedha 2018 uliopitishwa bungeni wiki jana kuendelea na mpango wao wa kumtimua kutoka wadhifa wake.

Akizungumza wakati wa hafla ya kuchangisha fedha katika Kanisa Katoliki la Nyandiwa, Suba Kusini, Bw Mbadi alisema kwamba aliunga mkono kupunguzwa kwa ushuru wa VAT kwa bidhaa za petrol kutoka asilimia 16 hadi 8 ili kusaidia taifa kulipa madeni yanayodaiwa na mataifa ya kigeni.

‘Mimi ni mhasibu kitaaluma na nafahamu mambo kadhaa kuhusu bajeti. Siogopi vitisho vya kuning’oa katika wadhifa wa kiongozi wa wachache wala kuhukumiwa na mtu yeyote. Kenya lazima ingetafuta mbinu za kusawazisha hali ili kuyalipa madeni yake na wakati uo huo kugharamia matumizi ya kinyumbani,” akasema Bw Mbadi.

Aidha Mwenyekiti huyo wa chama cha ODM alifafanua kwamba serikali hukusanya Sh1.9 trilioni ambazo hazitoshi kulipa madeni hayo na vile vile kugharamia maendeleo ya nchi.

“Serikali ya kitaifa hutumia Sh640bilioni kulipa mishahara na Sh314 bilioni kufadhili ugatuzi kwenye kaunti zote 47. Kwa hivyo serikali huhitaji mbinu ya kusawazisha namna inavyosambaza fedha zake na kuyalipa madeni ikizingatiwa bado tuna upungufu wa Sh870bilioni kugharamia uendeshaji wa maswala ya nchi,” akaongeza Bw Mbadi.

Wakati wa mjadala huo mkali bungeni wiki jana, Bw Mbadi na kiongozi wa wengi Aden Duale walitajwa na wabunge wenzao kama wasaliti walipounga mkono mswada huo uliopingwa vikali na wengi wa wabunge kutoka mirengo yote ya Jubilee na Nasa.

Hata hivyo mbunge huyo wa Suba Kusini aliwakashifu baadhi ya wabunge wenzake kama ndumakuwili walipokosa kuyaibua maswala kuhusu mswada huo wakati wa mkutano wao na vinara wa vyama vya Jubilee na Nasa ambao ni Rais Uhuru Kenyatta na Raila Odinga.

Kutokana na kupashishwa kimabavu kwa mswada huo, wabunge walioupinga wametaka mabadiliko makubwa yatekelezwa kwenye uongozi wa bunge mojawapo ikiwa ni kuwatimua Spika Justin Muturi, Bw Mbadi na Bw Duale kutoka kwa nyadhifa zao.

Wakati wa hafla hiyo Bw Mbadi aliyekuwa ameandamana na madiwani15 wa kaunti za Homabay akiwemo kiongozi wa wengi Walter Muok aliwataka wawakilishi wa wadi kutekeleza jukumu lao la kuitia mizani serikali za kaunti ipasavyo ili kuzuia ubadhirifu wa fedha unaolemaza maendeleo mashinani.

Juhudi za kumng’oa Spika Muturi, Duale na Mbadi zaanza

Na WAANDISHI WETU

WABUNGE waliowakaidi Rais Uhuru Kenyatta na Kiongozi wa Upinzani Raila Odinga kuhusu Mswada wa Fedha wa 2018, sasa wanapanga kuanzisha juhudi za kuwang’oa mamlakani viongozi wao bungeni.

Wabunge hao wa pande tofauti za kisiasa wamekasirishwa na jinsi mswada huo ulivyopitishwa kimabavu katika Bunge wiki iliyopita, na sasa wanataka viongozi akiwemo Spika Justin Muturi, Kiongozi wa Wengi Aden Duale, na mwenzake wa wachache John Mbadi waadhibiwe.

Mbunge wa Nandi Hills, Bw Alfred Keter, Jumapili alisema haifai bunge lote kukashifiwa kwa matukio yaliyoshuhudiwa wiki iliyopita, bali lawama inafaa ielekezwe kwa viongozi wao ambao alisema walivuruga shughuli hasa wakati wa kupitishwa kwa mswada uliohusu ongezeko la ushuru wa bidhaa za mafuta.

Wiki iliyopita, Bw Muturi aliwaambia wabunge hao waache kumlaumu kwani wao ndio walikosa kupanga mikakati yao ipasavyo ili kuzuia mswada huo kupitishwa.

Mbunge wa Mwingi Magharibi Charles Nguna, alidai wakuu bungeni waliwanyanyasa wabunge kwa kuwaibia ushindi wao katika kura zilizopigwa kwenye kikao maalum bungeni ili kupitisha mswada huo.

Wabunge wengine waliapa kwenda mahakamani ili mswada huo ulioidhinishwa kuwa sheria utupiliwe mbali, huku Chama cha Thirdway Alliance kikitoa wito kwa wabunge wanaodai kusimama na wananchi waungane kubadilisha sheria hiyo bungeni.

Wabunge Justus Murunga (Matungu), Ayub Savula (Lugari) na Mbunge Maalum Godfrey Osotsi ambao wote ni wa Chama cha Amani National Congress, walisema hawatakaa kitako na kutazama Wakenya wakiumia.

Kulingana na sheria za Bunge, baada ya mswada kupitishwa bungeni na kutiwa sahihi na Rais, unaweza tu kujereshwa bungeni tena baada ya miezi sita. Ni wakati muda huo ambapo mbunge anaweza kupenyeza marekebisho ambayo wangetaka yafanyiwe sheria husika, kwa kutayarisha mswada mpya unaojumuisha masuala yanayolengwa.

Ripoti ya VALENTINE OBARA, BONIFACE MWANIKI, SHABAN MAKOKHA na CHARLES WASONGA

Waliotajwa kwa sakata ya NYS wajiuzulu wasitatize uchunguzi – Mbadi

Na CHARLES WASONGA

RAIS Uhuru Kenyatta Jumatano ametakiwa kuwauliza maafisa waliotajwa katika kashfa ambapo Sh9 bilioni zilipotea katika Shirika la Huduma kwa Vijana (NYS) wajiondoe kwa muda ili kutoa nafasi kwa uchunguzi.

Kiongozi wa wachache katika Bunge la Kitaifa John Mbadi vile vile amewataka maafisa hao kujiuzulu kwa hiari kwa sababu huenda wakatatiza uchunguzi unaoendelea.

Waliotajwa katika sakata hiyo ni Katibu wa Wizara ya Utumishi wa Umma, Vijana na Masuala ya Jinsia Lilian Mbogo, Mkurugenzi Mkuu wa NYS Richard Ndubai na Waziri wa Afya Sicily Kariuki, ambaye aliongoza wizara hiyo mnamo 2016. Ni wakati huo ambapo pesa hizo zilidaiwa kupotea.

“Wito wangu wa kutaka maafisa hawa wakae kando kwa muda haumaanishi kuwa ni wenye hatia. Hofu yangu ni kwamba huenda wakatatiza uchunguzi unaendeshwa na asasi mbalimbali wakati huu,” Bw Mbadi akawaambia wanahabari afisini mwake katika majengo ya bunge.

“Maafisa hao wajiuzulu kwa hiari yao ama Rais Uhuru Kenyatta awalazimishe kukaa kando kwa muda ili kutoa nafasi kwa uchunguzi,” akaongeza Bw Mbadi ambaye pia ni Mbunge wa Suba Kusini.

Kashfa hiyo imekuwa ikichunguzwa na maafisa wa Idara ya Upelelezi wa Jinai (DCI) na wale wa Tume ya Maadili na Kupambana na Ufisadi (EACC).

Licha ya madai kuwa ni Sh9 bilioni zilipotea, Bi Mbogo alisema Idara ya Upelelezi wa Jinai (DCI) imekuwa ikipeleleza kupotea kwa Sh900 milioni wala sio Sh9 bilioni jinsi ilivyoripotiwa katika vyombo vya habari, sakata hiyo ilipofichuliwa juma lililopita.

Alitoa madai hayo kwenye barua aliyomwandikia mkubwa wake Prof Kobia, siku mbili baada Rais Uhuru Kenyatta kumwita ili atoe ufafanuzi kuhusu sakata hiyo ambayo imeipaka tope wizara hiyo kwa mara nyingine.

Katika sakata hii, inadaiwa kuwa maafisa wa NYS walibuni kampuni bandia, na kughushi stakabadhi za zabuni na kutumia udhaifu wa Mfumo wa Ulipaji Fedha Kielektroniki, almaarufu IFMIS, kupora mabilioni ya pesa za umma.

Wakati huo huo, Kamati ya Bunge kuhusu Uhasibu wa Pesa za Umma (PAC) imewaita Bi Mbogo, Bw Ndubai na maafisa wengine wa wizara hiyo kuelezea jinsi pesa hizo zilivyopotea.

Kujiuzulu kwa Chebukati kutampa mwanya Chiloba kurejea IEBC – John Mbadi

Na CHARLES WASONGA

KIONGOZI wa wachache katika Bunge la Kitaifa John Mbadi Jumatano amepinga shinikizo za kumtaka mwenyekiti wa Tume huru ya Uchaguzi na Mipaka (IEBC) Wafula Chebukati na makamishna wawili wang’atuke haraka. 

Akiongea wa wanahabari Jumatano afisini mwake katika majengo ya bunge, Bw Mbadi alisema Bw Chebukati na makamishna Profesa Abdi Guliye na Boya Molu wanafaa kuendelea kushikilia nyadhifa zao ili kutoa nafasi kwa “Wakenya kukubaliana kuhusu njia mwafaka za kuifanyia tume hiyo mageuzi kamili”

“Natofautiana kabisa na kauli za wenzangu, Aden Duale, Kipchumba Murkomen na James Orengo kwamba Chebukati na wenzake wajiuzulu.

Hatua hiyo itatoa nafasi kwa Chiloba kurejea katika jumba la Anniversary na kuendelea kuharibu mambo kule,” akasema.

Mbandi ambaye ni Mbunge wa Suba Kusini alipendekeza kwa mageuzi katika IEBC yaanza katika sekritariati ya tume hiyo inayoongozwa na Bw Chiloba ambaye amepewa likizo ya lazima ya miezi mitatu kutoa nafasi kwa uchunguzi kuhusu sakata ya ufisadi.

“Chiloba na maafisa wote katika sekritariati ya IEBC ndio wanafaa kuondolewa kwanza kabla ya Chebukati na wenzake. Chimbuko la matatizo yanayoizonga tume hii ni Chiloba,” akasema Bw Mbadi.

Alidai Mbw Duale na Murkomen wanataka Chebukati na wenzake waondoke haraka ili kutoa nafasi kwa “Bw Chiloba kurejea katika IEBC ili kuweka mikakati ya wizi wa kura katika uchaguzi mkuu wa 2022.

“Sisi kama NASA hatutakubali Chiloba kuendelea kushikilia wadhifa huo. Anafaa kufutwa kazi na kisha kufunguliwa mashtaka kortini,” akasema.

Bw Chebukati alikuwa amepuuzilia mbali wito wa kumtaka ajiuzulu na badala yake akasema inafaa wabunge waweke mikakati ya kupitisha sheria itakayotoa mwongozo wa jinsi ya kuajiri makamishna watakaojaza nafasi zilizoachwa wazi.

“Bunge halijapitisha sheria ya kusimamia jinsi ya kuajiri makamishna kuchukua mahala pa wale wanaoondoka. Hivyo basi, tunaomba asasi husika za serikali zichukue hatua zinazofaa ili kuhakikisha majukumu ya tume hayakwami,” akasema.

Kulingana naye, makamishna Consolata Nkatha Maina (Naibu Mwenyekiti), Dkt Paul Kibiwott Kurgat na Margaret Wanjala Mwachanya ambao walijiuzulu walionyesha hawana uwezo wa kuongoza tume inapokumbwa na matatizo, na pia si wenye moyo wa kukumbatia maoni yanayotofautiana na misimamo yao.

ODM mbioni kuimarisha umaarufu Magharibi

BARACK ODUOR na GAITANO PESSA

CHAMA cha ODM kiko mbioni kuhakikisha kimedumisha umaarufu wake eneo la Magharibi baada ya wanasiasa wakuu katika jamii ya Waluhya kuanzisha mchakato wa kuunda chama kimoja na kujiondoa katika muungano wa NASA.

Jumamosi, viongozi wakuu wa ODM waliwashutumu viongozi wa Ford-Kenya na ANC kwa kuunda miungano mipya kwa ajili ya siasa za 2022, badala ya kulenga maridhiano.

Katika eneo la Homa Bay, kiongozi wa wachache Bungeni John Mbadi aliwapuzilia mbali washirika wengine ndani ya NASA kwa kusema wanapinga maridhiano ya hivi majuzi kati ya Rais Uhuru Kenyatta na kiongozi wa ODM Raila Odinga.

“Ni wao wanapinga maridhiano, lakini ningependa kuwaambia wanaharibu muda wao. Viongozi hao wawili wamezama ndani ya makubaliano hayo na hakutakuwa na mjadala, na sio kwa sababu ya 2022,” alisema Bw Mbadi.

Mbunge huyo alikuwa akimshambulia kiongozi wa Wiper Kalonzo Musyoka ambaye amebadilisha jina la chama hicho kuwa One Kenya Movement.

Alisema ni mapema mno kwa vyama vya kisiasa katika upinzani kuanza kuunda miungano na kusambaratisha miungano mingine kwa sababu ya uchaguzi wa 2022.

Alisema uchaguzi huo utashawishiwa na mambo mengi na sio salamu tu.

“Uchaguzi wa mwaka jana ulileta mgawanyiko mkubwa, kiongozi wetu Raila Odinga aliamua kuridhiana na kuunda mkataba na Rais Uhuru Kenyatta. Hivyo, wenzetu kuondoka sasa katika muungano kwa sababu ya siasa za 2022 hawaoni mbali,” alisema Bw Mbadi wakati wa sherehe za kutoa zawadi katika Shule ya Msingi ya Wasara, katika Kisiwa cha Rusinga.

Tangu Rais Kenyatta na Raila Odinga waliporidhiana mwezi jana, vyama vya ANC, Wiper na FORD –Kenya vimeelezea kutoridhika kwao kuhusiana na mkataba kati ya viongozi hao,wakisema wamekuwa gizani.

Licha ya kuwa muungano wa upinzani, NASA, kusalia, matamshi ya hivi majuzi ya baadhi ya washirika wake yanaashiria kuwa muungano huo unaelekea kusambaratika.

Kiongozi wa FORD-Kenya Moses Wetangula na mwenzake wa ANC Musalia Mudavadi wamedokeza mpango wa kuunganisha vyama vyao, kukifanya kimoja, baada ya kutofautiana na ODM, chama tanzu cha muungano wa NASA.

Viongozi hao wanataka kujitenga na ODM kwa kumshutumu kiongozi wake Raila Odinga kusaliti muungano wa NASA kwa kufanya mkataba na Rais Kenyatta.
“Kilicho muhimu sasa ni maridhiano miongoni mwa Wakenya, na sio kuunda vyama vya kisiasa ili kuingia mamlakani,” alisema Mbadi.

Katika eneo la Busia, Mwakilishi wa Kike Florence Mutua(ODM) alipuzilia mbali mpango wa kuungana kwa FORD-Kenya na Amani National Congress, kwa kusema muungano huo hauwezi kuwaunganisha Wakenya.